Ɓɔ Niitiɛ Va Te Wõini Te Faa Wɛ̃ɛ E Vile Gala Ba

1. Velei numaa ta yee zei la keela woo vagɔi wu, zɔɔzu wulovɛ ɣɛ le? (Te Ɣɛɛ Ʋaitiɛ 13:47, 48; 16:14, 15)

NU LAMAA wɔlɔ-wɔlɔi zu, tei te Gala goi mɛnini te yee zeini bu. (Te Ɣɛɛ Ʋaitiɛ 13:47, 48; 16:14, 15 lodo.) Vele ɣana e la zaa, nu lamaa ta ʋolo ma-wũgi keela woo vagɔi mɛnisu, te wuuzu ɣa nɛɛ. Velei ɓalaa numaa taniga tɛ lɛ yee zeia keela woo vagɔi wu da bona te ma, siɛ ta ɣa levena ta yee zei bu. Da ɣɛna Gala goo wosu, de wɛlɛ numaa va te wõini te faa maa woli e vile Gala ba, zɛɓɛi maa nɛɛ de kɛ?

2. Da Ɣala goo wotii maʋaa wulovɛ e ɣɛ kpele wulo nu ɣɛ le?

² Ɣi-gaa-ziɛ po-kɔ̃ɔ-mai nii ma. Da Ɣala goo wotii maʋaa wulovɛ e ɣɛ kpele wulo nui. Ani sii zii ŋɛnii ta ɣa ɓoei na, tanisu towa na wulo. Na ɣa ɣɛɛna towa ɣaa ɓaa zɔitiɛ ma e yɛsu te wɔlɔ. Vele ɣa na nɔ e la, ani nui ta ɣa yee zei na Gala goi wu, da ɣaa ɓaa ga de ɓɔ manui va kaʋile ga e ɣɛ ga Kolai Maa Veaitiɛ te ta. Na ɓalaa ɣɛɛvɛ, taitiɛ tɛ lɛ dɛ yee zeini Gala Kɔlɔ maa woliai wu, ga ɣaa-ɓaa ge ɓɔ te va ga te zaɓui wɛ̃ɛ e kɛɛ Gala Kɔlɔ maa woli ʋai ga faa ɓi. (Jɔ̃ 4:35, 36) Ani da ɣɛna ga numaa maa ɓɛɛ nu, na ɣa ɓɔ de va de kwɛ̃ɛ nii numaa te wõini ɓɔɔ te wuito ma. De yɛpɛ na sa e vile faa maa wũgi va da kɛ ani da nu zɔlɔwo na e wõini e faa maa woli e vile Gala Kɔlɔi va. Da yɛpɛ wɔnɔ e vile nii va da kɛ ga de ɓɔ manui va e ɣɛ ga Jehova ʋeli nui ta.

DA LEVE ƔƐ LE DE ƁƆ NIITIƐ VA TE WÕINI TE FAA WƐ̃Ɛ E VILE GALA BA

3. Zɛɓɛi maa nɛɛ de kɛ ani da nu vɛtɛna e wõini e faa maa woli e vile Gala ba? (1 Kɔlĩitiɛ 9:26)

³ Ani da ɣɛna Gala goo wo su, de wɛlɛ numaa va te wõini te Gala Kɔlɔi maa woli, de ɓɔ te va kaʋile ga te vile pelei nii ma e liizu zɛʋui nii wɔ kwɛ̃ɛ gɛ lɛ ba. Folo maa wũgi de bo manui ga de wõini, diɛ Gala Kɔlɔi lɛɛ la. Na ɣa ɣɛɛna de bo ma ga e va gaalɛ-bai zu.— 1 Kɔlĩitiɛ 9:26 lodo.

