Jehova Ɣa Da Wuuzu “Nɛɛ Wuloai Zeea”

1-2. (a) Faa ɓaagi taniga ta ga zɛɓɛ ya la numaa ma zaa? (b) Zɛɓɛi de vaazu yɛpɛzu e vile ba?

ŊETEAI sa de su, numaa ta faa lamaa ɣɛ nɔ ga kuuzu nɛɛ ɣɛ te ya. Na ɓalaa ɣɛɛvɛ kuuzu nɛɛ lɛ ɣɛɛ dɛ te ya. Nu lamaa te yii ɣa zuuli, tiɛ ɣi-gaa-ziɛ ga faitiɛ tɛ lɛ wɔlɔ-wɔlɔ zolowoga te ʋaa ma. Jehova ʋeli vea taniga, ta ɓalaa ta ɣi-gaa-ziɛ ɣɛni. Tei sa de ŋetea ɣaa ɓelagi zu, de kwɛ̃ni ga da vaa levesu faa ɓaa taniga zu ya de yii zuuli ŋeteai nii zu “faa ɓaalii ge su.”—2 Tem. 3:1.

² Kɔlɔ zɛvɛi nii zu, da vaazu yɛpɛzu e vile faa taniga va ya kɛ kuuzu nɛɛ lɛ ɣɛɛ de ya, ta velei da kuuzu nɛɛ maa zɔlɔwo da wulu. Kɛ de yɛpɛ dɛ e vile nii va ya va ga kuuzu nɛɛ ɓɔɔɓɔɔ de wɔ.

NII YA KUUZU NƐƐ ƁƆƆƁƆƆ FE DE YA

3. Zɛɓɛi Jehova ɓɛtɛ ŋɛniitiɛ ta dɛ ga diɛ? (Wɛlɛ ɓalaa footeitiɛ va.)

³ Jehova wuuzu nɛɛvɛ wɔ. E wõini da ɓalaa kuuzu nɛɛ ɣɛ de ya. Na ɣa e kɛɛ e ŋɛni lamaa ɓɛtɛɛ ya de wuuzu nɛɛ. Ta ɣa ga velei zui ɣavele ɓɛtɛɛ la, ŋɛniitiɛ ɣaazɔ da pɛtɛ, velei suoitiɛ ta ɣɛ ɣaa wosu la, e vɛɛ daa-mii-ŋɛni nɛɛ-nɛɛ lamaa ba. Ɓɔɔɓɔɔ su, wõila ɣa Gala zeea de ʋaa ma na ɣa ɣɛɛna e wõini de yii-ma ɣɛ!

See yuuwui: Image © Romi Gamit/Shutterstock; penguin chicks: Vladimir Seliverstov/500px via Getty Images; bili yuuwuitiɛ: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Zɛɓɛi e kɛɛ Jehova wuuzu nɛɛ wɔ, velei ɓalaa daa-nɔwɔ-wogi la zui zu? (b) Faa nɛɛ zɛɓɛi Jehova kɛɛ de vɛ? (Psalm 16:11)

⁴ Velei ɓalaa Jehova la ga kuuzu nɛɛ Ɣala, daa-nɔwɔ-wogitiɛ ɓɔgapɛ te zui zu e kwɛ̃ni. (1 Tem. 1:11) Kɛ, lɛ ɓesu fai niitiɛ va tɔ kɛ na kuuzu nɛɛ maa yii. E kwɛ̃ni ga su lɛ vaa lebisu, daa-nɔwɔ-wogi niitiɛ ɓɔgapɛ te ɓea. E siɛgi wõini te vaazu ɓeazu la. Na ɣa ɣɛɛna, tɔ zii-lɔɔ wulozu e yɛsu siɛgi ziiti e vaazu daa-nɔwɔ-wogi ɓɔga maa wõi ʋaa wulozu ŋetea wɔlɔ-wɔlɔ ta wɔlɔ-wɔlɔ. Kɛ siɛgi na ɔ vɛɛ ziiti zu, Jehova kwɛ̃ni niitiɛ de levesu su na ɣa ɣɛɛna e wõini e ɓɔ de va. Towa ɓɔ de va ɣɛ le? Towa kɛ kuuzu nɛɛ ɣɛ de ya. (Psalm 16:11 lodo.) De wɛlɛ velei e kɛɛni la ga Ziizɛ wuuzu nɛɛ.

5-6. Zɛɓɛi e kɛɛ Ziizɛ wuuzu nɛɛ?

