KALABO 57
Zɛɓɛi Manɛɛ E Kɛ Ani Ya Faa Yowũ Ɣɛɛna Jehova Ɣaazu?
Velei ɓalaa yiɛ ɣaa-ɓaa la ga e Jehova yii-mai ɣɛ na ɣa ɣɛɛ na wõila e ya faa ma, tanisu ya faa yowũ ɣɛ. Kɛ faa yowũitiɛ ɓɔgapɛ taale te ga tii. (1 Kɔlĩitiɛ 6:9, 10) Ani ya fai ta ɣɛɛna ɓɔɔ e ga faa yowũ Jehova ɣaazu, kwɛ̃ɛga wõila ɣa dɛ zeea e ʋaa ma na ɣa ɣɛɛna e wõini e e zu-ʋaa-yɛ e ɓɔ e va.
1. Zɛɓɛi manɛɛ de kɛ ga Jehova de zu-ʋaa-yɛ?
Taitiɛ wõila te ya Jehova ʋaa ma te yii ɣa zuuli ani ta kwɛ̃ɛna ga te faa yowũ ɣɛɛ ɓɔɔ gaazu. Ta gaa-nɛkpɛ sɔlɔwo nii zu Jehova boni na numaitiɛ ma: “Velei ɓalaa wa ʋaa yowũitiɛ te wuloai la e ɣɛ ti-ɣi, ta vaazu welezu e ɣɛ dɛɣɛ.” (Isaiah 1:18) Da wulu ɣaa ʋena ɓɔɔ da ʋaa yowũitiɛ va Jehova ɣa de zu-ʋaa-yɛ. Da wulu ɣaa ʋe da ʋaa yowũitiɛ va ɣɛ le? Da nii ɣɛ ani de yii ɣa ɣɛna zuulizu e vile faa yowũi niitiɛ va de kɛɛzu na ɣa ɣɛɛna de ɓe faa yowũi na va. De Jehova ʋeli ga e de zu-ʋaa-yɛ na ɣa ɣɛɛna niitiɛ te kɛɛzu diɛ faa yowũi na ɣɛ de yee wulo su de luɓo-velei maa ʋeli. De ɣaa-ɓaa ɓɔɔ ga de ziɛ ga niitiɛ Jehova ɓoga.—Isaiah 55:6, 7 lodo.
2. Ani da faa yowũ ɣɛɛna Jehova ɣa ɓɔ de va ɣɛ le kuuwu wũ-tuo veaitiɛ zaala zu?
Ani da faa yowũ ɣɛɛna Jehova ɣɛ de ‘bo kuuwu wũ-tuo veaitiɛ ma.’ (Jĩi 5:14, 15 lodo.) Wõila ɣa ɓɔɔ kuuwu wũ-tuo veai niitiɛ ya Jehova ʋaa ma e vɛɛ na numaitiɛ va. Te ɣavele ɓɛtɛvɛ ɓɔɔ ga te ɓɔ de va de da ziɛ-pului zu-ɓaa de yɔɔzu da Jehova.—Galeesiaitiɛ 6:1.
Kuuwu wũ-tuo veaitiɛ ta ɓɔ de va ɣɛ le ani da faa yowũ ɣɛɛna? Ta tɛnɛ fe de ya te ɓɔ de va de kwɛ̃ɛ nii manɛɛ de kɛ ga de mɛlɛ faa yowũi na ɣɛ wɔnɔ. Ga te kuuwui maazu vɛtɛ tanisu kuuwu wũ-tuo veaitiɛ ta numaa taniga wulo kuuwui va ani ta faa yowũ ɣɛɛna tɔwɔ tɛ lɛ wõini tɔ wulu ɣaa ʋe ta ʋaa yowũi va.
FAA LAMAA MAA WOLI
Faa lamaa maa woli e vile velei va Jehova ɣa ɓɔ la de va ani da faa yowũ ɣɛɛna, ta velei da dɛɛ la ga de wuuzu nɛɛvɛ kpɔbai nii ʋaa ma.
3. Da laa wu-ziɣina da ʋaa yowũitiɛ ma de bo, da kpɔba maa zɔlɔwo
Faa yowũi nɛpɛ da kɛ towa Jehova yii-zuuli, na ma manɛɛ de laa wu-ziɣi daa ʋaa yowũitiɛ ma de bo ma. A Psalms 32:1-5 lodo, wo gaa-zaɣa-kɛɛ nii ɣaa wote:
Zɛɓɛi e kɛɛ manɛɛ de da ʋaa yowũitiɛ wo Jehova ma de mɛlɛ te loowũ?
Faa yowũitiɛ da kɛ ani da bona Jehova ma manɛɛ wɔnɔ de bo kuuwu wũ-tuo veaitiɛ ma ga te zoo te ɓɔ de va. ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.
Ʋiliogi nii zu, kuuwu wũ-tuo veaitiɛ te ɓɔni ɣɛ le Kanɔ va ga e va wulu Jehova wɔ?
Manɛɛ diɛ gaamai wo kuuwu wũ-tuo veaitiɛ ma, ta na ga te ɓɔ de va. A Jĩi 5:16 lodo, wo gaa-zaɣa-kɛɛ nii ɣaa wote:
Da gaamai wona kuuwu wũ-tuo veaitiɛ ma zɛɓɛi e kɛɛ na lɛ ɓaa ga te ɓɔ de va?