4. Po-kɔ̃ɔ-ma ʋe e vile nui ta va e dɛɛni ga kavele ɓɛtɛi e ɣɛni ga e Gala Kɔlɔi maa woli.

⁴ Bo manui ma ga e wõini yiɛ Gala Kɔlɔi lɛɛ la. Taitiɛ da yɛpɛ te wɔ, ta yee zei ɓɔɔ nɔ Gala Kɔlɔ maa woliai wu. Ma wo-kɔ̃ɔ-mai ta ɣa ga, Dɔwɔ Ɓɔkɔ folo gila ŋaza nu gila e ɣɛni Canada e liini vɛ de ɣaa yɔwɔ̃itiɛ te ɣɛni loni na, e kɔlɔi nii gila siɣi Yii-ma Ɣɛ Wɔlɔ-Wɔlɔ Ta Wɔlɔ-Wɔlɔ! De ɣaa yɔwɔ̃i nii e ɣɛni loni na e boni ma ga, ga Gala Kɔlɔi lɛ ga numaa naʋolo ʋaa lɛ ba. E yee zeini bu na ɣa ɣɛɛna e na nɔɓai ʋe de ɣaa yɔwɔ̃i ya. Tei na tawolo kɛɛni foloi na nɔ ma, ŋaza nui keela woo leveni de ɣaa yɔwɔ̃i na wɔ e ɣɛni ga ŋaza nu e vile siɛgi va te vaazu Gala Kɔlɔ maa woliai lɔɔ-zei zu la. Tei de ɣaa yɔwɔ̃i boni ma ga de kɛ sivili ʋoloi, e ɣɛni ma: “ŋinaa wɔ? Gɛ lɛ liizu ŋada nɛpɛ.” Te Gala Kɔlɔ maa woliai ɣɛɛni Dɔwɔ-wala ʋoloi na ma. Ŋaza nui vaani gaalɛ-bai zu Sedi ʋoloi na ma, na ɣa ɣɛɛna yiɛ ɣaa-ɓaa ga siɛ-pulu ɣɛ te yɔɔzu ta Jehova.

5. Da leve ɣɛ le de dɛ ga da ga faa maa ɓɛɛ vea ani da bona nu ma ga de wõini diɛ Gala Kɔlɔi lɛɛ la? (Wɛlɛ ɓalaa footeitiɛ va.)

⁵ Gaama zu, niitiɛ da Gala goi wo te ma te pɛ taa lɛ te vaazu yee zei zu bu e ɣɛ velei nɔ ŋaza nui nii kɛɛni la. Numaa taniga, siɛ tamaa ɣa leve tɔ vɛɛ yee zei zu Gala goi wu. Maa nɛɛ de zɛpɛi lɔɔ-zei e vile zɛpɛ wũgi nii va ya manui yii zo. Na ɓalaa ɣɛɛvɛ, ani da ɣɛna luɓozu ga pagɔ, diɛ dɛ ga wõila ɣa de ya e vile manui va, su lɛ lebiga manui yee zei Gala Kɔlɔ maa woliai wu. Zɛɓɛi maa nɛɛ de bo ani de wõini de Gala Kɔlɔi lɛ ga manui? Taitiɛ te vɛɛ Gala Kɔlɔ maa woliai lɔɔ-zeizu ga numaa, te taniga ɣaa-zaɣa-kɛɛni, de wɛlɛ nii va te boni.

6. Zɛɓɛi da kɛ ga de ɓɔ nui nii va e yee zeia Gala Kɔlɔ maa woli ʋai wu?

⁶ Te Gala goo wo bea ɓɔga panɛ̃ɛtiɛ te ɣaa-zaɣa-kɛɛni, tɔwɔ te boni ga zui taniga zu ya ɣɛna wõini e Gala Kɔlɔi lɛ ga nu, mɛlɛ ɣɛ tea “ge wõini ge Gala Kɔlɔi lɛ ga yiɛ,” ɔɔ “ge wõini giɛ e ɣalabo.” Kɛ, towa zolowo ani ya ɣɛna tea “ge wõini ge va diɛ yɛpɛ,” ɔɔ “ge wõini ge va de faa maa woli e vile Gala Kɔlɔi va.” Ani e wõini wa manui wo yɛpɛ wɔnɔ, ɣeeta ya ɣɛ tea, “Towa wulo ga diɛ ani da kwɛ̃ɛna ga gaa-zaɣa-kɛɛ ɓigitiɛ pilegɛi da ŋeteai va te ɣaa wotegi ɣa Gala Kɔlɔi zu,” ɔɔ “Gala Kɔlɔi lɛ nɔ Gala bea ʋaa ma kɛ towa ɓɔ de va pele lamaa zu.” Ya ɣɛ wɔnɔ tea: “Ɛ lɛ vaazu siɛ tamaa ziɣi zu, tɔ vaazu ɣɛɛzu ga militi 10 ɔɔ 15, kɛ ya vaazu faa lamaa maa woli zu ya ɓɔ e va ya ŋeteai zu.” Kɛ, lɛ ga e bo manui ma ga wa “yɛsu wõisu dɔɔ nɛpɛ,” kɛɛ ʋaa ma manui mɛlɛ ɣi-gaa-ziɛ ga tɔ ma ga kui ga yɛ e maa kpowũ.

