ບົດທີ 23
ການຮັບບັບເຕມາເປັນເປົ້າໝາຍສຳຄັນ!
ພະເຢຊູບອກວ່າຄລິດສະຕຽນຕ້ອງຮັບບັບເຕມາ. (ອ່ານມັດທາຍ 28:19, 20) ແຕ່ການຮັບບັບເຕມາແມ່ນຫຍັງ? ແລະເຮົາຕ້ອງເຮັດຫຍັງຈຶ່ງຈະຮັບບັບເຕມາໄດ້?
1. ການຮັບບັບເຕມາແມ່ນຫຍັງ?
ຄຳວ່າ “ບັບເຕມາ” ໃນພາສາກຣີກໝາຍເຖິງ “ຈຸ່ມ” ໃນນ້ຳ. ຕອນທີ່ພະເຢຊູຮັບບັບເຕມາ ເພິ່ນຈຸ່ມໂຕໃນແມ່ນ້ຳຈໍແດນ ແລະຈາກນັ້ນເພິ່ນກໍ “ຂຶ້ນມາຈາກນ້ຳ.” (ມາຣະໂກ 1:9, 10) ຄລິດສະຕຽນແທ້ກໍເຮັດຄືກັບພະເຢຊູ ເມື່ອຮັບບັບເຕມາເຂົາເຈົ້າກໍຈຸ່ມໂຕຫຼິບລົງໃນນ້ຳ.
2. ການຮັບບັບເຕມາເຮັດໃຫ້ຮູ້ຫຍັງ?
ເມື່ອຄົນໃດຄົນໜຶ່ງຮັບບັບເຕມາ ລາວກໍກຳລັງເຮັດໃຫ້ຄົນອື່ນຮູ້ວ່າລາວໄດ້ອຸທິດຕົວໃຫ້ພະເຢໂຫວາແລ້ວ. ການອຸທິດຕົວໝາຍເຖິງຫຍັງ? ກ່ອນທີ່ຄົນໜຶ່ງຈະຮັບບັບເຕມາໄດ້ ລາວຕ້ອງອະທິດຖານບອກພະເຢໂຫວາເປັນສ່ວນໂຕວ່າຈະເຊື່ອຟັງເພິ່ນຕະຫຼອດໄປ. ລາວສັນຍາກັບພະເຢໂຫວາວ່າຈະນະມັດສະການເພິ່ນຜູ້ດຽວແລະໃຫ້ຄວາມຕ້ອງການຂອງເພິ່ນເປັນເລື່ອງທີ່ສຳຄັນທີ່ສຸດໃນຊີວິດ. ລາວຕັດສິນໃຈທີ່ຈະ “ເຊົາໃຊ້ຊີວິດເພື່ອໂຕເອງ . . . ແລ້ວຕິດຕາມ” ຕົວຢ່າງຂອງພະເຢຊູແລະເຮັດຕາມຄຳສອນຂອງເພິ່ນຕໍ່ໆໄປ. (ມັດທາຍ 16:24) ການອຸທິດຕົວແລະຮັບບັບເຕມາເຮັດໃຫ້ລາວສະໜິດກັບພະເຢໂຫວາແລະສະໜິດກັບຄົນອື່ນທີ່ນະມັດສະການເພິ່ນນຳ.
3. ກ່ອນທີ່ຄົນໜຶ່ງຈະຮັບບັບເຕມາໄດ້ ລາວຕ້ອງເຮັດຫຍັງ?
ເພື່ອຈະຮັບບັບເຕມາໄດ້ ເຈົ້າຕ້ອງຮຽນຮູ້ກ່ຽວກັບພະເຢໂຫວາແລະມີຄວາມເຊື່ອໃນເພິ່ນ. (ອ່ານເຮັບເຣີ 11:6) ເມື່ອເຈົ້າມີຄວາມຮູ້ແລະຄວາມເຊື່ອຫຼາຍຂຶ້ນ ເຈົ້າກໍຈະຮັກພະເຢໂຫວາຫຼາຍຂຶ້ນນຳ. ແລ້ວເຈົ້າກໍຈະຢາກເຮັດຕາມສິ່ງທີ່ເພິ່ນບອກໄວ້ໃນຄຳພີໄບເບິນແລະຢາກບອກໃຫ້ຄົນອື່ນຮູ້ເລື່ອງເພິ່ນ. (2 ຕີໂມທຽວ 4:2; 1 ໂຢຮັນ 5:3) ແລະເມື່ອເຈົ້າ “ໃຊ້ຊີວິດໃຫ້ສົມກັບການເປັນຜູ້ຮັບໃຊ້ພະເຢໂຫວາເພື່ອຈະເຮັດໃຫ້ເພິ່ນພໍໃຈສະເໝີ” ເຈົ້າກໍອາດຕັດສິນໃຈອຸທິດຕົວໃຫ້ເພິ່ນແລະຮັບບັບເຕມາ.—ໂກໂລຊາຍ 1:9, 10a
ຮຽນຮູ້ຫຼາຍຂຶ້ນ
ເຮົາຮຽນຫຍັງໄດ້ຈາກການຮັບບັບເຕມາຂອງພະເຢຊູ ແລະກ່ອນທີ່ຄົນໜຶ່ງຈະຮັບບັບເຕມາໄດ້ລາວຕ້ອງເຮັດຫຍັງແດ່.
