Kpɔbai E Na Luoi Zu Niitiɛ Faa Ma Ta Te Laa-Nɔwɔ-Wo

Woo maa-wũgitiɛ kana te kɔlɔ zɛvɛi nii zu e JW.org daa ga “Women Safety—Wetin the Bible Say?” Woo taniga ta kɔlɔ zɛvɛi na laa-wulo zuvɛ ya yee ɓadona ba, ga e dãaloo kɛ. Nii sa e dãaloo kɛɛ, ya ɣaa-ɓaa e sɔlɔwo kɔlɔ ma. Ya kɔlɔi na ɣalesu sa ga e yɛ e ya. De ɣaa yɔwɔ̃i ta e Wuita zu daa ga Stacy, e boga ga “ge kɔlɔ zɛvɛi nii ta dãaloo kɛɛni ge pu kɔlɔ ma. Na ɣa ɣɛɛna ga de ɣaa yɔwɔ̃i ta ge liini vɛ ta li ga ŋazaitiɛ na ga ta zinaitiɛ te mɛ lɛ ŋada zei te va”

Ŋaza nui ta ɣɛni tii ɣɛɛzu na, na ma e te ɣaa-zaɣa-kɛɛni ani ta kɔlɔi ta ʋe zeea kɛɛ ʋaa ma e gaa-wɛɛ ŋazaitiɛ vɛ te ɣɛni na. De ɣaa yɔwɔ̃itiɛ te kɔlɔ yuwu 40 ʋeeni zeea e vɛɛ jw.org ʋãga wɔlɔi ma lili kɔlɔ 30 va. Na wulu laa liimai, nui e ɣɛni ga nu walai na maazu, e boni de ɣaa yɔwɔ̃itiɛ ma ga e wõini Jehova Na Seeleitiɛ tiɛ Gala Kɔlɔi lɛga taitiɛ te na.

Stacy ɓɔga de ɣaa yɔwɔ̃ felegɔ, te liina wɔnɔ ŋada ɓalaa vɛ ta li ga ŋazaitiɛ na ani ta zinaitiɛ ta ɣɛna wõini te ŋada zei te va. Te kɔlɔ zɛvɛi nii dooluo leveni numaitiɛ wɔ. Na ɣa ɣɛɛna te lamaa te boni ga de ɣaa yɔwɔ̃itiɛ ta ɣɛna liizu na na wului, te li ga ta. Ŋaza nui ta e tii ɣɛɛzu na e boni ga, “Kɔlɔi nii ɣa vaazu ɓɔsu ŋazaitiɛ va vɛ.” E boni wɔnɔ ga, “Nii vagɛ ɓɔɔ ge ʋaa ma.” Na wului tei de ɣaa yɔwɔ̃itiɛ te liini na, te lamaa te ɣaalɛni ba ga te wɛlɛ velei va da Gala Kɔlɔi lɛɛ la ga numaa. Na ɣa ɣɛɛna ŋaza nu felegɔ ɣɛni na, te deʋeni gate li da ɣaalɛ-bai ta zu na wulu zedigi.

Stacy ɣɛ: “Ge wuuzu nɛɛvɛ ga tei nu lamaa te wuuzu ɣa nɛɛ ga te kɔlɔ zɛvɛi nii lodo. Kɔlɔ zɛvɛi nii ɣa ɣɛna de ya, towa ɓɔ de va ga de keela woo vagɔi wo ŋazai niitiɛ ma numaa te te laa-nɔwɔ-wosu. Velei numaa te yee zeini la kɔlɔi nii wu, e ge yii zoni ɓɔɔ. Tɔwɔ, ge kwɛ̃ni ga Jehova ɣa vaazu tuuyiɛ loozu ge ma ga velei ge ɣaa ɓaazu la ga ge keela woo vagɔi wo ŋazai niitiɛ ma.”