Daa Leve Ɣɛ Le De Gaama Ɣala Pɛlɛi Wɛ̃ɛ?

1. É ɣisu gaama Ɣala pɛlɛi ɣa nɔ ɣilekpu?

Gala pɛlɛ gila ka Ziizɛ dɛɛni gaa pulu veaitiɛ, tɔ gaa gaama Ɣala pɛlɛi. Towaa ya pele wulo ga nuu ga é zɛʋui nii zɔlɔ wo kwɛ̃ɛ gɛ lɛ ba. Ziizɛ ɣɛni tiɛ: “nu gile-gile nɔ ɣa é pelei nii vɛtɛsu.” (Mafiyu 7:14) Gala feli velei nɔ Gala ka yee-ziɛ bu tɔga nii kuloai Gala Kɔlɔi zu. Gaama Ɣala feli veaitiɛ ta su ɣilekpu zee-la-mai zu.​—Jɔ̃ 4:23, 24; 14:6; Ɛfɛsɔitiɛ 4:4, 5 lodo.

Wɛlɛ ʋiliogi nii va È Ɣisu Gala-Felia Te Pɛ Ka Gala Ka Yee Zei Bu?

2. Zɛɓɛi Ziizɛ boni é vile niitiɛ va te ɓɔɔ wulo zu gaa ta ga Kolai maa vea?

Ziizɛ boni ga zɛɛ ʋaa ɣala goo wo beaitiɛ tɔɔ gaama Ɣala feli ʋai zu ŋala-ŋala. Taa ɓɔɔ wulo gaa taa ga gaama Ɣala feli vea. Tɛɛ ɓɔɔ wulo wɔnɔ gaa ta gaa Kolai ma vea ta ɣala pɛlɛitiɛ wu. Daa leve ɣɛ le de nii ɣa vele veaitiɛ wɛ̃ɛ? Gaama Ɣala pɛlɛi nɔ ɣa ya ɓɔ numaa va te ɣɛ ga Gala feli vea vagɔ. Ani ya wɛlɛ na te luɓo vele vagɔitiɛ va, ya zoo é te wɛ̃ɛ.​—Mafiyu 7:13-23 lodo.

3. Daa gaama Ɣala feli veaitiɛ wɛ̃ɛ ɣɛ le?

Wɛlɛ faa looluo va ya ɓɔ é va è te wɛ̃ɛ:

• Gaama Ɣala feli veaitiɛ ta ziɛ ga nii é Gala Kɔlɔi zu. Gaama Ɣala pɛlɛi ɓɔga zɛɛ ʋaa ɣala pɛlɛi tɛ lɛ ga faa gila ɓɔvɛlaale, zɛɛ ʋaa ɣala pɛlɛ wu veaitiɛ tɛ lɛ zia ga nii é Gala Kɔlɔi zu. (Mafiyu 15:7-9) Kɛ, gaama Ɣala pɛlɛ wu veaitiɛ ta ziɛ ga nii ta dɛ Gala Kɔlɔi zu.​—Jɔ̃ 17:17; 2 Temete 3:16, 17 lodo.

• 

  Ziizɛ wulu vea ɓɔɔɓɔɔ gitiɛ ta Jehova na daa-zeigi maa vii. Ziizɛ Jehova na daa-zeigi maa viini yɛ dɛ gaa numaa. É ɓɔni te va te Gala kwɛ̃ɛ, yɛ te ɣalabo ga tiɛ Gala feli gaá ɓaa la na daa-zeigi ma. (Mafiyu 6:9) É ɣisu ɓɛɛni ka te Gala na daa-zeigi lɛɛzu ga numaa?​—Jɔ̃ 17:26; Loomɛitiɛ 10:13, 14 lodo.

• Gaama Ɣala feli veaitiɛ ta yɛpɛ é vile Gala na Masadai va. Gala ge Ziizɛ leveni gaa é keela woo vagɔi wo é vile Gala ta Masadai va. Gala na Masadai nɔ ɣa manɛɛ de ɣito ba. Ziizɛ ɣɛni ɣɛpɛ zu é vile Gala ta Masadai va é yɛsu é za. (Luki 4:43; 8:1; 23:42, 43) É boni gaa pulu veaitiɛ te Gala goo wo é vile Masadai nii va. Nuu ta ɣa yɛpɛ na é wɔ é vile Gala ta Masadai va, é ɣisu Gala pɛlɛ zɛɓɛ ɣa manui wulaa bu?​—Mafiyu 24:14 lodo.

• Ziizɛ wulu veaitiɛ tɛ lɛ zui nii ma ʋaa va. Ziizɛ wulu veaitiɛ tɛ lɛ ʋoo zaɣa, ɔɔ nɔ ɣɛ gaa te zɔɔ-zɔɔ pile gɔmɛtii wulu. (Jɔ̃ 17:16; 18:36) Na ɣa ɣɛɛ na, tɛ lɛ yee vili ga tuɓo-vele yowũ ʋaa zu é numaa ya zui zu.​—Jĩi 4:4 lodo.

• Wõila ɓɔɔɓɔɔ ka gaama Ɣala feli veaitiɛ ya ɣiini faa ma. Wũfe-ma ɣa te ya nuu pɛ faa ma, ɓɔvɛlaale te maa woli vɛ Gala Kɔlɔi zu. Velei ɓalaa zɛɛ ʋaa ɣala pɛlɛ wu veaitiɛ ta yee vili la kɔɔ wɔɔ ʋaa zu, gaama Ɣala pɛlɛ wu veaitiɛ tɛ lɛ yee vili ga na ta zu. (Micah 4:1-3) Kɛ gaama Ɣala pɛlɛ wu veaitiɛ ta ɓɔ ɣiini ba, tiɛ ɣiini zii-lɔɔ.​—Jɔ̃ 13:34, 35; 1 Jɔ̃ 4:20 lodo.

4. Daa gaama Ɣala pɛlɛi wɛ̃ɛ ɣɛ le?

Gala pɛlɛ zɛɓɛi naa veaitiɛ ta ta ɣala-bogi wulo Gala Kɔlɔi zu, tiɛ Jehova na daa-zeigi maa vii, tiɛ kɔnɔ dɛ ga Gala ta masadai nɔ ɣa manɛɛ de ɣito ba? Ɓɛɛni ka wõila ɓɔɔɓɔɔ ge te ya ɣiini faa ma, tɛ lɛ yee vili ga kɔɔ wɔɔ ʋaa zu?​—1 Jɔ̃ 3:10-12 lodo.