ເຈົ້າຮຽນແບບພະເຢໂຫວາບໍໃນການປະຕິບັດກັບພີ່ນ້ອງຍິງ?
ເຮົາທີ່ເປັນພີ່ນ້ອງຊາຍຮູ້ສຶກດີໃຈທີ່ໄດ້ຮັບໃຊ້ພະເຢໂຫວາຮ່ວມກັບພີ່ນ້ອງຍິງaຫຼາຍຄົນທີ່ມີຄວາມເຊື່ອເຂັ້ມແຂງ. ເຂົາເຈົ້າເຮັດວຽກໜັກຫຼາຍ ເຮົາຮັກແລະເຫັນຄ່າເຂົາເຈົ້າແທ້ໆ. ພວກເຮົາທີ່ເປັນພີ່ນ້ອງຊາຍຢາກປະຕິບັດຕໍ່ພີ່ນ້ອງຍິງແບບອ່ອນໂຍນ ຍຸຕິທຳ ແລະໃຫ້ກຽດເຂົາເຈົ້າ. ແຕ່ຍ້ອນເຮົາເປັນຄົນບໍ່ສົມບູນແບບ ບາງເທື່ອຈຶ່ງຍາກທີ່ຈະເຮັດແບບນັ້ນ. ມີຫຍັງອີກທີ່ອາດເຮັດໃຫ້ເປັນເລື່ອງຍາກ? ໃຫ້ເຮົາມາເບິ່ງປະສົບການຂອງພີ່ນ້ອງຊາຍບາງຄົນນຳກັນ.
ບາງຄົນໃຫຍ່ມາໃນວັດທະນະທຳທີ່ຖືວ່າຜູ້ຍິງຕ່ຳຕ້ອຍກວ່າຜູ້ຊາຍ. ຕົວຢ່າງເຊັ່ນ: ຜູ້ດູແລໝວດຊື່ຮັນຢູ່ໂບລີວີເວົ້າວ່າ: “ຜູ້ຊາຍບາງຄົນໃຫຍ່ມາໃນວັດທະນະທຳທີ່ສອນແບບຜິດໆວ່າລູກຜູ້ຊາຍແທ້ໆຕ້ອງເປັນແບບໃດ ຄວາມຄິດແບບນີ້ເຮັດໃຫ້ເຂົາເຈົ້າດູຖູກແລະບໍ່ໃຫ້ກຽດຜູ້ຍິງ.” ຜູ້ດູແລຊື່ເຊິງຊຽນທີ່ຢູ່ໃຕ້ຫວັນເວົ້າວ່າ: “ບ່ອນທີ່ລາວຢູ່ຜູ້ຊາຍຫຼາຍຄົນຮູ້ສຶກວ່າຜູ້ຍິງບໍ່ຄວນຫຍຸ້ງເລື່ອງຂອງຜູ້ຊາຍ ແລະຖ້າຜູ້ຊາຍຄົນໃດເວົ້າກ່ຽວກັບຄຳຄິດເຫັນຂອງຜູ້ຍິງ ຄົນອື່ນກໍຈະດູຖູກລາວ.” ສ່ວນຜູ້ຊາຍຄົນອື່ນໆກໍມີອະຄະຕິກັບຜູ້ຍິງໂດຍທາງອ້ອມ ເຊັ່ນ ເຂົາເຈົ້າອາດຈະເລົ່າເລື່ອງຕະຫຼົກທີ່ດູຖູກຜູ້ຍິງ.
ເຮົາດີໃຈທີ່ເຫັນວ່າບໍ່ວ່າພີ່ນ້ອງຊາຍຈະໃຫຍ່ມາໃນວັດທະນະທຳແບບໃດ ເຂົາເຈົ້າກໍສາມາດປ່ຽນຄວາມຄິດທີ່ວ່າຜູ້ຊາຍດີກວ່າຜູ້ຍິງ. (ອຟຊ. 4:22-24) ສິ່ງທີ່ຊ່ວຍເຂົາເຈົ້າໄດ້ແມ່ນການຮຽນແບບພະເຢໂຫວາ. ໃນບົດຄວາມນີ້ເຮົາຈະມາເບິ່ງນຳກັນວ່າພະເຢໂຫວາປະຕິບັດກັບຜູ້ຍິງແນວໃດ. ພີ່ນ້ອງຊາຍຈະຮຽນແບບພະເຢໂຫວາແນວໃດໃນເລື່ອງນີ້ ແລະຜູ້ດູແລຈະນຳໜ້າໃນການໃຫ້ກຽດພີ່ນ້ອງຍິງແນວໃດ.
