Jehova Naatiisize Elia

Jezabele naautwile zeneezahalile kwa bapolofita ba Baale, mi anyema hahulu. Aluma lushango ku Elia lone lubulela kuli: ‘Kamuso ukashwa sina feela bapolofita ba Baale.’ Elia asaba hahulu mi amatela mwa lihalaupa. Alapela ali: ‘Jehova, hanisa kona kuzwelapili kuitiisa. Nituhelele feela nishwe.’ Elia naakatezi mi alobala mwatasaa kota.

Lingeloi lamuzusa mwa buloko, mi lali: ‘Zuha uce.’ Elia abona sinkwa sa laundi fa macwe acisa ni nkwana ya mezi. Aca ni kunwa mi alobala hape. Lingeloi lamuzusa hape mi lali: ‘Uce. Utokwa maata kuli uzamaye mwa musipili wahao.’ Kacwalo, Elia aca hape. Azamaya ka mazazi a 40 ni masihu a 40, kufitela afita kwa Lilundu la Horebe. Hafitile kwateñi, akena mwa mukoti kuli ayo lobala. Kono Jehova abulela ku yena. Amubuza kuli: ‘Elia, uezañi kwanu?’ Aalaba ali: ‘Maisilaele bapalezwi kutaleleleza sepiso yabona ku wena. Basinyize lialetare ni kubulaya bapolofita bahao. Mi cwale babata kunibulaya.’

Jehova kihaa li ku yena: ‘Zamaya uyo yema fa lilundu.’ Sapili, kwafuka moya omutuna fahaalimwa mukoti. Hasamulaho, kwaba ni zikinyeho ni mulilo. Kwa mafelelezo, Elia autwa linzwi lene liutwahalela mwatasi. Aikwahela kwa pata ka siapalo sahae mi azwela kwande a mukoti. Cwale Jehova amubuza libaka hanaabalehile. Elia kihaa li: ‘Ki na feela yasiyezi.’ Kono Jehova ali ku yena: ‘Haki wena feela yasiyezi. Kusanani batu ba 7,000 mwa Isilaele babasa nisebeleza. Zamaya uyo keta Elisha kuli abe mupolofita mwa sibaka sahao.’ Kapili-pili, Elia aya kuyo eza zanaa mubulelezi Jehova. Kana munahana kuli Jehova wakona kumitusa hamueza lika zabata kuli mueze? Eni, uka mitusa. Halunyakisiseñi nto yeñwi yeneezahezi ka nako yenekunani linanga.