KALABO 28
Dɛ Ga E Wuuzu Nɛɛvɛ Nii Ʋaa Ma Jehova Ɓɔga Ziizɛ Te Kɛɛ E Vɛ
Ya ɣi-gaa-ziɛ ɣɛ le ani ya ziɛ-pului ta ɣa faa-nɛɛ ɣɛɛna e vɛ? Gaama zu, e wuuzu ɣa nɛɛ ɓɔɔ ga ʋike. Ya ɣɛ wõini e dɛ ga ya ziɛ-pului ga e yee zeivɛ faa-nɛɛ na wu. Jehova ɓɔga Ziizɛ te faa-nɛɛ ɓakpa ɣɛɛvɛ de vɛ. Zɛɓɛi e ga faa-nɛɛ na, tɔwɔ da leve ɣɛ le de dɛ ga de yee zeivɛ bu?
1. Pele gila ka ga zɛɓɛ da dɛɛ la ga de wuuzu nɛɛvɛ nii ʋaa ma Jehova ɓɔga Ziizɛ te kɛɛ de vɛ?
Gala Kɔlɔi de ɣi-togɛ ga, “nui nɛpɛ yá [Ziizɛ] maʋaa ziɣi ga gaama” towa zɛʋui nii zɔlɔwo kwɛ̃ɛ gɛ lɛ ba. (Jɔ̃ 3:16) Ga de Ziizɛ maʋaa ziɣi ga gaama su-wulo-zu ɣa ga zɛɓɛ? Ga de Ziizɛ maʋaa ziɣi ga gaama lɛ nɔ ga de laala ga Ziizɛ ɣa na. Kɛ manɛɛ de dɛ ga zee-la-ma ɓɔɔɓɔɔ ka de ya niitiɛ zu da kɛ e vɛɛ niitiɛ va da deʋe. (Jĩi 2:17) Manɛɛ de dɛ ga zee-la-ma ɓɔɔɓɔɔ ka de ya niitiɛ zu da kɛ e vɛɛ niitiɛ va da bo. Da nii ɣɛɛna towa da ziɛ-pului zu-ɓaa de yɔɔzu da Ziizɛ e vɛɛ Keea va Jehova.—Jɔ̃ 14:21 lodo.
2. Gaalɛ-ba zɛɓɛi ya ɓɔ de va de dɛ ga de wuuzu nɛɛvɛ nii ʋaa ma Jehova ɓɔga Ziizɛ te kɛɛ de vɛ?
Ziizɛ ɔ vɛɛ zaazu ma ɓɔkɔi na, e pele ɓalaa lɛɛni ga pulu veaitiɛ ga velei ta dɛɛ la ga te wuuzu nɛɛvɛ zalaɣai nii ʋaa ma e ɣɛni vaazu kulozu. Ziizɛ ɓɔga na kala dopoitiɛ te gaalɛ-ba ɣɛɛni kuloai ɓɔɔ ba leilaa. Gaalɛ-bai nii ɣa Gala Kɔlɔi ɣa tili ga, “de Maliɣii Na Daa-Mii Ŋɛni-Miai.” Towa wɔnɔ ta tili ga Ɣi-Zɛ-Su Ɣaalɛ-Bai e vile Ziizɛ zaa ʋai va. (1 Kɔlĩitiɛ 11:20) Ziizɛ gaalɛ-bai nii ɣɛɛni ta na kala dopoitiɛ. E nii ɣɛɛni ga na kala dopoitiɛ ɓɔga Kolai Maa Vea ɓɔɔɓɔɔgitiɛ ɓɔgapɛ—te ɣigii yɛsu ga e zaani te ʋaa ma. Nii ɣa Ziizɛ boni e vile gaalɛ-bai nii va: “A nii ɣɛ dàa ɣigi-yɛ faa ma wo ɣa.” (Luki 22:19) Ani ya liina Ɣi-Zɛ-Su Ɣaalɛ-Bai zu, a kɛ tii ya dɛɛzu ga e wuuzu nɛɛvɛ wõilai nii ʋaa ma Jehova ɓɔga Ziizɛ te dɛɛ ga diɛ.
FAA LAMAA MAA WOLI
Wɛlɛ pele ta ɓalaa ba ya dɛɛ la ga e wuuzu nɛɛvɛ wõilai nii ʋaa ma Jehova ɓɔga Ziizɛ te dɛɛ ga diɛ. Wɛlɛ nii va e kɛɛ Ɣi-Zɛ-Su Ɣaalɛ-Bai e vile Ziizɛ zaa ʋai va e ga faa ɓi.
3. De dɛ ga de wuuzu nɛɛvɛ nii ʋaa ma Jehova ɓɔga Ziizɛ te kɛɛ de vɛ
Ɣi-gaa-ziɛ ani nui ta ɣa e yɛʋui maazu ɓaana, ya zoo e yeema ka-ʋile nii ma nui na kɛɛ e vɛ? Ɔɔ ya pele ɣaa-ziɛ e dɛ ga e wuuzu nɛɛvɛ nii ʋaa ma e kɛɛ?
Da zoo de zɛʋui nii maa zɔlɔwo kwɛ̃ɛ gɛ lɛ ba faa-nɛɛ nii zaala zu Jehova kɛɛ de vɛ. A 1 Jɔ̃ 4:8-10 lodo, wo gaa-zaɣa-kɛɛ niitiɛ ɣaa wote:
Zalaɣai nii Ziizɛ kuloa, zɛɓɛi e kɛɛ e ga faa-nɛɛ kuloai ba leilaa?
Zɛɓɛi e ga yɛdɔ ɣi-gaa-ziɛi e vile nii va Jehova ɓɔga Ziizɛ te kɛɛ de vɛ?
