Zɛɓɛi E Ga Gala Ta Masadai?

Yii-Ma Ɣɛ Wɔlɔ-Wɔlɔ Ta Wɔlɔ-Wɔlɔ!—Gala Kɔlɔ Maa Woli Ʋai Ɣa Ɓɔ Yiɛ
- KALABO 31
  
  Zɛɓɛi E Ga Gala Ta Masadai?
  Keela woi e Gala Kɔlɔi zu pilegɛ Gala ta Masadai va. Masadai na ɣa e vaazu Jehova yii-mai ɣɛɛzu zui ma. Zɛɓɛi e ga Gala ta Masadai? Da leve ɣɛ le de kwɛ̃ɛ ga Masadai nii ɣa sa deʋe wosu Gala ta? Zɛɓɛi sa Masadai nii kɛɛ? Na ɣa ɣɛɛna zɛɓɛi e vaazu kɛɛzu ŋinaa ŋeteai zu? Da vaazu gaa-zaɣa-kɛɛ niitiɛ ɣaa wotesu kalabogi nii zu e vɛɛ na wulu ɣalabo felegɔitiɛ va.
  
  1. Zɛɓɛi e ga Gala ta Masadai na ɣa ɣɛɛna ɓɛɛ ɣa e ga ma Masagi?
  
  Jehova ɣa e Masadai nii laa kẽesu. Ziizɛ ɣa e ga ma Masagi. Tɔ masadai nii ɣɛɛzu Gala ta. (Mafiyu 4:17; Jɔ̃ 18:36) Gala Kɔlɔi ɣɛ, Ziizɛ “Ná Masadai maʋaa wɛ̃ɛ gɛ lɛ ɣɛɛ ba.” (Luki 1:32, 33) Tei Ziizɛ ɣa e ga Masagi Gala Na Masadai ʋaa ma, na masadai ɣa vaazu ɣɛɛzu nu ɓɔgapɛ maazu zui ma.
  
  2. Ɓɛɛni ka te vaazu vɛɛzu Ziizɛ va te masadai ɣɛ?
  
  Ziizɛ to ɣila laale e vaazu masadai nii ɣɛɛzu. “Numaitiɛ te wuloni zii ɣaazɔ zu ta zii woo-wo bea mazii ɣaazɔ é vɛɛ zuu ɣaazɔ va . . . ta vaazu masada ɣɛɛzu zui zu.” (Faa wuloai kɛnɛ ma 5:9, 10) Nu liide ɣa e vaazu vɛɛzu Ziizɛ va ga te masadai ɣɛ? E ziɣi ɓɔɔ siɛgi ma Ziizɛ vaani la zui nii ma, nu lamaa vilega pulu. Kɛ nu 144,000 nɔɣa te vaazu liizu gee-zuvɛ te vɛɛ Ziizɛ va ga te masadai ɣɛ. (Faa wuloai kɛnɛ ma 14:1-4 lodo.) Kolai Maa Veai zɔitiɛ ta vaazu yɛsu zui ma Masadai na wu.—Psalms 37:29.
  
  3. Gala ta Masadai ʋize wogɛ e leve nu ɓuse wɔmɛtiitiɛ va ɣɛ le?
  
  Ani ɓalaa nu ɓuse wɔmɛtiitiɛ te wõini te faa vagɔ ɣɛ, gaa-ɓaa lɛ te ya ga te niitiɛ ɓɔgapɛ kɛ ta ɣɛ wõini te kɛ. Ani ɣeeta ta te maa ʋelina, taitiɛ ta te lo te woga tanisu tɛ lɛ numaitiɛ zoga ga pagɔ. Kɛ nu nɛpɛ lɛ vaazu losu Ziizɛ woga, nii e ga Masagi Gala ta Masadai ʋaa ma. Gala ge “masada zeiya kẽesu nii su lɛ wɔlɔ-wɔlɔ ŋala-ŋalaga.” (Daniel 2:44) Ziizɛ ɣa vaazu ɣɛɛzu ga masagi zui ɓɔgapɛ maazu na ɣa ɣɛɛna ɛ lɛ vaazu su-yɛvɛ bosu. Wõila ɣa Ziizɛ ya nu ɓuse ʋaa ma. Towa nu zɛ-sɛ bo na ɣa ɣɛɛna tele-bogɛi. Tɔ vaazu numaa ɣalabosu ga tiɛ te vaitiɛ zo ga velei ya kɛɛ la. Na ɣa ga tiɛ wõi ga numaa, tiɛ te zɛ-sɛ bo na ɣa ɣɛɛna tiɛ tele-bo tuo wo.—Isaiah 11:9 lodo.
  FAA LAMAA MAA WOLI
  
  Wɛlɛ zaɓui va e kɛɛ Gala Na Masadai ʋize wogɛi e leve gɔmɛti nɛpɛ ba.
  