ພະເຢໂຫວາປະຕິບັດກັບຜູ້ຍິງແນວໃດ?
ພະເຢໂຫວາເປັນຕົວຢ່າງທີ່ດີແທ້ໆໃນການໃຫ້ກຽດຜູ້ຍິງ. ເພິ່ນເປັນຄືກັບພໍ່ທີ່ເຫັນອົກເຫັນໃຈແລະຮັກມະນຸດທຸກຄົນຄືກັບລູກ. (ຢຮ. 3:16) ພີ່ນ້ອງຍິງທີ່ສັດຊື່ກໍເປັນຄືກັບລູກສາວທີ່ມີຄ່າຫຼາຍສຳລັບເພິ່ນ. ໃຫ້ເຮົາມາເບິ່ງວ່າພະເຢໂຫວາໃຫ້ກຽດຜູ້ຍິງແນວໃດແດ່.
ພະເຢໂຫວາປະຕິບັດກັບຜູ້ຍິງແບບບໍ່ລຳອຽງ. ພະເຢໂຫວາສ້າງຜູ້ຊາຍແລະຜູ້ຍິງໃຫ້ຄ້າຍຄືກັບເພິ່ນ. (ປຖກ. 1:27) ພະເຢໂຫວາບໍ່ໄດ້ສ້າງຜູ້ຊາຍໃຫ້ສະຫຼາດຫຼືມີຄວາມສາມາດຫຼາຍກວ່າຜູ້ຍິງ ແລະເພິ່ນກໍບໍ່ໄດ້ຮັກຜູ້ຊາຍຫຼາຍກວ່າຜູ້ຍິງ. (2ຂຄ. 19:7) ພະເຢໂຫວາສ້າງຜູ້ຊາຍແລະຜູ້ຍິງໃຫ້ມີຄວາມສາມາດໃນການຄິດຫາເຫດຜົນເພື່ອຈະເຂົ້າໃຈຄວາມຈິງໃນຄຳພີໄບເບິນແລະສະແດງຄຸນລັກສະນະທີ່ດີອອກມາ. ພະເຢໂຫວາຍັງເຫັນວ່າຄວາມເຊື່ອຂອງຜູ້ຊາຍແລະຜູ້ຍິງມີຄ່າເທົ່າທຽມກັນ. ພະເຢໂຫວາໃຫ້ຄວາມຫວັງທີ່ດີກັບຜູ້ຊາຍແລະຜູ້ຍິງທີ່ຈະມີຊີວິດຕະຫຼອດໄປໃນໂລກທີ່ເປັນສວນງາມໆຫຼືມີຄວາມຫວັງທີ່ຈະເປັນກະສັດແລະປະໂລຫິດໃນສະຫວັນ. (2ປຕ. 1:1) ເຫັນໄດ້ແຈ້ງວ່າພະເຢໂຫວາບໍ່ໄດ້ມີອະຄະຕິກັບຜູ້ຍິງ.
ພະເຢໂຫວາຟັງຜູ້ຍິງ. ພະເຢໂຫວາສົນໃຈຄວາມຮູ້ສຶກຂອງຜູ້ຍິງແລະບັນຫາທີ່ເຂົາເຈົ້າເຈິ. ຕົວຢ່າງເຊັ່ນ: ເພິ່ນຟັງແລະຕອບຄຳອະທິດຖານຂອງຣາເຊັນແລະຮັນນາ. (ປຖກ. 30:22; 1ຊມ. 1:10, 11, 19, 20) ນອກຈາກນັ້ນ ພະເຢໂຫວາຍັງໃຫ້ຜູ້ຂຽນຄຳພີໄບເບິນຂຽນເລື່ອງຂອງຜູ້ຊາຍທີ່ຟັງຜູ້ຍິງ ເຊັ່ນ ອັບຣາຮາມເຮັດຕາມຄຳສັ່ງຂອງພະເຢໂຫວາທີ່ໃຫ້ຟັງຊາຣາເມຍຂອງລາວ. (ປຖກ. 21:12-14) ກະສັດດາວິດຟັງອາບີກາຍ ແລະລາວເຖິງຂັ້ນຮູ້ສຶກວ່າພະເຢໂຫວາສົ່ງອາບີກາຍໃຫ້ມາເວົ້າກັບລາວ. (1ຊມ. 25:32-35) ພະເຢຊູກໍຮຽນແບບຄຸນລັກສະນະຕ່າງໆຂອງພະເຢໂຫວາໄດ້ດີແທ້ໆໂດຍຟັງມາຣີແມ່ຂອງເພິ່ນ. (ຢຮ. 2:3-10) ຕົວຢ່າງເຫຼົ່ານີ້ສະແດງໃຫ້ເຫັນວ່າວິທີໜຶ່ງທີ່ພະເຢໂຫວາໃຫ້ກຽດຜູ້ຍິງກໍຄືຟັງເຂົາເຈົ້າ.
