ບົດທີ 22

ເຈົ້າບອກຂ່າວດີໃຫ້ຄົນອື່ນຟັງໄດ້

ສະບັບພິມ

ເມື່ອເຈົ້າໄດ້ຮຽນແລະເຂົ້າໃຈສິ່ງທີ່ຄຳພີໄບເບິນສອນ ເຈົ້າອາດຈະຄິດວ່າ ‘ເລື່ອງດີໆແບບນີ້ຕ້ອງບອກໃຫ້ຄົນອື່ນຮູ້ນຳ!’ ແມ່ນແລ້ວ ນີ້ເປັນສິ່ງທີ່ທຸກຄົນຕ້ອງໄດ້ຮູ້! ແຕ່ເຈົ້າອາດຮູ້ສຶກບໍ່ກ້າທີ່ຈະບອກຄົນອື່ນກ່ຽວກັບສິ່ງທີ່ເຈົ້າໄດ້ຮຽນ. ໃນບົດນີ້ເຮົາຈະລົມກັນວ່າເຈົ້າຕ້ອງເຮັດຫຍັງເພື່ອຈະມີຄວາມກ້າຫານຫຼາຍຂຶ້ນ ແລະເຈົ້າຈະເລີ່ມບອກຂ່າວດີຈາກຄຳພີໄບເບິນໃຫ້ຄົນອື່ນຟັງໄດ້ແນວໃດ.

1. ເຈົ້າຈະບອກເລື່ອງທີ່ໄດ້ຮຽນໃຫ້ຄົນອື່ນຮູ້ໄດ້ແນວໃດ?

ພວກລູກສິດຂອງພະເຢຊູບອກວ່າ: “ພວກເຮົາເຊົາເວົ້າເລື່ອງທີ່ໄດ້ເຫັນແລະໄດ້ຍິນນັ້ນບໍ່ໄດ້.” (ກິດຈະການ 4:20) ພວກລູກສິດມັກເລື່ອງທີ່ໄດ້ຮຽນຈາກພະເຢຊູຫຼາຍ ເຂົາເຈົ້າກໍເລີຍຢາກບອກເລື່ອງນີ້ໃຫ້ທຸກຄົນຟັງ. ແລ້ວເຈົ້າເດ ເຈົ້າຮູ້ສຶກແບບນັ້ນຄືກັນບໍ? ຖ້າແມ່ນ ໃຫ້ເຈົ້າລອງຫາໂອກາດເລົ່າໃຫ້ຄົນໃນຄອບຄົວແລະໝູ່ຄູ່ຟັງວ່າເຈົ້າໄດ້ຮຽນຫຍັງແດ່. ແຕ່ຕອນທີ່ເຈົ້າເວົ້າກັບເຂົາເຈົ້າກໍໃຫ້ເວົ້າຢ່າງສຸພາບແລະດ້ວຍຄວາມນັບຖື.—ອ່ານໂກໂລຊາຍ 4:6

ເຈົ້າອາດເລີ່ມແບບນີ້

ເລືອກບາງເລື່ອງຈາກຄຳພີໄບເບິນທີ່ເຈົ້າຢາກເລົ່າໃຫ້ຄົນໃນຄອບຄົວຟັງ. ຕອນທີ່ລົມກັບເຂົາເຈົ້າ ເຈົ້າອາດເວົ້າວ່າ: “ຂ້ອຍໄດ້ຮຽນເລື່ອງໜຶ່ງທີ່ດີຫຼາຍ ເລີຍຢາກຈະເລົ່າໃຫ້ຟັງ.”
ອ່ານຂໍ້ຄຳພີທີ່ໃຫ້ກຳລັງໃຈໃຫ້ໝູ່ຟັງຫຼືສົ່ງໃຫ້ລາວອ່ານ ໂດຍສະເພາະຕອນທີ່ລາວເຈັບປ່ວຍຫຼືມີເລື່ອງທີ່ບໍ່ສະບາຍໃຈ.
ຖ້າໝູ່ຢູ່ບ່ອນເຮັດວຽກຖາມເຈົ້າວ່າວັນເສົາອາທິດເຮັດຫຍັງແດ່ ກໍໃຫ້ເຈົ້າເລົ່າສິ່ງທີ່ໄດ້ຮຽນຈາກຄຳພີໄບເບິນຫຼືຈາກການປະຊຸມປະຊາຄົມໃຫ້ລາວຟັງ.
ເປີດເວັບໄຊ jw.org ໃຫ້ໝູ່ຂອງເຈົ້າເບິ່ງ.
ຊວນຄົນທີ່ເຈົ້າຮູ້ຈັກໃຫ້ມານັ່ງຟັງນຳກັນຕອນທີ່ເຈົ້າຮຽນຄຳພີໄບເບິນ ຫຼືບອກວິທີທີ່ລາວຈະຂໍຮຽນຄຳພີໄບເບິນໄດ້ຈາກເວັບໄຊ jw.org.

