VELEI MAA NƐƐ KOLAI MAA VEAITIƐ TE TA ŊETEAI ƔƐƐ LA
Velei Maa Nɛɛ E Gala Kɔlɔ Maa Woli Ʋai Ma Ʋiliogitiɛ Lɛɛ La
Gala Kɔlɔ maa woli ʋai ma ʋiliogitiɛ da dɛ ga numaa Gala goo wo su vɛ, ta ga naagɔ. Zɛɓɛi e kɛɛ te ʋiliogi niitiɛ ɓɛtɛi ga gile-gile?
Zɛɓɛɛ É Kɛɛ Maa Nɛɛ E Baaboi Maa Woli?—Mawoozagi, te ʋiliogi nii ɣavele ɓɛtɛvɛ ga e ɓɔ numaa va te wõi ga Gala Kɔlɔi ani ɓalaa manui ɣa liizu gala pɛlɛ wu. Taitiɛ ta wɛlɛ ʋiliogi nii va, towa ɓɔ te va ga te Gala Kɔlɔi lodo ga te gaa-zaɣa-kɛɛ ɓigiitiɛ ɣaa wotegitiɛ wɛ̃ɛ. Na ɣa ɣɛɛna e po-kɔ̃ɔ-ma lɛɛvɛ e vile ki-daa-wodoi niitiɛ taniga va te Gala Kɔlɔi zu. É yɛpɛvɛ e vile nii va maa nɛɛ nu kɛ ani e wõini e Gala Kɔlɔi maa woli.
Zɛɓɛɛ É Kɛɛ Maa Nɛɛ E Baaboi Maa Woli? (ma ɓuogi), ʋiliogi nii ma ʋaa wulovɛ nɔ e ɣɛ velei mawoozagi la, kɛ nɛ dɛɛ kpuovɛ ga ʋike. Solowogɛ ɓɔɔ vɛtiɛ ʋaa ma da Gala goo wo na, kɛ ma numaitiɛ te ɣaazu ʋileai nɔ wɔ.
Ya Gala Kɔlɔi Maa Woli Ɣɛ Le? Te ʋiliogi nii ɓɛtɛvɛ ga e ɓɔ nu va e wõi ga e yee zei Gala kɔlɔ maa woliai wu. Na ɣa ɣɛɛna te gaa-zaɣa-kɛɛ taniga ɣaa wotegɛ su e vile Gala kɔlɔ maa woli ʋai va. Te dɛɛvɛ wɔnɔ nii maa nɛɛ nu kɛ ani e wõini e Gala Kɔlɔi maa woli.
E Mama Yee Zeizu Gala Kɔlɔ Maa Woliai Wu, te ʋiliogi nii ɣavele ɓɛtɛvɛ ga de dɛ ga niitiɛ te yee zeiya bu ga diɛ Gala Kɔlɔi lɛ ga tiɛ. Velei ɓalaa ʋiliogi nii la kɔlɔi nii lɔɔ zeizuvɛ daa ga Yii-Ma Ɣɛ Wɔlɔ-Wɔlɔ Ta Wɔlɔ-Wɔlɔ, kɔlɔ-laɣa felegɔi ma, da dɛ ga numaa ani da ɣɛna bolosiɛ nii lɛɛzu ga numaa Yii-Ma Ɣɛ Wɔlɔ-Wɔlɔ Ta Wɔlɔ-Wɔlɔ! Ʋiliogi nii yɛpɛvɛ e vile niitiɛ va kɔlɔi nii vilegɛi ba e vɛɛ velei va kalabogi vaazu ɣɛɛzula.
Velei ɓalaa te ʋiliogi niitiɛ ɓɛtɛi la ga gile-gile, ya dɛ ya ta lɛ ga nu ɔɔ e teve manui wɔ ani solowogɛ. Maa nɛɛ daitiɛ de ga Gala goo wo bea de te wɛ̃ɛ ga pagɔ na ɣa ɣɛɛna diɛ te lɛ ga numaa.