ພະເຢໂຫວາໄວ້ໃຈຜູ້ຍິງ. ຕົວຢ່າງເຊັ່ນ: ພະເຢໂຫວາໃຫ້ເອວາເບິ່ງແຍງທຸກສິ່ງທີ່ຢູ່ໃນໂລກ. (ປຖກ. 1:28) ພະເຢໂຫວາເຮັດແບບນີ້ສະແດງວ່າເພິ່ນບໍ່ໄດ້ຖືວ່າເອວາມີຄ່າໜ້ອຍກວ່າຜົວຂອງລາວ ແຕ່ລາວເປັນຜູ້ຊ່ວຍທີ່ດີ. ພະເຢໂຫວາຍັງໄວ້ໃຈຜູ້ພະຍາກອນຍິງຊື່ເດໂບຣາແລະຮຸນດາ ໂດຍໃຫ້ເຂົາເຈົ້າໄປໃຫ້ຄຳແນະນຳຄົນຂອງເພິ່ນ ເຊິ່ງບາງຄົນເປັນກະສັດແລະບາງຄົນເປັນຜູ້ຕັດສິນ. (ຜຕສ. 4:4-9; 2ກສ. 22:14-20) ໃນທຸກມື້ນີ້ ພະເຢໂຫວາກໍໄວ້ໃຈພີ່ນ້ອງຍິງໂດຍໃຫ້ເຂົາເຈົ້າເຮັດວຽກຫຼາຍຢ່າງທີ່ສຳຄັນ ເຊັ່ນ: ບາງຄົນເປັນຜູ້ປະກາດ ເປັນໄພໂອເນຍແລະເປັນມິດຊັນນາຣີ. ບາງຄົນເຮັດວຽກອອກແບບກໍ່ສ້າງ ແລະບຳລຸງຮັກສາຫໍປະຊຸມແລະອາຄານຕ່າງໆຂອງສຳນັກງານສາຂາ. ບາງຄົນກໍຮັບໃຊ້ຢູ່ເບເທນຫຼືຫ້ອງການການແປທ້ອງຖິ່ນ. ພີ່ນ້ອງຍິງເຫຼົ່ານີ້ເປັນຄືກັບກອງທັບໃຫຍ່ທີ່ພະເຢໂຫວາໃຊ້ເພື່ອເຮັດໃຫ້ຄວາມຕ້ອງການຂອງເພິ່ນເກີດຂຶ້ນແທ້. (ເພງ. 68:11) ເຫັນໄດ້ແຈ້ງວ່າພະເຢໂຫວາບໍ່ໄດ້ຖືວ່າຜູ້ຍິງອ່ອນແອຫຼືບໍ່ມີຄວາມສາມາດ.
ພີ່ນ້ອງຊາຍຈະຮຽນແບບພະເຢໂຫວາແນວໃດໃນການປະຕິບັດກັບພີ່ນ້ອງຍິງ?