7. Minɛɛ ɣa numaa taniga te gaamai wɛ̃ɛni na ga maa wũ? (1 Kɔlĩitiɛ 14:23-25)

⁷ Bo te ma ga te va gaalɛ-bai zu. Ya pɛtɛ ga Pɔɔ na siɛgi zu, tei numaa tɔ li gaalɛ-bai zu, na ɣa te gaamai wɛ̃ɛni na. (1 Kɔlĩitiɛ 14:23-25 lodo.) Zaa ɓalaa tɔ dɛ ɣɛɛzu. Taitiɛ te Gala Kɔlɔ maa woliai lɔɔ-zeia ga niinɛ, siɛ-pului e te yɔɔzu ta Jehova su ɣaa-ɓaa kaʋile ani ta ɣɛna vaazu gaalɛ-bai zu. Siɛ sɛɓɛi ya bo te ma ga te va gaalɛ-bai zu? Kɔlɔi nii zu Yii-ma Ɣɛ Wɔlɔ-Wɔlɔ Ta Wɔlɔ-Wɔlɔ! Kalabo 10 ɣa ɓɔ manui va ga e va gaalɛ-bai zu, kɛ lɛ ga e naa maa kpowũ e yɛsu wo ziiti kalabo 10 zu ɔɔ vɛɛ bosu ma. Foloi wa manui wo vaazu yɛpɛzu la, bo ma ga e va Sedi folo ɣaalɛ-bai zu. Ɣeeta ya yɛpɛ e vile kpɔ zɛpɛi ma wũgi va ɔɔ e vile faa ɓigi taniga va wo vaazu maa wolizu Wasitawɔi zu.

8. Ani da bona nu ma ga e va da ɣaalɛ-bai zu zɛɓɛi maa nɛɛ de yɛpɛ e vile ba? (Isaiah 54:13)

⁸ Ani ya ɣɛna nui nii lilisu e yee zeia Gala Kɔlɔ maa woliai wu, ga e va gaalɛ-bai zu, bo ma ga da ɣaalɛ-bai wulovɛ ba leilaa lɛ ga velei Gala pɛlɛi zɔitiɛ te la manui vɛɛ liizu bu. Taitiɛ da Gala Kɔlɔi lɛ ga tiɛ tei te ta vaani gaalɛ-bai zu ga maa-wũ e nui nii ɣaa-zaɣa-kɛɛni ya Gala Kɔlɔi lɛɛ la yiɛ ɣɛ ma “Nui e Wasitawɔi ma ɓawola e nu ɓɔgapɛ na daa-zeigi wɛ̃ni?” De ɣaa yɔwɔ̃i boni ma ga ge pɛ ga ɣaa-ɓaa ga ge ɣiini na daa-zeigitiɛ wɛ̃ɛ, e ɣɛ velei nɔ de da numaitiɛ ta laa-zeigitiɛ wɛ̃ni la. Nui te Gala Kɔlɔi lɛɛzu la e boni ga na Gala pɛlɛi wu numaa tɛ lɛ ɣiini ta laa-zeigitiɛ wɛ̃ni. E wulo na wulu, zaɓui e kɛɛ da ɣaalɛ-ba, towa wulo ga numaa. (Isaiah 54:13 lodo.) A da ɣaalɛ-ba ga de Jehova ʋeli, de faa maa woli zeea, na ɣa ɣɛɛna de ɣiini zii ɓaa. (Hii. 2:12; 10:24, 25) Na wɔ ka e kɛɛ, da ɣaalɛ-baitiɛ ɓɔgapɛ ta ɣɛ pele ma. (1 Kɔl. 14:40) Ga Kĩidɔ̃ Hɔɔgi la ɓɛtɛ ɓɔɔ ga pagɔ nii ya kɛ ge zoo ge faa maa woli na. Gɛlɛ wɔlɔ-wɔlɔ yee viliga ʋoo-zaɣa ʋaazu. Zaɓui ɣa ga gɛ lɛ gɔmɛti ʋaa va; ɔ nɔ ɣɛ ga ge vɛɛ ɓulu ba ga ge zɔɔ-zɔɔ pile gɔmɛtii wulu. Towaa ɣɛ ga faa vagɔ ga e ʋiliogi nii lɛ ga nui e Gala Kɔlɔi lɛɛzu la, Zɛɓɛi Ga Kɛ Kĩidɔ̃ Hɔɔgi La? Na ɣa ɓɔ ba e kwɛ̃ɛ velei gaalɛ-bai vaazu ɣɛɛzu la.

