ບົດທີ 40

ເຮົາຈະເປັນຄົນສະອາດສຳລັບພະເຈົ້າໄດ້ແນວໃດ?

ສະບັບພິມ

ຂໍໃຫ້ນຶກພາບແມ່ທີ່ຮັກລູກກຳລັງຊ່ວຍລູກຊາຍໃຫ້ກຽມໂຕໄປໂຮງຮຽນ. ລາວໃຫ້ລູກອາບນ້ຳແລະນຸ່ງເຄື່ອງທີ່ສະອາດຮຽບຮ້ອຍ. ການເຮັດແບບນີ້ເຮັດໃຫ້ລູກມີສຸຂະພາບດີ ແລະເຮັດໃຫ້ຄົນອື່ນເຫັນວ່າພໍ່ແມ່ເບິ່ງແຍງລູກຢ່າງດີ. ພະເຢໂຫວາພໍ່ທີ່ຮັກເຮົາກໍຢາກໃຫ້ເຮົາເປັນຄົນສະອາດທາງດ້ານຮ່າງກາຍ ຄວາມຄິດ ຄຳເວົ້າ ແລະການກະທຳນຳ. ຖ້າເຮົາເປັນຄົນສະອາດ ໂຕເຮົາເອງຈະໄດ້ຮັບປະໂຫຍດ ແລະເຮົາກໍຈະເຮັດໃຫ້ພະເຢໂຫວາໄດ້ຮັບກຽດນຳ.

1. ເຮັດແນວໃດເຮົາຈຶ່ງຈະເປັນຄົນສະອາດທາງດ້ານຮ່າງກາຍ?

ພະເຢໂຫວາບອກເຮົາວ່າ: “ພວກເຈົ້າຕ້ອງເປັນຄົນບໍລິສຸດ.” (1 ເປໂຕ 1:16) ການເປັນຄົນບໍລິສຸດກ່ຽວຂ້ອງກັບຄວາມສະອາດທາງດ້ານສິນລະທຳແລະທາງດ້ານຮ່າງກາຍ. ເພື່ອຈະເປັນຄົນສະອາດທາງດ້ານຮ່າງກາຍ ເຮົາຕ້ອງອາບນ້ຳເປັນປະຈຳ ເບິ່ງແຍງເຄື່ອງນຸ່ງ ເຮືອນ ແລະລົດໃຫ້ສະອາດຮຽບຮ້ອຍຢູ່ສະເໝີ. ນອກຈາກນັ້ນ ເຮົາຍັງຊ່ວຍອະນາໄມຫໍປະຊຸມໄດ້ນຳ. ຖ້າເຮົາເປັນຄົນສະອາດ ເຮົາກໍຈະເຮັດໃຫ້ພະເຢໂຫວາໄດ້ຮັບກຽດ.—2 ໂກຣິນໂທ 6:3, 4

2. ເພື່ອຈະເປັນຄົນສະອາດ ເຮົາຕ້ອງຫຼີກລ່ຽງຫຍັງແດ່?

ຄຳພີໄບເບິນບອກໃຫ້ເຮົາ “ເຮັດໃຫ້ໂຕເອງສະອາດຈາກທຸກສິ່ງທີ່ເຮັດໃຫ້ຮ່າງກາຍແລະຈິດໃຈເປິເປື້ອນ.” (2 ໂກຣິນໂທ 7:1) ເພື່ອຈະເຮັດໃຫ້ພະເຢໂຫວາພໍໃຈ ເຮົາຕ້ອງຫຼີກລ່ຽງອັນໃດກໍຕາມທີ່ສົ່ງຜົນເສຍຕໍ່ຮ່າງກາຍແລະຄວາມຄິດຂອງເຮົາ. ເຮົາຈະບໍ່ປ່ອຍໃຫ້ໂຕເອງຄິດເລື່ອງທີ່ບໍ່ເໝາະສົມ. (ເພງສັນລະເສີນ 104:34) ແລະເຮົາຈະບໍ່ໃຊ້ຄຳເວົ້າທີ່ບໍ່ດີແລະບໍ່ເໝາະສົມນຳ.—ອ່ານໂກໂລຊາຍ 3:8