ສຳລັບພີ່ນ້ອງຊາຍ ເພື່ອຈະຮູ້ວ່າເຮົາກຳລັງຮຽນແບບພະເຢໂຫວາຫຼືບໍ່ໃນການປະຕິບັດກັບພີ່ນ້ອງຍິງ ເຮົາຕ້ອງກວດເບິ່ງຄວາມຄິດແລະການກະທຳຂອງເຮົາແບບກົງໄປກົງມາ. ແຕ່ເຮົາເຮັດແບບນັ້ນດ້ວຍໂຕເອງບໍ່ໄດ້ ເຮົາຕ້ອງໄດ້ຮັບຄວາມຊ່ວຍເຫຼືອ. ຖ້າທ່ານໝໍຢາກຮູ້ວ່າຫົວໃຈຂອງເຮົາມີບັນຫາຫຍັງບໍ່ ລາວຈະໃຊ້ເຄື່ອງສ່ອງໄຟຟ້າເພື່ອກວດເບິ່ງ ຄ້າຍຄືກັນ ໝູ່ທີ່ດີແລະຄຳພີໄບເບິນສາມາດຊ່ວຍເຮົາໃຫ້ກວດເບິ່ງວ່າເລິກໆແລ້ວໃນໃຈເຮົາມີຄວາມຮູ້ສຶກໃນແງ່ລົບຕໍ່ຜູ້ຍິງຫຼືບໍ່. ເຮົາຕ້ອງເຮັດແນວໃດເພື່ອຈະໄດ້ຮັບຄວາມຊ່ວຍເຫຼືອແບບນີ້?
ຖາມໝູ່ທີ່ດີ. (ສຸພາ. 18:17) ເຈົ້າມີໝູ່ທີ່ໃຈດີ ໄວ້ໃຈໄດ້ ແລະມີເຫດຜົນບໍ? ຖ້າມີ ໃຫ້ຖາມລາວວ່າ: “ເຈົ້າຄິດວ່າຂ້ອຍປະຕິບັດກັບພີ່ນ້ອງຍິງແນວໃດ? ພີ່ນ້ອງຍິງຮູ້ສຶກບໍວ່າຂ້ອຍໃຫ້ກຽດເຂົາເຈົ້າ? ຂ້ອຍຄວນເຮັດຫຍັງອີກເພື່ອປະຕິບັດກັບເຂົາເຈົ້າໃຫ້ດີກວ່າເກົ່າ?” ຖ້າໝູ່ແນະນຳເຈົ້າບາງຢ່າງກໍຢ່າຊອກຫາຂໍ້ແກ່ໂຕ ແຕ່ໃຫ້ເຈົ້າພ້ອມທີ່ຈະປ່ຽນແປງໂຕເອງ.
ສຶກສາຄົ້ນຄວ້າຄຳພີໄບເບິນ. ວິທີທີ່ດີທີ່ສຸດທີ່ເຮົາຈະຮູ້ວ່າເຮົາປະຕິບັດກັບພີ່ນ້ອງຍິງດີຫຼືບໍ່ດີ ແມ່ນການສຶກສາຄົ້ນຄວ້າຄຳພີໄບເບິນ. (ຮຣ. 4:12) ເມື່ອອ່ານຄຳພີໄບເບິນ ເຮົາໄດ້ຮຽນເລື່ອງຂອງຜູ້ຊາຍທີ່ປະຕິບັດກັບຜູ້ຍິງແບບດີໆແລະເລື່ອງຂອງຜູ້ຊາຍທີ່ປະຕິບັດກັບຜູ້ຍິງແບບບໍ່ດີ. ແລ້ວເຮົາກໍເອົາຕົວຢ່າງຂອງເຂົາເຈົ້າມາສົມທຽບກັບວິທີທີ່ເຮົາປະຕິບັດກັບຜູ້ຍິງ. ນອກຈາກນັ້ນ ການອ່ານຂໍ້ຄຳພີຫຼາຍໆຂໍ້ແລ້ວເອົາມາສົມທຽບກັນຈະຊ່ວຍເຮົາບໍ່ໃຫ້ຕີຄວາມໝາຍຂໍ້ຄຳພີບາງຂໍ້ແບບທີ່ສະໜັບສະໜູນຄວາມຄິດຜິດໆຂອງເຮົາທີ່ມີຕໍ່ຜູ້ຍິງ. ຕົວຢ່າງເຊັ່ນ: ໃນ 1 ເປໂຕ 3:7 ບອກວ່າ ຜົວຄວນ “ທະນຸຖະໜອມພາຊະນະທີ່ບອບບາງກວ່າ.”b ຄຳວ່າພາຊະນະທີ່ບອບບາງກວ່າໝາຍຄວາມວ່າຜູ້ຍິງຕ່ຳຕ້ອຍກວ່າ ສະຫຼາດໜ້ອຍກວ່າ ຫຼືບໍ່ມີຄວາມສາມາດສ່ຳກັບຜູ້ຊາຍບໍ? ບໍ່ແມ່ນ ໃນຄາລາເຕຍ 3:26-29 ບອກວ່າພະເຢໂຫວາເລືອກທັງຜູ້ຍິງແລະຜູ້ຊາຍໃຫ້ປົກຄອງຮ່ວມກັບພະເຢຊູໃນສະຫວັນ. ດັ່ງນັ້ນ ເມື່ອເຮົາສຶກສາຄົ້ນຄວ້າຄຳພີໄບເບິນແລະຖາມໝູ່ທີ່ດີກໍຈະຊ່ວຍໃຫ້ຮູ້ວ່າເຮົາຄວນສະແດງຄວາມນັບຖືຕໍ່ພີ່ນ້ອງຍິງຢ່າງເໝາະສົມໄດ້ແນວໃດ.