9-10. Ani da bona nui ta ma ga e va da ɣaalɛ-bai zu, zɛɓɛi da bo ma ga e ɓɔ ba ga e mɛlɛ luo? (Wɛlɛ ɓalaa footei va.)

⁹ Numaa taniga tɛ lɛ ɣɛɛ wõini tɔ va gaalɛ-bai zu, zaɓui ɣa ga ta ɣɛ ɣi-gaa-ziɛzu ga, da vaazu bosu te ma ga te “ɣɛ ga Jehova Na Seeleitiɛ te ta.” Bo manui ma ga, ge wuuzu ɣa nɛɛ ga numaa te laali ge ma. Na ɣa ɣɛɛna gɛ lɛ ɓoeia nu la ga e vɛɛ ge va ɔ nɔ ɣɛ ga ge bo ma ga e gaa-zaɣa-kɛɛ ta ɣaa wote. Kaala vea ta va gaalɛ-bai zu, e vɛɛ ɓalaa niitiɛ va lopaa te te ya. Ga ɣaalɛ-bai zu, gɛ lɛ lopaitiɛ wuloa te ɣaa veaitiɛ woba gɔ ge li gatiɛ ŋada ɓalaa. Kɛ ta zei ta numaitiɛ woba na ɣa ɣɛɛna te pɛ te faa maa woli kii-ma. Na ɣa ɓɔ duu kɛɛ veaitiɛ va, te kwɛ̃ɛ vɛ te laitiɛ te na e vɛɛ niitiɛ va natiɛ te maa wolizu. (Deut. 31:12) Gɛ lɛ numaa ɣaa-zaɣa-kɛɛ ga te naʋolo ʋe ɔɔ nɔ ɣɛ ga ge ŋɛni ʋe te ya ga te naʋolo lɔsu. Kɛ ga ziɛzu ga nii, Ziizɛ boni ga: “Nii wo maa zɔlɔ woga wɛ lɛ sɔ̃wɔ ʋeeni a teve te mɛlɛ geea wo ma.” (Maf. 10:8) Ya bo wɔnɔ manui ma ga seɣei ya vaa la gaalɛ-bai zu, lɛ ga kɛni sɔ̃-wɛ̃ɛ ɓai. Nu ɣigi ɣa Gala ka pɛtɛ, lɛ ga manui ɓɛtɛ velei.—1 Sam. 16:7.

¹⁰ Ani manui ɣa vaana gaalɛ-bai zu, yee zei manui wu ɓɔɔ ga pagɔ. Manui lɛ ga kuuwu wũ-tuo veaitiɛ e vɛɛ e ɣaa yɔwɔ̃itiɛ va. Ani ya yee zeina ɓɔɔ manui wu, kuuzu ɣa nɛɛ ga e va wulu. Wa ɣɛna gaalɛ-bai zu, ani Gala Kɔlɔ lɛ manui ya, ya yá dɛi laa lao e na lɛɛ la na ɣa ɣɛɛna e ɓɔ ɓa e wulo zɛpɛi zu-nu-ma ɔɔ nii wo maa wolizu kɔlɔ zɛvɛi na zu.

YA ƁƆ ƔƐ LE NUI NII VA E GALA KƆLƆI LƐƐZU LA

11. Nui e Gala Kɔlɔi lɛɛzu la ya leve ɣɛ le e dɛ ga wũfe-ma ɣa e ya e vile siɛgi va e zeea?

¹¹ Zɛɓɛi maa nɛɛ de pɛɛ ɣibɛ ani da ɣɛna Gala Kɔlɔi lɛɛzu ga nu? Kwɛ̃ɛ ga nui e kalabosu, tii ɣa ma. Ma wo-kɔ̃ɔ-mai ta ɣa ga, ɣaa-ɓaa e li siɛgi ma ya bo manui ma, ani ɓalaa vɛ e na numaa tɛ lɛ siɛgi ʋaa ziɣia ga faa ɓi. Na ɓalaa ɣɛɛvɛ ya ʋolo maa wũgi liizu na, ɣaa-ɓaa e kalabogi zu ɓuo. Niitiɛ te vɛɛ Gala Kɔlɔi lɛɛzu ga numaa taniga te boga ga, towa zolowo ga e wolo kaʋile, ani ɓalaa manui wõini e wuito dɛ. Na ɣa ɣɛɛna mɛlɛ yɛpɛ ga tamaa. Ɓe ba manui yɛpɛ ga tamaa e vile niitiɛ va e kigi zu.—Prov. 10:19.

