Ɣaa-Ɓaa E Bataizei Maa Zɔlɔwo!

Ziizɛ boni ga manɛɛ Kolai Maa Veaitiɛ te bataizei maa zɔlɔwo. (Mafiyu 28:​19, 20 lodo.) Kɛ bataizei zu-wulo-zu ɣa ga zɛɓɛ? Zɛɓɛi nu ɣa kɛ ga e bataizei maa zɔlɔwo?

1. Bataizei zu-wulo-zu ɣa ga zɛɓɛ?

Woi nii ga bataize, tɔ ga Geliiki woo, tɔwɔ su-wulo-zu ɣa ga e nu lɔ ziɛ wu. Siɛgi ma te bataize ɣɛɛni ga Ziizɛ, te dɔɔni ziɛ walai Jɔdɛ̃ wu. Tei sa na ɣɛɛni e “wuloni ziɛ wu.” (Maki 1:​9, 10) E ɣɛ velei nɔ te kɛɛni la ga Ziizɛ, zaa ani Kolai Maa Vea ɓɔɔɓɔɔgitiɛ ta ɣɛna bataize maa zɔlɔ wosu ta te lɔ ziɛ wu.

2. Ani nu ɣa bataize maa zɔlɔ wona, zɛɓɛi ɓɔɔ na dɛɛzu?

Ani nu ɣa bataizei maa zɔlɔ wona a kɛ tii e dɛɛ ga e ɓɔɔ ʋea sa Jehova ya. Nu ɣa ɓɔɔ ʋe Jehova ya ɣɛ le? Nu ɔ vɛɛ bataize maa zɔlɔ wosu, towa Jehova ʋeli e bo ma ga e wõini e zii-mai ɣɛ wɔlɔ-wɔlɔ ta wɔlɔ-wɔlɔ. Gala-feliai na zu, towa bo ga Jehova tɔ ɣilekpu nɔɣa ya feli. Yiɛ bo wɔnɔ ga, towa Jehova na tii ɣɛɛ ʋai lo faa pɛ tuo na ŋeteai zu. Manu daa ɣisu ga e “ɣi kulo ɓɔɔ ʋaa zu na ɣa ɣɛɛ na . . . E vile” Ziizɛ wulu, e yee zei na kala-bogitiɛ wu. (Mafiyu 16:​24) Ani nu ɣa ɓɔɔ ʋeena Jehova ya e bataizei maa zɔlɔwo, na ɣa ɓɔ ba siɛ-pulu vagɔ ɣɛ te yɔɔzu ta Jehova e vɛɛ kaa yɔwɔ̃itiɛ va.

3. Zɛɓɛi manɛɛ nu kɛ ga e bataize maa zɔlɔwo?

Ya zoo e ɣavele ɓɛtɛ ga e bataizei maa zɔlɔwo ani ya faa maa wolizu e vile Jehova va na ɣa ɣɛɛna yiɛ ya yee-la-mai zu-ɓaa. (Hiiɓuluitiɛ 11:6 lodo.) Ya faa lamaa maa wolina, ya yee-la-mai zu ɣa ɓaa, wõila ɓɔɔɓɔɔ ka ɣɛ e ya Jehova ʋaa ma. Na ɣa ɓɔ e va e yɛpɛ numaa wɔ e vile ba na ɣa ɣɛɛna e ziɛ ga na tɔgitiɛ. (2 Temete 4:2; 1 Jɔ̃ 5:3) Ani nu ɣa ‘tuoi nii wosu yá zolowo de maliɣii ma yiɛ kɛ ga e zíi la ga ɓɔɔɓɔɔ su,’ towa da ɣisu ga e ɓɔɔ ʋe Gala zeea e bataizei maa zɔlɔwo.​​—Kolasaitiɛ 1:​9, 10.a

FAA LAMAA MAA WOLI

4. Da faa maa woli e vile Ziizɛ na bataizei va

A Mafiyu 3:​13-17 lodo ga wo faa lamaa maa woli e vile Ziizɛ na bataizei va na ɣa ɣɛɛna wo gaa-zaɣa-kɛɛ niitiɛ ɣaa wote:

• E ɣisu Ziizɛ ɣɛni ga duuyɛ̃ siɛgi ma e bataizei maa zɔlɔwoni?

• Te bataize ɣɛɛni ga Ziizɛ ɣɛ le? E ɣisu te ziɛ ʋazani nɔ ma?

Ziizɛ bataizei maa zɔlɔwoni siɛgi ma e tɔɔ-zeini la ga e tii nii ɣɛ Gala feeni zeea zui nii ma. A Luki 3:​21 ɓɔga Jɔ̃ 6:​38 lodo, wo gaa-zaɣa-kɛɛ nii ɣaa wote:

• Tei Ziizɛ bataizei maa zɔlɔwoni, tii zɛɓɛi e toni naa luo na ŋeteai zu?