ມີຫຍັງອີກທີ່ອາດເຮັດໃຫ້ເຮົາບໍ່ສະອາດທາງດ້ານຮ່າງກາຍແລະດ້ານສິນລະທຳ? ເຮົາຕ້ອງຫຼີກລ່ຽງການໃຊ້ຢາຫຼືສານຕ່າງໆທີ່ເຮັດໃຫ້ຮ່າງກາຍເຮົາບໍ່ສະອາດ ເຊັ່ນ ການສູບຢາ ການຄ້ຽວໝາກ ການໃຊ້ຢາເສບຕິດ ແລະການໃຊ້ຢາບາງຢ່າງໃນທາງທີ່ຜິດ. ຖ້າເຮົາຫຼີກລ່ຽງສິ່ງເຫຼົ່ານັ້ນ ກໍສະແດງວ່າເຮົາເຫັນຄ່າຊີວິດທີ່ເປັນຂອງຂວັນຈາກພະເຈົ້າ ແລະສຸຂະພາບຂອງເຮົາກໍຈະດີຂຶ້ນນຳ. ນອກຈາກນັ້ນ ເຮົາຈະພະຍາຍາມເປັນຄົນສະອາດດ້ານສິນລະທຳໂດຍຫຼີກລ່ຽງການກະທຳບາງຢ່າງ ເຊັ່ນ ການສະໜອງຄວາມຕ້ອງການທາງເພດດ້ວຍໂຕເອງຫຼືການເບິ່ງສື່ລາມົກ. (ເພງສັນລະເສີນ 119:37; ເອເຟໂຊ 5:5) ອາດບໍ່ແມ່ນເລື່ອງງ່າຍທີ່ຈະເຊົານິດໄສເຫຼົ່ານັ້ນ ແຕ່ພະເຢໂຫວາຊ່ວຍເຮົາໄດ້ແນ່ນອນ.—ອ່ານເອຊາຢາ 41:13

ຮຽນຮູ້ຫຼາຍຂຶ້ນ

ເປັນຫຍັງຄວາມສະອາດທາງດ້ານຮ່າງກາຍຈຶ່ງເຮັດໃຫ້ພະເຢໂຫວາໄດ້ຮັບກຽດ ແລະເຮົາຈະເຊົາການກະທຳທີ່ບໍ່ສະອາດໄດ້ແນວໃດ.

3. ຄວາມສະອາດດ້ານຮ່າງກາຍເຮັດໃຫ້ພະເຢໂຫວາໄດ້ຮັບກຽດ

ເມື່ອເຮົາໄດ້ອ່ານກົດໝາຍທີ່ພະເຢໂຫວາໃຫ້ກັບຊາດອິດສະຣາເອນໃນສະໄໝກ່ອນ ເຮົາກໍຈະໄດ້ເຂົ້າໃຈວ່າເປັນເລື່ອງສຳຄັນທີ່ປະຊາຊົນຂອງເພິ່ນຈະເປັນຄົນສະອາດ. ອ່ານອົບພະຍົບ 19:10 ແລະ 30:17-19 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຈາກຂໍ້ຄຳພີທີ່ອ່ານໄປ ພະເຢໂຫວາເບິ່ງເລື່ອງຄວາມສະອາດທາງດ້ານຮ່າງກາຍແນວໃດ?
ເພື່ອຈະຮັກສາຄວາມສະອາດທາງດ້ານຮ່າງກາຍ ເຮົາໜ້າຈະເຮັດຫຍັງແດ່?

ການຮັກສາຄວາມສະອາດຕ້ອງໃຊ້ເວລາແລະຄວາມພະຍາຍາມ. ບໍ່ວ່າເຮົາຈະຢູ່ໃສຫຼືຖານະເປັນແນວໃດ ຈະລວຍຫຼືທຸກຍາກ ເຮົາກໍເປັນຄົນສະອາດໄດ້. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ພະເຈົ້າຮັກຄົນທີ່ສະອາດ (4:10)

ເມື່ອເຮົາໄປປະກາດແລະຄົນອື່ນເຫັນວ່າສິ່ງຂອງຕ່າງໆຂອງເຮົາສະອາດຮຽບຮ້ອຍ ເຂົາເຈົ້າຈະໃຫ້ກຽດພະເຢໂຫວາຫຼາຍຂຶ້ນບໍ? ຍ້ອນຫຍັງ?

4. ເຊົາເຮັດສິ່ງທີ່ບໍ່ດີ

ຄົນໜຶ່ງຖິ້ມຢາສູບໃສ່ຖັງຂີ້ເຫຍື້ອ. — ພະເຢໂຫວາຊ່ວຍເຮົາໃຫ້ເຊົາເຮັດສິ່ງທີ່ບໍ່ດີໄດ້

ຖ້າເຈົ້າສູບຢາຫຼືໃຊ້ຢາເສບຕິດ ເຈົ້າຄືຊິຮູ້ວ່າມັນເຊົາຍາກ. ແຕ່ອັນໃດຈະຊ່ວຍໄດ້? ຖ້າເຈົ້າຮູ້ວ່າການເຮັດແບບນັ້ນສົ່ງຜົນເສຍແນວໃດ ກໍຈະຊ່ວຍໃຫ້ເຈົ້າເຊົາໄດ້ງ່າຍຂຶ້ນ. ອ່ານມັດທາຍ 22:37-39 ແລ້ວລົມກັນວ່າການຕິດຢາສູບແລະຕິດຢາເສບຕິດສົ່ງຜົນເສຍແນວໃດຕໍ່ . . .

ຄວາມສຳພັນຂອງເຈົ້າກັບພະເຢໂຫວາ.
ຄອບຄົວແລະຄົນອ້ອມຂ້າງ.

ເຈົ້າຕ້ອງເຮັດຫຍັງແດ່ເພື່ອຈະເຊົາເຮັດສິ່ງທີ່ບໍ່ດີໄດ້ສຳເລັດ.a ເປີດວິດີໂອ.

