1925—Kwena 100 Levega Sa

NII TE ƔI GE ƔƐNI BA, LƐ ƔƐƐNI

Kwenagi 1925, e ɣɛni Gala Kɔlɔ maa woli vea lamaa ɣisu ga, Gala gɔ zui ma ɣɛ ga ŋada vagɔ kwenagi na zu. Zɛɓɛ ʋaa ma? De ɣaa yɔwɔ̃i Albert Schroeder, nii tei na tawolo kɛɛni e ɣɛni ga Gala Goo Wotii Maazu Vɛtɛ Veaitiɛ te ta, boni ga: “Taitiɛ Gala yee ɓadoga te va, tɔ li Gala ta na ɣa ɣɛɛna te vɛɛ Ziizɛ va ga te Masadai ɣɛ. Na ɣa ɣɛɛna Jehova ʋeli veaitiɛ wɔlɔ-wɔlɔi zu zee-la-ma ɣɛni te ya, taniga ta ga Eeɓɔlɔhɛ̃ɛ, Deeve e vɛɛ numaa taniga va, tɔ wuziɣi saa ya na ɣa ɣɛɛna te gaa-ɓaa maa zɔlɔwo Gala na Masadai wu ga te zui nii leʋe.” Kɛ, tei na lɛ ɣɛɛni kwenagi na zu, de ɣaa yɔwɔ̃ taniga yii zuulini.—Prov. 13:12.

Velei ɓalaa te yii zuulini la, Gala Kɔlɔ maa woli vea lamaa te ɣaa ɓaani tiɛ Gala goo wo na ɣa ɣɛɛna tiɛ ɓɔ numaa va ga te ɣɛ ga Jehova Na Seeleitiɛ te ta. De yɛpɛ e vile tii va te kɛɛni ga te Gala goo wo nu lamaa ma.

TE LODIƐ WŨ LAMAA LONI

Lodiɛ wũgi Gala Kɔlɔ Maa Woli Veaitiɛ te toni daa ga WBBR, nu lamaa tɔ wuito ma. Na wulu wonagi zu, te lodiɛ wũ kpalaa loni, Illinois, Chicago woba. Lodiɛ wũgi nii na daa-zeigi ɣɛni ga, WORD. Ralph Leffler, nii e ɓɔni de ɣaa yɔwɔ̃itiɛ va ga te lodiɛ wũgi nii lo, e boni ga “Towa ɣɛ na ga kpɔkɔ, nu lamaa ta wuito lodiɛ wũgi nii ma.” Ma wo-kɔ̃ɔ-mai ta ɣa ga, kaalai ta ɣɛni Pilot Station, Alaska. Te maa wozagɛi ɓɔɔ e ɣɛni lodiɛ wũgi va (3,000 mi) Kɛ ta ʋolo maa wũgi wuitosu lodiɛ wũgi nii ma, te kɔlɔ wonɛni de ɣaa yɔwɔ̃itiɛ wɔ te ɣɛni lodiɛ wũgi la tiɛ te mama ga tei te gaa-nɛkpɛ maa zɔlɔwoni Gala goi natiɛ zu.

Kɔlɔi nii, The Watch Tower of December 1, 1925, yɛpɛvɛ e vile vɛtiɛ va lodiɛ wũgi nii ɔ ziiti na. E ɣɛ: “Lodiɛ wũgi nii daa ga WORD, towa li ŋada wooza e leve lodiɛ wũgitiɛ ɓɔgapɛ ba te Wuita zu. Numaa ta wuito lodiɛ wũgi nii ma ŋada lamaa Wuita zu, Cubae e vɛɛ ŋada lamaa va Alaska. Nu lamaa tɛ lɛ ɣɛni dɛ Gaamai mɛnini, kɛ tei sa te wuitoni lodiɛ wũgi na ma te ɣɛni wõini te faa lamaa wɛ̃ɛ e vile Gala ba.”

