E Ɣisu Jehova Na Seeleitiɛ Ta Ga Kolai Maa Vea Ɓɔɔɓɔɔ?

Gaitiɛ ge ga Jehova Na Seeleitiɛ ge laavɛ la ga, ga ga Kolai Maa Vea ɓɔɔɓɔɔ. Zɛɓɛi e kɛɛ ge laila ga, ga ga Kolai Maa Vea ɓɔɔɓɔɔ? Wɛlɛ niitiɛ va ge laila, ta daa-zeigi e ge wuloa ba leilaa e vɛɛ wõilai va e ge ya ɣiini faa ma.

1. Minɛɛ ɣa Jehova Na Seeleitiɛ ta ta ɣala-bogitiɛ wulona?

Ziizɛ boni ga: “[Gala] daa woi ɣa ga gaama.” (Jɔ̃ 17:​17) E ɣɛ velei Ziizɛ kɛɛni la, niitiɛ ɓɔgapɛ Jehova Na Seeleitiɛ te laila, kulovɛ Gala Kɔlɔi zu. Wɛlɛ ma wo-kɔ̃ɔ-mai ta va. Kwenagi nii zu 1870, Gala Kɔlɔ maa woli vea taniga te tɔɔ-zeini ga tiɛ Gala Kɔlɔi maa woli ɓɔɔ ga pagɔ. Te laani ga niitiɛ Gala Kɔlɔi boga ani ɓalaa Gala pɛlɛi zɔitiɛ tɛ lɛ ɣɛni laani la. Na ɣa ɣɛɛna te tɔɔ-zeini sa ga, tiɛ gaamai nii lɛ ga numaa.a

2. Zɛɓɛi e kɛɛ ta ge lili ga Jehova Na Seeleitiɛ?

Jehova ɣa na numaitiɛ lili ga na seeleitiɛ, ɓɔvɛlaale ta gaamai wo e vile ba. (Hiiɓuluitiɛ 11:4–12:1) Wɔlɔ-wɔlɔi zu, Gala ge boni na numaitiɛ ma ga: “Wa ɣa wo ga na seeleitiɛ.” (Isaiah 43:​10 lodo.) Gala Kɔlɔi ɣɛ, Ziizɛ ɣa “é ga seelei nu ɣa laa la.” (Faa wuloai kɛnɛ ma 1:5) Kwenagi 1931 zu, ge daa-zeigi nii ziɣini Jehova Na Seeleitiɛ. Ge wuuzu nɛɛvɛ ga tei daa-zeigi nii ge va.

3. Jehova Na Seeleitiɛ ta wõila lɛ ɣɛ le e ɣɛ velei Ziizɛ kɛɛni la?

Wõila ɣɛni Ziizɛ ya na kala dopoitiɛ ʋaa ma ɓɔɔ ga ʋike. Te maʋaa wuloni e ɣɛ kaala gila. (Maki 3:​35 lodo.) Vele ɣana nɔ Jehova Na Seeleitiɛ te la, te yee-viligɛ kiizu zui wɔlɔ-kɔlɔ ma. Na ɣa e kɛɛ ga ge vaitiɛ lili ga ge ɣaa yɔwɔ̃itiɛ. (Failimɔ 1, 2) Ga ziɛ wɔnɔ ga tɔgi nii: “A wõi ga wo vaitiɛ.” (1 Pite 2:​17) Jehova Na Seeleitiɛ ta wõilai nii lɛ pele lamaa zu. Ta ɓɔ te ɣaa yɔwɔ̃itiɛ va zui wɔlɔ-kɔlɔ ma, ani faa ɓaa ka laana te ma.

FAA LAMAA MAA WOLI

4. Gá ɣalabogi ɓɔgapɛ kulovɛ Gala Kɔlɔi zu

Jehova boni ga gaamai e Gala Kɔlɔi zu numaa tɔ zoo te gaa ɣa ɓɔɔ ga pagɔ. A Daniel 12:4 lodo, wo gaa-zaɣa-kɛɛ nii ɣaa wote:

• Zɛɓɛi Kolai Maa Veaitiɛ ta gaa ɣa, ani ta na Gala Kɔlɔi maa wolizu?

Wɛlɛ velei Charles Russell ɓɔga baitiɛ te Gala Kɔlɔi maa wolini la. ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.

ƲILIOGI: Gaamai Maa Woli Ʋai Gala Kɔlɔi Zu (7:45)

• Ʋiliogi nii zu, Charles Russell ɓɔga baitiɛ te Gala Kɔlɔi maa wolini ɣɛ le?

E ɣɛni nii wõni?

Tanisu gá ga ɣi-gaa-ziɛi taniga maa ʋeli bo e vile fai taniga va ge laila. Zɛɓɛi e kɛɛ gá nii ɣɛ? Velei nɔ woza ɣa wodo la ga pɛlɛ-pɛlɛ, vele ɣana nɔ Gala vɛɛ ɓɔsu la ge va ga ge Gala Kɔlɔi ɣaa ɣa la ga pɛlɛ-pɛlɛ. (Proverbs 4:​18 lodo.) Velei ɓalaa Gala Kɔlɔi maa lɛ ʋeli boga la, kɛ ani ga fai ta ɣaa ɣa na ɓɔɔ ga pagɔ Gala Kɔlɔi zu, ga nii maa ʋeli bo ge laila.