Da leve ɣɛ le de dɛ ga de wuuzu nɛɛvɛ nii ʋaa ma Jehova ɓɔga Ziizɛ te kɛɛ de vɛ? A 2 Kɔlĩitiɛ 5:15 ɓɔga 1 Jɔ̃ 4:11; 5:3 lodo. Wa ma maa wũgi lodona, wo gaa-zaɣa-kɛɛ nii ɣaa wote. Wa fele kelei lodona wɔnɔ, wo gaa-zaɣa-kɛɛ nii ɣaa wote:
E ɣɛ velei Gala Kɔlɔi boga la, zɛɓɛi manɛɛ de kɛ ga de dɛ ga de yee zeivɛ nii wu Jehova ɓɔga Ziizɛ te kɛɛ de vɛ?
4. Vile Ziizɛ wɔwɔ-wogi zu
Velei wɔnɔ da dɛɛ la ga de wuuzu nɛɛvɛ faa-nɛɛ nii ʋaa ma Jehova ɓɔga Ziizɛ te kɛɛ de vɛ, tɔ ga de vile kɔwɔ-wogi zu. A 1 Pite 2:21 lodo, wo gaa-zaɣa-kɛɛ nii ɣaa wote:
Ya leve ɣɛ le e vile Ziizɛ wɔwɔ-wogi zu?
Kpoolo-ʋɔi ɓɔga dɔi te zu-wulo-zu ɣa ma. Kpoolo-ʋɔi zu-wulo-zu ɣa ga Ziizɛ ma lɔtɔi nii maa-wulo-zu lɛ ɣɛni ba e feeni de ʋaa ma. Dɔi zu-wulo-zu ɣa ga ma ʋɔdɔi
5. Ɣaa-ɓaa e ɣɛ Ɣi-Zɛ-Su Ɣaalɛ-Bai zu e vile Ziizɛ zaa ʋai va
Ga e nii wɛ̃ɛ e ɣɛɛni folo maa wũgi te Ɣi-Zɛ-Su Ɣaalɛ-Bai ɣɛɛni ma, a Luki 22:14, 19, 20 lodo, wo gaa-zaɣa-kɛɛ niitiɛ ɣaa wote:
Zɛɓɛi ya ɣɛ Ɣi-Zɛ-Su Ɣaalɛ-Bai zu?
Kpoolo-ʋɔi ɓɔga dɔi te zu-wulo-zu ɣa ga zɛɓɛ?—Wɛlɛ ma woo 19 ɓɔga 20 va.
Ziizɛ wõini pulu veaitiɛ te Ɣi-Zɛ-Su Ɣaalɛ-Bai ɣɛ kwena nɛpɛ, foloi nii ma e zaani la. Na ɣa e kɛɛ Jehova Na Seeleitiɛ ta wũi kwena nɛpɛ ga te ɣi-zɛ Ziizɛ zaa ʋai zu, e ɣɛ velei nɔ Ziizɛ boni la. Ga e faa wɛ̃ɛ e vile gaalɛ-bai nii va kuloai ba leilaa, ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.
Zɛɓɛi ya ɣɛ Ɣi-Zɛ-Su Ɣaalɛ-Bai zu?
Wõila ɣɛni Ziizɛ ya Gala Kɔlɔi ʋaa ma, e keela woo vagɔi woni numaa ma na ɣa ɣɛɛna e ɓɔni numaa va
NUMAA TANIGA TE ƔƐ: “Nii nɔ manɛɛ e kɛ ga e wũ-maa-wo maa zɔlɔwo tɔ ga e laala ga Ziizɛ ɣa na.”
Ya leve ɣɛ le e ɓɔ nu va e kwɛ̃ɛ Gala goi niitiɛ zu Jɔ̃ 3:16 ɓɔga Jĩi 2:17, ga ɛ lɛ nɔ ga e laala ga Ziizɛ ɣa na, kɛ manɛɛ e faa ɓalaa kɛ?
NII SA È MAA WOLIA
Da dɛ ga de wuuzu nɛɛvɛ nii ʋaa ma Ziizɛ kɛɛ de vɛ ani da maʋaa ziɣina ga gaama, na ɣa ɣɛɛna diɛ li Ɣi-Zɛ-Su Ɣaalɛ-Bai zu.
Ma-ɓigitiɛ
Ga de Ziizɛ maʋaa ziɣi ga gaama, su-wulo-zu ɣa ga zɛɓɛ?
Ya leve ɣɛ le e dɛ ga e wuuzu nɛɛvɛ nii ʋaa ma Jehova ɓɔga Ziizɛ te kɛɛ e vɛ?
Zɛɓɛi e kɛɛ e ga faa ɓi ga de li Ɣi-Zɛ-Su Ɣaalɛ-Bai zu e vile Ziizɛ zaa ʋai va?
WƐLƐ FAA LAMAA VA
Zɛɓɛi Ziizɛ zaa ʋai ɣa de wuuzu nɛɛ ga de kɛ?
Faa lamaa maa woli e vile zee-la-ma va, ta velei da dɛɛ la.
“Dɛ Ga Zee-La-Ma Ɣa E Ya E Vile Niitiɛ Va Jehova De Ɣi-Toga La” (The Watchtower, October 2016)
Faa maa woli e vile velei va ŋaza nui nii na ŋeteai ma ʋeli boni la, tei e kwɛ̃ni ga towa wulo Ziizɛ zaa ʋai zu-nu-ma.
“Gala Kɔlɔi Ɣa Da Ŋeteai Maa Ʋeli Bo” (The Watchtower, August 1, 2011)
Wɛlɛ nii va e kɛɛ taitiɛ ta kpoolo-ʋɔi mi te dɔi ɓoale tɛ lɛ lamaga.