KALABO 51
Da Leve Ɣɛ Le De Jehova Yii-La De Yɛpɛ Velei Zu?
Siɛgi ma Jehova de ɓɛtɛni la, e ŋɛni vagɔ ʋeeni de ya. Na ɣa ga zobogi e de vɛ ga de yɛpɛ. E ɣisu velei da yɛpɛ la tɔ ga faa ɓi Jehova ɣaazu? Ooi, tɔ ɓɔɔ ga faa ɓi! (Jĩi 1:26 lodo.) Na ma zɛɓɛi sa da kɛ de yɛpɛ velei Jehova yii-la?
1. Da leve ɣɛ le de yɛpɛ velei Jehova yii-la?
Gala Kɔlɔi ɣɛ “a wiɛ ɣiini zii lɔ wiɛ ɣiini maʋaa li ga zee luo vele ŋeteai zu.” (1 Tɛsɛlonaikaitiɛ 5:11) E nu ta nɛpɛ kwɛ̃ni ga manɛɛ e gaa-nɛkpɛ maa zɔlɔwo? Zɛɓɛi yà kɛ ga manui wuuzu nɛɛ? Dɛ ga e ɓɛdɛvɛ manui ʋaa ma. Tanisu nii ɓɔɔ e wõini la e vile manui va ya bo ma. E ɣigii ɣa Gala goi ta nɛpɛ su ga yá nu ɣaa-nɛkpɛ? Te lamagɛ ɓɔɔ Gala Kɔlɔi zu. Kwɛ̃ɛ ga velei ya yɛpɛ la numaa wɔ, towa kɛ te yii ɣaa wɔpɔ. Na ma ya ɣɛna yɛpɛzu numaa wɔ, da ma yiɛ te zɛ-sɛ bo.—Proverbs 15:1.
2. Woo zɛɓɛi maa lɛ nɛɛni ɔ wulo de la?
Gala Kɔlɔi ɣɛ: “A mɛ lɛ ɓe ba faa yowũ ta nɛpɛ gɔ wulo wo la wɔ bo.” (Ɛfɛsɔitiɛ 4:29 lodo.) Na zu-wulo-zu ɣɛ ga maa lɛ nɛɛni pĩwũ ɔɔ woo yowũ ta nɛpɛ ɔ wulo de la ani da ɣɛna yɛpɛzu nu wɔ, ɔ kɛ manui yii ɣaa ɔ wãla. De mɛlɛ ɣɛ wɔnɔ numaa laa wosu ɔ nɔ ɣɛ ga diɛ yɛpɛ ga yowũa e vile te va.—Proverbs 16:28 lodo.
3. Da leve ɣɛ le de de ɣaa yowũitiɛ za-su lɔ de yɛpɛ velei zu?
De laa woi ɣa nii lɛ e de ɣigii zu ɔɔ nii de ɣi-gaa-ziɛzu ma. (Luki 6:45) Na ma manɛɛ de ɓɔɔ maa wolo ga de da ɣi-gaa-ziɛi lete to niitiɛ ma te ga faa vagɔ. Natiɛ ta ga nii nɛpɛ e ga tele-bo faa, nii nɛpɛ maʋaa maa wuai, nii nɛpɛ é ga nu wõi-ɣɛ-ma ʋaa, e vɛɛ nii nɛpɛ ba saala ma. (Felepaitiɛ 4:8) Ga de ɣaazu ɓado faa vapagi niitiɛ va, manɛɛ de da ma ga ɣaa-wogi da bo e vɛɛ niitiɛ va da te ɣɛ ga da ziɛ-pulua. (Proverbs 13:20) Niitiɛ Gala Kɔlɔi boga ta ɓɔ wɔnɔ de va de ɣi-gaa-ziɛ ɓɔɔ ga pagɔ dɔ vɛɛ yɛpɛzu. Ɣi-gaa-ziɛ e vile velei va e laa woi ɣaa faa vɛɛ la numaa ta ɣi-gaa-ziɛi va. Gala Kɔlɔi ɣɛ: “Ani nu lɛ ɣi-gaa-ziɛni ɔ vɛɛ yɛpɛzu maʋaa ɣa wulo e ɣɛ ta boa lɔ nu va. Kɛ kele-ɣele beaitiɛ te nɛgii ɣa ga balo la.”—Proverbs 12:18.
FAA LAMAA MAA WOLI
Wɛlɛ velei va ya yɛpɛ la ga e Jehova yii-la, e numaa yii ɣaa wɔpɔ.
4. Da ma ga velei ya yɛpɛ la
Tanisu da fai ta wo na ta wolo ɣa kɛɛna, de kwɛ̃ɛ ga ɛ lɛ ɣɛni vani ga dɔ bo. (Jĩi 3:2) A Galeesiaitiɛ 5:22, 23 lodo, wo gaa-zaɣa-kɛɛ niitiɛ ɣaa wote:
Tuɓo-velei niitiɛ zaama, ma zɛɓɛ ɣa ya Gala ɣaa-zaɣa-kɛ ga e maa zɔlɔwo ga e ɓɔ e va e kwɛ̃ɛ velei ya yɛpɛ la? Tuɓo-velei niitiɛ ta ɓɔ e va ɣɛ le?