4. ເຮົາຮຽນຫຍັງໄດ້ຈາກການຮັບບັບເຕມາຂອງພະເຢຊູ?
ເພື່ອຈະຮູ້ຫຼາຍຂຶ້ນກ່ຽວກັບການຮັບບັບເຕມາຂອງພະເຢຊູ ອ່ານມັດທາຍ 3:13-17. ແລ້ວລົມກັນກ່ຽວກັບຄຳຖາມຕໍ່ໄປນີ້:
ພະເຢຊູຮັບບັບເຕມາຕອນທີ່ເພິ່ນເປັນແອນ້ອຍບໍ?
ພະເຢຊູຮັບບັບເຕມາໂດຍການເອົານ້ຳມາຊິດຫຼືຫົດໃສ່ຫົວບໍ? ແລ້ວພະເຢຊູຮັບບັບເຕມາແນວໃດ?
ຫຼັງຈາກທີ່ພະເຢຊູຮັບບັບເຕມາ ເພິ່ນເລີ່ມເຮັດວຽກທີ່ພະເຈົ້າຢາກໃຫ້ເພິ່ນເຮັດ ນີ້ເປັນວຽກທີ່ສຳຄັນຫຼາຍ. ອ່ານລູກາ 3:21-23 ແລະໂຢຮັນ 6:38 ແລ້ວລົມກັນກ່ຽວກັບຄຳຖາມຕໍ່ໄປນີ້:
ຫຼັງຈາກທີ່ພະເຢຊູຮັບບັບເຕມາ ເພິ່ນຕັ້ງໃຈເຮັດວຽກຫຍັງ?
5. ການຮັບບັບເຕມາເປັນເປົ້າໝາຍທີ່ເຈົ້າເຮັດໄດ້
ເຈົ້າອາດຮູ້ສຶກບໍ່ໝັ້ນໃຈແລະບໍ່ພ້ອມທີ່ຈະອຸທິດຕົວແລະຮັບບັບເຕມາໃນຕອນນີ້. ແຕ່ຖ້າເຈົ້າຮຽນຮູ້ເລື່ອງພະເຢໂຫວາແລະຮູ້ຈັກເພິ່ນຫຼາຍຂຶ້ນ ເຈົ້າກໍຈະໝັ້ນໃຈແລະພ້ອມທີ່ຈະອຸທິດຕົວແລະຮັບບັບເຕມາ. ໃຫ້ເຮົາມາເບິ່ງຕົວຢ່າງຂອງບາງຄົນທີ່ເຮັດແບບນັ້ນ ເປີດວິດີໂອ.
ອ່ານໂຢຮັນ 17:3 ແລະຢາໂກໂບ 1:5 ແລ້ວລົມກັນກ່ຽວກັບຄຳຖາມຕໍ່ໄປນີ້:
ເຈົ້າຕ້ອງເຮັດຫຍັງເພື່ອຈະພ້ອມທີ່ຈະຮັບບັບເຕມາ?