⁵ Jehova ɓɛtɛ ŋɛniitiɛ ɓɔgapɛ zaa ma, Ziizɛ wuuzu nɛɛvɛ. Zɛɓɛ ʋaa ma? De wɛlɛ zaɓu felegɔ va. (1) “Towa é ga po-kɔ̃ɔgi Galagi nii ʋaa ma nu lɛ ɣaazu laa ma” Na ɣa ɣɛɛna, e dɛɛ ga Keea luɓo-veleitiɛ ɓɔgapɛ ta zeea na ŋeteai ɓɔgapɛ su. (Kol. 1:15; wɛlɛ “happy” study note on 1 Temete 6:15.) (2) Ziizɛ ɓɔga Keea, te siɛ tamaa ziɣia kii-ma, nii kuuzu nɛɛ ɓɔɔɓɔɔ Wuloai zeea.

⁶ Kuuzu nɛɛ ɣa Ziizɛ ya wɔ tii nɛpɛ su Keea ɣa fe zeea ga e kɛ. (Prov. 8:30, 31; Jɔ̃ 8:29) Nii wɔ ka e kɛɛ, Jehova yee zeia Ziizɛ wu na ɣa ɣɛɛna kuuzu nɛɛ faa ma.—Maf. 3:17.

7. Da kuuzu nɛɛ ɓɔɔɓɔɔ maa zɔlɔwo ɣɛ le?

⁷ Da ɓalaa da kuuzu nɛɛ ɓɔɔɓɔɔ maa zɔlɔwo ani da lɔtɔ na Jehova va, nii kuuzu nɛɛ Wuloai zeea. Ani da siɛ tamaa ziɣina ba, diɛ faa maa woli e vile Jehova va, diɛ vile na po-kɔ̃ɔ-mai zu, da kuuzu nɛɛ maa zɔlɔwo. Da kuuzu nɛɛ maa zɔlɔwo wɔnɔ, ani da ɣɛna ziɛ zu ga Jehova na tɔgitiɛ na ɣa ɣɛɛna de kwɛ̃ɛ ga e yee zeivɛ de wu.a (Ps. 33:12) Kɛ e ɣisu maa nɛɛ de ɣi-gaa-ziɛ ɣɛ le, ani de yii ɣa ɣɛna zuuli zu siɛgi ta zu ɔɔ ani kuuzu nɛɛ e de ya maa ɣa sa yii zu? Ki-laa ʋaa zu maa nɛɛ de ɣi-gaa-ziɛ ga Jehova wuuzu lɛ nɛɛni de ʋaa ma? Ɓa! Jehova kwɛ̃ni ga de pɛ da ga faa yowũ ɣɛɛ vea, da laa-nɔwɔ-wo, de taɓa ziɣi na ɣa ɣɛɛna de yii zuuli. (Ps. 103:14) De yɛpɛ e vile faa taniga va ya kuuzu nɛɛ wulo de ya ta velei da kuuzu nɛɛ maa zɔlɔwo da wulu.

MƐLƐ ƁE FAA NƐPƐ BA Ɔ KUUZU NƐƐ WULO E YA

8. Faa ɓaagitiɛ da levesu, ta faa vɛɛ de va ɣɛ le?

⁸ Faa ɓaa 1: Faa yowũitiɛ ta la de ma ŋeteai zu. Ya ga nui ta numaa te ziliai ga yiɛ Jehova ʋeli ʋai ʋaa ma, faa ɓoei ta laa e ma, ya laa-nɔwɔ-wosu, yiɛ zeeɓɛ ɔɔ e wɔlɔ-zaɣagɛi? Kuuzu nɛɛ e de ya, na lɛ ɓaa ga maa yii ani da ɣɛna levesu faa ɓoei niitiɛ zu, ani ʋɔlɔ tɔ ga faa ga da ɣaa-ɓaa lɛ maazu. Gala Kɔlɔi boga ga, zii zuulii ɣa kɛ kuuzu nɛɛ lɛ ɣɛɛ de ya. (Prov. 15:13) Kuuwu wũ-tuo nui nii da ga Babis, kaa veaitiɛ te zaani kwena naagɔ wuuzu e vɛɛ ɓalaa diɛ va. E ɣɛni tea: “Maa wõini, na ɣa ɣɛɛna giɛ ɣi-gaa-ziɛ ga nu nɛpɛ lɛ na ga ɔ ɓɔ ba. Tanisu, zii ɣa zuuli, zaɓui ɣa ga, baa ʋai lamagɛi e ɣɛni, na ma ga diɛ e vɛɛ kaa veaitiɛ va gɛ lɛ siɛ tamaa ziɣini kii-ma tɔ vɛɛ zaazu.” Faa ɓaagitiɛ ta la de ma ŋeteai zu, ta kɛ de ʋii yiɛ ɓɛɛ de yii yiɛ zuuli.