ຜູ້ດູແລຈະໃຫ້ກຽດພີ່ນ້ອງຍິງແນວໃດ?
ພີ່ນ້ອງຊາຍສາມາດຮຽນແບບຕົວຢ່າງຂອງຜູ້ດູແລໃນວິທີທີ່ເຂົາເຈົ້າປະຕິບັດກັບພີ່ນ້ອງຍິງດ້ວຍຄວາມນັບຖື. ຜູ້ດູແລຈະເປັນຕົວຢ່າງແນວໃດໃນການສະແດງຄວາມນັບຖືຕໍ່ພີ່ນ້ອງຍິງ? ໃຫ້ເຮົາມາເບິ່ງບາງວິທີທີ່ຜູ້ດູແລຈະເຮັດໄດ້.
ຊົມເຊີຍພີ່ນ້ອງຍິງ. ອັກຄະສາວົກໂປໂລເປັນຕົວຢ່າງທີ່ດີໃນເລື່ອງນີ້. ຕອນທີ່ໂປໂລຂຽນຈົດໝາຍໄປຫາຄລິດສະຕຽນຢູ່ເມືອງໂຣມ ລາວຊົມເຊີຍພີ່ນ້ອງຍິງຫຼາຍຄົນ. (ໂຣມ 16:12) ລອງຄິດເບິ່ງວ່າພີ່ນ້ອງຍິງເຫຼົ່ານັ້ນຈະດີໃຈຫຼາຍສ່ຳໃດຕອນທີ່ມີການອ່ານຈົດໝາຍນັ້ນໃນປະຊາຄົມ. ຄ້າຍຄືກັນ ຖ້າຜູ້ດູແລຊົມເຊີຍພີ່ນ້ອງຍິງສຳລັບຄຸນລັກສະນະທີ່ດີຂອງເຂົາເຈົ້າແລະວຽກທີ່ເຂົາເຈົ້າເຮັດເພື່ອພະເຢໂຫວາ ມັນກໍຈະເຮັດໃຫ້ເຂົາເຈົ້າຮູ້ສຶກວ່າພີ່ນ້ອງຮັກແລະນັບຖືເຂົາເຈົ້າ. ບາງເທື່ອຄຳຊົມເຊີຍຈາກຜູ້ດູແລອາດເປັນສິ່ງທີ່ພີ່ນ້ອງຍິງຕ້ອງການພໍດີເພື່ອຈະຊ່ວຍເຂົາເຈົ້າໃຫ້ຮັບໃຊ້ພະເຢໂຫວາຢ່າງສັດຊື່ຕໍ່ໆໄປ.—ສຸພາ. 15:23
ຊົມເຊີຍ
ຜູ້ດູແລຄວນຊົມເຊີຍພີ່ນ້ອງຍິງແບບເຈາະຈົງແລະຊົມເຊີຍຈາກໃຈ. ເປັນຫຍັງຕ້ອງເຮັດແບບນັ້ນ? ພີ່ນ້ອງຍິງທີ່ຊື່ເຈດຊິກ້າບອກວ່າ: “ຕອນທີ່ພີ່ນ້ອງຊາຍບອກເຮົາວ່າ ‘ເຈົ້າເຮັດດີຫຼາຍ.’ ມັນກະດີຢູ່ ແຕ່ຖ້າເຂົາເຈົ້າບອກເລີຍວ່າເຮັດດີເລື່ອງຫຍັງມັນກະຄືຊິໄດ້ກຳລັງໃຈຫຼາຍກວ່າ ເຊັ່ນ: ຊົມເຊີຍທີ່ເຮົາສອນລູກໃຫ້ນັ່ງດີໆຢູ່ການປະຊຸມ ຫຼືຊົມເຊີຍທີ່ເຮົາໄປຮັບນັກສຶກສາມາປະຊຸມ.” ຖ້າຜູ້ດູແລຊົມເຊີຍແລະບອກວ່າພີ່ນ້ອງຍິງເຮັດດີເລື່ອງຫຍັງ ເຂົາເຈົ້າກໍຈະຮູ້ສຶກວ່າໂຕເອງສຳຄັນແລະມີຄ່າຕໍ່ປະຊາຄົມ.
