Gala Kɔlɔi Ɣa Ga Gala Na Keela Woi E Tevega De Wɔ

Jehova Daa Woi ʋeevɛ de ya. Kɔlɔ vɛlɛ-vɛlɛ 66 ɣa puai kii-ma Gala Kɔlɔi zu. Kɛ ɣeeta ya ɣi-gaa-ziɛ zu ga: De Gala Kɔlɔi ma zɔlɔwogɛ ɣɛ le? Ɓɛɛ na kele-ɣele ka e Gala Kɔlɔi zu? De faa maa woli e vile velei va de Gala Kɔlɔi ma zɔlɔ woga la, na ɣa ɓɔ de va de gaa-zaɣa-kɛɛ niitiɛ ɣaa wote.

1. Ani nu ɓuse ɣa e Gala Kɔlɔi wonɛni, zɛɓɛi e kɛɛ da ɣɛ tea kulovɛ Gala zeea?

Ɣeeta nu 40 ɣa e Gala Kɔlɔi wonɛni kwena 1,600 wuuzu. Te tɔɔ-zeini kwena 1513 zu tɔ vɛɛ Ziizɛ ɣaazu, e li kwena 98 zu Kolai na yɛmini su. Na ɣa ɣɛɛna taitiɛ te ponɛni tɛ lɛ ɣɛni wuloni ŋada gila. Na ɓalaa ɣɛɛvɛ, niitiɛ ɓɔgapɛ te ponɛni ta ga faa gila. Nii ɣɛɛni sa ɣɛ le? Nii ɣɛɛni ɓɔvɛlaale Gala Kɔlɔi wulovɛ Gala zeea. (1 Tɛsɛlonaikaitiɛ 2:13 lodo.) Gala Kɔlɔ wonɛ veaitiɛ ta ɓɔ ɣi-gaa-ziɛi lei te ɣɛni ponɛsu. “Kɛ̀ Gala baa ŋinɛgi ɔ́ numaa yii wu-ziɣi tiɛ woi nii wo ɔ́ wulo Gala da.”a (2 Pite 1:21) Gala baa ŋinɛgi ɔ́ numaa yii wu-ziɣi ga te Gala na ki-gaa-ziɛi wonɛ.—2 Temete 3:16

2. Bɛɛni ka ta wulo Gala Kɔlɔi zu-nu-ma?

‘Zuu pɛ, zii pɛ e vɛɛ nu pɛ’ ba, ta wulo keela woo vagɔi nii zu-nu-ma e Gala Kɔlɔi zu. (Faa wuloai kɛnɛ ma 14:6 lodo) Gala ɣɛɛ ga zaɓu ga Gala Kɔlɔi ɣɛ zii woo lamaa zu e leve kɔlɔ nɛpɛ ba zui zu. Gala Kɔlɔi ɣa sa nu lamaa ya, zii woo lamaa zu zui wɔlɔ-kɔlɔ ma.

3. Jehova Daa Woi maazu vɛtɛga ɣɛ le?

Te Gala Kɔlɔi wonɛni ŋɛnii niitiɛ ma tɛ lɛ lebega ga ʋike. Taitiɛ wõila ɣɛni te ya Gala Kɔlɔi ʋaa ma, te zooni ɓɔɔ te ponɛ ga pagɔ. Velei ɓalaa gaa-ɓaa vea te ɣaa ɓaani la ga te Gala Kɔlɔi ŋala-ŋala, numaa te ɣi kuloni yɛʋui zu ga te maazu vɛtɛ. Nu nɛpɛ, ɔɔ faa nɛpɛ lɛ kɛɛ Jehova ɔ ɓe yɛpɛzu de wɔ. Gala Kɔlɔi ɣɛ: “Da Ɣalagi laawoi ɣa yɛ na wɔlɔ-wɔlɔ ta wɔlɔ-wɔlɔ.”—Isaiah 40:8.

FAA LAMAA MAA WOLI

4. Gala Kɔlɔi dɛɛvɛ ga nui kuloai zeea

ƲILIOGI nii lɛ ga. A 2 Temete 3:16 lodo, wo gaa-zaɣa-kɛɛ niitiɛ ɣaa wote.