9. Zɛɓɛi ya ɓɔ de va ga kuuzu nɛɛ ɣɛ de ya wɔnɔ? (Jeremiah 29:4-7, 10)

⁹ Zɛɓɛi ya ɓɔ de va ga kuuzu nɛɛ ɣɛ de ya wɔnɔ? Da kuuzu nɛɛ maa zɔlɔwo wɔnɔ ani da dɛɛna ga de wuuzu nɛɛvɛ niitiɛ ʋaa ma te de ya, lɛ ga niitiɛ da ɣaa-ɓaa lɛ maazu. Zui zu veaitiɛ ta kɛ numaa te ɣi-gaa-ziɛ ga, kɛni te sɔɔla lamaa maa zɔlɔwo tɔ vɛɛ kuuzu nɛɛ maa zɔlɔ wosu. Kɛ na ɣa ga zɛɛ ʋaa. Ma wo-kɔ̃ɔ-mai ta ɣa ga, Jehova boni Dusiitiɛ ma te ɣɛni duo-laa zu Babelɔ̃ ga te yee zei velei wu te ɣɛni la zuu ɓalaa su. Na ɣa ɣɛɛna te ɣaa-ɓaa ga kuuzu nɛɛ ɣɛ te ya. (Jeremiah 29:4-7, 10 lodo.) Zɛɓɛi da maa woli nii zu? Ɣaa-ɓaa ga e ɣaazu ɓado faa vagɔitiɛ va te ɣɛɛzu ya ŋeteai zu ga e kuuzu nɛɛ zɔlɔwo. Kwɛ̃ɛ ga Jehova ɣa vaazu ɓɔsu e va. (Ps. 63:7; 146:5) De ɣaa yɔwɔ̃i Effie, nii kai wuuni la e mɛlɛ-ŋɛlɛ, e ɣɛni tea: “Ge kpɔba lamaa maa zɔlɔ woni Jehova ya, na numaitiɛ e vɛɛ kuuwui va. Na ma ge ɣi-gaa-ziɛni ga, ga ɣɛ ga faa wɛ̃ɛ-tala-nu ani fii ɣa ɓɛɛna. Ge wõini ge dɛ ga kuuzu nɛɛvɛ niitiɛ ʋaa ma Jehova ɓɔga na siɛ-puluitiɛ te kɛɛ bɛ.”

10. Zɛɓɛi e kɛɛ kuuzu nɛɛ ɣa ɣɛ de ya ani ɓalaa da ɣɛna levesu faa ɓaa su?

¹⁰ Ani ɓalaa da ŋeteai lɛ ga velei de ɣɛni wõini e ɣɛɛ la, ɔɔ ani faa yowũ ɣa ɣɛɛna ga diɛ ɔɔ da numaitiɛ te ta, da kuuzu nɛɛ maa zɔlɔwo dɛ.b (Ps. 126:5) Zɛɓɛ ʋaa ma? Zaɓui ɣa ga, da wuuzu nɛɛ wulovɛ Jehova ya, lɛ ga velei da ŋeteai la. Maria, nii e ga panɛ̃itiɛ te ta, e ɣɛni tea: “Ya ɣɛna levesu faa ɓaa su, tɔwɔ kuuzu nɛɛ e ya, na lɛ ɣɛɛ dɛɛzu ga ɛ lɛ levesu faa ɓaa su. Kɛ, towa ɣɛ dɛɛzu ga ɛ lɛ yee-mani ki-togitiɛ ma Jehova fea. De Ɣeea Gala ɣa ɓɔ de va ga kuuzu nɛɛ e de ya, de maazu vɛtɛ.” Kwɛ̃ɛ ga faa ɓaagitiɛ ɓɔgapɛ de levesu su zaa, su lɛ vaa lebisu te ɓea, e ɣɛ velei nɔ nu wɔwɔ-wogi lɛ lebiga la yãaze-su yuu woba. Su lɛ sa vaazu lebisu, Jehova niitiɛ ɓɔgapɛ kulo na ya kɛ de yii yiɛ zuuli diɛ laa-nɔwɔ-wo.

