Siɛgi Ɣaa Ga E Ɣavele Ɓɛtɛ E Vile Sale Vɛlɛ Ʋaa Va

Zɛɓɛi e kɛɛ maa nɛɛ e ɣavele ɓɛtɛ? Sale vɛlɛ la ʋaa ɣa vile de va siɛ nɛpɛ ma. Na ma, ɣaa-ɓaa siɛgi nii ma ga e ɣavele ɓɛtɛ e vile salei mazii va e vaazu siɣizu. Ani ya na ɣɛɛna ya dɛ ga zɛʋu ʋize wogɛ e ɣaazu na ɣa ɣɛɛna ya ziɛzu ga Jehova na tɔgi e vile fɔdɔ va.—Ac 15:28, 29.

Zɛɓɛi ya kɛ ga e ɣavele ɓɛtɛ?

• Jehova ʋeli, na ɣa ɣɛɛna e ɣaa-ɓaa e fɔdɔ wɔlɔi ɓɛtɛ ga pagɔ. Na ɣa ga (DPA)a wɔlɔ yuwugi.* Taitiɛ te bataizei maa zɔlɔ woga ta fɔdɔ wɔlɔi gila maa zɔlɔwo kɔlɔ ziɣi zuvɛ. Ya ta maa zɔlɔwo ɓalaa lopaitiɛ ʋaa ma, daa ga Identity Card (ic)

• Ani ko ka e va, kuuwu wũ-tuo veaitiɛ ɣaa-zaɣa-kɛ kɔlɔi nii ʋaa ma Information for Expectant Mothers (S-401). Kɔlɔi nii ɣa ɓɔ e va e deʋe vagɔ wo e vile niitiɛ va te ʋaazu ɣɛɛzu ga yiɛ

• Ani fɔdɔ ʋaa ɣa vilena e va ɔɔ maa nɛɛ te e la, zɛɓɛi maa nɛɛ e kɛ? Siɛgi tawolo yɛ na e bo kuuwu wũ-tuo veaitiɛ ma. Na ɣa ɣɛɛna e bo wui sale lii ɣɛɛ veaitiɛ ma ga Jehova Na Seeleitiɛ ta yɛsu vaazu ga te laali ma.

Kuuwu wũ-tuo veaitiɛ ta ɓɔ e va ɣɛ le? Ta ɓɔ e va ga e fɔdɔ wɔlɔ yuwugi ɓɛtɛ. Na ɓalaa ɣɛɛvɛ, kuuwu wũ-tuo veaitiɛ tɛ lɛ vaazu deʋe wosu e ʋaa ma e vile salei mazii va maa nɛɛ e siɣi. (Loom 14:12; Ga 6:5) Ani ya bo na kuuwu wũ-tuo veaitiɛ ma ga fɔdɔ ʋaa vilegɛ e va, ta vaazu bosu kaʋile ɓulugi nii ma ya yɛpɛ wui sale lii ɣɛɛ veaitiɛ wɔ. Na ɣa ga Hospital Liaison Committee (HLC).

HLC veaitiɛ ta ɓɔ e va ɣɛ le? Kuuwu wũ-tuo veai niitiɛ te ɓulugi nii va, te te ɣalaboga ga te ɓɔ wui sale lii ɣɛɛ veaitiɛ va ga te niitiɛ ɣaa ɣa de deʋea e vile fɔdɔ ʋaa va. Ta pele taniga lɛ ga ya ɓɔ e va e salei nii ziɣi fɔdɔ ʋaa lɛ ba. Ani e wõini ta bo wo li wui sale lii ɣɛɛ nui ta ɓalaa pɔ, nii na fai lɛ ɓaani.

A WƐLƐ ƲILOGI NII VA VELEI DA DEƲE WO DA E VILE FƆDƆ ƲAA VA, NA ƔA ƔƐƐNA WO GAA-ZAƔA-KƐƐ NIITIƐ ƔAA WOTE:

• Zɛɓɛi e maa wolia ʋiliogi nii zu ga ya ɓɔ e va e ɣavele ɓɛtɛ e vile fɔdɔ ʋaa va?

  Your answer