ຟັງພີ່ນ້ອງຍິງ. ຜູ້ດູແລທີ່ຖ່ອມຈະບໍ່ຖືວ່າຄວາມຄິດຂອງໂຕເອງດີທີ່ສຸດ. ຜູ້ດູແລທີ່ເປັນແບບນີ້ຈະມັກຂໍຄຳຄິດເຫັນຈາກພີ່ນ້ອງຍິງ ແລ້ວກໍຕັ້ງໃຈຟັງເຂົາເຈົ້າ. ການເຮັດແບບນີ້ຈະເຮັດໃຫ້ພີ່ນ້ອງຍິງໄດ້ກຳລັງໃຈແລະຜູ້ດູແລກໍໄດ້ຮັບປະໂຫຍດຄືກັນ. ເປັນຫຍັງຈຶ່ງເປັນແບບນັ້ນ? ຜູ້ດູແລຊື່ເຈຣາໂດ້ທີ່ຮັບໃຊ້ຢູ່ເບເທນເວົ້າວ່າ: “ຂ້ອຍຮູ້ສຶກວ່າການຂໍຄຳຄິດເຫັນຈາກພີ່ນ້ອງຍິງຊ່ວຍຂ້ອຍໃຫ້ເຮັດວຽກໄດ້ດີຂຶ້ນ ຍ້ອນເຂົາເຈົ້າມີປະສົບການໃນວຽກນັ້ນ ແລະບາງຄົນກໍເຮັດວຽກດົນກວ່າພີ່ນ້ອງຊາຍຫຼາຍຄົນຊ້ຳ.” ນອກຈາກນັ້ນ ພີ່ນ້ອງຍິງຫຼາຍຄົນຍັງເປັນໄພໂອເນຍໃນປະຊາຄົມ ເຂົາເຈົ້າຈຶ່ງຮູ້ຈັກຄົນໃນເຂດດີ. ຜູ້ດູແລຊື່ໄບຣອັ້ນບອກວ່າ: “ພີ່ນ້ອງຍິງມີຄຸນລັກສະນະທີ່ດີແລະມີຄວາມສາມາດຫຼາຍຢ່າງ ເຊິ່ງເປັນປະໂຫຍດຕໍ່ອົງການ. ດັ່ງນັ້ນ ຂໍໃຫ້ເຮົາຮຽນຈາກປະສົບການຂອງເຂົາເຈົ້າ.”
ຟັງ
ຜູ້ດູແລທີ່ສະຫຼາດຈະບໍ່ເບິ່ງຂ້າມຄຳຄິດເຫັນຂອງພີ່ນ້ອງຍິງ. ຍ້ອນຫຍັງ? ຜູ້ດູແລທີ່ຊື່ເອັດເວີດບອກວ່າ: “ຄຳຄິດເຫັນແລະປະສົບການຂອງພີ່ນ້ອງຍິງຊ່ວຍໃຫ້ພີ່ນ້ອງຊາຍເຫັນພາບລວມຂອງເລື່ອງທັງໝົດແລະຊ່ວຍໃຫ້ເຂົ້າໃຈຄວາມຮູ້ສຶກຂອງຄົນອື່ນ. (ສຸພາ. 1:5) ເຖິງວ່າບາງເທື່ອຜູ້ດູແລບໍ່ສາມາດເຮັດຕາມຄຳຄິດເຫັນຂອງພີ່ນ້ອງຍິງໄດ້ ແຕ່ເຂົາເຈົ້າກໍສາມາດຂອບໃຈພີ່ນ້ອງຍິງທີ່ສະເໜີຄຳຄິດເຫັນແລະແບ່ງປັນສິ່ງທີ່ເຂົາເຈົ້າຮູ້.
