KALABO 25
Zɛɓɛi E Ga Gala Na Deʋei De Ʋaa Ma?
Gala Kɔlɔi dɛɛvɛ ga nu ɓuse na “ŋeteai zu ɓuovɛ na ɣa ɣɛɛna su laaʋegɛ ga daa-nɔwɔ-wo tamaa.” (Job 14:1) E ɣisu nii ɣa e ɣɛni ga Gala na deʋei de ʋaa ma? Ani na lei e ɣɛni ga na deʋei, zɛɓɛi sa e ga na deʋei de ʋaa ma? E ɣisu na deʋei ɣa vaazu ɣɛɛzu? Wɛlɛ velei Gala Kɔlɔi gaa-zaɣa-kɛɛ niitiɛ ɣaa wotegɛ la ɓɔɔ ga pagɔ.
1. Ŋetea sɛɓɛi Jehova wõini de maa zɔlɔwo?
Jehova wõini de ɣɛ ŋeteai nii zu kuuzu nɛɛ ɓɔɔɓɔɔ ge su. Siɛgi ma Jehova nu maa-wũgitiɛ ɓɛtɛni la Adã ɓɔga Iivi, e tulu pagɔ ʋeeni te ya, tɔ na lili ga Idɛ̃. Tei sa na ɣɛɛni “Gala ge tuuyiɛ looni te ma, e ɣɛ te maa: ‘A duu ɣa wo lamaa, wo zui maa laaʋe wo maazu vɛtɛ.’” (Genesis 1:28) Jehova ɣɛni wõini te duu ɣa te zui ma ɓɔgapɛ kɛ ga tulu pagɔ na ɣa ɣɛɛna te suoitiɛ maazu vɛtɛ. Gala ɣɛni wõini kɔlɔ-su-wodo ɣɛ nu ɓɔgapɛ zeea na ɣa ɣɛɛna te ɣɛ ŋetea wɔlɔ-wɔlɔ ta wɔlɔ-wɔlɔ.
Velei ɓalaa zaa da ŋeteai lɛ ga velei Gala ge deʋeni la, Gala na deʋei maa lɛ dɛ ʋelini.a (Isaiah 46:10, 11) Gala wõini goo-mɛni bea te yɛ ŋetea wɔlɔ-wɔlɔ ta wɔlɔ-wɔlɔ zii-laa zu.—Faa wuloai kɛnɛ ma 21:3, 4 lodo.
2. Ya kuuzu nɛɛ maa zɔlɔwo ɣɛ le ya ŋeteai zu zaa?
Velei Jehova de ɓɛtɛɛ la, da “tele-bo tuo ma-wõi-wõi kulo.” Na ɣa ga velei da wõi la ga de faa wɛ̃ɛ e vile ba diɛ zii-mai ɣɛ. (Mafiyu 5:3-6 lodo.) Jehova wõini de ɣɛ ga na siɛ-pulua, “de ziɛ ga na tɔgitiɛ ɓɔgapɛ, de wõi la.” Na ɣa ɣɛɛna de feli “ga yii ɣaazɔ.” (Deuteronomy 10:12; Psalms 25:14) Ani da na ɣɛɛna, kuuzu nɛɛ ɓɔɔɓɔɔ ka ɣɛ de ya ani ɓalaa faa ɓaa ka laazu de ma. Da ɣɛna Jehova ʋelizu da kuuzu nɛɛ maa zɔlɔwo da ŋeteai zu, ɓɔvɛlaale de kwɛ̃ni ga vele ɣa e wõini de da ŋeteai ɣɛɛ la.
FAA LAMAA MAA WOLI
Faa maa woli e vile velei va Jehova dɛɛni la ga wõila ɣa zeea ɓɔɔ ga ʋike de ʋaa ma siɛgi ma e zui ɓɛtɛni la. Na ɣa ɣɛɛna nii Gala Kɔlɔi boga e vile na deʋei va nu ɓuse ʋaa ma.
3. Jehova wõini de ŋetea vagɔ ɣɛ
ƲILIOGI nii lɛ ga. Yá wolona wo gaa-zaɣa-kɛɛ nii ɣaa wote.
Zɛɓɛi e kɛɛni Jehova yiɛ zui nii ɓɛtɛ ɓɔɔ ga pagɔ?
