Ɣaa-Ɓaa Yiɛ Ya Ziɛ-Pului Zu-Ɓaa Wo Yɔɔzu Wa Jehova

E faa lamaa maa wolia sa Gala Kɔlɔ maa woliai nii zu e vile Jehova va. Niitiɛ e maa wolia e vile Jehova va e kɛɛ wõila ɣa sa e ya faa ma. Ɣeeta wõilai na kɛɛ e ɓɔɔ ʋea sa Jehova ya na ɣa ɣɛɛna e bataizei maa zɔlɔ woga. Ani ɛ lɛ dɛ nii ɣɛɛni, ge kwɛ̃ni ga su lɛ vaazu wooza su ga e kɛ. Ani ɓalaa ya bataizei maa zɔlɔ wona manɛɛ dɛ e ɣaa-ɓaa yiɛ ya ziɛ-pului zu-ɓaa wo yɔɔzu wa Jehova. Ya zoo e ɣaa-ɓaa e lɔtɔ Jehova va wɔlɔ-wɔlɔ ta wɔlɔ-wɔlɔ. Ya nii ɣɛ sa ɣɛ le?

1. Zɛɓɛi e kɛɛ manɛɛ e ɣaa-ɓaa e ya ziɛ-pului zu-ɓaa wo yɔɔzu wa Jehova?

Manɛɛ diɛ ɣaa-ɓaa ga de da ziɛ-pului zu-ɓaa de yɔɔzu da Jehova. Zɛɓɛi e kɛɛ manɛɛ de na ɣɛ? Ga, “de mɛ lɛ va ziɣizu pulu.” (Hiiɓuluitiɛ 2:1) Zɛɓɛi ya ɓɔ de va ga de ɣaa-ɓaa diɛ Jehova ʋeli de ʋii mɛlɛ ɓɛɛ. Manɛɛ de ɣaa-ɓaa ɓɔɔ Gala goo wotii zu na ɣa ɣɛɛna de pele taniga ɣaa-ziɛ ga ya ɓɔ de va de Jehova yii-mai ɣɛ. (Felepaitiɛ 3:​16 lodo.) Jehova ʋeli ʋai ɣa ɓɔɔ e ga faa vagɔi da kɛ da ŋeteai zu!​—Psalm 84:​10.

2. Zɛɓɛi wɔnɔ manɛɛ e ɣaa-ɓaa yiɛ kɛ?

Velei ɓalaa sa e vaazu kɔlɔi nii laa wulozu la, manɛɛ e ɣaa-ɓaa yiɛ dɛ ga ya ga Kolai Maa Veaitiɛ te ta. Gala Kɔlɔi ɣɛ “A ɣɛ wɔnɔ ga nu niinɛa ki-gaa-ziɛi nii mavele ma é wo ɣigi zu.” (Ɛfɛsɔitiɛ 4:​23, 24) Ya ɣaa ɓaana yiɛ Gala Kɔlɔi maa woli, yiɛ li gaalɛ-baitiɛ zu ya faa niinɛ maa woli e vile Jehova va e vɛɛ na tuɓo-veleitiɛ va. Pelei taniga ɣaa-ziɛ ga e vile Jehova na po-kɔ̃ɔ-mai zu ya ŋeteai zu. Ɣaa-ɓaa ɓɔɔ yiɛ faa taniga maa ʋeli bo ya ŋeteai zu ga e Jehova wuuzu nɛɛ.

3. Jehova ɣa ɓɔ e va ɣɛ le ga e wɔɔlɔ feli ʋai zu?

Gala Kɔlɔi ɣɛ “Galagi ɣa wo maʋaa ɣavele ɓɛtɛ é wo zu-ɓaa é wo lo kpãa.” (1 Pite 5:​10) Tɛ-ga ɣa wo ga de ta nɛpɛ, kɛ Jehova ɣa ɓɔ de va de lo kpã. (Psalms 139:​23, 24) E de ɣi-togɛ ga tɔ vaazu zobo feezu de ya, e kɛ de wõi ga de zii-mai ɣɛ da ŋeteai zu.​—Felepaitiɛ 2:​13 lodo.

FAA LAMAA MAA WOLI

4. Yiɛ yɛpɛ Jehova wɔ yiɛ wuito goi ma

Gala-feliai ɓɔga Gala Kɔlɔ maa woliai ɓɔga de va de ɣɛ ga Jehova na siɛ-pulua. Fai niitiɛ ta ɓɔ e va ɣɛ le ga e lɔtɔ Jehova va?

A Psalms 62:8 lodo, wo gaa-zaɣa-kɛɛ nii ɣaa wote:

• Zɛɓɛi manɛɛ e maa ʋeli ya ɣala feli velei zu ga e ya ziɛ-pului zu-ɓaa wo yɔɔzu wa Jehova?

A Psalms 1:2 lodo, wo gaa-zaɣa-kɛɛ nii ɣaa wote:

• Ya leve ɣɛ le e faa lamaa maa woli ya Ɣala Kɔlɔ maa woliai zu ga e ya ziɛ-pului zu-ɓaa wo yɔɔzu wa Jehova?