  4. Masadai nii e vaazu yɛsu zui maazu kee ɣaa ɓaavɛ
  
  Gaa-ɓaa ɣa Ziizɛ ya ga e nu ɓuse leʋe e leve nu nɛpɛ ba. A Mafiyu 28:18 lodo, wo gaa-zaɣa-kɛɛ nii ɣaa wote:
  
  Ziizɛ na gaa-ɓai levegɛ ɣɛ le nu ɓuse wɔmɛtiitiɛ va?
  
  Ta nu ɓuse wɔmɛtiitiɛ maa ʋeli bo, na ɣa ɣɛɛna tɛ lɛ ɣɛɛ ga masa zui pɛ maazu. E ɣisu vele ɣa Gala Na Masadai la? A Daniel 7:14 lodo, wo gaa-zaɣa-kɛɛ niitiɛ ɣaa wote:
  
  Zɛɓɛi e kɛɛ e ga faa vagɔ ga Gala Na Masadai zu “lɛ wɔlɔ-wɔlɔ ŋala-ŋalaga”?
  
  Zɛɓɛi e kɛɛ e ga faa vagɔ ga Masadai nii ɣa vaazu yɛsu zui ɓɔgapɛ maazu?
  
  5. Manɛɛ nu ɓuse wɔmɛtii maa ʋeli
  
  Zɛɓɛi e kɛɛ manɛɛ Gala Na Masadai lo nu ɓuse wɔmɛtiitiɛ woga? ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.
  
  ƲILIOGI: Zɛɓɛi É Ga Gala Na Masadai?—Ʋilio Kpuogi (1:41)
  
  Faa yowũ zɛɓɛi nu ɓuse wɔmɛtiitiɛ te kɛɛ?
  
  A Ecclesiastes 8:9 lodo, wo gaa-zaɣa-kɛɛ niitiɛ ɣaa wote:
  
  E ɣisu manɛɛ Gala Na Masadai lo nu ɓuse wɔmɛtiitiɛ woga? Zɛɓɛi e kɛɛ yiɛ na wo?
  
  6. Taitiɛ te vɛɛzu Ziizɛ va ga te masadai ɣɛ te kwɛ̃ni nii de leʋesu su
  
  Tei da Masagi Ziizɛ ŋetea ɣɛɛni zui nii ma, towa “de maa wõi zo da zobo-bala-bɛ ʋai zu.” (Hiiɓuluitiɛ 4:15) Jehova yee ɓadoga nu 144,000 va, te ‘wuloai zii ɣaazɔ zu ta zii woo-wo bea mazii ɣaazɔ é vɛɛ zuu ɣaazɔ va’ ga te vɛɛ Ziizɛ va ga te masadai ɣɛ.—Faa wuloai kɛnɛ ma 5:9.
  
  Ziizɛ ɓɔga niitiɛ te vaazu vɛɛzu ba ga te masadai ɣɛ, te kwɛ̃ni nii de levesu su. E ɣisu nii ɣa e ɣaa-nɛkpɛ? Zɛɓɛi e kɛɛ yiɛ na wo?
  
  Jehova yee ɓadoga numaa va te wuloa zuu ɣaazɔ zu ga te vɛɛ Ziizɛ va te masadai ɣɛ
  
  7. Gala Na Masadai ma lɔgitiɛ ʋize wogɛ e leve nu ɓuse wɔmɛtiitiɛ va
  
  Nu ɓuse wɔmɛtiitiɛ ta tɔ da ga e ɓɔ ta numaitiɛ va na ɣa ɣɛɛna e te maazu vɛtɛ. Gala Na Masadai ɓalaa ɣa tɔ da ga na numaa te ziɛ la. A 1 Kɔlĩitiɛ 6:9-11 lodo, wo gaa-zaɣa-kɛɛ niitiɛ ɣaa wote:
  
  E ɣisu zui ɣa ɣɛ ɓɔɔ ɣɛ le ani nu pɛ ka ziɛna ga Gala na tɔgitiɛ?a
  
  E ɣisu Jehova ɣa manɛɛ e tɔ da ga taitiɛ te vaazu yɛsu na Masadai wu ga te ziɛ la? Zɛɓɛi e kɛɛ yiɛ na wo?
  
  Zɛɓɛi e dɛɛzu ga taitiɛ tɛ lɛ ziɛzu ga tɔgi niitiɛ tanisu ta luɓo-velei maa ʋeli bo?—Wɛlɛ ma woo 11 va.
  