A 1 Kɔlĩitiɛ 15:33 lodo, wo gaa-zaɣa-kɛɛ nii ɣaa wote:
Ya ziɛ-puluitiɛ e vɛɛ ɣaa-wogi va ya bo ta faa vɛɛ e yɛpɛ velei va ɣɛ le?
Zɛɓɛi ya faa vɛɛ e yɛpɛ velei va?
A Ecclesiastes 3:1, 7 lodo, wo gaa-zaɣa-kɛɛ nii ɣaa wote:
Siɛ sɛɓɛi maa lɛ nɛɛni dɔ yɛpɛ la ɔɔ de na maa kpowũ dɔɔ vɛɛ yɛpɛzu?
5. Yɛpɛ ga pagɔ e vile numaa va
Ya leve ɣɛ le e ɓe yɛpɛzu ga yowũa e vile numaa va? ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.
Ʋiliogi nii zu, velei de ɣaa yɔwɔ̃i nii ɔ yɛpɛ la numaa wɔ zɛɓɛi e kɛɛ e ɣɛni wõini e maa ʋeli?
Zɛɓɛi e ɓɔni ba ga e na zɛpɛ velei maa ʋeli?
A Ecclesiastes 7:16 lodo, wo gaa-zaɣa-kɛɛ nii ɣaa wote:
Zɛɓɛi manɛɛ de ɣi-gaa-ziɛ ma ga e bɔ de va de mɛlɛ yɛpɛ ga yowũa e vile numaa va?
A Ecclesiastes 7:21, 22 lodo, wo gaa-zaɣa-kɛɛ nii ɣaa wote:
Gala goi niitiɛ ta ɓɔ e va ɣɛ le e mɛlɛ luɓo ga yowũa ani nui ta ɣa yɛpɛ na ga yowũa e vile e va?
6. Yɛpɛ ga pagɔ ya numaitiɛ wɔ
Jehova wõini diɛ yɛpɛ ɓɔɔ ga pagɔ da numaitiɛ wɔ diɛ kɛ wõila vele zu. ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.
Zɛɓɛi ya ɓɔ e va ga e yɛpɛ ga pagɔ ya numaitiɛ wɔ?
A Ɛfɛsɔitiɛ 4:31, 32 lodo, wo gaa-zaɣa-kɛɛ nii ɣaa wote:
Da leve ɣɛ le de da numaitiɛ yii ɣaa wɔpɔ de yɛpɛ velei zu?
Jehova dɛɛvɛ ga velei e ɣi-gaa-ziɛzu la e vile dui Ziizɛ va. A Mafiyu 17:5 lodo, wo gaa-zaɣa-kɛɛ nii ɣaa wote:
Ya vile ɣɛ le Jehova na po-kɔ̃ɔ-mai zu ga velei ya yɛpɛ la ya numaitiɛ wɔ?
Yiɛ pele ɣaa-ziɛ ga yiɛ mama fe numaa vɛ
NUMAA TANIGA TA ƔƐ TEA: “Nii ge wõini na ɣa ga bo. Ani ɓalaa numaa tɛ lɛ wõini tɔ mɛni nà faa lɛ su.”
E ɣisu nii ɣa ga faa vagɔ? Zɛɓɛi e kɛɛ yiɛ na wo?
NII SA È MAA WOLIA
De laa woi ɣa nu yii zuuli ɔɔ e kuuzu nɛɛ. Manɛɛ de ɣi-gaa-ziɛ ɓɔɔ ga pagɔ nii ma da bo, siɛgi da bo ma, ta velei da bo la.
Ma-ɓigitiɛ
Pelei taniga ta ga zɛɓɛ ya ɓɔ la numaa va e yɛpɛ velei zu?
Maa lɛ nɛɛni dɔ yɛpɛ ɣɛ le?
Zɛɓɛi ya ɓɔ de va de da ma diɛ numaa zɛ-sɛ bo de yɛpɛ velei zu?
WƐLƐ FAA LAMAA VA
Zɛɓɛi ya ɓɔ de va ga de yɛpɛ numaa wɔ ga pagɔ?
Wɛlɛ nii va ya ɓɔ e va ga e mɛlɛ ɣɛ yɛpɛzu ga yowũa.
“E Ɣisu Tɔ Ga Faa Vagɔ Ga De Numaa Woto?” (Kɔlɔi nii ɣa fãga wɔlɔi ma)
Wɛlɛ velei ya ɣaa-ɓaa la ga e mɛlɛ yɛpɛ ga yowũa e vile numaa va.
Wɛlɛ velei va Jehova ɓɔni la zunui nii va ga e ɓeteve numaa woto fai va.
“Gè Ɣɛni Sa Ɣi-Gaa-Ziɛzu E Vile Nii Va E Vaazu Ɣɛɛzu Na Ŋeteai Zu” (The Watchtower, August 1, 2013)