KALABO 18
Velei Ya Kolai Maa Vea Ɓɔɔɓɔɔgitiɛ Wɛ̃ɛ La
Nu lamaa te ɣɛ ta ga Kolai Maa Vea. Kɛ te pɛ tɛ lɛ laani ga faa gila na ɣa ɣɛɛna ta lɔgitiɛ ta ga tee. Da leve ɣɛ le sa de Kolai Maa Vea ɓɔɔɓɔɔgitiɛ wɛ̃ɛ?
1. Ɓɛɛni ka te ga Kolai Maa Veaitiɛ?
Kolai Maa Veaitiɛ ta ga Ziizɛ na kala dopoa. (Te Ɣɛɛ Ʋaitiɛ 11:26 lodo.) Ta leve ɣɛ le te dɛ ga ta ga Ziizɛ na kala dopoa? Ziizɛ ɣɛni tea: “Ani wa ɣili na gòi va, a kɛ tii wa ga nà kala dopoa ga ɓɔɔɓɔɔ su.” (Jɔ̃ 8:31) Nii ɣa dɛɛzu ga manɛɛ Kolai Maa Vea ɓɔɔɓɔɔgitiɛ te ziɛ ga Ziizɛ na kalabogi. Ziizɛ ɔ na kalabogi wulo Gala Kɔlɔi zu, vele ɣana manɛɛ Kolai Maa Veaitiɛ te kɛɛ la.—Luki 24:27 lodo.
2. Kolai Maa Vea ɓɔɔɓɔɔgitiɛ ta wõila lɛ ɣɛ le?
Ziizɛ boni pulu veaitiɛ ma ga: “Wo wõi ga ɣiini è ɣɛ velei gè wo wõini la.” (Jɔ̃ 15:12) Ziizɛ dɛɛni ɣɛ le ga wõila ɣa zeea na kala dopoitiɛ ʋaa ma? E siɛ siɣini ba ga e yɛ te woba, yiɛ te yii-lɔɔ, na ɣa ɣɛɛna yiɛ ɓɔ te va. E yɛʋui ʋeeni ɓalaa te ʋaa ma. (1 Jɔ̃ 3:16) Vele ɣana nɔ Kolai Maa Vea ɓɔɔɓɔɔgitiɛ ta kɛɛ la, ta dɛ te luɓo-velei ɓɔga te yɛpɛ velei zu ga wõila ɣa te ya.
3. Tii zɛɓɛi Kolai Maa Vea ɓɔɔɓɔɔgitiɛ te kɛɛzu?
Ziizɛ tii ʋeeni na kala dopoitiɛ ya. “É te wuloni sa é te leve ga tiɛ Gala goi wo é vile Gala na masadai va.” (Luki 9:2) Wɔlɔ-wɔlɔi zu Kolai Maa Veaitiɛ tɛ lɛ ɓe ga nɔ Gala goi wo ta Ɣala pɛlɛitiɛ wu. Kɛ tɔ Gala goo wo vɛ nɛpɛ numaa tɔ ɣɛ na. Tɔ Gala goo wo wɔnɔ numaitiɛ ta vɛlɛitiɛ la. (Te Ɣɛɛ Ʋaitiɛ 5:42; 17:17 lodo.) Kolai Maa Vea ɓɔɔɓɔɔgitiɛ zaa ta Gala goi wo numaa ma vɛ nɛpɛ ta ɣɛ na. Wõila ɣa te ya numaa ʋaa ma. Na ɣa ɣɛɛna te wuuzu nɛɛvɛ ga te siɛ tamaa ziɣi ba ga te Gala goi wo numaa ma. Ta Gala Kɔlɔ lɛ ga numaa ga e te ɣaa-nɛkpɛ e ki-to fe te ya.—Maki 12:31.
FAA LAMAA MAA WOLI
Kolai Maa Vea ɓɔɔɓɔɔgitiɛ ta niitiɛ tɛ lɛ ziɛzu ga Ziizɛ na kalabogi, wɛlɛ velei ya te yɔɔzu wɛ̃ɛ la.
4. Ta ɣaa-ɓaa ga te gaamai wɛ̃ɛ e Gala Kɔlɔi zu
Wɔlɔ-wɔlɔi zu Kolai Maa Veaitiɛ te ɣɛni wõini ga Gala Kɔlɔi
Numaa taniga ta ɓɔɔ wulo ga Kolai Maa Vea, kɛ tɛ lɛ laani la ga tɔ ga faa ɓi ga e gaamai wɛ̃ɛ e Gala Kɔlɔi zu. ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.
Taitiɛ ta ɓɔɔ wulo ga Kolai Maa Vea tɛ lɛ Ziizɛ na kalabogi lɛɛzu ɣɛ le ga numaa?
Ziizɛ gaamai lɛɛni ga numaa Gala Kɔlɔi zu. A Jɔ̃ 18:37 lodo, wo gaa-zaɣa-kɛɛ nii ɣaa wote:
E ɣɛ velei Ziizɛ boni la, da leve ɣɛ le de niitiɛ wɛ̃ɛ te yee zeiya gaamai wu?