11. Pɔɔ na po-kɔ̃ɔ-mai ɣa de yii-lɔɔ ɣɛ le?

¹¹ Siɛ ta zu ani da ɣɛna laa-nɔwɔ-wosu, e ɣisu na ɣa ɣɛ dɛɛzu ga Jehova yee wuloa sa de wu? Ani vele ɣa na e ɣi-gaa-ziɛzu la, towa ɣɛ ga faa vagɔ ga e ɣi-gaa-ziɛ Jehova ʋeli vea taniga ma te leveni faa ɓaa su wɔlɔ-wɔlɔi zu. De yɛpɛ e vile Pɔɔ na po-kɔ̃ɔ-mai va. Ziizɛ yee ɓadoni Pɔɔ va ga e li ga keela woo vagɔi “zii ɓalaagitiɛ yii la ta masagitiɛ é vɛɛ Yezɔi nu zuwui va.” (Te Ɣɛɛ Ʋaitiɛ 9:15) Nii ɣɛni ɓɔɔ ga tii maa viiyai! Na ɓalaa ɣɛɛvɛ, faa ɓaa ge laani Pɔɔ ma. (2 Kɔl. 11:23-27) Velei faa ɓaa tamaa ɣɛni laazu la Pɔɔ ma, e ɣisu na ɣɛni dɛɛzu ga Jehova yee wuloa bu? Gaama zu ɓa! Kɛ zii-lɔi Pɔɔ kuloni, e dɛɛni ga Jehova ɣɛni tuuyiɛ loozu ma. (Loo. 5:3-5) Na ma, ɣi-gaa-ziɛ nɔ niitiɛ ma e levesu su zaa. Ya ɣaa ɓaazu ga e Jehova ʋeli velei ɓalaa e levesu la faa ɓaa su. Ya ɓalaa, kwɛ̃ɛ ga Jehova yee zeivɛ e wu na ɣa ɣɛɛna tɔ ɓɔsu e va.

12. Nii de wõini de kɛ Jehova ʋeli ʋai zu, ani dɛ lɛ kɛɛni na ɣa faa vɛɛ ɣɛ le da wuuzu nɛɛ va?

¹² Faa ɓaa 2: Ani dɛ lɛ nii ɣɛɛni de wõni de kɛ Jehova ʋeli ʋai zu. (Prov. 13:12) Wõilai e de ya Jehova ʋaa ma, ta velei de wõini de mama la niitiɛ ʋaa ma e kɛɛ de vɛ na ɣa e kɛɛ de deʋea ga de tii lamaa ɣɛ bɛ. Na ɓalaa ɣɛɛvɛ, ani de deʋea ga de tii ta ɣɛ Jehova vɛ tɔwɔ faa ɓaagi ta vili su, na ɣa de yii zuuli. (Prov. 17:22) De ɣaa yɔwɔ̃i Holly, nii e ga panɛ̃itiɛ te ta, e boni ga: “Ge ɣɛni wõini ge li Kɔlɔ vɛlɛi nii wu e Gala Goo Wo Beaitiɛ Ʋaa Ma, ga ge Gala goo wo zuu ɓalaa su, ɔɔ ga ge tii ɣɛ vɛ te ɣɛni da ofisii walai ta losu na Ramapo. Kɛ faitiɛ maa ʋeliboni, gɛ lɛ sa zooni gɔ niitiɛ ɓɔgapɛ kɛ ge ɣɛni wõini ge kɛ. Na zii zuulini ga ʋike. Ani ya ɣɛna wõini e faa ɣɛ, kɛ lɛ sa kɛɛ towa ɣɛ ɓɔɔ ga zii zuuli ʋaa.” Jehova ʋeli vea lamaa nii ɣavele ʋai ta ɣa ɣɛ ga tiɛ.