Siɛgi na wuuzu, Gala Kɔlɔ Maa Woli Veaitiɛ te ɣɛni ɣaa ɓaazu ga te lodiɛ wũgi ta ɓɛtɛ ga te Gala goo wo nu lamaa ma Canada. Kwenagi 1924, te lodiɛ wũgi ta loni Saskatoon, Saskatchewan, tɔ tili ga CHUC. Lodiɛ wũgi nii ɣa e ɣɛni ga lodiɛ wũ maa-wũ Gala feli vea te to Canada. Kwenagi 1925, te ɣɛni ŋada ɓalaa ɣaa-ziɛzu ga te li ga lodiɛ wũgi nii na. Na ma, da ɓulugi nii, the Watch Tower Society, e loni sa lodiɛ wũgi nii ma ɓaola. Tɔwɔ te liini sa ga lodiɛ wũgi nii Saskatoon, vɛ te na ɣeeani na ɣa ɣɛɛna te na ɣavele ɓɛtɛ lodiɛ wũgi ʋaa ma.

Lodiɛ wũgi nii zaala zu, nu lamaa te ɣɛni vɛ woba tɔ na lili gaSaskatchewan, te zooni te keela woo vagɔi mɛni. Ma wo-kɔ̃ɔ-mai ta ɣa ga, tai ta zu ŋaza nu gila ge ɣɛni na daa ga, Mrs. Graham. Tei e wuitoni lodiɛ nii ma, e kɔlɔ wonɛni de ɣaa yɔwɔ̃itiɛ wɔ yiɛ te ɣaa-zaɣa-kɛ da wɔlɔi ta ma. De ɣaa yɔwɔ̃i George Naish boga ga, “Velei e boni la ge ma ga ge ‘ɓɔ ba, ge ɣɛni kwɛ̃ni ga maa nɛɛ gɔ kɛ kaʋile’! Na ma ge kɔlɔi nii leveni pɔ, Studies in the Scriptures.” Su lɛ ɣɛni lebini, nii sa Mrs. Graham maa wolini e vile Gala ta Masadai va, e ɣɛni sa dɛɛzu ga numaa.

GAAMAI GE MAA WOLINI

Zɛpɛ wũgi ta ɣa kɔlɔi nii zu, March 1, 1925, issue of The Watch Tower fize wogɛi ɓɔɔ. Maa woli wɔlɔ zɛvɛi na ma wũgi ɣa ga, “Birth of the Nation.” Zɛɓɛi e kɛɛ maa woli wɔlɔ zɛvɛi nii ʋize wogɛi ɓɔɔ e ɣɛni? Kwena tamaa wuuzu, Gala Kɔlɔ Maa Woli Veaitiɛ te ɣɛni kwɛ̃ni ga ɓulu ge ɣɛni Seeta ya, ŋinɛ yowũa te su, gala feli vea, podi lɔɔ vea e vɛɛ gɔmɛti vea va zui ma. Na ɓalaa ɣɛɛvɛ, kɔlɔi nii zaala zu, Gala Goo Wotii Maazu Vɛtɛ Veaitiɛ te ɓɔni te ɣaa yɔwɔ̃itiɛ va te kwɛ̃ɛ ga, Jehova ɓalaa ɓulu ɣa zeea, tɔwɔ ɓulugi nii lɛ wuloni ga Seeta na dɛɛ ɣavele. Na ɣa ɣɛɛna ta tii ɣɛ kii-ma ga te Dɛvelei yee maazu ɣale. (Maf. 24:45) E wulo na wulu, Gala Goo Wotii Maazu Vɛtɛ Veaitiɛ te boni ga, kɔɔ wɔɔni Gala ta kwenagi 1914, te Seeta ɓɔga na ŋinɛ yowũitiɛ wuloni gee-zuvɛ na ɣa ɣɛɛna te te vili zui ma.—Faa. 12:7-9.

Na ɓai e ɣɛni ga Gala Kɔlɔ maa woli vea taniga te yee zei kalabogi nii wu. Tei de ɣaa yɔwɔ̃itiɛ te ɣɛni nii wõini, te puuni maa woli wɔlɔ zɛvɛi nii zu ga: “Ani kɔlɔ lodo nu nɛpɛ ɣa Wasitawɔi nii lodona, na ɣa ɣɛɛna lɛ yee zeini niitiɛ wu bogɛi vɛ, ga bosu manui ma ga e yii-lɔɔ e de Maliɣii maa kpowũ na ɣa ɣɛɛna yiɛ feli ga ɣisu wuoa.”