12. Zɛɓɛi maa nɛɛ de pɛɛ ɣibɛ ani da ɣɛna Gala Kɔlɔ maa woliai lɔɔ-zeizu ga nu?

¹² Tɔɔ-zei zuvɛ ɣaa-ɓaa e ɓɔ manui va e Jehova ɓɔga Ziizɛ wɛ̃ɛ na ɣa ɣɛɛna wõila ɣɛ zeea te ʋaa ma. Ya nii ɣɛ ani ya ɣɛna Gala goitiɛ lɛɛzu ga manui, lɛ ga niitiɛ ya ɓɔɔ e koni e vile Gala Kɔlɔi va. (Te Ɣɛɛ Ʋaitiɛ 10:25, 26) Pɔɔ ɔ ɣɛna kalabo bosu ɔ yɛpɛ e vile Ziizɛ va, nii Jehova teveni ga e ɓɔ de va ga de kwɛ̃ɛ, na ɣa ɣɛɛna wõila ɣɛ de ya faa ma. (1 Kɔl. 2:1, 2) Pɔɔ gaa wodoni ɓɔɔ kala nii e kɛɛ e ga faa ɓi ga te ɓɔ niitiɛ va te ɣɛɛ ga Kolai Maa vea ga niinɛ ga tuɓo-vele vagɔ ɣɛ te ya, nii maʋaa ɣa wulo e ɣɛ zɛni, kani e vɛɛ tɔnɔ ba wɔti va. (1 Kɔl. 3:11-15) Tuɓo-vele vapagi niitiɛ taniga ta ga zee-la-ma, kele-ɣele, faa ɣaa ɣa ʋai, ta duobai e nu ya Jehova ʋaa ma. (Ps. 19:9, 10; Prov. 3:13-15; 1 Pite. 1:7) Vile Pɔɔ na po-kɔ̃ɔ-mai zu ani ya ɣɛna numaa ɣalabo su ga zee-la-ma ɣɛ te ya na ɣa ɣɛɛna siɛ-pulu vagɔ ɣɛ te yɔɔzu ta Jehova.—2 Kɔl. 1:24.

13. Da leve ɣɛ le de dɛ ga da ga faa ɣaa ɣa vea na ɣa ɣɛɛna diɛ yii-lɔɔ niitiɛ ya de Gala Kɔlɔi lɛɛzu ga tiɛ? (2 Kolĩitiɛ 10:4, 5) (Wɛlɛ ɓalaa footei va.)

¹³ Vile Ziizɛ na po-kɔ̃ɔ-mai zu, e vile kalabo faa va. Dɛ ga ya ga faa ɣaa ɣa nu na ɣa ɣɛɛna yiɛ zii-lɔɔ wulo. Ɣaa-ɓaa ga e mɛlɛ ɣɛ gaa-zaɣa-kɛɛ wosu ya manui ɓala. Ani manui lɛ fai ta ɣaa ɣani, wa li ga luo na ɣa ɣɛɛna, na ta ɣa kɛɛna wa va wulu. Mɛlɛ ɓoei manui la ga kɛni nɔ ya yee zei kalabogi ta wu, kɛ ya ɓe ba e ɣi-gaa-ziɛ ma. (Jɔ̃ 16:12; Kol. 2:6, 7) Gala Kɔlɔi boga ga zɛɛ-ʋaa ɣalabogi nii de ɣaa ɓaazu ga de zee maazu ɣale maʋaa wulovɛ e ɣɛ ŋɛnii kee ɣaa-ɓai. (2 Kɔlĩitiɛ 10:4, 5 lodo; wɛlɛ nii va ponɛi e vile “overturning strongly entrenched things.” va) Ga de bo nui nii ma ga e wulu ɣaaʋe niitiɛ va dai la kwena tamaa wuuzu, towa zolowo ga de bo ma ga e yee la Jehova ma.—Ps. 91:9.

DA LEVE ƔƐ LE DE ƁƆ NIITIƐ VA TA VA GAALƐ-BAI ZU GA NIINƐ

14. Maa nɛɛ de niitiɛ zo ɣɛ le ta va gaalɛ-bai zu ga niinɛ?

¹⁴ Jehova lɛ wõini dɔ suyɛvɛ bo ga velei da niitiɛ so da ta va gaalɛ-bai zu ga niinɛ. Ɓaa towa ɣɛ ga vɛ te wuloa na, ɓaa ta ga naʋolo kɛɛ vea, ɔɔ zii woi ta bo. (Jĩi 2:1-4, 9) Na ma da wõila lɛ ɣɛ le ga niitiɛ ta va gaalɛ-bai zu ga niinɛ?