ຝຶກພີ່ນ້ອງຍິງ. ຜູ້ດູແລຄວນຊອກໂອກາດຝຶກພີ່ນ້ອງ. ຕົວຢ່າງເຊັ່ນ: ຝຶກວິທີນຳການປະຊຸມເພື່ອການປະກາດ ເພື່ອເຂົາເຈົ້າຈະສາມາດນຳການປະຊຸມເພື່ອການປະກາດໄດ້ຕອນທີ່ບໍ່ມີພີ່ນ້ອງຊາຍທີ່ຮັບບັບເຕມາຢູ່ນຳ ຫຼືສອນວິທີຄວບຄຸມອຸປະກອນແລະເຄື່ອງຈັກເພື່ອເຂົາເຈົ້າຈະຊ່ວຍວຽກໃນໂຄງການກໍ່ສ້າງຫຼືສ້ອມແປງແລະບຳລຸງຮັກສາ. ນອກຈາກນັ້ນ ຢູ່ເບເທນຜູ້ດູແລພະແນກອາດຈະຝຶກພີ່ນ້ອງຍິງໃຫ້ເຮັດວຽກຫຼາຍຢ່າງ ເຊັ່ນ: ວຽກສ້ອມແປງແລະບຳລຸງຮັກສາ ວຽກຈັດຊື້ ບັນຊີ ຄອມພິວເຕີ ຫຼືວຽກອື່ນໆ. ຖ້າຜູ້ດູແລຝຶກພີ່ນ້ອງຍິງກໍສະແດງໃຫ້ເຫັນວ່າພີ່ນ້ອງຍິງມີຄວາມສາມາດແລະໄວ້ໃຈໄດ້.
ຝຶກ
ພີ່ນ້ອງຍິງຫຼາຍຄົນທີ່ໄດ້ຮັບການຝຶກຈາກຜູ້ດູແລສາມາດຊ່ວຍຄົນອື່ນໄດ້. ຕົວຢ່າງເຊັ່ນ: ພີ່ນ້ອງຍິງບາງຄົນທີ່ຖືກຝຶກໃນໂຄງການກໍ່ສ້າງໄດ້ໃຊ້ສິ່ງທີ່ລາວຮຽນເພື່ອຊ່ວຍແປງເຮືອນພີ່ນ້ອງຄົນອື່ນທີ່ໄດ້ຮັບຜົນກະທົບຈາກໄພພິບັດ. ສ່ວນພີ່ນ້ອງຍິງທີ່ໄດ້ຮັບການຝຶກເພື່ອປະກາດໃນບ່ອນສາທາລະນະກໍສາມາດຝຶກພີ່ນ້ອງຍິງຄົນອື່ນຕໍ່ໄດ້ໃນການເຮັດວຽກນີ້. ພີ່ນ້ອງຍິງເຫຼົ່ານີ້ຮູ້ສຶກແນວໃດທີ່ຜູ້ດູແລພະຍາຍາມຝຶກເຂົາເຈົ້າ? ພີ່ນ້ອງຍິງຄົນໜຶ່ງຊື່ເຈນນິເຟີ້ບອກວ່າ: “ຕອນທີ່ຂ້ອຍເຮັດວຽກໃນໂຄງການກໍ່ສ້າງຫໍປະຊຸມ ຜູ້ດູແລຄົນໜຶ່ງໄດ້ໃຊ້ເວລາສອນຂ້ອຍ ສັງເກດວຽກທີ່ຂ້ອຍເຮັດ ແລະຊົມເຊີຍຂ້ອຍ. ຂ້ອຍມັກເຮັດວຽກກັບລາວຫຼາຍຍ້ອນຂ້ອຍຮູ້ສຶກວ່າໂຕເອງມີຄ່າແລະເປັນຄົນທີ່ໄວ້ໃຈໄດ້.”
ການປະຕິບັດກັບພີ່ນ້ອງຍິງຄືກັບຄົນໃນຄອບຄົວມີປະໂຫຍດແນວໃດ?
