VELEI MAA NƐƐ KOLAI MAA VEAITIƐ TE TA ŊETEAI ƔƐƐ LA

**Faa Vagɔi Taniga E Vile Yii-Ma Ɣɛ Wɔlɔ-Wɔlɔ Ta Wɔlɔ-Wɔlɔ! wɔlɔi va**

E wuuzu nɛɛvɛ ɓɔɔ e vile ʋiliogitiɛ ɓɔga gaa-zaɣa-kɛɛtiɛ va te Yii-Ma Ɣɛ Wɔlɔ-Wɔlɔ Ta Wɔlɔ-Wɔlɔ! wɔlɔi zu? E wuuzu nɛɛvɛ wɔnɔ e vile vɛtiɛ va ponɛi na ga “Numaa Taniga Te Ɣɛ,” “Ɣaa-ɓaa e nii ɣɛ,” ta “Wɛlɛ Faa Lamaa Va”? Zɛɓɛi wɔnɔ ya pɛtɛ kɔlɔi nii zu ga ya ɓɔ e va Gala goo wotii zu?—Maf 28:19, 20.

“Yii-Ma Ɣɛ Wɔlɔ-Wɔlɔ Ta Wɔlɔ-Wɔlɔ!” wɔlɔi laa laogɛ “JW Wɔlɔ Ɓulugi ma.” Nii kuloai koba tɔ vɛ lɛɛzu ya “Ma Zɛvɛ 1 Ma Zɔɔlaitiɛ” vɛtɛ na.

Ʋiliogitiɛ E Vɛɛ Kɔlɔitiɛ Va: Ani e wõini e Gala Kɔlɔi lɛ ga nu kɔlɔi nii zu tɔwɔ ɛ̀ lɛ wõini ɔ kɛ foũgi ɔɔ kɔ̃pitai ma, ya leve ɣɛ le e ma zɔɔlaitiɛ ɓɔgapɛ sɔlɔwo ŋada gila? Ani kɔlɔi nii ɣa e ya foũgi ɔɔ kɔ̃pitai ma, yee ɓado ma zɛvɛ naagɔi ta nɛpɛ ba. Na ɣa ɣɛɛna yii kala-bogitiɛ wu, e yee ɓado ma zɛvɛi na ma zɔɔlaitiɛ va. (Wɛlɛ foote 1 va.)

“Printed Edition” Velei Towa Ɓɔ La E Va: Ani kɔlɔi nii ɣa e ya foũgi ɔɔ kɔ̃pitai ma tɔwɔ yiɛ nui ta ɣalabo su, li vɛ ponɛi na ga “Printed Edition.” Towa ɓɔ e va kalabogi wo fai zu. Ya kalabogi laa laona, wɛlɛ naa maa zuvɛ va e yee-zaasu vele, ŋɛniitiɛ te na, yee ɓado gaa ɓalagi va na ɣa ɣɛɛna e yee ɓado “Printed Edition” va. Tɔ vaazu ɓɔsu e va e ɣi-gaa-ziɛ e vile zɛpɛ wũgi va kalabogi zu. Ani e wõini e li wulu e ɣɛ velei e yɛga la, li nɔ na kɔnɔ e yee ɓado “Digital Edition” va.

“Yii-Ma Ɣɛ Wɔlɔ-Wɔlɔ Ta Wɔlɔ-Wɔlɔ!” wɔlɔi laa laogɛ “JW Wɔlɔ Ɓulugi ma.” Niitiɛ kuloai koba tɔ vɛtiɛ lɛɛzu, “Kavele Ɓɛtɛvɛ?” ta “Kɔlɔi nii laa wulo zuvɛ.”

“Kavele Ɓɛtɛvɛ?”: Kologi niitiɛ te kɔlɔi nii laa wulo zuvɛ, te niitiɛ lɛɛvɛ maa nɛɛ nu kɛ ga e vɛɛ kuuwui va ga te Gala goo wo na ɣa ɣɛɛna e bataizei maa zɔlɔwo. (Wɛlɛ foote 2 va.)

Kɔlɔi Nii Laa Wulo Zuvɛitiɛ: Niitiɛ ponɛi kɔlɔi nii laa wulo zuvɛitiɛ, ta ki-daa-wodo ʋe e vile zɛpɛ wũgi taniga va. Ani kɔlɔi nii ɣa e ya foũgi ɔɔ kɔ̃pitai ma, ya wolona kɔlɔi nii laa wulo zuvɛ ta nɛpɛ ma, ŋada ɣa na ya yee ɓadona ga e li ga yiɛ wulu vɛ e wɛ̃ɛga na kalabogi zu. (Wɛlɛ foote 2 va.)

Taitiɛ e Gala Kɔlɔi lɛɛzu ga tiɛ Yii-Ma Ɣɛ Wɔlɔ-Wɔlɔ Ta Wɔlɔ-Wɔlɔ! wɔlɔi zu, ɣaa-ɓaa yiɛ kɔlɔi nii lɛ ga tiɛ e yɛsu te daa wulo ani ɓalaa ta bataizei maa zɔlɔ wona. Siɛgi ɣaalu ya siɣi ba ga e manui ɣalabo. Daali mai ɣaalu na ɣa ɣɛɛna manui ɣaalu ga Gala Kɔlɔ maa woli nui ta e ʋaa ma ani ɓalaa e bataizei maa zɔlɔ woga. Ani wa e ɣaa yɔwɔ̃i ta ɣa wo lia ga wo manui ɣalabo, tɔwɔ é yɛpɛ, tɔ ɓalaa towa siɛgi ɣaalu.