Tom Eyre, nii e ɣɛni ga panɛ̃itiɛ te ta, kuloai Britain, yɛpɛvɛ e vile velei va Gala Kɔlɔ maa woli vea lamaa te ɣɛni ɣi-gaa-ziɛzu la e vile maa woli wɔlɔ zɛvɛi na va. E ɣɛ: “De ɣaa yɔwɔ̃itiɛ te wuuzu nɛɛ e ɣɛni e vile velei va te Faa Wuloai Kɛnɛ Ma 12 zu wuloni la. Tei ge kw̃ɛɛni ga Gala ta Masadai ɣa sa deʋe wosu Gala ta, ge wuuzu nɛɛ e ɣɛni ga ʋikee ga ge keela woo vagɔi wo numaa ma. Na kɛɛni ge Gala goo wo ga tamaa numaa ma, na ɣa ɣɛɛna e ɓɔ ge va ge kwɛ̃ɛ ga Jehova ɣa vaazu faa vagɔ lamaa ɣɛɛzu ge vɛ na luoi zu.”

TA SEELE WOO ƲEEZU E VILE JEHOVA VA

Zaa, Jehova Na Seeleitiɛ te Gala goi nii wɛ̃ni ɓɔɔ ga pagɔ, na ɣa ga Isaiah 43:10: “Nii ɣa Jehova boga ‘Wa ɣa wo ga na seeleitiɛ,’ ‘Ooi na numaitiɛ ge yee ɓadoga wo va.’” Kwenagi 1925 ɔ vɛɛ ziiti zu, gɛ lɛ ɓena yɛpɛ ɔ vile Gala goi nii va ga tamaa ga wɔlɔitiɛ zu. Kɛ na maa ʋeliboni sa. Kwenagi 1925 Kɔlɔi nii The Watch Tower yɛpɛni e vile Isaiah 43:10 ɓɔga 12 va, da wɔlɔ 11 su!

August 1925 laa wulo zuvɛ, Gala Kɔlɔ Maa Woli Veaitiɛ te gaalɛ-ba wala zoni Indianapolis, Indiana. De ɣaa yɔwɔ̃i Joseph F. Rutherford woo taniga wonɛni gaalɛ-ba wɔlɔi ma ga e ɓɔ numaitiɛ va te kwɛ̃ɛ ga kuuzu nɛɛvɛ te vaa ʋai ma. Tɔwɔ woi na ɣɛni ga: “A de vaavɛ gaalɛ-ba walai nii ma ga de gaa-ɓaa . . . maa zɔlɔwo de Maliɣii ya nii ya kɛ da liina wulu de wõi ga de seele woo ʋe e vile Gala ba.” Folo lɔzetai nii wuuzu te gaalɛ-ba walai nii ɣɛɛni ma, taitiɛ te vaani gaalɛ-bai zu te boni te ma ga ani ta siɛ maa zɔlɔ wona te yɛpɛ numaa wɔ e vile Jehova va.

Sivili ʋoloi, August 29, de ɣaa yɔwɔ̃i Rutherford zɛpɛi ta ʋeeni ma wũgi ga “Ɣaa-Ɓaa Gala Go Wogai Zu.” Na zɛpɛi nii zu, e zaɓui lɛɛni e kɛɛ e ga faa ɓi ga de seele wo ʋe e vile Gala ba. E ɣɛni tea: “Jehova ɣɛni na numaitiɛ ma. . . : ‘Wa ɣa wo ga na seeleitiɛ . . . na ɣa ge ga Gala.’ Na ɣa ɣɛɛna de ɣaa yɔwɔ̃i gaa ɣɛɛni sa kala yiɛ ɣɛ te ma: ‘A seele woo ʋe e vile Jehova va.’ Taitiɛ nɔ ta seele woo ʋe e vile Jehova va zui ma, ta ga niitiɛ e pele wulozu ga tiɛ na gaa ɓai zaala zu. Tɔwɔ zaɓui ɣa ga tei te ga na numaa”—Isa. 43:12; 62:10.

Tei de ɣaa yɔwɔ̃i Rutherford woloni ga na zɛpɛi ʋe, e kɔlɔi ta lodoni daa ga “Keela Woi Ya Kito Fe Nu Ya,” taitiɛ ɓɔgapɛ te ɣɛni gaalɛ-ba walai nii zu, te yee zeini keela woi nii wu tiɛ dɛ ga Gala ta Masadai nɔ ɣa ya va ga “ziila, kɔlɔsu-wodo ta kuuzu nɛɛ ɓɔɔɓɔɔ nu wɔ.” Te keela woi nii wuuni zii woo lamaa zu na ɣa ɣɛɛna te pu kɔlɔ lamaa zu. Te kɔlɔi nii lamaa ɣaa wɛɛni zui wɔlɔ-kɔlɔ ma.

