ບົດທີ 25
ພະເຈົ້າຢາກໃຫ້ເຮົາມີຊີວິດແບບໃດ?
ຄຳພີໄບເບິນບອກວ່າຊີວິດຂອງມະນຸດ “ສັ້ນແລະເຈິແຕ່ບັນຫາ.” (ໂຢບ 14:1) ພະເຈົ້າຢາກໃຫ້ເຮົາມີຊີວິດແບບນັ້ນບໍ? ແທ້ໆແລ້ວເພິ່ນຕັ້ງໃຈຈະໃຫ້ເຮົາມີຊີວິດແບບໃດ? ແລະສິ່ງທີ່ເພິ່ນຕັ້ງໃຈໄວ້ຈະເກີດຂຶ້ນແທ້ບໍ? ຄຳຕອບຈາກຄຳພີໄບເບິນຈະໃຫ້ກຳລັງໃຈເຈົ້າ.
1. ພະເຢໂຫວາຢາກໃຫ້ເຮົາມີຊີວິດແບບໃດ?
ພະເຢໂຫວາຢາກໃຫ້ເຮົາມີຊີວິດທີ່ດີທີ່ສຸດ. ຕອນທີ່ເພິ່ນສ້າງອາດາມກັບເອວາມະນຸດຄູ່ທຳອິດ ເພິ່ນໃຫ້ເຂົາເຈົ້າຢູ່ໃນສວນອຸທິຍານທີ່ສວຍງາມຫຼາຍທີ່ເອີ້ນວ່າສວນເອເດັນ. ແລ້ວເພິ່ນກໍ “ອວຍພອນເຂົາເຈົ້າແລະບອກວ່າ: ‘ໃຫ້ພວກເຈົ້າມີລູກມີຫຼານຫຼາຍໆຈົນເຕັມໂລກ ແລະໃຫ້ເບິ່ງແຍງໂລກ.’” (ປະຖົມມະການ 1:28) ພະເຢໂຫວາຢາກໃຫ້ເຂົາເຈົ້າມີລູກມີຫຼານ ເຮັດໃຫ້ທົ່ວໂລກເປັນສວນອຸທິຍານທີ່ສວຍງາມ ແລະເບິ່ງແຍງສັດຕ່າງໆ. ເພິ່ນຢາກໃຫ້ທຸກຄົນມີສຸຂະພາບສົມບູນແຂງແຮງແລະມີຊີວິດທີ່ມີຄວາມສຸກຕະຫຼອດໄປ.
ເຖິງວ່າໃນທຸກມື້ນີ້ຈະບໍ່ໄດ້ເປັນແບບນັ້ນa ແຕ່ສິ່ງທີ່ພະເຈົ້າຕັ້ງໃຈໄວ້ກໍຍັງຄືເກົ່າ. (ເອຊາຢາ 46:10, 11) ພະເຢໂຫວາຍັງຢາກໃຫ້ມະນຸດທີ່ເຊື່ອຟັງເພິ່ນມີຊີວິດທີ່ມີຄວາມສຸກຕະຫຼອດໄປໃນໂລກທີ່ເປັນສວນອຸທິຍານທີ່ສວຍງາມ.—ອ່ານພະນິມິດ 21:3, 4
2. ເຮົາຕ້ອງເຮັດຫຍັງເພື່ອຊີວິດຂອງເຮົາຈະມີຄວາມສຸກໃນຕອນນີ້?
ຄົນເຮົາບໍ່ໄດ້ຖືກສ້າງມາໃຫ້ເພິ່ງໂຕເອງ ແຕ່ຖືກສ້າງມາໃຫ້ເພິ່ງພະເຈົ້າຫຼືຕ້ອງໃຫ້ “ພະເຈົ້າຊີ້ນຳ” ນີ້ເລີຍເຮັດໃຫ້ເຮົາຢາກຮູ້ຈັກແລະນະມັດສະການເພິ່ນ. (ອ່ານມັດທາຍ 5:3-6) ພະເຢໂຫວາຢາກໃຫ້ເຮົາສະໜິດກັບເພິ່ນ “ໃຊ້ຊີວິດຕາມແນວທາງຂອງເພິ່ນ ຮັກເພິ່ນ” ແລະຮັບໃຊ້ເພິ່ນ “ສຸດຫົວໃຈ.” (ພະບັນຍັດ 10:12; ເພງສັນລະເສີນ 25:14) ຖ້າເຮົາເຮັດແບບນັ້ນ ເຮົາກໍຈະມີຄວາມສຸກໄດ້ເຖິງວ່າເຮົາອາດຈະເຈິກັບບັນຫາ. ການນະມັດສະການພະເຢໂຫວາແລະເຮັດຕາມທີ່ເພິ່ນບອກຈະເຮັດໃຫ້ເຮົາມີຊີວິດທີ່ມີຄວາມສຸກແທ້ໆ.
ຮຽນຮູ້ຫຼາຍຂຶ້ນ
ວິທີທີ່ພະເຢໂຫວາສ້າງໂລກເຮັດໃຫ້ເຫັນວ່າເພິ່ນຮັກເຮົາຫຼາຍແລະຄຳພີໄບເບິນບອກໄວ້ວ່າພະເຈົ້າຢາກໃຫ້ເຮົາມີຊີວິດແບບໃດ.
3. ພະເຢໂຫວາຢາກໃຫ້ເຮົາມີຊີວິດທີ່ມີຄວາມສຸກ
ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
ພະເຈົ້າສ້າງໂລກທີ່ສວຍງາມຂຶ້ນມາເພື່ອຫຍັງ?