13. Ani faa ɓaa ge kɛɛ dɛ lɛ zooga dɔ fai ta ɣɛ, zɛɓɛi wɔnɔ da deʋe ga de kɛ?

¹³ Zɛɓɛi ya ɓɔ de va de kuuzu nɛɛ maa zɔlɔwo wɔnɔ? Kwɛ̃ɛ ga Jehova lɛ boga ga kɛni nɔ de fai ta ɣɛ. Lɛ de ɣaa-zaɣa-kɛɛ nii ma dɛ lɛ ziɛa bu, ɔ nɔ ɣɛ ga e de ʋize wo nɔ ga tei de tii lamaa ɣɛɛ feli ʋai zu. Kɛ, Jehova wõini de kwɛ̃ɛ nii da ziɛ bu na ɣa ɣɛɛna de lo kpãa faa ma. (Mic. 6:8; 1 Kɔl. 4:2) Kpɛdɛvɛ nui mazii ma de le de ɣi-gii zu e leve niitiɛ va da kɛ. De mɛ lɛ ɣi-gaa-ziɛ ga kɛni nɔ de fai ta ɣɛ ani de kwɛ̃ni ɓɔɔ ga dɛ lɛ ziɛa na wu!c Na ma, ani ɛ lɛ zooga ɔɔ fai ta ɣɛ Jehova na ɓulugi zu, ɣaazu ɓado niitiɛ va ya zoo e kɛ. Ya zoo e nu niinɛi ta ɣalabo ɔɔ e pɔlɔ-zaɣa beaitiɛ ɣaa-nɛkpɛ? Ya da ɣisu ga e nui ta ɣaa-nɛkpɛ, ga e manui lili ɔɔ e keela woo leve pɔ? Jehova ɣa tuuyiɛ loo e ma ani ya ɣaa ɓaana ga e niitiɛ kɛ ya ziɛ bu! Na ɣa ɣɛɛna, kwɛ̃ɛ ga su lɛ sa vaa lebisu, de zoo de tii niitiɛ ɓɔgapɛ kɛ de wõini de kɛ Jehova vɛ na luoi zu! Holly, nii de yɛpɛi e vile ba na maazu vɛ, e na zɛpɛi laa wulovɛ ga: “Ga zei ge ɣi-gaa-ziɛ ga, ga vaazu yɛsu ŋetea wɔlɔ-wɔlɔ ta wɔlɔ-wɔlɔ. Jehova ɣa vaazu ɓɔsu ba ga ge niitiɛ ɣɛ ge deʋea.”

14. Zɛɓɛi wɔnɔ ya kɛ kuuzu nɛɛ lɛ ɣɛɛ de ya?

¹⁴ Faa ɓaa 3: Ŋɛni wõi ɓɔga zii-ma ɣɛɛ ɓakpa wuloai. Numaa taniga te fãga wɔlɔi ma, ta kɛ numaa te ɣi-gaa-ziɛ ga da kuuzu nɛɛ ɓɔɔɓɔɔ maa zɔlɔwo ani da wõina ga ɓɔɔ. Ta kɛ diɛ ɣi-gaa-ziɛ ga ani da ɣɛna niitiɛ ɣeea zu wõi de ma ɔɔ diɛ li siɛ ma, towa kɛ de kuuzu nɛɛ maa zɔlɔwo. Ɛ lɛ ga faa yowũ ga de fai niitiɛ ɣɛ ga de yii-ma ɣɛ. Jehova wõini de niitiɛ ma ɣa nɛɛ wulo e kpɛtɛɛ de vɛ. Na ɓalaa ɣɛɛvɛ, nu lamaa te wɛlɛɛ na va ga nii e ɣɛni te ɣisu ga ɔ va ga kuuzu nɛɛ te wɔ, to mu e vaa ga zii zuuli. Eva, nii e ga panɛ̃itiɛ te ta e ɣɛ, “ani ya ga nui ta e wõini nɔ e ɓɔɔ yii-la, e yii lɛ wɔlɔ-wɔlɔ laa.” Ŋɛni wõi ɓɔga zii-ma ɣɛɛ ɓakpa wuloai ɣa kɛ kuuzu nɛɛ lɛ ɣɛɛ de ya.