ກ. ເຮົາອຸທິດຕົວໃຫ້ກັບພະເຢໂຫວາໂດຍອະທິດຖານບອກເພິ່ນວ່າເຮົາຈະເຊື່ອຟັງເພິ່ນຕະຫຼອດໄປ
ຂ. ຕອນທີ່ເຮົາຮັບບັບເຕມາ ຄົນອື່ນກໍຈະຮູ້ວ່າເຮົາໄດ້ອຸທິດຕົວໃຫ້ກັບພະເຈົ້າແລ້ວ
6. ການຮັບບັບເຕມາເຮັດໃຫ້ເຮົາໄດ້ເຂົ້າມາເປັນຄົນໃນຄອບຄົວຂອງພະເຢໂຫວາ
ເມື່ອເຮົາຮັບບັບເຕມາ ເຮົາກໍໄດ້ເຂົ້າມາເປັນຄົນໃນຄອບຄົວຂອງພະເຢໂຫວາທີ່ເປັນນ້ຳໜຶ່ງໃຈດຽວກັນທົ່ວໂລກ. ບໍ່ວ່າເຮົາຈະເປັນໃຜມາຈາກໃສ ເຮົາກໍເຊື່ອແລະເຮັດຕາມສິ່ງທີ່ຄຳພີໄບເບິນບອກຄືກັນ.ອ່ານເພງສັນລະເສີນ 25:14 ແລະ 1 ເປໂຕ 2:17 ແລ້ວລົມກັນກ່ຽວກັບຄຳຖາມຕໍ່ໄປນີ້:
ການຮັບບັບເຕມາມີຜົນແນວໃດຕໍ່ຄວາມສຳພັນທີ່ເຮົາມີຕໍ່ພະເຢໂຫວາແລະຕໍ່ພີ່ນ້ອງຄລິດສະຕຽນ?
ບາງຄົນເວົ້າວ່າ: “ຕອນນີ້ຂ້ອຍຍັງບໍ່ພ້ອມທີ່ຈະຮັບບັບເຕມາ.”
ຖ້າເຈົ້າຮູ້ສຶກແບບນັ້ນ ເຈົ້າຄິດວ່າຈະເຮັດຫຍັງໄດ້ແດ່ເພື່ອໃຫ້ພ້ອມທີ່ຈະຮັບບັບເຕມາ?
ສະຫຼຸບ
ພະເຢຊູບອກວ່າຄລິດສະຕຽນຕ້ອງຮັບບັບເຕມາ ແລະເພື່ອຈະຮັບບັບເຕມາໄດ້ ເຮົາຕ້ອງມີຄວາມເຊື່ອໃນພະເຢໂຫວາ ເຮັດຕາມສິ່ງທີ່ເພິ່ນບອກ ແລະອຸທິດຕົວໃຫ້ກັບເພິ່ນ.
ຄຳຖາມທົບທວນ
ການຮັບບັບເຕມາແມ່ນຫຍັງ ແລະເປັນຫຍັງເລື່ອງນີ້ຈຶ່ງສຳຄັນ?
ການຮັບບັບເຕມາເຮັດໃຫ້ຮູ້ຫຍັງ?
ກ່ອນທີ່ຄົນໜຶ່ງຈະອຸທິດຕົວແລະຮັບບັບເຕມາໄດ້ລາວຕ້ອງເຮັດຫຍັງ?
ເບິ່ງເພີ່ມເຕີມ
ການຮັບບັບເຕມາເປັນແນວໃດແທ້ໆ.
ເພື່ອຈະຮັບບັບເຕມາໄດ້ເຈົ້າຕ້ອງເຮັດຫຍັງແດ່.
ອັນໃດເຮັດໃຫ້ຜູ້ຊາຍຄົນໜຶ່ງຢາກຮັບບັບເຕມາ.
“ພວກເພິ່ນຢາກໃຫ້ຂ້ອຍພິສູດຄວາມຈິງດ້ວຍໂຕເອງ” (ຫໍສັງເກດການ 1 ກຸມພາ 2013)
ເປັນຫຍັງການຮັບບັບເຕມາຈຶ່ງເປັນເປົ້າໝາຍທີ່ສຳຄັນແລະເຈົ້າຕ້ອງເຮັດຫຍັງເພື່ອຈະພ້ອມຮັບບັບເຕມາ.
“ຂ້ອຍຄວນຮັບບັບເຕມາບໍ?” (ຄຳຖາມທີ່ໜຸ່ມສາວຖາມ—ຄຳຕອບທີ່ໃຊ້ໄດ້ຜົນ ເຫຼັ້ມທີ 2 ບົດທີ 37)
a ຄົນທີ່ເຄີຍຮັບບັບເຕມາກັບສາສະໜາອື່ນມາກ່ອນ ຕ້ອງຮັບບັບເຕມາໃໝ່ອີກເທື່ອໜຶ່ງ. ຍ້ອນຫຍັງ? ຍ້ອນສາສະໜາເຫຼົ່ານັ້ນບໍ່ໄດ້ສອນຄວາມຈິງຈາກຄຳພີໄບເບິນ.—ເບິ່ງກິດຈະການ 19:1-5 ແລະບົດທີ 13 ຂອງປຶ້ມນີ້