ອ່ານປັນຍາຈານ 3:11 ແລ້ວລົມກັນກ່ຽວກັບຄຳຖາມຕໍ່ໄປນີ້:
ຂໍ້ນີ້ບອກຫຍັງເຮົາກ່ຽວກັບພະເຢໂຫວາ?
4. ຄວາມຕັ້ງໃຈຂອງພະເຢໂຫວາຍັງຄືເກົ່າ
ອ່ານເພງສັນລະເສີນ 37:11, 29; ເອຊາຢາ 55:11 ແລ້ວລົມກັນກ່ຽວກັບຄຳຖາມຕໍ່ໄປນີ້:
ເຮົາຮູ້ໄດ້ແນວໃດວ່າຄວາມຕັ້ງໃຈຂອງພະເຢໂຫວາຍັງຄືເກົ່າ?
ເຮືອນທີ່ບໍ່ມີໃຜເບິ່ງແຍງແລະຖືກປະຖິ້ມໃຫ້ຊຸດໂຊມກໍຍັງສ້ອມແປງໄດ້. ໂລກທີ່ເສຍຫາຍເພາະຂາດການເບິ່ງແຍງຢ່າງດີ ພະເຈົ້າກໍຈະເຮັດໃຫ້ດີຂຶ້ນໄດ້ເພື່ອຄົນທີ່ຮັກເພິ່ນຈະໄດ້ຢູ່ຫັ້ນ
5. ການນະມັດສະການພະເຢໂຫວາຈະເຮັດໃຫ້ເຮົາມີຊີວິດທີ່ມີຄວາມສຸກ
ເຮົາຈະມີຊີວິດທີ່ມີຄວາມສຸກຖ້າໄດ້ຮູ້ວ່າເຮົາມີຊີວິດຢູ່ເພື່ອຫຍັງ. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
ເທຣຸມິໄດ້ຮັບປະໂຫຍດແນວໃດຫຼັງຈາກທີ່ໄດ້ຮູ້ວ່າໂຕເອງມີຊີວິດຢູ່ເພື່ອຫຍັງ?
ອ່ານປັນຍາຈານ 12:13 ແລ້ວລົມກັນກ່ຽວກັບຄຳຖາມຕໍ່ໄປນີ້:
ພະເຢໂຫວາເຮັດຫຼາຍຢ່າງເພື່ອເຮົາຫຼາຍແທ້ໆ ແລ້ວເຮົາຈະເຮັດຫຍັງໄດ້ແດ່ເພື່ອຂອບໃຈເພິ່ນ?
ບາງຄົນອາດຖາມວ່າ: “ເຮົາຈະມີຊີວິດທີ່ມີຄວາມສຸກໄດ້ແນວໃດ?”
ຖ້າມີຄົນຖາມແບບນີ້ ເຈົ້າຈະຕອບແນວໃດ?
ສະຫຼຸບ
ພະເຢໂຫວາຢາກໃຫ້ເຮົາມີຊີວິດທີ່ມີຄວາມສຸກຕະຫຼອດໄປໃນໂລກທີ່ເປັນສວນອຸທິຍານທີ່ສວຍງາມ. ຖ້າເຮົານະມັດສະການເພິ່ນສຸດຫົວໃຈ ເຮົາຈະມີຊີວິດທີ່ມີຄວາມສຸກຕັ້ງແຕ່ຕອນນີ້.
ຄຳຖາມທົບທວນ
ພະເຢໂຫວາຕັ້ງໃຈວ່າຈະໃຫ້ອາດາມແລະເອວາມີຊີວິດແບບໃດ?
ເຮົາຮູ້ໄດ້ແນວໃດວ່າຄວາມຕັ້ງໃຈຂອງພະເຢໂຫວາທີ່ມີຕໍ່ມະນຸດຍັງຄືເກົ່າ?
ເຮົາຕ້ອງເຮັດຫຍັງເພື່ອຈະມີຊີວິດທີ່ມີຄວາມສຸກ?
ເບິ່ງເພີ່ມເຕີມ
ເປັນຫຍັງເຮົາຈຶ່ງໝັ້ນໃຈວ່າສວນເອເດັນເຄີຍມີຢູ່ແທ້.
“ສວນເອເດັນ—ເລື່ອງຈິງຫຼືເລື່ອງເລົ່າ?” (ຫໍສັງເກດການ 1 ມັງກອນ 2011)
ເຮົາຈະໝັ້ນໃຈໄດ້ແນວໃດວ່າໂລກຂອງເຮົາຈະຢູ່ຕະຫຼອດໄປ.
ເຮົາຈະມີຊີວິດທີ່ມີຄວາມໝາຍໄດ້ແນວໃດ ເບິ່ງຄຳຕອບຈາກຄຳພີໄບເບິນນຳກັນ.
ຜູ້ຊາຍຄົນໜຶ່ງເຈິສິ່ງທີ່ຂາດຫາຍໄປໃນຊີວິດ.
a ໃນບົດຕໍ່ໄປເຮົາຈະໄດ້ຮູ້ວ່າ ເປັນຫຍັງຊີວິດຂອງເຮົາໃນທຸກມື້ນີ້ຈຶ່ງບໍ່ເປັນໄປຕາມທີ່ພະເຈົ້າຕັ້ງໃຈໄວ້ຕັ້ງແຕ່ທຳອິດ.