ບົດຮຽນ 12
ຫຼານຊາຍຜູ້ກ້າຫານຂອງໂປໂລ
ໃຫ້ເຮົາມາຮຽນຮູ້ກ່ຽວກັບຊາຍໜຸ່ມຄົນໜຶ່ງທີ່ໄດ້ຊ່ວຍຊີວິດລຸງຂອງຕົນ. ລຸງຂອງລາວແມ່ນໂປໂລ. ເຮົາບໍ່ຮູ້ຊື່ຂອງຊາຍໜຸ່ມຄົນນີ້ ແຕ່ຮູ້ວ່າລາວໄດ້ເຮັດສິ່ງທີ່ກ້າຫານຫຼາຍ. ລູກຢາກຮູ້ເລື່ອງທີ່ລາວໄດ້ເຮັດບໍ?—
ຫຼານຊາຍຂອງໂປໂລໄດ້ບອກໂປໂລແລະຫົວໜ້າທະຫານໃຫ້ຮູ້ແຜນການຊົ່ວຮ້າຍ
ໂປໂລຖືກຂັງຢູ່ຄຸກໃນເມືອງເຢຣຶຊາເລມ. ລາວຖືກຈັບເພາະວ່າລາວປະກາດເລື່ອງພະເຍຊູ. ມີຄົນຊົ່ວກຽດຊັງໂປໂລ ດັ່ງນັ້ນ ພວກເຂົາຈຶ່ງວາງແຜນການຊົ່ວຮ້າຍ. ພວກເຂົາເວົ້າກັນວ່າ: ‘ພວກເຮົາມາພາກັນຍົວະໃຫ້ຫົວໜ້າທະຫານອອກຄຳສັ່ງໃຫ້ລູກນ້ອງຂອງລາວພາໂຕໂປໂລໄປຂຶ້ນສານ. ແລ້ວພວກເຮົາກໍລີ້ໂຕຢູ່ທີ່ແຄມທາງ ແລະເມື່ອໂປໂລກາຍມາທາງນັ້ນ ພວກເຮົາກໍຈະຂ້າລາວໂລດ.’
ຫຼານຊາຍຂອງໂປໂລໄດ້ຍິນເລື່ອງແຜນການຮ້າຍນີ້. ລາວຈະເຮັດແນວໃດ? ລາວຈຶ່ງໄປທີ່ຄຸກແລະບອກໃຫ້ໂປໂລຮູ້ເລື່ອງນັ້ນກ່ອນ. ດັ່ງນັ້ນ ໂປໂລຈຶ່ງໃຫ້ລາວໄປບອກຫົວໜ້າທະຫານໃຫ້ຮູ້ກ່ຽວກັບແຜນການຮ້າຍນັ້ນ. ລູກຄິດວ່າເປັນເລື່ອງງ່າຍບໍ ທີ່ຫຼານຂອງໂປໂລຈະໄປບອກໃຫ້ຫົວໜ້າທະຫານຮູ້?— ບໍ່ງ່າຍເລີຍ ເພາະວ່າຕ້ອງໄປເວົ້າກັບຫົວໜ້າທະຫານເຊິ່ງມີອຳນາດຫຼາຍ ແຕ່ຫຼານຂອງໂປໂລກໍມີຄວາມກ້າຫານແລະໄດ້ເວົ້າກັບຫົວໜ້ານັ້ນ.
ຫົວໜ້າທະຫານຮູ້ດີວ່າຈະເຮັດແນວໃດ. ລາວຈັດໃຫ້ມີທະຫານເກືອບ 500 ຄົນເພື່ອປົກປ້ອງໂປໂລ! ລາວໄດ້ສັ່ງໃຫ້ຄົນເຫຼົ່ານັ້ນພາໂປໂລໄປໃນເວລາກາງຄືນ. ໂປໂລປອດໄພດີບໍ?— ປອດໄພດີ ຄົນຊົ່ວເຫຼົ່ານັ້ນເຮັດຫຍັງໃຫ້ໂປໂລບໍ່ໄດ້! ແຜນການຊົ່ວຂອງເຂົາບໍ່ສຳເລັດ.
ລູກໄດ້ຮັບບົດຮຽນຫຍັງຈາກເລື່ອງນີ້?— ລູກກໍສາມາດເປັນຄົນກ້າຫານຄືກັບຫຼານຊາຍຂອງໂປໂລໄດ້. ເຮົາຕ້ອງກ້າເວົ້າເລື່ອງພະເຢໂຫວາໃຫ້ຄົນອື່ນຟັງ. ລູກຈະເປັນຄົນກ້າຫານແລະເວົ້າເລື່ອງພະເຢໂຫວາຕໍ່ໆໄປບໍ?— ຖ້າລູກເຮັດເຊັ່ນນັ້ນລູກກໍຈະຊ່ວຍຊີວິດຜູ້ຄົນ.