Ya ʋaa yowũitiɛ wo, gaamai wo kuuwu wũ-tuo veaitiɛ ma na ɣa ɣɛɛna e yee zei Jehova na kpɔɓai wu
4. Jehova ɣa faa yowũ ɣɛɛ veaitɛ ɣaazu maa-wõi zo?
Ani nui ta ɣa faa yowũ ɣɛɛna, tɔwɔ ɛ lɛ wõini ɔ ziɛ ga Jehova na tɔgitiɛ ta manui wulo kuuwui va na ɣa ɣɛɛna dɛ lɛ ɣɛɛ ga na siɛ-pulu. A 1 Kɔlĩitiɛ 5:6, 11 lodo, wo gaa-zaɣa-kɛɛ nii ɣaa wote:
Kpoolo-ʋɔɔ ɓokolo ŋɛnii maɓuo wolo ɣa kɛ kpɔɔlɔ-ʋɔɔ ɓumɛ walai ɓoda kɔlɔ-kɔlɔ ma ɣaali. Ani da niitiɛ ɣɛɛna ga da ziɛ-pulu tɛ lɛ wõini tɔ wulu ɣaa ʋe ta ʋaa yowũi va towa faa vɛɛ ɣɛ le kuuwui va?
Kuuwu wũ-tuo veaitiɛ ta vile Jehova wɔwɔ wogi zu ga te niitiɛ ɣaazu maa-wõi zo ta faa yowũ ɣɛ. Na ɣa e kɛɛ kuuwu wũ-tuo veaitiɛ ta li niitiɛ wɔ te te wuloa kuuwui va ga te ɓɔ te va. Numaa lamaa te vaa wulu kuuwui zu zaɓui ɣa ga te te ɣɛɛzɔ kuloni te yee ma velei ɓalaa gaa wãlai e ɣɛni la e kɛɛni te va wulu ɓɔɔ wɔ. (Psalms 141:5)
Velei Jehova ɣa niitiɛ zo la ta faa yowũ ɣɛ gaazu, e dɛɛ ɣɛ le ga na fai lɛ ɓaani, towa numaa ɣaazu maa-wõi zo na ɣa ɣɛɛna wõila ɣa zeea?.
5. Jehova ɣa de zu-ʋaa-yɛ ani da wulu ɣaa ʋena da ʋaa yowũitiɛ va
Ziizɛ e po-kɔ̃ɔ-ma zeini ga e dɛ ga velei Jehova ɣa ɣi-gaa-ziɛ la ani nu ɣa wulu ɣaa ʋena na faa yowũitiɛ va. A Luki 15:1-7 lodo, wo gaa-zaɣa-kɛɛ nii ɣaa wote:
Zɛɓɛi nii dɛɛzu ga diɛ e vile Jehova va?
A Ezekiel 33:11 lodo, wo gaa-zaɣa-kɛɛ nii ɣaa wote:
Zɛɓɛi manɛɛ e kɛ ga e dɛ ga e wulu ɣaa ʋega sa ya ʋaa yowũi va?
E ɣɛ velei baala maazu vɛtɛ nu e la, Jehova ɓɛdɛvɛ na numaitiɛ ʋaa ma ɓɔɔ ga ʋikee
NUMAA TANIGA TA ƔƐ TEA: “Faa yowũi ge kɛɛ ga luozu ga ge bo kuuwu wũ-tuo veaitiɛ ma, zaɓui ɣa ga ga bona ta vaazu kulozu kuuwui va.”
Zɛɓɛi ya bo nui nii ma e ɣi-gaa-ziɛzu ɣana?
NII SA È MAA WOLIA
Ani da faa yowũ ɣɛɛna tɔwɔ maʋai kɛɛ de yii yɛ zuuli na ɣa ɣɛɛna diɛ ɣaa-ɓaa ga de wulu ɣaa ʋe faa yowũi na va Jehova ɣa de zu-ʋaa-yɛ.
Ma-ɓigitiɛ
Zɛɓɛi e kɛɛ faa yowũi da kɛ manɛɛ de bo Jehova ma?
Zɛɓɛi manɛɛ de kɛ ga Jehova de zu-ʋaa-yɛ?
Ani da faa yowũ ɣɛɛna zɛɓɛi e kɛɛ manɛɛ de bo kuuwu wũ-tuo veaitiɛ ma ga te ɓɔ de va?
WƐLƐ FAA LAMAA VA
Wɛlɛ velei zunu gila kwɛ̃ɛni la ga velei Jehova ɣa de zu-ʋaa-yɛ la e ɣɛ velei Gala Kɔlɔi boga la Isaiah 1:18 zu.
Ta nu wulona kuuwui va nu ɓɔgapɛ ta wulo su-nu-ma ɣɛ le?
“Jehova Ɣa Wõila Lɛ Ga Faa Yowũ Ɣɛɛ Veaitiɛ E Te Maa-Wõi Zo” (The Watchtower, August 2024)
Wɛlɛ velei va ta wõila lɛɛ la ga nui nii ya faa yowũ ɣɛ kɛ lɛ wõini ɔ wulu ɣaa ʋe ba na ɣa ɣɛɛna te gaazu maa-wõi zo.
“Kpɔɓai E Niitiɛ Ʋaa Ma Ta Te Wulo Kuuwui Va” (The Watchtower, August 2024)
Po-kɔ̃ɔ-mai nii zu “Manɛɛ Ge Li Wulu Jehova Wɔ” wɛlɛ nii va e ɓɔni zunui nii va ga e kwɛ̃ɛ ga Jehova ɣa e ɓɔni ba ga e va wulu gaamai zu.
“Gala Kɔlɔi Ɣa Da Ŋeteai Maa Ʋeli Bo” (The Watchtower, April 1, 2012)