  Gɔmɛtiitiɛ ta tɔ da ga e ɓɔ ta numaitiɛ va, na ɣa ɣɛɛna e te maazu vɛtɛ. Gala Na Masadai ma lɔgitiɛ te ʋize wogɛ, towa ɓɔ na numaitiɛ va e te maazu vɛtɛ
  
  NUMAA TANIGA TE ƔƐ: “Zɛɓɛi e ga Gala Na Masadai?”
  
  Ya gaa-zaɣa-kɛɛ na ɣaa wote ɣɛ le?
  NII SA È MAA WOLIA
  
  Gala Na Masadai ɣa ga gɔmɛti ɓɔɔɓɔɔ e gee-zuvɛ, tɔ vaazu yɛsu zui ɓɔgapɛ maazu.
  
  Ma-ɓigitiɛ
  
  Ɓɛɛni ka te masadai nii leʋezu?
  
  Gala Na Masadai ʋize wogɛ e leve nu ɓuse wɔmɛtiitiɛ va ɣɛ le?
  
  Taitiɛ te vaazu yɛsu Gala na masadai wu, zɛɓɛi ɓɔɔ Jehova wõini te kɛ?
  
  Kalabogi laa wuloa foloi nii ma:
  
  Ɣaa-ɓaa e nii ɣɛ
  Faa maa woli e vile Ziizɛ na masadai va Isaiah 11:1-10 zu. Na ɣa ɣɛɛna e wɛlɛ velei va fize wogɛi la nu ɓuse wɔmɛtiitiɛ va.
  
  Zɔitiɛ e wõini e kɛ ponɛ vɛ:
  Your other goal
  
  WƐLƐ FAA LAMAA VA
  
  Wɛlɛ nii va Ziizɛ boni e vile vɛ va Gala Na Masadai na.
  
  “E ɣisu Gala Na Masadai ɣa E Ɣigii zu?” (Kɔlɔi nii ɣa fãga wɔlɔi ma)
  
  Zɛɓɛi e kɛɛ Gala Na Masadai nɔɣa Jehova Na Seeleitiɛ ta lo pulu kpã?
  
  Te Logɛ Gala Na Masadai Ʋaa Ma (1:43)
  
  Wɛlɛ nii va Gala Kɔlɔi boga e vile niitiɛ va Gala yee ɓadoga te va ga te vɛɛ Ziizɛ va ga te masadai ɣɛ, na ɣa ga 144,000.
  
  “Ɓɛɛni Ka Te Liizu Gala Ta?” (Kɔlɔi nii ɣa fãga wɔlɔi ma)
  
  Zɛɓɛi e ɓɔni ŋaza nui nii va e kwɛ̃ɛ ga Gala Na Masadai nɔɣa ya zui nii maa ʋile ga ma vagɔ?
  
  “Ge Kwɛ̃ni Sa Nii E Kɛɛ Tele-Bo-Tala Luo Yɛ Wo” (Awake!, November 2011)
  a Da vaazu yɛpɛzu e vile tɔgi nii taniga va Ma Zɛvɛ 3 zu.

Gala Na Masadai Ɣa Tii Ɣɛɛzu Gala Ta!

Yii-Ma Ɣɛ Wɔlɔ-Wɔlɔ Ta Wɔlɔ-Wɔlɔ!—Gala Kɔlɔ Maa Woli Ʋai Ɣa Ɓɔ Yiɛ
- KALABO 32
  
  Gala Na Masadai Ɣa Sa Deʋe Wosu Gala Ta!
  Gala Na Masadai tɔɔ-zeini ga yɛ deʋe wo Gala ta kwenagi 1914 zu. Siɛgi na zu ɣa ŋeteai ɣaa ɓela foloi lɔɔ-zeini la. De levega ɣɛ le de na wɛ̃ɛ? Da vaazu wɛlɛzu niitiɛ va Gala Kɔlɔi boni e vɛɛ velei va numaa te vɛɛ luɓozu la e ziɣi kwenagi nii ma 1914.
  
  1. Niitiɛ Gala Kɔlɔi boni zɛɓɛi te dɛɛzu?
  
  Nii Daniel na kɔlɔi boga, e dɛɛvɛ ga Gala Na Masadai ɔ tɔɔ-zei ga yɛ deʋe wo siɛgi nii laa wulo zuvɛ Gala Kɔlɔi ɣa tili ga “siɛ lɔfelai.” (Daniel 4:16, 17) Tei kwena tamaa leveni, Ziizɛ yɛpɛni e vile siɛgi nii va yiɛ tili ga “zii ɓalaagitiɛ tɛ dɔ wui.” E boni wɔnɔ ga siɛgi na lɛ dɛ ɓeani. (Luki 21:24) Da vaazu maa wolizu ga siɛ lɔfelai laa wuloni kwenagi 1914 zu.
  