2. ເປັນຫຍັງການປະກາດຮ່ວມກັບປະຊາຄົມຈຶ່ງເປັນເປົ້າໝາຍທີ່ສຳຄັນ?

ນອກຈາກບອກຂ່າວດີກັບຄົນທີ່ຮູ້ຈັກແລ້ວ ພວກລູກສິດຂອງພະເຢຊູກໍຍັງບອກຂ່າວດີກັບຄົນອື່ນນຳ. ພະເຢຊູ ‘ສົ່ງເຂົາເຈົ້າອອກໄປເປັນຄູ່ໆ’ ໃຫ້ເຂົາເຈົ້າໄປປະກາດຕາມເມືອງຕ່າງໆ. (ລູກາ 10:1) ການປະກາດທີ່ເປັນລະບົບລະບຽບແບບນີ້ເຮັດໃຫ້ພວກລູກສິດໄດ້ບອກຂ່າວດີກັບຫຼາຍຄົນ ແລະເມື່ອເຂົາເຈົ້າໄດ້ໄປປະກາດນຳກັນ ເຂົາເຈົ້າກໍມີຄວາມສຸກຫຼາຍ. (ລູກາ 10:17) ແລ້ວເຈົ້າເດ ເຈົ້າຢາກໄປປະກາດນຳກັນກັບພີ່ນ້ອງໃນປະຊາຄົມບໍ?

ຮຽນຮູ້ຫຼາຍຂຶ້ນ

ມາເບິ່ງວ່າເຈົ້າຕ້ອງເຮັດຫຍັງເພື່ອຈະມີຄວາມກ້າຫານຫຼາຍຂຶ້ນແລະເຈົ້າຈະມີຄວາມສຸກກັບການປະກາດຂ່າວດີໄດ້ແນວໃດ.

ຮູບ: ນັກສຶກສາຄຳພີໄບເບິນກຳລັງປະກາດກັບຜູ້ຍິງຄົນໜຶ່ງໃນສວນສາທາລະນະ. 1. ນັກສຶກສາຄຳພີໄບເບິນອະທິດຖານ. 2. ລາວລົມບາງເລື່ອງໃນຄຳພີໄບເບິນໃຫ້ຜູ້ຍິງຄົນນັ້ນຟັງ.

3. ພະເຢໂຫວາຈະຊ່ວຍເຈົ້າ

ບາງຄົນຢາກຈະປະກາດແຕ່ກໍບໍ່ກ້າເພາະຢ້ານວ່າຄົນຈະບໍ່ຟັງຫຼືບໍ່ແນ່ໃຈວ່າຄົນອື່ນຈະຄິດແນວໃດ.

ເຈົ້າຮູ້ສຶກຢ້ານທີ່ຈະບອກຄົນອື່ນກ່ຽວກັບເລື່ອງທີ່ເຈົ້າຮຽນບໍ?ຍ້ອນຫຍັງ?

ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ຂ້ອຍອະທິດຖານຂໍຄວາມກ້າຫານຈາກພະເຢໂຫວາ (4:05)

ໄວລຸ້ນທີ່ເປັນພະຍານພະເຢໂຫວາເຮັດຫຍັງເພື່ອເຂົາເຈົ້າຈະມີຄວາມກ້າຫານ?

ອ່ານເອຊາຢາ 41:10 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເມື່ອເຈົ້າຮູ້ສຶກບໍ່ກ້າທີ່ຈະປະກາດ ເປັນຫຍັງເຈົ້າໜ້າຈະອະທິດຖານ?

ເຈົ້າຮູ້ບໍ?

ພະຍານພະເຢໂຫວາຫຼາຍຄົນເຄີຍຮູ້ສຶກວ່າເຂົາເຈົ້າບໍ່ມີທາງທີ່ຈະປະກາດຂ່າວດີກັບຄົນອື່ນໄດ້. ຕົວຢ່າງເຊັ່ນ ຜູ້ຊາຍຄົນໜຶ່ງທີ່ຊື່ເຊີເກເປັນຄົນທີ່ຂາດຄວາມໝັ້ນໃຈແລະຮູ້ສຶກວ່າການລົມກັບຄົນອື່ນເປັນເລື່ອງທີ່ຍາກຫຼາຍ. ແຕ່ເມື່ອລາວໄດ້ຮຽນຄຳພີໄບເບິນ ລາວບອກວ່າ: “ເຖິງວ່າຈະຮູ້ສຶກຢ້ານ ແຕ່ຂ້ອຍກໍເລີ່ມລົມກັບຄົນອື່ນ. ຂ້ອຍເລົ່າເລື່ອງທີ່ໄດ້ຮຽນໃຫ້ເຂົາເຈົ້າຟັງ. ຂ້ອຍບໍ່ຄິດເລີຍວ່າ ການໄດ້ລົມເລື່ອງຄຳພີໄບເບິນກັບຄົນອື່ນຈະເຮັດໃຫ້ຂ້ອຍໝັ້ນໃຈໃນໂຕເອງຫຼາຍຂຶ້ນ ແລະຍັງຊ່ວຍໃຫ້ໝັ້ນໃຈໃນສິ່ງທີ່ຂ້ອຍເຊື່ອຫຼາຍຂຶ້ນນຳອີກ.”

