Zɛɓɛi Gala Wõini De Kwɛ̃ɛ É Vile Ba?

1. Zɛɓɛi é kɛɛ manɛɛ de Gala feli?

Gaama Ɣalagi ɣa é ŋɛnii ɓɔgapɛ kpɛtɛɛ. Na ŋeteai lɔɔ-zei zu lɛ ba, tɔwɔ kwɛ̃ɛ gɛ lɛ ba. (Psalm 90:2) Keela woo vagɔi é Gala Kɔlɔi zu towa é tevega. (1 Temete 1:11) Gala ka é de ɓɛtɛɛ. Tɔ ɣilekpu nɔ ɣa manɛɛ de feli.​—Faa Wuloai Kɛnɛ Ma 4:11 lodo.

2. Gala na tuɓo veleitiɛ taniga ta ga zɛɓɛ?

Nu ta nɛpɛ gɛ lɛ dɛ wɛlɛni Gala ba ɓɔvɛlaale tɔ ga ŋinɛ (ŋinɛ pagɔ). Nii zu-wulo-zu ɣa gaa, nɔ dɔ lɔtɔi leve gɛ ʋulu ŋɛnii ɓɔgapɛ ba zui ma. (Jɔ̃ 1:18; 4:24) Na ɓalaa ɣɛɛ vɛ, Gala na kpɛtɛ ŋɛniitiɛ ta ɓɔ de va de kwɛ̃ɛ. Ani da wɛlɛ na daa-mii ŋaniitiɛ va é vɛɛ gulu wuitiɛ va, towaa dɛ ga wõila ɣa Gala zéea é vɛɛ kele-ɣele ba. Ani da wɛlɛ na kɔnɔ zui nii ɓakpa velei va de wɛlɛ gee-wɔlɔgi va towa dɛ gaa diɛ gaa, gaa ɓaa ɣa Gala zéea.​—Loomɛitiɛ 1:20 lodo.

Ani da Gala Kɔlɔi maa woli na, da zoo ɓalaa de Gala kwɛ̃ɛ ga pagɔ. Gala Kɔlɔi ɣa ɓɔ de va de Gala yii-mai wɛ̃ɛ é vɛɛ nii va lɛ ga zii-ma. Da zoo de kwɛ̃ɛ velei ya nu zo da é vɛɛ velei va ya luɓo la faa ɣaazɔ zu.​—1 Jɔ̃ 1:9 lodo.

3. É ɣisu daa-zei ka Gala ba?

Ziizɛ ɣɛni tea: “Yài è ga gé ɣeeai è gee-zuvɛ, ɓaa ɣa la yá laa-zeigi ma.” (Mafiyu 6:9) Numaa lamaa ta Gala lili ga daa-zei tamaa, kɛ na daa-zeigi ɣa nɔ ɣilekpu. Kɛ zii woo gile-gilegi zu ta boga taɓalaa. Lɔɔma goi zu ta tili ga Jehova.​—Psalm 83:18 lodo.

Gala na daa-zeigi maa ʋeli bogɛ ga taɓalaa Gala Kɔlɔ lamaa zu, naa fikaa tɔɔ na ga gé maliɣii ɔɔ Gala. Siɛgi ma te Gala Kɔlɔi wonɛni la, Gala na daa-zeigi ɣɛni su ɔɔ ziiti ɓalaa tawusu dɔfela zu (7,000) Ziizɛ ɔɔ numaa ɣalabo yɛ Gala na daa-zeigi lɛ ga tiɛ.​—Jɔ̃ 17:26 lodo.

Wɛlɛ ʋiliogi nii va É Ɣisu Daa-Zei Ka Gala Ba?

4. È ɣisu Jehova ɓɛdɛvɛ de ma?

È ɣisu daa-nɔwɔ-wogi é zui wɔlɔ-kɔlɔ ma tɔɔ dɛɛzu ga Gala lɛ ɓɛdɛni de ma? Numaa lamaa ta ɣi-gaa-ziɛ zu gaa Gala ka é kɛɛ diɛ laa-nɔwɔ-wo. Kɛ na lɛ ga gaama.​—Jĩi 1:13 lodo.

Velei Jehova de ɓɛtɛɛ la, daa yii-ma ziɣi faa pɛ su. É nii ɣɛɛni ga é de maavii. Manɛɛ a de Jehova mama ga e ɓega de va diɛ yii-ma ziɣi (Joshua 24:15) Kɛ daa-nɔwɔ-wogi zu ɣa zaa wɔɔlɔ zu, ɓɔvɛlaale numaa lamaa ta ga faa yowũ ɣɛɛ vea. Jehova yii ɣa zuu-li ani ya wɛlɛ na faa yowũi niitiɛ va tiɛ ɣɛ.​—Te Ɣɛɛ Ʋaitiɛ 7:34; 1 Pite 5:7 lodo.

Jehova ɓɛdɛvɛ de ma, é wõini de yii-ma ɣɛ. Su ɓuovɛ saa ga Gala ge daa-nɔwɔ-wogi ɓea. Numaitiɛ te kɛɛzu diɛ laa-nɔwɔ-wo, Gala ka vaazu te zu ŋala-ŋala su. Zaɓu ɣa é kɛɛ é ɓega ba diɛ laa-nɔwɔ-wo, kɛ tɔwɔ daa-nɔwɔ-wogi nii wɛ̃ɛ ka ma. Da ziiti na Kalabo 8 ma daa vaazu nii wɛ̃ɛ su.​—2 Pite 2:9; 3:7, 13 lodo.

5. Daa lɔtɔ ɓɔɔ Gala ba ɣɛ le?

Jehova wõini de lɔtɔ ba, tɔwɔ da nii ɣɛ Gala-felia zu. É wõini ga de ɣile-gile-dai. (Psalm 65:2; 145:18) Towaa de zu ʋaa yɛ. Tanisu daa faa yowũ ɣɛ, kɛ tɔwɔ ani da ɣaa ɓaa na ga de zii-mai ɣɛ, towaa kwɛ̃ɛ ba. Velei ɓalaa de la ga faa yowũ ɣɛɛ vea, da zoo de ɣɛ ga Jehova na siɛ-pulu.​—1 Jɔ̃ 1:9; Jĩi 4:8 lodo.

Jehova ɣa é zɛʋu ʋea de ya, manɛɛ de wõila é leve nu ta nɛpɛ ba. (Maki 12:30) Yaa zoo è wõila lɛ ga Jehova ani ya faa lamaa maa woli na é vile ba, é zii-mai ɣɛ, na ɣa ɓɔ yìɛ è lɔtɔ ba.​—1 Temete 2:4; 1 Jɔ̃ 5:3 lodo.