KALABO 12

Yɛpɛ Wõila Vele Zu

1 Tɛsɛlonaikaitiɛ 2:7, 8

NIITIƐ MAA NƐƐ E KƐ: Taitiɛ e yɛpɛzu te wɔ, ɓɛ te kwɛ̃ɛ ga wõila ɣa e ya te ʋaa ma, na ɣa ɣɛɛna e wõini e ɓɔ te va.

Ɣi-gaa-ziɛ niitiɛ ma e yɛpɛzu te wɔ. Ya ɣɛna ya yɛpɛi ɓɛtɛzu, ɣi-gaa-ziɛ faa ɓaagitiɛ ma numaitiɛ te levesu su. Ɣi-gaa-ziɛ e vile velei va te ɣi-gaa-ziɛzu la.
Ɣi-gaa-ziɛ ɓɔɔ ga pagɔ niitiɛ ma e vaazu bosu. Niitiɛ ya bo, e ɣɛ ga fai ya nu ɣaa nɛkpɛ e nu yii-lɔɔ. Taitiɛ tɛ lɛ laani ga Jehova, mɛlɛ faa yowũ wo e vile te va. Na ɣa ɣɛɛna mɛlɛ faa yowũ wo e vile niitiɛ va te laila.
Dɛ ga e ɓɛdɛvɛ numaa ʋaa ma. Velei ya yɛpɛ la, ta velei ya ɣɛ yeeitiɛ ɣɛɛzu la, maa nɛɛ te dɛ ga e ɓɛdɛvɛ numai natiɛ ʋaa ma. Ya dɛ kɔnɔ ga e ɓɛdɛvɛ numaa ʋaa ma ga velei ya ɣaazu ɓɛtɛ la, yiɛ ŋɛɛ ga tawolo siɛ nɛpɛ ma.

Ani ya ɣɛna zɛpɛ ʋeezu, mɛlɛ e woi maa ʋeli ga ʋike ga e yowũ. Ya ɣɛna kɔlɔ lodosu, velei e dodosu la ta velei e e woi maa ʋelisu la maa nɛɛ e zolowo. Mɛlɛ kɛ ga ʋike ga e kɛ numaa te ɣaazu ɓado e va. Ani ya ɣɛna yɛpɛzu numaa wɔ, woo maa yii, na ɣa kɛ te wõi ga te wuito e woi ma.