KALABO 15

Dɛ Ga E Laavɛ Ga Niitiɛ E Bosu

1 Tɛsɛlonaikaitiɛ 1:5

NIITIƐ MAA NƐƐ E KƐ: Dɛ ga e laavɛ ɓɔɔ ga gaamai e bosu na ɣa ɣɛɛna tɔ ga faa ɓi.

Ɣavele ɓɛtɛ ɓɔɔ ga pagɔ. Maa woli ɓɔɔ ga pagɔ e kwɛ̃ɛ velei Gala Kɔlɔi dɛɛ la ga niitiɛ te zɛpɛi naa zu ta ga gaama. Ya ɣɛna faa ɓigiitiɛ lɛɛzu mɛlɛ su wooza na ɣa ɣɛɛna gaa ɣaazu mɛlɛ ɓaa. Ɣi-gaa-ziɛ ga velei e vaazu ɓɔsu la numaitiɛ va. Jehova ʋeli na gaa-ɓai ʋaa ma.

Ya ɣɛna ya yɛpɛi maa wolizu, mɛlɛ ɣɛ bosu ɣigii zu, kɛ yiɛ woo wulo la. Na ɣa ɓɔ e va e maa woli ga pagɔ na ɣa ɣɛɛna e fe ga velei maa nɛɛ e ɣɛɛ la.
Woi niitiɛ wo ya dɛ ga e laavɛ ga niitiɛ e bosu. Mɛlɛ ɣɛ nɔ lɛɛzu niitiɛ ma te ponɛɛ kɔlɔi zu, kɛ te maa ʋeli bo ga woi niitiɛ e te wɛ̃ni. Woi niitiɛ ya bo maa nɛɛ te dɛ ga e laavɛ ga niitiɛ e bosu.
Dɛ ɓɔɔ ga e laavɛ la. Yiɛ woo wulo ya ɣɛna ya yɛpɛi ʋeezu. Yiɛ wɛlɛ numaitiɛ ɣaazu va ya ɣɛna yɛpɛzu ani ɛ lɛ ga faa yowũ ga e kɛ vɛ wo na.

Mɛlɛ ɓoei numaitiɛ la ga te yee zei ya ɣi-gaa-ziɛi wu ga nɔ è dɛ ga e laavɛ ga nii e bosu. Kɛsɛ ga velei ya yɛpɛ la ga e dɛ ga wõila ɣa e ya te ʋaa ma, velei ɓalaa e lai la ga niitiɛ e bosu.