5. Ga ɣaa-ɓaa ga ge seele woo ʋe e vile Jehova va

ƲILIOGI: Daa-Zeigi Nii Ɣa Ge Losovɛ Lɛ (2:40)

• Daa-zeigi nii ga Jehova Na Seeleitiɛ, zɛɓɛi e kɛɛ solowogɛi?

Zɛɓɛi e kɛɛ Jehova yee ɓadoga numaa va ga te ɣɛ ga na seeleitiɛ? É nii ɣɛɛvɛ ga te dɛ ga towa e ga gaama Ɣalagi, tei numaa taniga te zɛɛ ʋaa wosu e vile ba. De wɛlɛna zɛɛ ʋai niitiɛ felegɔ va.

Gala pɛlɛi taniga wu ta bo ta numaitiɛ ma ga Gala wõini te maa-niini gala feli ʋai vɛɛ ta ɣala feli ʋai va. Kɛ a Leviticus 26:1 lodo, wo gaa-zaɣa-kɛɛ niitiɛ ɣaa wote:

• Zɛɓɛi e ga gaamai? Zɛɓɛi e ga Jehova na ki-gaa-ziɛi e vile maa-niini gala feli ʋai va?

Gala pɛlɛ wũ-tuo vea taniga ta bo ta numaitiɛ ma ga Ziizɛ ɣa e ga Gala. Kɛ a Jɔ̃ 20:​17 lodo, wo gaa-zaɣa-kɛɛ niitiɛ ɣaa wote:

• Zɛɓɛi e ga gaamai? E ɣisu Ziizɛ ɓɔga Gala ta ga nu gila?

• Jehova na seeleitiɛ levegɛ ga te ɓɔ e va e Jehova wɛ̃ɛ ta dui. Zɛɓɛi e ga yɛdɔ ɣi-gaa-ziɛi e vile na va?

6. Wõila ɣa ge ya ɣiini faa ma

Gala Kɔlɔi bogɛ ga kuuwui maʋaa wulovɛ e ɣɛ nu ɓuse lɔtɔi losovɛtiɛ. A 1 Kɔlĩitiɛ 12:​25, 26 lodo, wo gaa-zaɣa-kɛɛ niitiɛ ɣaa wote:

• Zɛɓɛi manɛɛ Kolai Maa Vea ɓɔɔɓɔɔgitiɛ te kɛ, ani te ɣaa yɔwɔ̃i ta ɣana laa-nɔwɔ-wosu?

• Zɛɓɛi ɓɔɔ e pɛtɛga e vile wõilai nii va e Jehova Na Seeleitiɛ zaama?

Ani Jehova Na Seeleitiɛ te taniga ta na laa-nɔwɔ-wosu ŋadɛi ta, te ɣaa yɔwɔ̃itiɛ te zui wɔlɔ-kɔlɔ ma ta ɓɔ te va kaʋile. Ga e wɛlɛ ma wo-kɔ̃ɔ-mai ta va, ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.

ƲILIOGI: Fãga Walai Ɓɔga Ziɛ Nii E Vaani Haiti Daa Ga Mafiyu (5:​29)

• Kpɔbai Jehova Na Seeleitiɛ ta fe te ɣaa yɔwɔ̃itiɛ ya, e dɛɛ ɣɛ le ga wõila ɣa te ya ɣiini faa ma?

NII SA È MAA WOLIA

Jehova Na Seeleitiɛ ta ga Kolai Maa Vea ɓɔɔɓɔɔ. Ge yee-viligɛ kiizu zui wɔlɔ-kɔlɔ ma. Ge laavɛ ga niitiɛ ɓɔgapɛ te Gala Kɔlɔi zu. Na ɣa ɣɛɛna ga gaamai lɛ ga numaa e vile Jehova va.

Ma-ɓigitiɛ

• Zɛɓɛi e kɛɛ ta ge lili ga Jehova na seelaitiɛ?

• Ga ɣiini so ɣɛ le?

• E ɣisu Jehova Na Seeleitiɛ ta ga Kolai Maa Vea ɓɔɔɓɔɔ?

WƐLƐ FAA LAMAA VA

Faa lamaa maa woli e vile ge va.

Jehova Na Seeleitiɛ Ta Dɛɛzu Ga Zee-La-Ma Ɣa Te Ya, Ma maa wũgi: Ge Wuloa Kpidii Zu (1:00:53)

Wɛlɛ velei Jehova Na Seeleitiɛ te zɛɛ ʋaa ɣala-bogitiɛ wulu wuloa la.

Gala Na Numaitiɛ Ta Na Daa-Zeigi Laa-Maa-Lɛ (7:08)

Gaa-zaɣa-kɛɛtiɛ te e ya e vile Jehova Na Seeleitiɛ va, wɛlɛ te ɣaa wotegitiɛ va.

“Gaa-zaɣa-kɛɛtiɛ nu lamaa ta bo” (kɔlɔi nii ɣa fãga wɔlɔi ma)

Stephen zilini ga wui kwelegitiɛ ga ʋike. Wɛlɛ nii va e pɛtɛni Jehova Na Seeleitiɛ zaama, ga e ɓɔni ba e luɓo-velei maa ʋeli.

“Na Ŋeteagi Maa Ɣɛni Nɔ Ʋeli Bosu Ga Ma Yowũ” (The Watchtower, July 1, 2015)