5. Gaamai e Gala Kɔlɔi zu ta dɛ ga numaa
Wɔlɔ-wɔlɔi zu Kolai Maa Veaitiɛ Tɔ Gala goi wo numaa ma
Ziizɛ ɔ vɛɛ liizu Gala ta, e tii ʋeeni pulu veaitiɛ ya ga te kɛ. Tɔwɔ ta dɛ tii na ɣɛɛzu zaa. A Mafiyu 28:19, 20 ɓɔga Te Ɣɛɛ Ʋaitiɛ 1:8 lodo, wo gaa-zaɣa-kɛɛ nii ɣaa wote:
Minɛɛ ɣa manɛɛ te Gala goi wona? Siɛ sɛɓɛi Gala goo wogai ɔ ɓea la?
6. Ta ziɛ ga niitiɛ ta dɛ ga numaa
Zɛɓɛi e ɓɔni zunui nii va ta tili ga Tom, ga e laala ga e Kolai Maa Vea ɓɔɔɓɔɔgitiɛ vɛtɛga? ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote.
Ʋiliogi nii zu, zɛɓɛi e kɛɛni Tom yiɛ yee wulo Gala feli ʋai zu?
Zɛɓɛi e kɛɛ sa Tom laila ga e gaamai vɛtɛga?
Ya nu wɛ̃ɛ ga tuɓo-velei ɛ lɛ nɔ ga manui yɛpɛ velei. A Mafiyu 7:21 lodo, wo gaa-zaɣa-kɛɛ nii ɣaa wote:
Zɛɓɛi ɓɔɔ fize wogɛi Ziizɛ ɣaazu—diɛ ɣɛ tea de laavɛ ga Ziizɛ ɔɔ diɛ ziɛ ga na tɛnɛgi?
7. Wõila ɣa ɓɔɔ te ya ɣiini faa ma
Wɔlɔ-wɔlɔi zu Kolai Maa Veaitiɛ wõila ɣɛni te ya ɣiini faa ma
E ɣisu Kolai Maa Veaitiɛ ta ɣi kulo te yɛʋui zu te vaitiɛ ʋaa ma? ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote.
Ʋiliogi nii zu zɛɓɛi e kɛɛni Lloyd ɣi kuloni yɛʋui zu de ɣaa yɔwɔ̃i Johnson ʋaa ma?
E ɣisu e dɛɛni ga tɔ ga Kolai Maa nu ɓɔɔɓɔɔ?
A Jɔ̃ 13:34, 35 lodo, wo gaa-zaɣa-kɛɛ niitiɛ ɣaa wote:
Taitiɛ ta wulo zuu ɓalaa su, Kolai Maa Vea ɓɔɔɓɔɔgitiɛ ta te zo ɣɛ le?
Kolai Maa Vea ɓɔɔɓɔɔgitiɛ ta nii ɣɛ ɣɛ le, ani numaa ta na kɔɔ wɔɔzu?
NUMAA TANIGA TE ƔƐ: “Kolai Maa Veaitiɛ te vɛɛ faa yowũ lamaa ɣɛɛzu—ta leve sa ɣɛ le te ɣɛ ga gaama Ɣala feli vea?”
Minɛɛ ɣa ya naa lodo Gala Kɔlɔi zu, ga e dɛ velei da Kolai Maa Vea ɓɔɔɓɔɔgitiɛ wɛ̃ɛ la?
NII SA È MAA WOLIA
Kolai Maa Vea ɓɔɔɓɔɔgitiɛ ta ziɛ ga kala-bogitiɛ te Gala Kɔlɔi zu. Ta wõila ɓɔɔɓɔɔ dɛ ga numaa na ɣa ɣɛɛna ta keela woo vagɔi wo e Gala Kɔlɔi zu.
Ma-ɓigitiɛ
Minɛɛ ɣa ɓɔɔ Kolai Maa Vea ɓɔɔɓɔɔgitiɛ ta ta ɣalabogi wulo na?
Tuɓo-vele zɛɓɛi e Kolai Maa Vea ɓɔɔɓɔɔgitiɛ ya?
Tii zɛɓɛi Kolai Maa Vea ɓɔɔɓɔɔgitiɛ ta kɛ?
WƐLƐ FAA LAMAA VA
Faa lamaa maa woli e vile numai niitiɛ va te ɣaa ɓaazu ga te ziɛ ga Kolai na kala-bogitiɛ.
Wɛlɛ nii va e ɓɔni gala pɛlɛ wũ-tuo nui nii va ga e “kaala ɓɔɔɓɔɔ maa zɔlɔwo.”
“Ta Gaa-zaɣa-kɛɛtiɛ ɓɔgapɛ gaa wotegi wulo Gala Kɔlɔi Zu!” (The Watchtower, April 1, 2014)
Faa maa woli e vile velei Kolai Maa Vea ɓɔɔɓɔɔgitiɛ ta ɓɔ la te vaitiɛ va ani faa ɓaa ka laana te ma.
Velei Ga Ɓɔ La Ge Ɣaa Yɔwɔ̃itiɛ Va Ani Faa Ɓaa Ka Laana Te Ma—Ʋilio Kpuogi (3:57)
Ziizɛ yɛpɛni e vile nii va ya ɓɔ de va de pulu vea ɓɔɔɓɔɔgitiɛ wɛ̃ɛ. Wɛlɛ velei pulu veaitiɛ wɔlɔ-wɔlɔi zu e vɛɛ pulu vea ɓɔɔɓɔɔgitiɛ va zaa te nii ɣɛɛzu la e boni.
“Ya Gaama Ɣala Feli Veaitiɛ Wɛ̃ɛ Ɣɛ Le?” (The Watchtower, March 1, 2012)