15. Zɛɓɛi da maa woli Masagi Salamɔ̃ na po-kɔ̃ɔ-mai zu?

¹⁵ Da faa maa woli Masagi Salamɔ̃ na po-kɔ̃ɔ-mai zu e vile velei va ŋɛni wõi ɓɔga zii-ma ɣɛɛ ɓakpa wuloai ɣa vaa la ga zii zuuli. E ɣaa ɓaani ga e kuuzu nɛɛ maa zɔlɔwo ga velei ɔ ɓɔɔ yii laa la. Ta ɣa ga, ɔ daa-mii-ŋɛni ma ɣaa nɛɛ wulo, guitiɛ, e vɛɛ nii nɛpɛ ba naʋolo ɔ geea na siɛgi zu. Kɛ na lɛ vaani gaa kuuzu nɛɛ ɓɔɔɓɔɔ pɔ. E ɣɛni tea: “Nu ɣaazu yii lɛ laa wɛlɛzu, ɔ nɔ ɣɛ ga nu wui zu laaʋe faa mɛnisu.” (Eccl. 1:8; 2:1-11) Velei zui zu veaitiɛ ta ɣi-gaa-ziɛ la e vile kuuzu nɛɛ ɓɔɔɓɔɔ ba, maʋaa wulovɛ e ɣɛ zɛɛ ʋaa naʋolo. Zɛɛ ʋaa naʋoloi maʋaa ɣa wulo e ɣɛ fize wogɛ, kɛ ɛ lɛ zooga ɔ ŋɛni ɣeea la.

16. Ani da ɣɛna ɓɔsu numaa va, towa kɛ de kuuzu nɛɛ maa zɔlɔwo ɣɛ le? (Wɛlɛ ɓalaa footeitiɛ va.)

¹⁶ Zɛɓɛi ya ɓɔ de va de kuuzu nɛɛ maa zɔlɔwo wɔnɔ? Ziizɛ boni ga, “tɔ ga tuuyiɛ ɓakpa nu ma ga é faa-nɛɛ ɣɛ é leve faa-nɛɛ va yá ɣɛ manu vɛ.” (Te Ɣɛɛ Ʋaitiɛ 20:35) Kuuwu wũ-tuo nui nii daa ga Alekos, boni ga: “Ga ɣaa-ɓaa ga ge faa taniga ɣɛ ga ge ɓɔ numaa taniga va. Ga ɓɔna te va, towa kɛ gɛ lɛ ɣi-gaa-ziɛa e vile ɓɔɔ va. Tɔwɔ, na ɣa kuuzu nɛɛ.” Zɛɓɛi ya kɛ ga e ɓɔ numaa ɓalaaga va? Ani ya wɛlɛna nui ta va zii yɛ zuuli, ɣaa-ɓaa ga e manui ɣaa-nɛkpɛ. Ɣeeta, ɛ lɛ vaazu manui na zii zuulii ɓeazu, kɛ ya manui ɣaa-nɛkpɛ ani ya wuito na ɓɔɔ ga pagɔ niitiɛ ma e bosu, yiɛ wõila lɛɛ la na ɣa ɣɛɛna e ɓɔ ba e kwɛ̃ɛ ga Jehova ɓɛdɛvɛ ɓɔɔ faa ma. (Ps. 55:22; 68:19) Ya ɓɔ ba wɔnɔ e kwɛ̃ɛ ga Jehova lɛ wɔlɔ-wɔlɔ wulu ɣaa ʋega ba. (Ps. 37:28; Isa. 59:1) Ya deʋe ɓalaa ga e faa taniga ɣɛ ga e ɓɔ ba, taniga ta ga, e diɣi-ɣili bɛ ɔɔ wa tɔ wo li wo ziɛ-ziɛ ŋadɛɛ ta. Bo ma ga wa tɔ wo li Gala goo wosu, tɔwɔ na ɣa kɛ kuuzu nɛɛ. Ɓɛ Jehova e ɣaa yɔwɔ̃itiɛ ɣaa-nɛkpɛ e zaala zu. Ani da ɣaazu ɓadona numaa ɓalaaga va, na ɣa kɛ kuuzu nɛɛ ɓɔɔɓɔɔ ge ɣɛ de ya!—Prov. 11:25.

17. Zɛɓɛi maa nɛɛ de kɛ ga kuuzu nɛɛ ɣɛ de ya? (Psalm 43:4)

¹⁷ Da kuuzu nɛɛ ɓɔɔɓɔɔ maa zɔlɔwo ani da ɣaa ɓaana ga de lɔtɔ de ɣeea Gala ba. Gala Kɔlɔi boga ga, Jehova ɣa ya kuuzu nɛɛ ɓɔɔɓɔɔ fe de ya. (Psalm 43:4.lodo) Na ma, ani ɓalaa da ɣɛna levesu faa ɓaa su, de yii mɛ lɛ zuuli ɔ nɔ ɣɛ ga de luo. Na ma, de ɣaa-ɓaa de ɣaazu ɓado Jehova va nii kuuzu nɛɛ ɓɔɔɓɔɔgi Wuloai zeea!—Ps. 144:15.