Nu Felegɔ Vɛɛ Gala Goo Wotii Maazu Vɛtɛ Veaitiɛ Va
OCTOBER na folo dooluoi 2024, te ki-daa-wodo ʋeeni gaalɛ-bai nii zu Gala Goo Wotii Maazu Vɛtɛ Veaitiɛ ta so kwena nɛpɛ. te boni ga de ɣaa yɔwɔ̃i Jody Jedele ɓɔga Jacob Rumph ta sa ga Jehova Na Seeleitiɛ ta Ɣala Goo Wotii Maazu Vɛtɛ Veaitiɛ te ta. De ɣaa yɔwɔ̃i niitiɛ te vɛɛ sa Jehova ʋelizu kwena tamaa wuuzu.
Jody Jedele ɓɔga ŋazai, Damaris
Te de ɣaa yɔwɔ̃i Jedele ɣaani Missouri, Wuita zu. Na ɣa ɣɛɛna, kaa veaitiɛ te ɣɛni ga Jehova Na Seeleitiɛ te ta. Kaa veaitiɛ te ɣɛni vɛ Jehova Na Seeleitiɛ tɛ lɛ ɣɛni lamani na. Na ɓalaa ɣɛɛvɛ, de ɣaa yɔwɔ̃i niitiɛ tɔ li te wɔɔvɛ ga te vɛɛ te va ga te Gala goo wo, e te lamaa wɛ̃ɛni. Wõilai e ɣɛni de ɣaa yɔwɔ̃itiɛ ya ɣiini faa ma e vɛɛ zee-vili-kiizui va, na faa vɛɛni na ki-gaa-ziɛi va. E bataizei maa zɔlɔ woni October 15, 1983, tei e ɣɛni ga nu niinɛ. Na zu e woloni la kɔlɔ vɛlɛ ma, e panɛ̃ɛ lii lɔɔ-zeini, September 1989.
Tei de ɣaa yɔwɔ̃i Jedele ɣɛni ga nu niinɛ, kaa veaitiɛ tɔ liila Bɛtɛ e vɛɛ na seelai va ga te wɛlɛ na va. Daali-mai nii ɓɔni lopai niitiɛ va te deʋe ga te li Bɛtɛ ga te tii ɣɛ na. Tei tɔwɔ te wɔɔlɔni na nɔ ɣa te kɛɛni. De ɣaa yɔwɔ̃i Jedele liini Bɛtɛ Wallkill September 1990. Tii maa-wũgi te feeni zeea, e ɣɛni ga ŋada ɓale lii. Tei na tawolo kɛɛni e vɛɛni sa Sale Vɛlɛ La lii ɣɛɛ veaitiɛ va.
Siɛgi na ma, Gala goo wo beaitiɛ te ɣɛni lamasu Spanish wuuwuitiɛ zu te ɣɛni na ligi zu. Tɔwɔ, te ɣɛni wõini de ɣaa yɔwɔ̃ taniga te vɛɛ kuuwui na ta va. Na ma, de ɣaa yɔwɔ̃i Jedele liini kuuwui na gila su, yiɛ sa Spanish woi maa woli. Su lɛ ɣɛni lebeni, e wɛlɛ Damaris va, de ɣaa yɔwɔ̃i nii e ɣɛni ga panɛ̃itiɛ te ta na ligi zu nɔ. Tei sa siɛ ta leveni, te ɣii ʋuluni na ɣa ɣɛɛna e vɛɛ sa pɔɔ nu va Bɛtɛ.
Kwenagi nii zu 2005 te wuloni Bɛtɛ ga te li te te ɣaa veaitiɛ maazu vɛtɛ. Siɛgi na ma, te ɣɛni ga panɛ̃itiɛ te ta. De ɣaa yɔwɔ̃i Jedele ɣɛni ga kɔlɔ lɛɛ nui ta Panɛ̃itiɛ ta wɔlɔ vɛlɛi wu. Na ɣa ɣɛɛna e ɣɛni wɔnɔ tii ɣɛɛzu Ɓulugi Nii Va Ya Yɛpɛ Wui Sale lii ɣɛɛ veaitiɛ wɔ e vɛɛ sa ɓulugi nii va ya da Ɣala feli vɛlɛitiɛ lo.
Kwenagi 2013, te de ɣaa yɔwɔ̃i Jedele ɓɔga ŋazai lilini wulu Bɛtɛ ga te tii ɣɛ pɛlɛi nii ma te ɣɛni toso Warwick. E ziɣi sa ɓɔɔ siɛgi na ma, te vɛɛ tii ɣɛɛzu Patterson ɓɔga Wallkill. De ɣaa yɔwɔ̃i Jedele vɛɛ tii ɣɛɛzu ɓulugi nii va ya da Ɣala feli vɛlɛitiɛ lo ta ɓulugi nii ya ki-daa-wodo ʋe e vile sale vɛlɛ ʋaa va. Ɣalogi nii zu March 2023, te yee ɓadoni ba ga e ɣɛ ga Gala Goo Wotii Maazu Vɛtɛ Veaitiɛ ta ɓɔ ba nui ta. Tei e ɣi-gaa-ziɛni tiitiɛ ɓɔgapɛ ma te feeni zeea, e ɣɛni tea: “Ta tii ʋeena e ya ga e kɛ, tanisu ya ɣɛ ɓɔɔ luozu. Siɛgi na ma, kɛni e pɛɛ ɣibɛ ga maa nɛɛ e yee-la Jehova ma, zaɓui ɣa ga towa ya kɛ faa nɛpɛ ge ɣɛ.”