4. ໃຫ້ຄວາມນັບຖື

ກ່ອນທີ່ຈະບອກຂ່າວດີໃຫ້ຄົນອື່ນຟັງ ໃຫ້ຄິດວ່າເຈົ້າຈະເວົ້າຫຍັງແລະໃຫ້ຄິດນຳວ່າເຈົ້າຈະເວົ້າແນວໃດ. ອ່ານ 2 ຕີໂມທຽວ 2:24 ແລະ 1 ເປໂຕ 3:15 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຕອນທີ່ລົມເລື່ອງຄຳພີໄບເບິນກັບຄົນອື່ນ ເຈົ້າຈະເຮັດຕາມສິ່ງທີ່ບອກໄວ້ໃນຂໍ້ຄຳພີເຫຼົ່ານີ້ໄດ້ແນວໃດ?
ຖ້າຄົນໃນຄອບຄົວຫຼືໝູ່ບໍ່ເຫັນດີກັບເຈົ້າ ເຈົ້າຄວນເຮັດຫຍັງ? ແລະບໍ່ຄວນເຮັດຫຍັງ?
ແທນທີ່ຈະບອກກົງໆວ່າລາວຕ້ອງເຊື່ອຫຍັງ ເປັນຫຍັງເຮົາໜ້າຈະຄ່ອຍໆເວົ້າແລະພະຍາຍາມໃຊ້ຄຳຖາມເພື່ອໃຫ້ລາວຄິດໄດ້?

ນັກສຶກສາຄຳພີໄບເບິນຄົນໜຶ່ງກຳລັງເລົ່າສິ່ງທີ່ໄດ້ຮຽນໃຫ້ຍາດພີ່ນ້ອງຟັງ.

5. ການບອກຂ່າວດີເຮັດໃຫ້ມີຄວາມສຸກ

ພະເຢໂຫວາໃຫ້ພະເຢຊູປະກາດຂ່າວດີ. ພະເຢຊູຮູ້ສຶກແນວໃດກັບວຽກນີ້? ອ່ານໂຢຮັນ 4:34 ແລ້ວລົມກັນກ່ຽວກັບຄຳຖາມຕໍ່ໄປນີ້:

ການກິນອາຫານທີ່ມີປະໂຫຍດເຮັດໃຫ້ເຮົາມີຊີວິດຢູ່ໄດ້ແລະມີຄວາມສຸກນຳ. ພະເຢຊູກໍບອກວ່າການເຮັດຕາມຄວາມຕ້ອງການຂອງພະເຈົ້າ ເຊັ່ນ ການປະກາດຂ່າວດີ ເປັນຄືກັບການກິນອາຫານ. ເປັນຫຍັງພະເຢຊູຈຶ່ງບອກແນວນັ້ນ?
ເຈົ້າຄິດວ່າການປະກາດຂ່າວດີຈະເຮັດໃຫ້ມີຄວາມສຸກແນວໃດແດ່?

ສິ່ງທີ່ຊ່ວຍໄດ້

ເມື່ອເຈົ້າໄປປະຊຸມກາງອາທິດ ໃຫ້ຄິດເບິ່ງວ່າມີຫຍັງແດ່ຈາກການປະຊຸມທີ່ເຈົ້າຈະເອົາໄປໃຊ້ເພື່ອເລີ່ມລົມກັບຄົນອື່ນ.
ລອງລົມກັບຜູ້ທີ່ມາສອນເຈົ້າເບິ່ງວ່າ ເຈົ້າຕ້ອງເຮັດຫຍັງເພື່ອຈະໄດ້ເປັນນັກຮຽນໃນການປະຊຸມກາງອາທິດ. ການເປັນນັກຮຽນຈະຊ່ວຍເຈົ້າໃຫ້ພ້ອມຫຼາຍຂຶ້ນທີ່ຈະບອກຄົນອື່ນກ່ຽວກັບສິ່ງທີ່ເຈົ້າໄດ້ຮຽນ.
ໃຫ້ຝຶກວ່າເຈົ້າຈະຕອບຄຳຖາມແລະຂໍ້ໂຕ້ແຍ່ງທີ່ອາດຈະເຈິເລື້ອຍໆແນວໃດ ໂດຍໃຊ້ສ່ວນ “ບາງຄົນເວົ້າວ່າ” ຫຼື “ບາງຄົນອາດຖາມວ່າ” ທີ່ຢູ່ໃນປຶ້ມນີ້.

ບາງຄົນອາດຖາມວ່າ: “ບໍ່ໄດ້ເຫັນກັນດົນແລ້ວ ໄລຍະນີ້ເປັນຈັ່ງໃດ?”