  2. Numaa te vɛɛ luɓozu ɣɛ le e ziɣi kwenagi 1914 ma?
  
  Ziizɛ na kala dopoitiɛ te gaa-zaɣa kɛɛni: “Ʋolo ɓɛɛ ɣa fai nii ɣa ɣɛɛ la? Na ɣa ɣɛɛna zɛɓɛ ɣa a ɣɛ é è vaa ʋai lɛ ga seele é vɛɛ ŋetea ɣaa ɓela fai va?” (Mafiyu 24:3) Ziizɛ gaa woteni yiɛ boga faa lamaa ɣa vaazu ɣɛɛzu siɛgi ma ɔ tɔɔ-zei la ga yiɛ Deʋe wo Gala ta Masadai ʋaa ma. Fai nii taniga ta ga kɔɔ wɔɔ ʋaa, daa-mii ŋɛni ʋaa ɔ ɓaa na ɣa ɣɛɛna zui ɔ ɓeli yiɛ wusu ŋada taniga. (Mafiyu 24:7 lodo.) Gala Kɔlɔi boni wɔnɔ ga velei nu lamaa tɔ luɓo la “ŋetea ɣaa ɓelagi zu”, ɔ kɛ “ŋeteai ɓaa.” (2 Temete 3:1-5 NWT) Fai niitiɛ te ʋɛɛ ɣɛɛzu, na ɣa ɣɛɛna numaa te vɛɛ luɓozu ɣana e ziɣi kwenagi 1914 ma.
  
  3. Zɛɓɛi e kɛɛ faitiɛ te vɛɛ ɓaazu e ziɣi siɛgi ma Gala ta Masadai tɔɔ-zeini la ga yiɛ deʋe wo Gala ta?
  
  Jehova Ziizɛ ɣɛɛni ga Masa Gala ta Masadai ʋaa ma. Tei na ɣɛɛni su lɛ ɣɛni lebini ta Seeta e vɛɛ ŋinɛ yowũitiɛ va te kɔɔ wɔɔni Gala ta. Ziizɛ Seeta yee maazu ɣaleni. Gala Kɔlɔi ɣɛ “te pílini zui zu. Ná keelaitiɛ te vɛɛni bá te te vili.” (Faa wuloai kɛnɛ ma 12:9, 10,12) Seeta yii ɣaa-wãlavɛ ɓɔɔ ga ʋike ɓɔvɛlaale e kwɛ̃ni ga su lɛ vaa lebisu ga te su ŋala-ŋala. Na ɣa e kɛɛ e vaazu ga taɓa e ʋɛɛ daa-nɔwɔ-wo tamaa va zui zu. Nii ɣa e kɛɛ ŋeteai ɓai zaa. Gala Na Masadai ɣa vaazu daa-nɔwɔ-wogi niitiɛ ɓɔgapɛ kpeazu.
  FAA LAMAA MAA WOLI
  
  Wɛlɛ velei va da kwɛ̃ɛ la ga Gala Na Masadai tɔɔ-zeini ga yiɛ deʋe wo kwenagi 1914 zu. Kwɛ̃ɛ wɔnɔ velei na ɣa faa vɛɛ la da ɣi-gaa-ziɛi va.
  
  4. Niitiɛ Gala Kɔlɔi boga e dɛɛvɛ ga Gala Na Masadai tɔɔ-zeini ga yiɛ deʋe wo 1914
  
  ƲILIOGI nii lɛ ga.
  
  ƲILIOGI: Gala Na Masadai Tɔɔ-Zeini Ga Yiɛ Deʋe Wo 1914 (5:02)
  
  Gala kɛɛni Babelɔ̃ Masagi Nɛɓukinaza zeni e vile nii va e ɣɛni vaazu ɣɛɛzu naa luoi zu. Nii Dayã boni e vile segi na va, tɔ dɛɛzu ga pilegɛ Nɛɓukinaza na masadai ɓɔga Gala ta Masadai va.—Daniel 4:17 lodo.a
  
  A Daniel 4:20-26 lodo, wo gaa-zaɣa-kɛɛ niitiɛ ɣaa wote te kologi zu:
  
  (A) Zɛɓɛi Nɛɓukinaza pɛtɛni segi zu?—Wɛlɛ ma woo 20 ta 21 va.
  
  (B) Zɛɓɛi ɔ ɣɛ ga gului?—Wɛlɛ ma woo 23 va.
  
  (C) Zɛɓɛi ɔ ɣɛ “siɛ lɔfelai” laa wulo zuvɛ?—Wɛlɛ ma woo 26 va.
  