ເຮົາຮັກພີ່ນ້ອງຍິງຄືກັບທີ່ພະເຢໂຫວາຮັກ! ເຮົາຈຶ່ງປະຕິບັດກັບເຂົາເຈົ້າຄືກັບຄົນໃນຄອບຄົວ. (1ຕມ. 5:1, 2) ເຮົາດີໃຈແລະພູມໃຈຫຼາຍທີ່ໄດ້ຮັບໃຊ້ກັບເຂົາເຈົ້າ. ເຮົາດີໃຈທີ່ພີ່ນ້ອງຍິງເຫຼົ່ານີ້ຮູ້ວ່າເຮົາຮັກແລະສະໜັບສະໜູນເຂົາເຈົ້າ. ພີ່ນ້ອງຍິງທີ່ຊື່ວາເນັດຊ້າບອກວ່າ: “ຂ້ອຍຂອບໃຈພະເຢໂຫວາແທ້ໆທີ່ໄດ້ຢູ່ໃນອົງການຂອງເພິ່ນ ຍ້ອນຢູ່ບ່ອນນີ້ມີແຕ່ພີ່ນ້ອງທີ່ເຮັດໃຫ້ຂ້ອຍຮູ້ສຶກສົດຊື່ນແລະໄດ້ກຳລັງໃຈ.” ພີ່ນ້ອງຍິງອີກຄົນໜຶ່ງທີ່ຢູ່ໃຕ້ຫວັນບອກວ່າ: “ຂ້ອຍຂອບໃຈພະເຢໂຫວາແລະອົງການຂອງເພິ່ນແທ້ໆທີ່ເຫັນຄ່າຜູ້ຍິງແລະເຂົ້າໃຈຄວາມຮູ້ສຶກເຮົາ. ສິ່ງນີ້ເຮັດໃຫ້ຂ້ອຍມີຄວາມເຊື່ອເຂັ້ມແຂງແລະຮູ້ສຶກຂອບໃຈແທ້ໆທີ່ໄດ້ຢູ່ໃນອົງການຂອງເພິ່ນ.”
ພະເຢໂຫວາຕ້ອງພູມໃຈຫຼາຍແທ້ໆທີ່ເຫັນພີ່ນ້ອງຊາຍຮັກແລະໃຫ້ກຽດພີ່ນ້ອງຍິງຄືກັບທີ່ເພິ່ນເຮັດ! (ສຸພາ. 27:11) ຜູ້ດູແລທີ່ຊື່ເບັນຈາມິນຈາກສະກ໋ອດແລນບອກວ່າ: “ຜູ້ຊາຍທົ່ວໄປດູຖູກຜູ້ຍິງ. ດັ່ງນັ້ນ ເມື່ອພີ່ນ້ອງຍິງຍ່າງເຂົ້າມາຫໍປະຊຸມ ເຮົາຢາກໃຫ້ເຂົາເຈົ້າຮູ້ສຶກວ່າເຮົາຮັກແລະໃຫ້ກຽດເຂົາເຈົ້າ.” ຂໍໃຫ້ເຮົາທຸກຄົນພະຍາຍາມແທ້ໆທີ່ຈະຮຽນແບບພະເຢໂຫວາໃນການປະຕິບັດກັບພີ່ນ້ອງຍິງໂດຍສະແດງຄວາມຮັກແລະໃຫ້ກຽດເຂົາເຈົ້າສະເໝີ.—ຣມ. 12:10
a ໃນບົດຄວາມນີ້ ຄຳວ່າ “ພີ່ນ້ອງຍິງ” ໝາຍເຖິງຜູ້ຍິງທີ່ເປັນຄລິດສະຕຽນ ບໍ່ແມ່ນຄົນໃນຄອບຄົວດຽວກັນ.
b ສຳລັບຄຳອະທິບາຍຄຳວ່າ “ພາຊະນະທີ່ບອບບາງກວ່າ” ໃຫ້ເບິ່ງບົດຄວາມ “ພາຊະນະທີ່ອ່ອນແອກວ່າ” ໃນຫໍສັງເກດການ 15 ພຶດສະພາ 2006 ແລະ “ຄຳແນະນຳທີ່ສະຫຼາດສຸຂຸມສຳລັບຄູ່ສົມລົດ” ໃນຫໍສັງເກດການ 1 ມີນາ 2005. (ພາສາໄທ)