Jacob Rumph ɓɔga ŋazai, Inga
Te de ɣaa yɔwɔ̃i Rumph ɣaani California, Wuita zu. Naa zu, e ɣɛni dɛ nɔ ga lopo-wolo, dee ʋiiɓɛɛ e ɣɛni zee-la-mai zu. Kɛ dee ɔ dɛ ɣaa-ɓaa ga e Gala Kɔlɔi lɛɛ la. E wulo na wulu, kwena nɛpɛ de ɣaa yɔwɔ̃i Rumph ɔɔ li ga e laali maa ma, na ɣɛni ga Jehova ʋeli nu. Na ɓɔni ba e wõiga gaamai. Tei sa e ɣɛni ga kwena 13, e boni ga tiɛ Gala Kɔlɔi lɛɛ la. Tei sa e ɣɛni ga nu niinɛ, ɣalogi September 27, 1992 e bataizei maa zɔlɔ woni. E ɣɛni ga kuuzu nɛɛ ʋaa ga dee tɔɔ-zeini wɔnɔ ga yiɛ Gala goo wo, na ɣa ɣɛɛna yiɛ li gaalɛ-baitiɛ zu. Keea, e vɛɛ deɣeitiɛ va, te ɣaa baani Jehova ʋeli ʋai zu, na ɣa ɣɛɛna te bataizei maa zɔlɔwo.
Tei e ɣɛni ga nu niinɛ e wɛlɛni velei panɛ̃itiɛ te wuuzu nɛɛ e ɣɛni la. Na zu e woloni kɔlɔ vɛlɛ ma, e tɔɔ-zeini sa ga e ɣɛ ga panɛ̃itiɛ te ta, ɣalogi nii zu September 1995. Kwenagi 2000, e liini Ecuador vɛ Gala goo wo beaitiɛ tɛ lɛ ɣɛni lamani na. Na ɣa ta Inga te wũini na. E ɣɛni ga panɛ̃itiɛ te ta, kuloai Canada. Tei na tawolo kɛɛni te ɣii ʋuluni. Tei te ɣii ʋuluni, te ɣɛni sa tai ta zu e Ecuador, tɔwɔ Gala goo wo beaitiɛ tɛ lɛ ɣɛni lamani na. Zaa Gala goo wo beaitiɛ te lamagɛ ɓɔɔ kuuwui na zu.
Tei siɛ ta leveni, te yee ɓadoni sa de Ɣaa Yɔwɔ̃i Rumph ɓɔga Ŋazai va ga te ɣɛ ga panɛ̃ɛ niitiɛ te wuloai ba leilaa. Tei na ta kɛɛni wɔnɔ e ɣɛni ga sakiu owɔsiɛ. Gilead wɔlɔ vɛlɛ 132 te soni 2011, tiɛ ka te liini kɔlɔ vɛlɛi na wu. Naa zu, te wuloni Gilead wɔlɔ vɛlɛi wu te te leveni ŋada lamaa zui wɔlɔ-kɔlɔ ma. Te tii lamaa ɣɛɛni taniga ta ga, Bɛtɛ lii, Gala goo wo fai zuu ɓalaa su, ta Sakiu owɔsiɛ lii. De ɣaa yɔwɔ̃i Rumph ɣɛni ga kɔlɔ lɛɛ nui ta kɔlɔ vɛlɛi nii wu e Gala Goo Wo Beaitiɛ Ʋaa Ma.
Siɛgi ma COVID-19 zeeɓɛi vaani la, De Ɣaa Yɔwɔ̃i Rumph ɓɔga Ŋazai te liini wulu Wuita zu. Te te lilini Wallkill Bɛtɛ, na ɣa te kalaboni na ga yiɛ tii ɣɛ ɓulugi nii va ya Gala goo wo fai la kẽesu. Tei na tawolo kɛɛni, te te leveni wulu ofisii la e Ecuador, na ɣa e ɣɛni na ga Ofisii Maazu Vɛtɛ Veaitiɛ te ta. Kwenagi 2023 te te leveni Warwick. Ɣalogi nii zu January 2024, te yee ɓadoni De Ɣaa Yɔwɔ̃i Rumph va ga e ɣɛ ga Gala Goo Wotii Maazu Vɛtɛ Veaitiɛ ta ɓɔba nui ta. Tei e ɣi-gaa-ziɛni tiitiɛ ɓɔgapɛ ma e kɛɛ, e ɣɛni tea, “Nii ya kɛ tii wulo ba leilaa, lɛ ga vɛ ta e leve na kɛ taitiɛ wa tiɛni wo tii ɣɛɛzu kii-ma.”
De wuuzu nɛɛvɛ ɓɔɔ tii niitiɛ ʋaa ma de ɣaa yɔwɔ̃itiɛ te vɛɛ kɛɛzu, na ɣa ɣɛɛna “Ga wũfe nii ɣavele veaitiɛ ma.”—Fele. 2:29.