ວິດີໂອ: ຝຶກຄວບຄຸມໂຕເອງ (2:47)

ອ່ານຟີລິບປອຍ 4:13 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເປັນຫຍັງການອະທິດຖານເລື້ອຍໆ ອ່ານຄຳພີໄບເບິນເປັນປະຈຳ ແລະເຂົ້າຮ່ວມການປະຊຸມເປັນປະຈຳຈະຊ່ວຍໃຫ້ເຈົ້າມີກຳລັງເພື່ອຈະເຊົານິດໄສທີ່ບໍ່ດີ?

5. ສູ້ກັບຄວາມຄິດແລະການກະທຳທີ່ບໍ່ສະອາດ

ອ່ານໂກໂລຊາຍ 3:5 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເຮົາຮູ້ໄດ້ແນວໃດວ່າສື່ລາມົກ ເຊັກຕິງb ແລະການສະໜອງຄວາມຕ້ອງທາງເພດດ້ວຍໂຕເອງເປັນເລື່ອງທີ່ພະເຢໂຫວາຖືວ່າບໍ່ສະອາດ?
ພະເຢໂຫວາຢາກໃຫ້ເຮົາເປັນຄົນສະອາດດ້ານສິນລະທຳ ເຈົ້າຄິດວ່າເຮົາເຮັດໄດ້ບໍ? ເປັນຫຍັງເຈົ້າຈຶ່ງຄິດແບບນັ້ນ?

ເຮົາຈະສູ້ກັບຄວາມຄິດທີ່ບໍ່ສະອາດໄດ້ແນວໃດ. ເປີດວິດີໂອ.

ວິດີໂອ: ລົງມືເຮັດເພື່ອຮັກສາຄວາມສະອາດດ້ານຄວາມຄິດ (1:51)

ພະເຢຊູເລົ່າຕົວຢ່າງປຽບທຽບໜຶ່ງທີ່ສະແດງໃຫ້ເຫັນວ່າເຮົາຕ້ອງເຮັດທຸກຢ່າງທີ່ເຮັດໄດ້ເພື່ອຈະເປັນຄົນສະອາດດ້ານສິນລະທຳ. ອ່ານມັດທາຍ 5:29, 30 ແລ້ວລົມກັນກ່ຽວກັບຄຳຖາມຕໍ່ໄປນີ້:

ພະເຢຊູບໍ່ໄດ້ບອກໃຫ້ເຮົາທຳຮ້າຍຮ່າງກາຍໂຕເອງ ແຕ່ແທ້ໆແລ້ວເພິ່ນກຳລັງບອກວ່າເຮົາຕ້ອງລົງມືເຮັດບາງຢ່າງ. ເຮົາຕ້ອງເຮັດຫຍັງແດ່ເພື່ອຈະຫຼີກລ່ຽງຄວາມຄິດທີ່ບໍ່ສະອາດ?c

ພະເຢໂຫວາເຫັນຄ່າທີ່ເຈົ້າພະຍາຍາມຕໍ່ສູ້ເພື່ອຈະເຊົາຄິດເລື່ອງທີ່ບໍ່ສະອາດ. ອ່ານເພງສັນລະເສີນ 103:13, 14 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຖ້າເຈົ້າກຳລັງພະຍາຍາມເຊົາຄິດເລື່ອງທີ່ບໍ່ສະອາດ ຂໍ້ຄຳພີນີ້ໃຫ້ກຳລັງໃຈເຈົ້າແນວໃດເພື່ອຈະບໍ່ຍອມແພ້?

ຢ່າຍອມແພ້!

ເຈົ້າອາດຄິດວ່າ ‘ຂ້ອຍເຮັດຜິດອີກແລ້ວ ຍອມແພ້ດີກວ່າ.’ ຂໍໃຫ້ລອງຄິດເຖິງເລື່ອງນີ້: ສົມມຸດວ່ານັກແລ່ນຄົນໜຶ່ງສະດຸດລົ້ມ ນີ້ບໍ່ໄດ້ໝາຍຄວາມວ່າລາວແພ້ການແຂ່ງຂັນຫຼືຕ້ອງກັບໄປເລີ່ມແລ່ນໃໝ່ຕັ້ງແຕ່ຕົ້ນ. ຄ້າຍຄືກັນ ຖ້າເຈົ້າກັບໄປເຮັດບາງຢ່າງທີ່ບໍ່ດີ ນັ້ນບໍ່ໄດ້ໝາຍຄວາມວ່າເຈົ້າຈະເຊົາບໍ່ໄດ້ ຫຼືບໍ່ໄດ້ໝາຍຄວາມວ່າຄວາມພະຍາຍາມທັງໝົດທີ່ເຮັດມາບໍ່ມີປະໂຫຍດ. ຖ້າຕອນນີ້ເຈົ້າກຳລັງສູ້ຢູ່ ແຕ່ບາງເທື່ອກໍຍັງພາດ ຂໍຢ່າຍອມແພ້! ພະເຢໂຫວາຈະຊ່ວຍເຈົ້າໃຫ້ເຊົາເຮັດສິ່ງເຫຼົ່ານັ້ນໄດ້ແນ່ນອນ.