  Gului Mazegi Vilegɛi Ɣɛ Le Gala Na Masadai Va?
  
  NII GALA KƆLƆI BONI (Daniel 4:20-36)
  
  Masadai
  
  (A) Gulu walai
  
  Masadai wuloni zeea
  
  (B) “Gului wɔ,” na ɣa ɣɛɛna ɓe ba ‘siɛ lɔfela leve’
  
  Masadai maa zɔlɔ woga wɔnɔ
  
  (C) “Ya vaazu ya masadai maa zɔlɔ wosu wɔnɔ”
  
  Velei segi nii ɣɛɛni la ga ma maa wũ . . .
  
  (D) Gului zu-wulo-zu ɣa ga zɛɓɛ?—Wɛlɛ ma woo 22 va.
  
  (E) E valani ɣɛ le na masadai ma?—Daniel 4:29-33 lodo.
  
  (F) Zɛɓɛi e ɣɛɛni ga Nɛɓukinaza “siɛ lɔfelai” laa wulo zuvɛ?—Daniel 4:34-36 lodo.
  
  VELEI E ƔƐƐNI LA GA MAA WŨ
  
  Masadai
  
  (D) Nɛɓukinaza, Babelɔ̃ Masagi
  
  Masadai wuloni zeea
  
  (E) Tei kwenagi 606 B.C.E leveni., Nɛɓukinaza ɓolowani e ʋala na masadai ma e yɛsu kwena dɔfela leve
  
  Masadai maa zɔlɔ woga wɔnɔ
  
  (F) Nɛɓukinaza na wũgi zu laani wɔnɔ e na masadai maa zɔlɔwo
  
  Velei segi nii ɣɛɛni la fele kelei zu . . .
  
  (G) Gului zu-wulo-zu ɣa ga zɛɓɛ?—1 Chronicles 29:23 lodo.
  
  (H) Te valani ɣɛ le masadai ma? Da leve ɣɛ le de kwɛ̃ɛ ga siɛgi ma Ziizɛ ɣɛni zui ma, masadai na lɛ ɣɛni dɛ te ya?—Luki 21:24 lodo.
  
  (I) Siɛ sɛɓɛi te masadai nii maa zɔlɔwoni la wulu? Minɛɛ ɣa te maa zɔlɔwoni na?
  
  VELEI E ƔƐƐNI LA WƆNƆ
  
  Masadai
  
  (G) Yezɔi masagi niitiɛ te logɛi e ɣɛni Gala Na Masadai woga
  
  Masadai wuloni zeea
  
  (H) Yɛlusulɛɛ zu ŋala-ŋalaga, e kɛ Yezɔi masagitiɛ te vala masadai ma kwena 2,520 wuuzu
  
  Masadai maa zɔlɔ woga wɔnɔ
  
  (I) Ziizɛ tɔɔ-zeini ga yiɛ deʋe wo Gala ta
  
  Kwena liide ɣa e siɛ lɔfelai zu?
  
  Gala goi taniga ta ɓɔ de va de Gala goi zɔitiɛ ɣaa ɣa. Ma wo-kɔ̃ɔ-mai ta ɣa ga, Faa Wuloai Kɛnɛ Ma wɔlɔi bogɛ ga siɛ saagɔ ta tikpe liigoi ɣa ga folo 1,260. (Faa wuloai kɛnɛ ma 12:6, 14) Siɛ lɔfelai liigoi ɣa ga folo 2,520. Gala Kɔlɔi ɣa yɛpɛna e vile folo va ŋada taniga, zu-wulo-zu ɣa ɣɛ ga kwena. (Ezekiel 4:6) Niitiɛ Dayã na kɔlɔi boga e vile siɛ lɔfelai va Gala Kɔlɔi zu, vele ɣa na nɔ e la—su-wulo-zu ɣa ga kwena 2,520.
  5. Ŋeteai maa ʋeli ga e ziɣi kwenagi 1914 ma
  
  ƲILIOGI nii lɛ ga.
  
  ƲILIOGI: Ŋeteai Maa Ʋeli Ga E Ziɣi Kwenagi 1914 Ma (1:10)
  
  Ziizɛ yɛpɛni e vile fai niitiɛ va tɔ ɣɛ siɛgi ma ɔ ɣɛ la ga Masa. A Luki 21:9-11 lodo, wo gaa-zaɣa-kɛɛ nii ɣaa wote:
  
  Niitiɛ Ziizɛ boni, ma zɛɓɛ ɣa e pɛtɛga ɔɔ e faa mɛniga e vile ba?
  