5. Ani ya ɣaa ɓaana ya bataizei maa zɔlɔwo

Ɣeeta ya ɣi-gaa-ziɛzu ga, na ɓaavɛ ga nu ɓɔɔ ʋe Jehova ya ɔ nɔ ɣɛ ga e bataize maa zɔlɔwo. Kɛ ani ya faa maa wolina e vile Jehova va, e kwɛ̃ɛ ɓɔɔ ga pagɔ, na ɣa ɓɔ e va e bataizei maa zɔlɔwo. Ga e numaa taniga wɛ̃ɛ te nii ɣɛɛni, ƲILIOGI nii lɛ ga.

ƲILIOGI: Ɣaa-Ɓaa Siɛ-Pulu Vagɔ Ɣɛ Wo Yɔɔzu Wa Jehova (1:​11)

A Jɔ̃ 17:3 ɓɔga Jĩi 1:5 lodo, wo gaa-zaɣa-kɛɛ nii ɣaa wote:

• Zɛɓɛi manɛɛ nu kɛ ga e bataizei maa zɔlɔwo?

1. Da ɓɔɔ ʋe Jehova ya ani da bona ma Gala-feliai zu ga de wõini de feli wɔlɔ-wɔlɔ ta wɔlɔ-wɔlɔ

2. Da bataizei maa zɔlɔ wona, a kɛ tii da dɛɛzu ga nu ɓɔgapɛ ga de ɓɔɔ ʋea sa Jehova ya

6. Ya bataizei maa zɔlɔ wona, ya ɣɛ ga Jehova na numaitiɛ te ta

Ani ya bataizei maa zɔlɔ wona, ya vɛɛ Jehova na ɓulugi va e zui wɔlɔ-kɔlɔ ma. Velei ɓalaa gɛ lɛ wuloni la ŋada gila, ge ɓɔgapɛ ge laavɛ ga faa gila na ɣa ɣɛɛna ga ziɛzu ga Jehova na tɔgitiɛ. A Psalms 25:​14 ɓɔga 1 Pite 2:​17 lodo, wo gaa-zaɣa-kɛɛ nii ɣaa wote:

• Ani nu ɣa bataizei maa zɔlɔ wona, zɛɓɛi na ɣa kɛ ga na siɛ-pului e te yɔɔzu ta Jehova e vɛɛ feli veaitiɛ va?

NII SA È MAA WOLIA

Ziizɛ boni ga manɛɛ Kolai Maa Veaitiɛ te bataizei maa zɔlɔwo. Ga e zoo e na ɣɛ, kɛni e ɣaa-ɓaa zee-la-ma ɓɔɔɓɔɔ ge ɣɛ e ya e vile Jehova va, yiɛ ziɛ ga na tɔgitiɛ na ɣa ɣɛɛna e ɓɔɔ ʋe zeea.

Ma-ɓigitiɛ

• Bataizei zu-wulo-zu ɣa ga zɛɓɛ? Zɛɓɛi e kɛɛ e ga faa ɓi?

• Ɓɔɔ ʋee ʋai Jehova ya ta bataizei, te wulovɛ ga vɛ ɣɛ le?

• Zɛɓɛi manɛɛ nu kɛ ga e ɓɔɔ ʋe Jehova ya e bataizei maa zɔlɔwo?

WƐLƐ FAA LAMAA VA

Gaamai wɛ̃ɛ e vile bataizei va.

“Bataizei Zu-Wulo-Zu Ɣa Ga Zɛɓɛ?” (Kɔlɔi nii ɣa fãga wɔlɔi ma)

Faa maa woli e vile niitiɛ va manɛɛ nu kɛ ga e bataizei maa zɔlɔwo.

“Ani Wõila Ɣa E Ya E Vile Jehova Va, Towa Ɓɔ E Va E Bataizei Maa Zɔlɔwo” (The Watchtower, March 2020)

Wɛlɛ nii va e ɓɔni zunu gila ba ga e zoo e bataizei maa zɔlɔwo.

“Te Ɣɛni Wõini Gè Dɛ Ga Dai E Ɣɛni Ga Nii Gè Ɣɛni Maa Wolizu” (The Watchtower, February 1, 2013)

Wɛlɛ nii va e kɛɛ manɛɛ e ɣaa-ɓaa e bataizei maa zɔlɔwo e vɛɛ velei va ya ɣavele ɓɛtɛ la.

“Ɣaa-Ɓaa E Bataizei Maa Zɔlɔwo?” (Gaa-Zaɣa-Kɛɛ Nu Niinɛitiɛ Ta Bo​—Gaa Wotegitiɛ Ya Ɓɔ Te Va, Fele kelei, toso 37)