KALABO 2

Yɛpɛ E Ɣɛ Velei Wa Nu Wa Ɣɛ Yɛpɛzu La

2 Kɔlĩitiɛ 2:17

NIITIƐ MAA NƐƐ E KƐ: Yɛpɛ ga velei numaa ta yɛpɛ la. Niitiɛ wo ɓɔɔ e e ɣigii zu ga e dɛ ga velei e ɣi-gaa-ziɛzu la e vile zɛpɛ wũgi va e vɛɛ taitiɛ va e yɛpɛzu te wɔ.

VELEI YA NA ƔƐƐ LA:

Jehova ʋeli na ɣa ɣɛɛna e ɓɔɔ ɣavele ɓɛtɛ. Gala feli ga e ɓɔ e va e mɛlɛ ɣaazu ɓado ɓɔɔ va. Kɛ e ɣaazu ɓado keela woi va e liizu bosu. Faa ɓigii vɛɛ ɣibɛ e zɛpɛi naa zu ga maa nɛɛ e yɛpɛ e vile ba. Yɛpɛ e ɣɛ velei nɔ ya yɛpɛ la; mɛlɛ ɣɛ lɛɛzu nɔ woitiɛ ma te kɔlɔi zu yiɛ te wo.

Ani ya deʋena ga e Gala Kɔlɔi ɔɔ kɔlɔ ɓalaa lodo, ɣaa-ɓaa ga e kɔlɔ-laɣai na wɛ̃ɛ na ɣa ɓɔ e va ga e dodo ga pagɔ. Kɔlɔ-laɣai e dodosu, ani numaa ɣa te yɛpɛzu su, dodo e ɣɛ numai natiɛ ɣa te yɛpɛzu ga è niitiɛ yii zo e yɛpɛzu te wɔ. Kɛ mɛlɛ kɛ sa ga ʋike.
Niitiɛ e bosu maa nɛɛ te wulo e ɣisu. Ɣi-gaa-ziɛ zaɓui ma e kɛɛ maa nɛɛ numaitiɛ te keela woi nii mɛni e vaazu bosu. Ɣaazu ɓado te va. Dɛ ga e ɣaazu wodovɛ na ɣa ɣɛɛna e laavɛ ga niitiɛ e bosu. Ya na ɣɛ ga velei ya lo da ɔɔ ya zei la. Na ɣa ɣɛɛna, ya dɛ wɔnɔ ga velei ya ɣɛ yeetiɛ ɣɛɛzu la ta velei ya ɣɛ ɣaazu ɣavele ɓɛtɛzu la.

Yɛpɛ ga velei nɔ ya yɛpɛ la, kɛ mɛlɛ yɛpɛ e ɣɛ ya ɣɛ ɣaa-wosu. Yɛpɛ ga numaa te zoo te gaa ɣa, na ɣa dɛ ga wũfe-ma ɣa e ya niitiɛ ʋaa ma e bosu.
Yiɛ wɛlɛ niitiɛ va e yɛpɛzu te wɔ. Yiɛ wɛlɛ numaitiɛ va e yɛpɛzu te wɔ ani ɛ lɛ ga faa yowũ ga e na ɣɛ vɛ e na. Ya ɣɛna zɛpɛ ʋeezu mɛlɛ ɣɛ nɔ ɣaazu ziɛzu kaʋile, kɛ yiɛ wɛlɛ numaitiɛ va ga gile-gile.