  Pɔɔ yɛpɛni e vile velei numaa tɔ luɓo la ŋetea ɣa ɓelagi zu. A 2 Temete 3:1-5 lodo, wo gaa-zaɣa-kɛɛ nii ɣaa wote:
  
  Tuɓo-velei niitiɛ e yɛpɛni e vile te va, ma zɛɓɛ ɣa e pɛtɛsu numaa ya zaa?
  
  6. Manɛɛ de wuuzu nɛɛ Gala Na Masadai ʋaa ma
  
  A Mafiyu 24:3, 14 lodo, wo gaa-zaɣa-kɛɛ niitiɛ ɣaa wote:
  
  Tii zɛɓɛi e ɣɛɛzu e dɛɛzu ga Gala ta Masadai ɣa sa deʋe wosu?
  
  Ya leve ɣɛ le e tii nii ta ɣɛ?
  
  Gala Na Masadai ɣa sa deʋe wosu. Su lɛ sa woozani ga e ɣɛ zui maazu. A Hiiɓuluitiɛ 10:24, 25 lodo, wo gaa-zaɣa-kɛɛ nii ɣa wote:
  
  Zɛɓɛi manɛɛ de ɓɔgapɛ de kɛ tei diɛ “wɛlɛ ŋetea ɣaa ɓela foloi va yɛ lɔtɔ”?
  
  Ani ya faa ta maa wolina e kwɛ̃ni ga towa ɓɔ numaa va te zɛʋu zɔlɔwo, zɛɓɛi ya kɛ?
  
  NUMAA TANIGA TE ƔƐ: “Zɛɓɛi e kɛɛ Jehova Na Seeleitiɛ ta boga Ziizɛ ɣɛɛni ga masa kwenagi 1914?”
  
  Ya gaa-zaɣa-kɛɛ nii ɣaa wote ɣɛ le?
  NII SA È MAA WOLIA
  
  Niitiɛ Gala Kɔlɔi boga, ta velei e boga la e vɛɛ fai niitiɛ va te ɣɛɛzu zui zu te dɛɛvɛ ga Gala ta Masadai ɣa sa deʋe wosu Gala ta. Ani da ɣɛna liizu gaalɛ-bai zu, diɛ Gala goo wo numaa ma da dɛ ga de laavɛ ga fai niitiɛ.
  
  Ma-ɓigitiɛ
  
  Zɛɓɛi e ɣɛɛni siɛgi ma folo lɔfelai woloni la e ɣɛ velei Dayã na kɔlɔi boga la?
  
  Zɛɓɛi e kɛɛ e laila ga Gala Na Masadai tɔɔ-zeini ga yɛ deʋe wo 1914?
  
  Ya leve ɣɛ le e dɛ ga e laavɛ la ga Masadai nii ɣa sa deʋe wosu Gala ta?
  
  Kalabogi laa wuloa foloi nii ma:
  
  Ɣaa-ɓaa e nii ɣɛ
  Ɣaa-ɓaa e ɣɛ ga Gala goo wo nui ta.
  
  Zɔitiɛ e wõini e kɛ ponɛ vɛ:
  Your other goal
  
  WƐLƐ FAA LAMAA VA
  
  Wɛlɛ nii va numaa te boga e vile faitiɛ va maa ʋeliga zui zu e ziɣi 1914 ma.
  
  “Nu Ɓuse Luɓo-Velei Maa Ʋeli Boga Ga Yowũa” (Awake!, April 2007)
  
  Nii Gala Kɔlɔi boga Mafiyu 24:14 zu, wɛlɛ velei e ɓɔni la zunu gila ba.
  
  “Ge Ɣɛni Wõini Ɓɔɔ Ga Bɔɔ Lowa Ʋai E Leve Faa Ta Nɛpɛ Ba!” (The Watchtower No. 3 2017)
  
  Da leve ɣɛ le de kwɛ̃ɛ ga nii Gala Kɔlɔi boga Daniel toso 4 zu pilegɛ Gala ta Masadai va?
  
  “Siɛ Sɛɓɛi Gala Ta Masadai Tɔɔ-Zeini La Ga Yiɛ Deʋe Wo? (Ma maa wũgi)” (The Watchtower, October 1, 2014)
  
  Zɛɓɛi e dɛɛzu ga “siɛ lɔfelai” Gala Kɔlɔi yɛpɛi e vile ba Daniel toso 4 zu daa wuloni kwenagi 1914 zu?
  
  “Siɛ Sɛɓɛi Gala Ta Masadai Tɔɔ-Zeini La Ga Yiɛ Deʋe Wo? (Fele kelei)” (The Watchtower, November 1, 2014)
  a Wɛlɛ kɔlɔ zɛvɛ felegɔitiɛ va te kologi zu daa ga Wɛlɛ faa lamaa va kalabogi nii zu.