A Ecclesiastes 3:11 lodo, wo gaa-zaɣa-kɛɛ nii ɣaa wote:
Zɛɓɛi nii dɛɛzu ga yiɛ e vile Jehova na deʋei va nu ɓuse ʋaa ma?
4. Jehova na deʋei maa lɛ dɛ ʋelini
A Psalm 37:11, 29 ɓɔga Isaiah 55:11 lodo, wo gaa-zaɣa-kɛɛ nii ɣaa wote:
De levegɛ ɣɛ le de kwɛ̃ɛ ga Jehova na deʋei nu ɓuse ʋaa ma maa lɛ dɛ ʋeli boni?
Ani pɛlɛ ɣa ŋala-ŋala na, nu ɣa zoo e kpɛtɛ, vele ɣana nɔ e la ga zui. Velei ɓalaa nu ɓuse kala-ŋalasu la, Gala ka vaazu kpɛtɛzu e fe niitiɛ ya wõila te ya faa ma
5. Da ɣɛna Jehova ʋelizu da kuuzu nɛɛ maa zɔlɔwo da ŋeteai zu
Ani da Gala na deʋei wɛ̃ɛna e vile nu ɓuse va, towa va ga kuuzu nɛɛ de wɔ. ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.
Kulo su-nu-ma zɛɓɛi Terumi maa zɔlɔwoni ga tei e Gala na deʋei wɛ̃ɛni e vile nu ɓuse va?
A Ecclesiastes 12:13 lodo, wo gaa-zaɣa-kɛɛ nii ɣaa wote:
Tei sa Jehova faa lamaa ɣɛɛ de vɛ, zɛɓɛi sa manɛɛ de kɛ bɛ?
NUMAA TANIGA TE ƔƐ: “Zɛɓɛi e ga Gala na deʋei nu ɓuse ʋaa ma?”
Ya gaa-zaɣa-kɛɛ na ɣaa wote ɣɛ le?
NII SA È MAA WOLIA
Jehova wõini de yii-ma ɣɛ wɔlɔ-wɔlɔ ta wɔlɔ-wɔlɔ zui nii ma zii-laa zu. Ani da felina ga yii ɣaazɔ da kuuzu nɛɛ maa zɔlɔwo da ŋeteai zu.
Ma-ɓigitiɛ
Zɛɓɛi e ɣɛni ga Jehova na deʋei Adã ɓɔga Iivi ʋaa ma?
De levegɛ ɣɛ le de kwɛ̃ɛ ga Gala na deʋei nu ɓuse ʋaa ma maa lɛ dɛ ʋelini?
Da kuuzu nɛɛ ɓɔɔɓɔɔ maa zɔlɔwo ɣɛ le da ŋeteai zu?
WƐLƐ FAA LAMAA VA
Wɛlɛ nii va e kɛɛ da laala ga tulugi nii tɔ tili ga Idɛ̃, e ɣɛni ɓɔɔ ga tulu kpɔɔɓɔɔ.
“E Ɣisu Tulugi Nii Tɔ Tili Ga Idɛ̃ Na Ɣɛni Ga Ŋada Ɓɔɔɓɔɔ?” (The Watchtower, January 1, 2011)
Nii wɛ̃ɛ e kɛɛ da ɣɛ tea zui ɣa vaazu yɛsu na wɔlɔ-wɔlɔ ta wɔlɔ-wɔlɔ.
“E Ɣisu Zui Nii Ɣa Vaazu Yɛsu Na Wɔlɔ-Wɔlɔ Ta Wɔlɔ-Wɔlɔ?” (Kɔlɔi nii ɣa fãga wɔlɔi ma)
Wɛlɛ nii va Gala Kɔlɔi boga e vile velei va ya kuuzu nɛɛ maa zɔlɔwo la ya ŋeteai zu.
Wɛlɛ velei zunui nii e ɣɛni ɣi-gaa-ziɛzu ga ŋɛni ɓɔgapɛ ka zeea, e kwɛ̃ni ga ŋɛni ɓɔgapɛ taale ɔ ɣɛ zeea.
a Na wulu ɣalabogi zu, ya vaazu zaɓui wɛ̃ɛsu e kɛɛni Gala na deʋei lɛ dɛ ɣɛɛni.