ƲILIOGI: Ɓɛɛ Na Kele-Ɣele Ka E Gala Kɔlɔi Zu?—Ʋilio Kpuogi (2:48)

• Ani nu ɓuse ɣa e Gala Kɔlɔi wonɛni, zɛɓɛi e kɛɛ da ɣɛ tea tɔ ga Gala Daa Woi?

• E ɣisu Gala zooni e na ki-gaa-ziɛi wu numaa ɣisu ga te ponɛ?

5. Numaa tɛ lɛ ziɛni na wu ga tɔ Gala Kɔlɔi ŋala-ŋala

ƲILIOGI: Gala Kɔlɔi Ʋize Wogɛi E Ɣɛni Te Ɣaazu—Ʋilio Kpuogi (William Tyndale) (6:17)

• Tei e koni sa ga numaa taniga te ɣi kuloni yɛʋui zu ga te Gala Kɔlɔi maazu vɛtɛ, na e e wuuzu nɛɛvɛ ga yiɛ dodo?

A Psalm 119:97 lodo, wo gaa-zaɣa-kɛɛ nii ɣaa wote:

• Zɛɓɛi e kɛɛni numaa taniga te ɣi kuloni yɛʋui zu ga te Gala Kɔlɔi wonɛ zii woo lamaa zu, tiɛ gaa wɛɛ?

6. Kɔlɔi e nu ɓɔgapɛ faa ma

Te vɛɛ Gala Kɔlɔi wonɛsu zii woo lamaa zu. Nu lamaa te maa zɔlɔ woga, e leve kɔlɔ nɛpɛ ba. A Te Ɣɛɛ Ʋaitiɛ 10:34, 35 lodo, wo gaa-zaɣa-kɛɛ niitiɛ ɣaa wote:

• Zɛɓɛi e kɛɛ Gala wõini ga Daa Woi ɣɛ zii woo lamaa zu? Zɛɓɛi e kɛɛ é wõini nu lamaa te maa zɔlɔwo?

• Zɛɓɛi e e wuuzu nɛɛ e vile Gala Kɔlɔi va?

NII SA È MAA WOLIA

Gala Kɔlɔi ɣa ga Gala Daa Woi. Gala ka e ɣɛɛ ga zaɓu nu lamaa te maa zɔlɔ woga.

Ma-ɓigitiɛ

• Ani Gala Kɔlɔi ɣa bona ga Gala ge na ki-gaa-ziɛi wuuni numaa ɣisu ga te Daa Woi wonɛ, su-wulo-zu ɣa ga zɛɓɛ?

• Zɛɓɛi e e wuuzu nɛɛ e vile Gala Kɔlɔi maazu vɛtɛ fai va, velei te ponɛsu la zii woo lamaa zu, ta velei nu lamaa te maa zɔlɔ wosu la?

• Ani ya wɛlɛna velei va Gala ɣɛɛ la ga zaɓu ga Daa Woi ziiti de ma, zɛɓɛi ya ɣɛ ga ya ɣi-gaa-ziɛi?

WƐLƐ FAA LAMAA VA

Faa maa woli e vile Gala Kɔlɔi va e ziɣi siɛgi ma te ponɛni la wɔlɔ-wɔlɔi zu, ta velei te ponɛsu la zaa zii woo lamaa zu.

“De Gala Kɔlɔi Maa Zɔlɔ Wogɛ Ɣɛ Le?” (Awake!, November 2007)

Faa saagɔi niitiɛ tɛ lɛ zooni tɔ Gala Kɔlɔi zu ŋala-ŋala. Faa maa woli e vile te va.

“Gala Kɔlɔi—Velei Gala Maazu Vɛtɛni La” (The Watchtower No. 4 2016)

Wɛlɛ velei numaa te ɣi kuloni la yɛʋui zu, ga te Gala Kɔlɔi wonɛ zii woo lamaa zu.

Gala Kɔlɔi Ʋize Wogɛi E Ɣɛni Te Ɣaazu (14:26)

Siɛ tamaa zu te vɛɛ Gala Kɔlɔi wonɛsu zii woo lamaa zu. Ya leve ɣɛ le e laala ga keela woi e Gala Kɔlɔi zu maa lɛ dɛ ʋelini?

“E Ɣisu Te Keela Woi Maa Ʋeliga Gala Kɔlɔi Zu?” (Kɔlɔi nii ɣa fãga wɔlɔi ma)