Zɛɓɛi Gala Ta Masadai Vaazu Kɛɛzu

Yii-Ma Ɣɛ Wɔlɔ-Wɔlɔ Ta Wɔlɔ-Wɔlɔ!—Gala Kɔlɔ Maa Woli Ʋai Ɣa Ɓɔ Yiɛ

KALABO 33

Zɛɓɛi Gala Ta Masadai Vaazu Kɛɛzu?

Gala ta Masadai ɣa sa deʋe wosu. Su lɛ sa lebisu ga e faa taniga maa ʋeli bo zui ma. De wɛlɛ faa vapagi taniga va masadai nii vaazu kɛɛzu.

1. Gala ta Masadai ɣa vaa vaazu ga zii-la ɓɔga tele-bo tuoi zui ma ɣɛ le?

Ziizɛ ɣa e ga Gala ta Masadai ma Masagi. Tɔ vaazu faa yowũ ɣɛɛ veaitiɛ ɓɔga gɔmɛtiitiɛ zu ŋala-ŋalasu Amagɛdɔ̃ wɔɔi zu. (Faa wuloai kɛnɛ ma 16:14, 16) Siɛgi na ɣa ziitina, nii Gala Kɔlɔi boga tɔ vaazu ɣɛɛzu: “Na tawolo nɔ ve sa, faa yowũ ɣɛɛ veaitiɛ tɛ lɛ ɣɛɛ sa na.” (Psalms 37:10) Masadai na zaala zu, Ziizɛ ɣa vaa vaazu ga zii-la, ɓɔga tele-bo tuo zui wɔlɔ-kɔlɔ ma.—Isaiah 11:4 lodo.

2. Ŋeteai ɣa vaazu ɣɛɛzu ɣɛ le ani Gala yii-mai ɣa ɣɛɛna zui ma?

Gala ta Masadai wu, “tele-bo tuo veaitiɛ ka te vaazu zui maa zɔlɔwo su, tɔwɔ ta yɛ ma wɔlɔ-wɔlɔ ta wɔlɔ-wɔlɔ.” (Psalms 37:29) Ɣi-gaa-ziɛ e zui nii zu tele-bo tuo vea letele ɣa nɔ te na, wõila te ya Jehova ʋaa ma e vɛɛ te veaitiɛ va! Nu nɛpɛ lɛ vaazu sa zeeɓɛzu na ɣa ɣɛɛna te pɛ ta ɣɛ ŋetea wɔlɔ-wɔlɔ ta wɔlɔ-wɔlɔ.

3. Zɛɓɛi Gala ta masadai vaazu kɛɛzu, ani ta faa yowũ ɣɛɛ veaitiɛ zu ŋala-ŋalana?

Ta faa yowũ ɣɛɛ veaitiɛ zu ŋala-ŋalana, Ziizɛ ɣa vaazu ɣɛɛzu ga masa zui maazu kwena 1,000 faa ma. Nu 144,000 ɣa e vaazu vɛɛzu Ziizɛ va ga te masadai ɣɛ. Siɛgi na ma, ta vaazu ɓɔsu nu ɓuse va ga te ɣɛ ga tele-bo bea. Kwena 1,000 laa wulo zuvɛ, zui ɣa vaazu ɣɛɛzu ga ŋada vagɔ. Taitiɛ te vaazu yɛsu zui ma ta vaazu ziɛzu ga Jehova na tɔgi. Na ɣa ɣɛɛna kuuzu nɛɛ ɣa ɣɛ te ya. Ziizɛ ɣa sa ya masadai leve wulu keea Jehova wɔ. “Ɓaa ɣa la” sa Jehova na daa-zeigi ma. (Mafiyu 6:9, 10) Tɔ vaazu dɛɛzu ga Jehova ɣa ga Masa pagɔ, nii kpɛdɛɛ na numaitiɛ ʋaa ma. Jehova ɣa sa ya Seeta, ɓɔga ŋinɛ yowũitiɛ zu ŋala-ŋala e vɛɛ niitiɛ va tɛ lɛ wõini tɔ yee zei Na masadai wu. (Faa wuloai kɛnɛ ma 20:7-10) Ŋetea vagɔi nii Gala ta Masadai vaa vaazu la, tɔ vaazu yɛsu na wɔlɔ-wɔlɔ ta wɔlɔ-wɔlɔ.

FAA LAMAA MAA WOLI

Wɛlɛ nii va e kɛɛ da laala ga Gala Na Masadai ɣa e vaazu niitiɛ ɓɔgapɛ kɛɛzu Gala Kɔlɔi boga.

