Jeremia
30 Ki le linzwi lene litile ku Jeremia kuzwa ku Jehova, lelili: 2 “Jehova Mulimu wa Isilaele sabulela ki se, uli: ‘Ñola mwa buka manzwi kaufela eni kubulelela. 3 Kakuli “bona! mazazi aataha,” kubulela Jehova, “hanika kubukanya babahapilwe ba sicaba saka, sa Isilaele ni Juda,”+ kubulela Jehova, “mi nika bakutiseza mwa naha yene nifile bo kuku wabona, mi baka iluwa hape.”’”+
4 Ki a manzwi a Jehova anaabulelezi Isilaele ni Juda.
5 Jehova sabulela ki se, uli:
“Muutwile mihuwo ya batu babasabile;
Batu basabile, habayo mwa kozo.
6 Shangwe, hamubuze nji muuna wakona kupuluha.
Ki kabakalañi pata ya mutu kaufela haipilukile?
7 Mawe! Lizazi leo ki lelisabisa.*+
Hakuna lizazi leliswana ni lona,
Ikaba nako ya ziyezi ya Jakobo.
Kono ukapiliswa ku yona.”
8 “Mi mwa lizazi leo,” kubulela Jehova wa limpi, “nikaloba coko ye mwa mulala wabona, mi nikapuma litolopo zabona fahali; mi batu basili* habasa tola babaeza batanga babona hape. 9 Bakasebeleza Jehova Mulimu wabona ni Davida mulenaa bona, yenika bafa.”+
10 “Mi wena, Jakobo mutangaaka, usike wasaba,” kubulela Jehova,
“Mi usike wangangama, wena Isilaele.+
Kakuli nika kulamulela mwa naha ya kwahule
Mi nikalamulela bana bahao mwa naha mobaisizwe mwa buhapiwa.+
Jakobo ukakuta mi ukapila mwa buiketo ni mwa kozo,
Kusina yamusabisa.”+
11 “Kakuli niinzi ni wena,” kubulela Jehova, “kuli nikupilise.
12 Kakuli Jehova sabulela ki se, uli:
“Lituma lahao halina kalafo.+
Sitombo sahao hasifoli.
13 Hakuna yayemela taba yahao,
Hakuna mwakufoliseza sitombo sahao.
Hakuna kalafo yekona kukutusa.
14 Linyazi zahao kaufela likulibezi.+
Lituhezi kukundongwama.
Kakuli nikunatile inge mone sika kunatela sila,+
Ka koto ya mutu yanani lunya,
Kabakala mulatu wahao omutuna ni libi zahao zeñata.+
15 Kiñi haulila kabakala lituma lahao?
Butuku bouutwa habufeli!
Ki kabakala mulatu wahao omutuna ni libi zahao zeñata+
Hani kuezize cwana.
16 Kabakaleo, kaufela baba kumiza bakamiziwa ni bona,+
Mi lila zahao kaufela likaiswa mwa buhapiwa ni zona.+
Baba kuamuha zahao ni bona bakaamuhiwa zabona,
Mi baba kubukula kaufela nika bafa mwa mazoho a babaka+ babukula.”
17 “Kono nikatahisa kuli ukutelwe ki buikangulo bwahao mi nikafolisa litombo zahao,”+ kubulela Jehova,
“Nihaike nebaize u muhaniwa, bali:
‘Sione, yasina yamubata.’”+
18 Jehova sabulela ki se, uli:
“Nikubukanya ba mwa litende za Jakobo,+ babaisizwe mwa buhapiwa,
Mi nikautwela butuku litabernakele zahae.
Muleneñi ukayahiwa sinca fa mulunda waona,+
Mi tawala yesilelelizwe ikaba mwa sibaka sayona sesiswanela.
19 Mi ku bona kukazwa buitumelo ni mihuwo ya batu babaseha.+
20 Bana bahae bakaba sina mone bainezi kwamulaho,
Mi sicaba sahae sikatiiswa fapilaa ka.+
Nikanata baba muhatelela kaufela.+
21 Yakutekeha wahae ukazwa ku yena,
Mi mwahalaa hae ki mokuka zwa mubusi wahae.
Nikatahisa kuli asutelele fakaufi, mi uka niatumela.”
“Kakuli hakusicwalo, ki mañi yakona kuba ni bundume bwa kuniatumela?”* kubulela Jehova.
22 “Mi mukaba sicaba saka,+ mi na nikaba Mulimu wamina.”+
23 Hamubone! Liñungwa la Jehova likafuka ka buhali,+
Ikaba liñungwa lelimaata, lelipotolohela fa litoho za babamaswe.
24 Buhali bwa Jehova bobutuka habuna kukuyuka
Kufitela aeza ni kupeta milelo ye mwa pilu yahae.+
Mukautwisisa taba yeo kwa mafelelezo a mazazi.+