Kwena tamaa leveni, Gala Kɔlɔ maa woli veai niitiɛ tɔ vɛɛ ta laa-zeigi maa ʋeli bosu ga Jehova Na Seeleitiɛ. Kɛ te ɣɛni sa zaɓui wɛ̃ɛsu e kɛɛ e ga faa ɓi ga te daa-zeigi nii ziɣi, ga Jehova Na Seeleitiɛ.

TƆ SA LI WULU NIITIƐ WƆ TƆ GALA GOO WO TE MA

Tei sa Gala goo wo beaitiɛ te ɣɛni lamasu zui wɔlɔ-kɔlɔ ma, te boni te ma ga te mɛ lɛ nɔ kɔlɔ ʋe numaa ya kɛ tiɛ li wulu niitiɛ wɔ ta yee zei Gala goi wu. Siɛgi ma te woloni la ga kɔlɔi nii ʋe numaa ya, Keela Woi Ya Kito Fe Nu Ya, ki-daa-wodo vaani kɔlɔi nii zu tɔ tili ga Bulletina yiɛ bo ga: “Li wulu vɛtiɛ e kɔlɔi nii ta yɛ ga na Keela Woi Ya Kito Fe Nu Ya.”

Ɣalogi nii January 1925, kɔlɔi nii daa ga Bulletin yɛpɛni e vile fai ta va Gala Kɔlɔ maa woli nui ta ponɛni e ɣɛni, Plano, Texas. E ɣɛ: “E wuloni ga giɛ tei ge liini wulu vɛ ge Gala goo woni na ga maa wũ, ga velei numaa te yee zeini la Gala goi wu. Kwena puugoi nii wuuzu, ge Gala goo wo ga sa ta woloi ta zu na zeizu ɣɛ ga dooluo. . . Kuu-felegoi nii, na seelai Hendrix ɓɔga dee te liini na ga te Gala goo wo, tɔwɔ te kɔlɔ lamaa ʋeeni numaitiɛ ya e leve kɔlɔ liigoi va ge vɛɛ feezu te ya.”

Zui nii zu ta tili ga Panama, panɛ̃ɛ ta kɔlɔ wonɛni yiɛ ɣɛ tea: “Niitiɛ tɛ lɛ ɓena wõi ga tɔ wuito tei ge liini Gala goo wosu na ga niinɛ te lamaa ta wuito ani ga liina na wɔnɔ. Kwenagi zɔi e levega, ge siɛ tamaa ziɣini ba na Gala goo wogai zu ga ge li niitiɛ wɔ ge yɛpɛni te wɔ wɔlɔ. Tɔwɔ gatiɛni ga yɛpɛ ɓɔɔ ga pagɔ.”

ƔAAZU ƁADO ŊINAA VA

Kɔlɔi de ɣaa yɔwɔ̃i Rutherford teveni panɛ̃itiɛ ɓɔgapɛ pɔ kwenagi laa wulo zuvɛ, e yɛpɛni e vile tii va e ɣɛɛni kwenagi na e vɛɛ nii va maa nɛɛ sa te kɛ. E ɣɛni tea: “Kwenagi nii e levega e ɣɛni ga kuuzu nɛɛ ʋaa ga de nu lamaa ɣaa-nɛkpɛ te yii ɣɛni zuuli zu. Tii nii vaa ga kuuzu nɛɛ wo wɔ . . . Kwenagi nii e vaazu, wa vaazu siɛ lamaa maa zɔlɔ wosu ga wo seele woo ʋe e vile Gala ba ta na Masadai na ɣa ɣɛɛna wo dɛ niitiɛ ɓɔɔɓɔɔgi te ga feli vea. . . . Na ma, de pɛ de ɣaa-ɓaa de yee vili kiizu de Jehova ɓɔga Ziizɛ laa-maa-lɛ.”

Kwenagi 1925 laa-wulo-zuvɛ, Ofisii Walai e Brooklyn, de ɣaa yɔwɔ̃itiɛ te deʋeni sa ga te na wɔɔlɔ. Kwenagi 1926 te tɔɔ-zeini ga te pɛlɛ lamaa lo ɓulugi vɛ.