Ya Leve Ɣɛ Le E Kɛ Kuuzu Nɛɛ Ɣɛ Ya Ɣaalai Zu?​—Ma Maa Mũgi

Ani numaa ta ɣɛna ʋulu ʋaa ɣɛɛzu kuuzu nɛɛ ɣa ɣɛ te ya, ta ɣɛ wõini e ɣɛ te ya wɔ. Tɔwɔ ta zoo te kɛ kuuzu nɛɛ na ɣɛ te ya. Kolai Maa Veai niitiɛ te ʋulu ʋaa ɣɛɛ kwena tamaa wuuzu, tɔwɔ te ɣaa ɓaazu ga te ziɛ ga tɛnɛgitiɛ te Gala Kɔlɔi zu te kwɛ̃ni ga nii ɣa ga gaama.

1. Tɛnɛ sɛɓɛi Gala Kɔlɔi fea ŋaza kɛɛ veaitiɛ ya?

Jehova yee ɓadoga zunui va ga e ɣɛ ga kaala wũ-tuo nui. (Ɛfɛsɔitiɛ 5:​23 lodo.) Jehova wõini zunui deʋe vagɔ wo ga taitiɛ te na kaalai zu te wulo su-nu-ma. Gala Kɔlɔi boga ŋaza kɛɛ veaitiɛ ma ga: “A wõi ga wo ŋazaitiɛ.” (Ɛfɛsɔitiɛ 5:​25) Na zu-wulo-zu ɣa ga zɛɓɛ? Zunui nii wõila zeea ŋazai ʋaa ma towa na zo ɓɔɔ ga pagɔ ani ta ɣɛna ta vɛlɛi la ɔɔ ani ta ɣɛna kpɔsu. Towa na maazu vɛtɛ ga faa yowũ mɛlɛ ɣɛɛ la na ɣa ɣɛɛna e na yii-la. (1 Temete 5:8) Maɓigii ɣa ga towa ɣaa-ɓaa ga e ɓɔ ŋazai va ga siɛ-pulu vagɔ ɣɛ te yɔɔzu ta Jehova. (Mafiyu 4:4) Ta ŋazai ta Gala feli, te Gala Kɔlɔi lodo kii-ma. Ani towa ŋazai zo na ɓɔɔ ga pagɔ towa siɛ-pului nii zu-ɓaa e te yɔɔzu ta Jehova.​—1 Pite 3:7 lodo.

2. Tɛnɛ sɛɓɛi Gala Kɔlɔi fea zini-bɛ veaitiɛ ya?

Gala Kɔlɔi zini-bɛ veaitiɛ lɛnɛgɛ ga “a wɛlɛ na va ga wa wũfesu wo wɔɔ veaitiɛ ma.” (Ɛfɛsɔitiɛ 5:​33) Ŋaza nui ɣa leve ɣɛ le e na ɣɛ? Manɛɛ e ɣi-gaa-ziɛ pɔɔ nu na tuɓo-vele vagɔitiɛ ma e vɛɛ velei va na ɓɔsu la kaalai va. Manɛɛ yiɛ ziɛ ga deʋei niitiɛ pɔɔ nu ɣa bo. Towa dɛ wɔnɔ ga wũfe-ma ɣa zeea pɔɔ nu ʋaa ma ani ya ɣɛna yɛpɛzu ga pagɔ na wɔ. Yiɛ yɛpɛ ga pagɔ e vile ba numaa wɔ ani ɓalaa na lɛ ga Jehova ʋeli veaitiɛ te ta.

3. Ʋulu veaitiɛ ta leve ɣɛ le te ta ziɛ-pului zu-ɓaa te yɔɔzu?

