Jeremia

43 Jeremia haafeza kubulelela batu kaufela manzwi a kamukana aazwa ku Jehova Mulimu wabona, ona manzwi kamukana a Jehova Mulimu wabona, anaa mulumile kubabulelela, 2 Azaria mwanaa Hoshaya, Johanani+ mwanaa Karea, ni batu kaufela babaikuhumusa, babulelela Jeremia, bali: “Litaba zeubulela ki za buhata! Jehova Mulimu waluna haasika kuluma kuto lubulelela kuli: ‘Musike mwaya kwa Egepita kuyo pila kwateñi.’ 3 Kono Baruki+ mwanaa Neria ki yena ya kususueza kubulela cwalo, kuli lufiwe mwa mazoho a Makaladeya, ilikuli lubulaiwe kamba kuiswa mwa buhapiwa kwa Babilona.”+

4 Cwale Johanani mwanaa Karea ni bazamaisi kaufela ba limpi ni batu kaufela bahana kumamela linzwi la Jehova la kuli bazwelepili kupila mwa naha ya Juda. 5 Kono Johanani mwanaa Karea ni bazamaisi kaufela ba limpi baya ni bo masiyaleti kaufela ba Juda bane bakutile kuto pila mwa naha ya Juda kuzwa mwa macaba kaufela mone bahasanezi.+ 6 Baanga baana, basali, banana, ni bana ba mulena babasizana, ni batu kaufela banaasiile Nebuzaradani,+ yomuhulu wa balibeleli, mwa zamaiso ya Gedalia+ mwanaa Akikami+ mwanaa Shafani,+ hamohocwalo ni mupolofita Jeremia ni Baruki mwanaa Neria. 7 Mi baya ni bona mwa naha ya Egepita, kakuli nebasika mamela linzwi la Jehova, mane bayo fita ni kwa Takapanesi.+

8 Cwale linzwi la Jehova lataha ku Jeremia mwa Takapanesi, lali: 9 “Uunge macwe amatuna ka lizoho lahao, mi uapate mwa daka kwa mulunda wa sitina o kwa munyako wa ndu ya Faro mwa Takapanesi, Majuda inze baiponela. 10 Mi cwale ubabulelele, uli: ‘Jehova wa limpi, yena Mulimu wa Isilaele, sabulela ki se, uli: “Hamubone, nibiza Nebukadenezare* mulena wa Babilona, yena mutangaaka,+ mi nikabeya lubona lwahae fahalimwaa macwe a, enipatile, mi ukabapulela tende yahae ya silena fahalimwaa ona.+ 11 Mi ukataha kuto nata naha ya Egepita.+ Mutu kaufela yaswanelwa ki ncwa yebulaya ukafiwa kwa ncwa yebulaya, yaswanelwa ki kuiswa mwa buhapiwa ukaiswa mwa buhapiwa, mi yaswanelwa ki mukwale ukafiwa kwa mukwale.+ 12 Mi mandu* a milimu ya Egepita nika atumbeka mulilo,+ mi uka acisa ni kuhapa milimu yeo. Ukaikapesa naha ya Egepita inge mulisana mwaikapesezanga siapalo sahae, mi ukafunduka mwa sibaka seo ka kozo.* 13 Mi ukalobaka misumo* ya Beti-shemeshi* mwa naha ya Egepita, mi ukacisa mandu* a milimu ya Egepita ka mulilo.”’”