15-16. Da yee zei niitiɛ wu ɣɛ le ta va gaalɛ-bai zu ga niinɛ?

¹⁵ Numaa taniga ta va da ɣaalɛ-bai zu ga te kwɛ̃ɛ nii e ɣɛɛzu na, ɔɔ ɣeeta nu ta ɣa e boga te ma ga te va gaalɛ-bai zu. Na ma ani numaa ta vaana da ɣaalɛ-bai zu towa ɣɛ ga faa vagɔ ga de yee zei te wu. Yee zei te wu kɛ, mɛlɛ kɛ tɔ ɓala. Ya bo ɓalaa te ma ga te va te zei e woba. Ya ya Ɣala Kɔlɔi laa lao e dɛ ga manui ta kɔlɔi nii wo maa woli zu, ɔɔ e ta ʋe zeea. Na ɣa ɣɛɛna pele taniga ɣaa-ziɛ ga e yee zei te wu. Zunu gila liini Kĩidɔ̃ Hɔɔgi la de ɣaa yɔwɔ̃i ta yee zei bu, e ɣɛni na ma, ga ɓɔɔ luozu ga velei ge maa ɣilia la. De ɣaa yɔwɔ̃i yɛpɛni pɔ ga pagɔ na zii-la, na ɣɛ ma, Jehova Na Seeleitiɛ ɓalaa ta ga nu ɓuse. Tei siɛ ta leveni zunui nii ɣaa ɓaani e bataizei maa zɔlɔwo, kɛ lɛ wɔlɔ-wɔlɔ yee-mani nii ma de ɣaa yɔwɔ̃i boni ma. Nii vɛɛ ɣibɛ: Ani numaa ta vaana da ɣaalɛ-bai zu ga niinɛ, mɛlɛ gaa-zaɣa-kɛɛ nii wo ya kɛ te wũfe ɔɔ te fai ta wo lɛ ga tɔ bo.—1 Pite 4:15.

¹⁶ Da yee zei niitiɛ wu ta va da ɣaalɛ-bai zu ga niinɛ, ani da dɛɛna ga, wũfe-ma ɣa de ya de yɛpɛ velei zu. Da dɛ wɔnɔ gaa-zaɣa-kɛɛtiɛ zu da gaa wote, zɛpɛi da fe e vile niitiɛ va tɛ lɛ ga Jehova ʋeli vea ɔɔ e vile niitiɛ va te lai la. De mɛlɛ niitiɛ wo ya kɛ manui ziɣi pele va ɔɔ ya kɛ e ɣi-gaa-ziɛ ga ta ɓalaa. (Taitɔ 2:8; 3:2) Ma wo-kɔ̃ɔ-mai ta ɣa ga, taitiɛ tɛ lɛ ga Jehova ʋeli vea de mɛlɛ wɔlɔ-wɔlɔ yɛpɛ ga yowũa e vile niitiɛ va te lai la. (2 Kɔl. 6:3) Nii mavele ma, de ɣaa yɔwɔ̃itiɛ ta kpɔ zɛpɛ ʋe maa nɛɛ te da ma ga fai nii. Maa nɛɛ wɔnɔ te kwɛ̃ɛ ga numaa taniga ta kpɔgi na zu tɛ lɛ ga Jehova ʋeli vea na ma woo taniga ta na tɛ lɛ vaazu gaa ɣazu.

17. Zɛɓɛi maa nɛɛ de pɛɛ ɣibɛ ani da ɣɛna Gala goo wosu?

¹⁷ Gela bo pele gile-gile, numaa ɣalabo fai ɣa ga tii maa nɛɛ de bo kaʋile. Na ɣa ɣɛɛna siɛ nɛpɛ ma da numaa zɔlɔwo te wõini te faa wɛ̃ɛ e vile Jehova va.” (Te Ɣɛɛ Ʋaitiɛ 13:48) Ani da na ɣɛɛna, de mɛlɛ maa nɛkɛ ga de bo te ma ga de wõini diɛ Gala Kɔlɔi lɛ ga tiɛ na ɣa ɣɛɛna de bo te ma ga te va gaalɛ-bai zu. Ani da na ɣɛɛna da ɓɔ te va te vile pelei nii va ya zɛʋu ʋe nu ya.—Maf. 7:14.