KALABO 7

Gaamai Wo Na Ɣa Ɣɛɛna E Ɓɔ Numaitiɛ Va Te Laala

Luki 1:3

NIITIƐ MAA NƐƐ E KƐ: Faa taniga wo ɔɔ e faa taniga lɛ ga è ɓɔ niitiɛ va e yɛpɛzu te wɔ ga te kwɛ̃ɛ ga niitiɛ e dɛɛzu ga tiɛ ta ga gaama.

Ki-daa wodoi taniga ɣaa-ziɛ numaa ta laala na ɣa ɣɛɛna e yɛpɛ e vile ba. Nii nɛpɛgi ya bo, maa nɛɛ e wulo Gala Kɔlɔi zu. Ani solowogɛ dodo. Ani e wõni e yɛpɛ e vile faa nɛpɛ ba faa wulu ɣaa-ziɛ wuigitiɛ te yɛpɛi e vile ba, ɔɔ ki-daa-wodo ɣa e sɔlɔ woga, nii numaa taniga te levega su, e vɛɛ sa faa taniga va, ɣaa-ɓaa ga e kwɛ̃ɛ ani ki-daa-wodoi natiɛ ta ɓɔɔ ga gaama.
Ki-daa-wodoitiɛ e sɔlɔ woga ŋada taniga, fe ɓɔɔ ga pagɔ. Gala goitiɛ te Gala goi nii woba e dodoga, ɔɔ nii ɓɔɔɓɔɔgi Gala Kɔlɔi vilegɛi ba e vɛɛ kɔlɔitiɛ va Gala Goo Wotii Maazu vɛtɛ veaitiɛ ta fe de ya, towa ɓɔ e va ga e ɓɔ numaitiɛ va te ziɛ ga nii e bosu te ma (Maf. 24:45) Ani e ki-daa-wodo maa zɔlɔ woga kɔlɔ zu ɔɔ ŋɛdɛi ta ɣaa-ɓaa ga e mɛlɛ ki-daa-wodoi na maa ʋeli.

Ya ki-daa-wodo maa zɔlɔ wona ŋadɛɛ ta na ɣa ɣɛɛna e wõini e yɛpɛ e vile ba, mɛlɛ ya ɓɔɔ ɣele-ɣele vɛɛ ba. Ani ki-daa-wodoi bogɛ ga “numaa taniga” mɛlɛ ɣɛ tea “numaa bɔɔlɔ zu” ɔɔ ani towa ɣɛna tea “tanisu” mɛlɛ ɣɛ tea “ɣee nɛpɛ.” Na ɣa ɣɛɛna towa ɣɛna tea “ɣeeta tɔ vaazu ɣɛɛzu” mɛlɛ ɣɛ tea “e ɣɛɛ.”
Fai taniga lɛ ga e ɓɔ numaitiɛ va te la ga nii e dɛɛzu. Ya wolona Gala goi ta lodosu, ɔɔ e woloa yɛpɛzu e vile ki-daa-wodoi taniga va e maa zɔlɔ woga, gaa-zaɣa-kɛɛ vili ɔɔ po-kɔ̃ɔ-mai taniga zei ga e ɓɔ te va te faa ɓigii ɣaa ɣa.