Zɛɓɛi ya kɛ ga e wulo ɓɔɔ ya Ɣala Kɔlɔ maa woliai zu-nu-ma? Ga e wɛlɛ niitiɛ va ya ɓɔ e va, ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.

ƲILIOGI: Ya Ɣala Kɔlɔ Maa Woli Velei Maa Ʋeli Ga E Wulo Su-Nu-Ma (5:​22)

• Zɛɓɛi e maa wolia ʋiliogi nii zu ga e wõini e ziɛ la?

• Zɛpɛ wũgi niitiɛ zaama, ma zɛɓɛ ɣa ɓɔɔ e wõini e faa maa woli e vile ba?

5. Deʋe wo ga e ɓɔ e va e ya ziɛ-pului zu-ɓaa wo yɔɔzu wa Jehova

Ya faa taniga leʋena Jehova ʋeli ʋai zu towa ɓɔ e va e ɣaa-ɓaa ya ɣala feli ʋai zu. ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.

ƲILIOGI: Ŋeteai Nii Ɓɔɔ Fize Wogɛi (3:​31)

• Ʋiliogi nii zu kulo su-nu-ma zɛɓɛi Kamɛlɔ sɔlɔwoni tei e faa taniga leʋeni ga e kɛ Jehova ʋeli ʋai zu?

De ɓɔgapɛ dɛ lɛ zooga dɔ li zuu ɓalaa su ga de Gala goo wo, kɛ da zoo de faa ta leʋe ga de kɛ Jehova ʋeli ʋai zu. A Proverbs 21:5 lodo, wo yɛpɛ e vile nii va ya deʋe ga e kɛ . . .

• kuuwui zu.

• Gala goo wotii zu.

Tɛnɛgi e Gala goi nii zu towa ɓɔ e va ɣɛ le nii e deʋea e zoo e kɛ?

Fai taniga ya ɣi-gaa-ziɛ ma ga e kɛ

• Ya ɣala feli velei maa ʋeli.

• Gala Kɔlɔi lodo e yɛsu e daa wulo.

• Ɣaa-ɓaa e nu ɓɔgapɛ kwɛ̃ɛ ya wuuwui zu.

• Nui ta ɣaa-ziɛ ga yiɛ Gala Kɔlɔi lɛɛ la.

• Ɣɛ ga panɛ̃itiɛ te ta ɔɔ e ɣɛ ga ta ɓɔba veaitiɛ te ta.

• Ani ya ga zunu ɣaa-ɓaa e ɣɛ ga kuuwu wũ-tuo veaitiɛ ta ɓɔba nui ta.

NII SA È MAA WOLIA

Ɣaa-ɓaa e ya ziɛ-pului zu-ɓaa wo yɔɔzu wa Jehova. Na ɣa ɣɛɛna faa taniga leʋe ga e kɛ ya ɣala feli ʋai zu. Ya na ɣɛɛna ya yii-ma ɣɛ wɔlɔ-wɔlɔ ta wɔlɔ-wɔlɔ!

Ma-ɓigitiɛ

• Zɛɓɛi e kɛɛ e laila ga Jehova ɣa vaazu ɓɔsu e va ga e zii-mai ɣɛ?

• Ya leve ɣɛ le e ya ziɛ-pului zu-ɓaa wo yɔɔzu wa Jehova?

• Ya faa taniga leʋena ga e kɛ Jehova ʋeli ʋai zu towa ɓɔ e va ɣɛ le?

WƐLƐ FAA LAMAA VA

Zɛɓɛi ɓɔɔ Jehova wõini de kɛ, de zii-mai ɣɛ nɔ folo gila ɔɔ de kɛ da ŋeteai zu wɔ?

Ɣɛ Ga Tele-Bo Tuo Wo Nu E Ɣɛ Eeɓɔlɔhɛ̃ɛ (9:20)

Jehova ʋeli veai niitiɛ ɓalaa zee-la-ma te ya tanisu fai ta ɣa kɛ zii-la lɛ ɣɛɛ te ya. Wɛlɛ nii va ya ɓɔ e va.

Ɣi-Gaa-Ziɛ Niitiɛ Ma E Maa Wolizu Ga E Zii-La Zɔlɔwo (5:25)

Ya leve ɣɛ le e faa taniga leʋe e vile ya ɣala feli ʋai va na ɣa ɣɛɛna e ɣaa-ɓaa yiɛ te ɣɛ?

“E Ɓɛtɛ Ɣalagi Jehova Laa-Maa-Lɛ Fai Niitiɛ Zu Ya Deʋe Ga E Kɛ Feli Ʋai Zu” (The Watchtower, July 15, 2004)

Zɛɓɛi e kɛɛ manɛɛ e wɔɔlɔ Gala fai zu na ɣa ɣɛɛna ya leve ɣɛ le e na ɣɛ?

Wɔɔlɔ Gala Fai Zu, Jehova Na Zii Ɣaa-Wãla Ʋoloi Maa Ɓuovɛ Sa (The Watchtower, May 15, 2009)