Nii ɣa Gala Kɔlɔi boga e vile ʋulu veaitiɛ va: “Te felegɔ te ɣɛ ga ŋɛni ɣila.” (Mafiyu 19:5) Na zu-wulo-zu ɣa ga te mɛlɛ ɓe faa ta nɛpɛ ba ɔ faa vɛɛ wõilai nii va e te ya ɣiini faa ma. Ta nii ɣɛ ani ta ɣɛna siɛ tamaa ziɣizu ba kii-ma tiɛ wuuzu ʋaa wo ɣiini ma wõila vele zu. Tɛ lɛ ɓega faa ta nɛpɛ ba ɔɔ nu nɛpɛ ba e wulo Jehova wulu ɔ ʋize wo e leve siɛ-pului va e te yɔɔzu. Ta ɣaa-ɓaa ga te mɛlɛ ɣata nu nɛpɛ ba e wulo nɔ te ŋazai ɔɔ te wɔɔ nu wulu.

FAA LAMAA MAA WOLI

4. Ŋaza kɛɛ veaitiɛ—a wõi ga wo ŋazaitiɛ wiɛ te zo ɓɔɔ ga pagɔ

ƲILIOGI: Ŋaza Kɛɛ Veaitiɛ A Wõi Ga Wo Ŋazaitiɛ E Ɣɛ Velei Wo Wõini La Ga Ɓɔɔ (9:​53)

• Pelei taniga ta ga zɛɓɛ zunui ɣa dɛɛ la ga wõila ɣa zeea ŋazai ʋaa ma na ɣa ɣɛɛna kpɛdɛvɛ faa ma?

A Kolasaitiɛ 3:​12 lodo, wo gaa-zaɣa-kɛɛ nii ɣaa wote:

• Ŋaza keea nu ɣa leve ɣɛ le e tuɓo-velei niitiɛ lɛ?

5. Zini-bɛ veaitiɛ​​—a wõi ga wo zinigitiɛ wiɛ wũfe te ma

Gala Kɔlɔi bogɛ ga manɛɛ ŋaza nui wũfe pɔɔ nu ma ani ɓalaa na lɛ ga Jehova ʋeli veaitiɛ te ta. A 1 Pite 3:​1, 2 lodo, wo gaa-zaɣa-kɛɛ niitiɛ ɣaa wote:

• Ani e wɔɔ nu lɛ ga Jehova ʋeli nui ta, gé kwɛ̃ni ɓɔɔ ga e wõini e Jehova ʋeli. Zɛɓɛi ɓɔɔ ya ɓɔ e va, ga yiɛ Gala goi wo ma ɔɔ ga yiɛ luɓo ɓɔɔ ga pagɔ yiɛ wũfe ma? Zɛɓɛi e kɛɛ yiɛ na wo?

Zunui ɓɔga ŋazai ta zoo te deʋe vagɔ wo kii-ma. Na ɓalaa ɣɛɛvɛ, tanisu ŋaza nui lɛ ʋaa niitiɛ ɓɔgapɛ bu pɔɔ nu ɣa deʋe. Ani na ɣa ɣɛɛna towa zoo e yɛpɛ pɔɔ nu wɔ e vile velei va e ɣi-gaa-ziɛzu la, wũfe-ma vele zu. Kɛ manɛɛ e kwɛ̃ɛ ga Jehova gaa-ɓaa ʋeevɛ zunui ya ga e deʋe vagɔ wo kaalai ʋaa ma. Manɛɛ e ɣaa-ɓaa e yee zei deʋei niitiɛ wu pɔɔ nu ɣa bo. Ani towa ɣaa ɓaana e niitiɛ ɓɔgapɛ kɛ kuuzu nɛɛ ɣa ɣɛ kaalai zu. A 1 Pite 3:​3-5 lodo, wo gaa-zaɣa-kɛɛ nii ɣaa wote:

• Jehova ɣa ɣi-gaa-ziɛ ɣɛ le ani ŋaza nui ɣa dɛɛna ga wũfe-ma ɣa zeea pɔɔ nu ʋaa ma?