4. Gala Na Masadai ɣa e vaazu nu ɓuse wɔmɛtiitiɛ zu ŋala-ŋalasu

“Nu ɓuse vɛɛ te veaitiɛ leʋezu ga yowũa.” (Ecclesiastes 8:9) Gala ta Masadai ɣa e vaazu tele-bo-tala luoitiɛ ɓɔgapɛ kpeazu.

A Daniel 2:44; ɓɔga 2 Tɛsɛlonaikaitiɛ 1:6-8 lodo, wo gaa-zaɣa-kɛɛ niitiɛ ɣaa wote:

Zɛɓɛi Jehova ɓɔga Ziizɛ te vaazu kɛɛzu ga nu ɓuse wɔmɛtiitiɛ e vɛɛ niitiɛ va te te wulu?
Nii e maa wolia e vile Jehova ɓɔga Ziizɛ va, towa ɓɔ e va ɣɛ le e kwɛ̃ɛ ga nii te vaazu kɛɛzu tɔ vaazu yɛsu ga faa vagɔ?

5. Ziizɛ ɣa ga Masa pagɔ

Ziizɛ nii e ga Gala ta Masadai ma Masagi tɔ vaazu ga kulo su-nu-ma na numaitiɛ ʋaa ma. ƲILIOGI nii lɛ ga, wo wɛlɛ velei Ziizɛ dɛɛ la ga e wõini e ɓɔ nu ɓuse va na ɣa ɣɛɛna Gala gaa-ɓaa ʋea zeea ga e kɛ.

ƲILIOGI: Ziizɛ Nii Lɛɛni Gala Ta Masadai Vaazu Kɛɛzu (1:13)

Niitiɛ Ziizɛ kɛɛni siɛgi e ɣɛni zui ma, e ɣɛni dɛɛzu ga nii Gala ta Masadai vaazu kɛɛzu. Kulo su-nu-mai niitiɛ yɔɔzu, ma zɛɓɛ ɣa ɓɔɔ e wõini e pɛtɛ? Gala goi niitiɛ lodo e yɛpɛzu e vile kulo su-nu-mai niitiɛ va.

SIƐGI MA ZIIZƐ ƔƐNI ZUI MA . . .	TEI ZIIZƐ GALA TA TƆ VAAZU . . .
e fãgai ɣa yiini.—Maki 4:36-41.	zui nii ɣɛɛzu ga ma vagɔ.—Isaiah 35:1, 2.
e nu lamaa wɔ̃nɔ kuloni.—Mafiyu 14:17-21.	daa-mii ŋɛnii lamasu zui nii ma.—Psalm 72:16.
e seeɓɛ vea lamaa valoni.—Luki 18:35-43.	kɔlɔ-su-wodo ʋeezu nu ɓɔgapɛ zeea.—Isaiah 33:24.
e saa vea wu-ziɣini saa ya.—Luki 8:49-55.	saa vea wu-ziɣizu saa ya.—Faa wuloai kɛnɛ ma 21:3, 4.

6. Gala ta Masadai ɣa vaa vaazu ga ŋetea vagɔ

Masadai nii ɣa vaazu Jehova yii-mai ɣɛɛzu e vile nu ɓuse va. Ta yɛ ŋetea wɔlɔ-wɔlɔ ta wɔlɔ-wɔlɔ zuu vagɔi ma. ƲILIOGI nii lɛ ga, wo wɛlɛ velei va Jehova zii-mai ɣɛɛzu la Dui Ziizɛ zaala zu.

ƲILIOGI: Velei Zuu Vagɔi Vaazu Yɛsu La (4:38)

A Psalms 145:16 lodo, wo gaa-zaɣa-kɛɛ nii ɣaa wote:

Ya ɣi-gaa-ziɛ ɣɛ le ani ya kwɛ̃ɛna ga Jehova ɣa vaazu “yee laa laosu ga e ʋulu ŋɛnii ɓɔgapɛ zii-la”?

NUMAA TANIGA TE ƔƐ: “Ani de ɓɔgapɛ da yee vili na kiizu, da zoo de daa-nɔwɔ-wogi ɓea zui zu.”

Zɛɓɛi Gala Na Masadai vaazu kɛɛzu nu ɓuse wɔmɛtiitiɛ tɛ lɛ zooga tɔ kɛ?

NII SA È MAA WOLIA

Gala Na Masadai ɣa vaazu Jehova yii-mai ɣɛɛzu. Tɔ vaazu zui ɣɛɛzu ga ma vagɔ. Taitiɛ te vaazu yɛsu zuu vagɔi zu, ta vaazu yɛsu ga tele-bo bea wɔlɔ-wɔlɔ ta wɔlɔ-wɔlɔ.