6. Ya zoo e faa ɓaagitiɛ yee maazu ɣale ya ɣaalai zu

ƲILIOGI: Zɛɓɛi Ya Ɓɔ Ʋulu Veaitiɛ Va Ga Te Ta Ziɛ-Pului Zu-Ɓaa? (5:44)

• Ʋiliogi nii zu, zɛɓɛi e dɛɛ ga ʋulu veai niitiɛ te ɣɛni sa ɣaa-wɛɛ zu?

• Zɛɓɛi te kɛɛni ga te ta ziɛ-pului zu-ɓaa wɔnɔ?

A 1 Kɔlĩitiɛ 10:​24 ɓɔga Kolasaitiɛ 3:​13 lodo. Wa ma maa wũgi lodona wo gaa-zaɣa-kɛɛ nii ɣaa wote. Wa fele kelei lodona wɔnɔ wo gaa-zaɣa-kɛɛ nii ɣaa wote:

• Ani ʋulu vea ta ɣɛna ziɛzu ga tɛnɛgi niitiɛ towa ta ziɛ-pului zu-ɓaa ɣɛ le?

Gala Kɔlɔi bogɛ ga de wũfe ɣiini ma. Da na ɣɛ ani da ɣɛna ɣiini zosu ga pagɔ. A Loomɛitiɛ 12:​10 lodo, wo gaa-zaɣa-kɛɛ niitiɛ ɣaa wote:

• E ɣisu manɛɛ zunui ŋazai maa kpowũ ɔɔ ŋaza nui pɔɔ nu maa kpowũ ga na wõila lɛɛ la ga ma maa wũ? Zɛɓɛi e kɛɛ yiɛ na wo?

NII SA È MAA WOLIA

Zunui ɓɔga ŋazai ta kuuzu nɛɛ maa zɔlɔwo ani wõila ɣa ɣɛna te ya ɣiini faa ma, tiɛ wũfe ɣiini ma na ɣa ɣɛɛna tiɛ ziɛ ga tɛnɛgitiɛ te Gala Kɔlɔi zu.

Ma-ɓigitiɛ

• Zɛɓɛi manɛɛ zunui kɛ ga kuuzu nɛɛ ɣɛ kaalai zu?

• Zɛɓɛi manɛɛ ŋaza nui kɛ ga kuuzu nɛɛ ɣɛ kaalai zu?

• Ani e ʋulu ʋaa ɣɛɛ, tɛnɛ sɛɓɛi e Gala Kɔlɔi zu ya ɓɔ wo va wo wa ziɛ-pului zu-ɓaa wo yɔɔzu?

WƐLƐ FAA LAMAA VA

Wɛlɛ faa taniga va ya ɓɔ wo va ga wo kuuzu nɛɛ maa zɔlɔwo wa ɣaalai zu.

Wa Zoo Wo Kuuzu Nɛɛ Maa Zɔlɔwo Wa Ɣaalai Zu (bolosiɛ)

Wɛlɛ ʋiliogi nii va e dɛɛzu ga kulo su-nu-mai ya maa zɔlɔwo ani ya ɣɛna ziɛzu ga tɛnɛgi niitiɛ Gala ge fea ya ɣaalai zu.

Wõila Ɣa Ɓɔɔ Te Ya Ɣiini Faa Ma (4:26)

Ani Gala Kɔlɔi ɣa bona ga ŋaza nui wolo pɔɔ nu vɛ, wɛlɛ su-wulo zuvɛ va.

“Zɛɓɛi E Kɛɛ Manɛɛ Zini-Bɛ Veaitiɛ Te Wolo Te Zinigitiɛ Vɛ?” (The Watchtower, May 15, 2010)

Zɛɓɛi e ɓɔni ʋulu veai niitiiɛ va ga te faa ɓagitiɛ yee maazu ɣale te ɣɛni levesu su—ta ɣa ga velei te ɣaa wɛɛni la?

Jehova Ɓɔni Ge Va Ge Ga Ʋulu Lai zuɓaa (5:14)