Mu Eze Mazoho a Jehova a Kamita ku ba Yona Kemelo ya Mina

“Mulimu wa ku ya ku ile ki yena sibaka sa maino a hao, mi kwatasi ku inzi mazoho a hae a kamita.”—DEUTERONOMA 33:27, American Standard Version.

1, 2. Ki kabakalañi batu ba Jehova ha ba kona ku ba ni buikolwiso ka za kemelo ya hae?

JEHOVA u babalela batu ba hae. Sina ka mutala, mwahal’a manyando kamukana a Maisilaele, “a kalelwa hamoho ni bona”! Ka lilato ni mufelañeke, “a ba lwala.” (Isaya 63:7-9) Kacwalo haiba lwa sepahala ku Mulimu, lwa kona ku ba ni buikolwiso ka za kemelo ya hae.

² Mupolofita Mushe n’a bulezi kuli: “Mulimu wa kamita ki mapilelo a hao Mi mazoho a kamita a ku inezi kwatasi.” (Deuteronoma 33:27) Toloko ye ñwi i talusa kuli: “Mulimu wa ku ya ku ile ki yena sibaka sa maino a hao, mi kwatasi ku inzi mazoho a hae a kamita.” (American Standard Version) Kono mazoho a Mulimu a yemela cwañi batanga ba hae?

Ki Kabakalañi ha ku na ni Butata bo Buñata Cwalo?

3. Ki l’ili f’o mufuta wa mutu o ipeya ku utwa u ka ikola “tukuluho ya kanya ya bana ba Mulimu” ka nzila ye tezi?

³ Ku sebeleza Jehova ha ku lu silelezi kwa butata bo bu atile kwa batu ba ba si ka petahala. Mutang’a Mulimu Jobo n’a bulezi kuli: “Mutu ya pepilwe ki musali, bupilo bwa hae ki bo bukuswani, Mi bu tezi maziyezi.” (Jobo 14:1) Haili ka za “bupilo bwa luna, [ni] mazazi a bona,” walisamu u talusa kuli: “Ki bwa mikatazo ni butata fela.” (Samu 90:10) Bupilo bu k’a ba cwalo ku fitela ‘ze bupilwe ha li ka lukululwa kwa butanga bwa ku bola ni ku ba ni tukuluho ya kanya ya bana ba Mulimu.’ (Maroma 8:19-22) Seo si ka ezahala mwahal’a Puso ya Kreste ya Lilimo ze Sikiti. Ka ku toma fa sitabelo sa Jesu sa tiululo, babusiwa ba mufuta wa mutu ba ona Mubuso w’o cwale ba ka ipumana mwa tukuluho ya ku zwa kwa sibi ni lifu. Pili Lilimo ze Sikiti li si ka fela kale, Kreste ni malena ba ba li baprisita bao a ka busa ni bona ba kabe ba tusize mufuta wa mutu o ipeya ku utwa ku fita fa bupetehi, mi bao ba ba sepahala ku Mulimu mwahal’a tiko ya mafelelezo ye zwelela ku Satani ni madimona a hae mabizo a bona a ka ñolwa mwa “buka ya bupilo” ku ya ku ile. (Sinulo 20:12-15) Mi cwale ba ka ikola ka ku tala tukuluho ya kanya ya bana ba Mulimu.

4. Mwa sibaka sa ku bilaela ka za miinelo ya mwa bupilo bwa luna, ki sifi se lu swanela ku eza?

⁴ Ka nako ye, mwa sibaka sa ku bilaela ka za miinelo ya luna mwa bupilo, ha lu sepeñi Jehova. (1 Samuele 12:22; Juda 16) Hape lu itumele ku Muprisita yo Mutuna, Jesu, ili y’o ka yena lwa kona ku atumela Mulimu “kuli lu utwelwe butuku, lu fumane ku shemubiwa, mi lu tuswe mwa nako ye swanela.” (Maheberu 4:14-16) Ni kamuta lu si ke lwa ba sina Adama. Ka seo, ka mafosisa a tameleza Jehova kuli kuti n’a mu file musali y’a maswe, ka ku bulela kuli: “Musali y’o ni file kuli a ine ni na, ki yena ya ni file kwa kota, mi ni cile.” (Genese 3:12) Mulimu u fa lika ze nde mi h’a tahisi butata ku luna. (Mateu 5:45; Jakobo 1:17) Manyando hañata a tahiswa ki ku tokwa kwa luna butali kamba ka mafosisa a mutu yo muñwi. Hape n’a kana a taha fahalimw’a luna bakeñisa kuli lu na ni sibi mi lu pila mwa lifasi le li lapalezi mwatas’a m’ata a Satani. (Liproverbia 19:3; 1 Joani 5:19) Niteñi, mazoho a Jehova a kamita ka nako kaufela a yemela batanga ba hae ba ba sepahala ili bao ka tapelo ba itinga ku yena mi ka butu ba sebelisa kelezo ya Linzwi la hae.—Samu 37:5; 119:105.

Ku Tiisa Mwahal’a Makulanu

5. Ki susuezo ifi yeo ba ba kula ne ba kana ba i fumana kwa Samu 41:1-3?

⁵ Ka linako ze ñwi buñata bwa luna lu telwa ki manyando bakeñisa makulanu. Niteñi, Davida na bulezi kuli: “U filwe mbuyoti mutu ya tokomela ba ba tokwile; Mwa lizazi la butata Mulimu u ka mu lamulela. [Jehova, NW] u ka mu babalela, a mu pilise; U ka fuyolwa mwa lifasi; Mi a si ke a mu neelela mwa mata a lila za hae. [Jehova, NW] u ka mu tiisa h’a lobezi mwa bulobalo bwa butuku: U mu bonela bulobalo bwa hae kaufela h’a kula.”—Samu 41:1-3.

6, 7. Mulimu n’a tusize Davida kamukwaufi ha n’a inzi fa bulobalo bwa butuku, mi seo si kona ku susueza cwañi batanga ba Jehova kacenu?

⁶ Mutu y’a na ni mamelelo ku ba bañwi u tusa ba ba mwa butokwi. “Lizazi la butata” li kona ku ba nako ifi kamba ifi ya butata kamba nako ye telele ye tepeleza mutu ka butu. U sepa Mulimu kuli a mu bukeleze mwahal’a butuku bwa hae, mi ba bañwi ‘ba mu talusa kuli ki ya tabile mwa lifasi’ ka ku yandulula litaba za likezo za Jehova za mufelañeke ku yena. Jehova n’a tiisize Davida “mwa bulobalo [bwa hae] bwa butuku,” mwendi mwahal’a nako ye filikanya hahulu muta mwan’a Davida Abisalomi na likile ku kwañasha lubona lwa Isilaele.—2 Samuele 15:1-6.

⁷ Bakeñisa kuli Davida na bonisize mamelelo ku ba ba tokwile, n’a ikutwile kuli Mulimu n’a ka mu tiisa ha n’a fitile fa ku ba mwa butokwi mwa bulobalo bwa butuku. (Samu 18:24-26) Nihaike kuli n’a li mwa mukishi, n’a na ni buikolwiso bwa kuli Mulimu u ka mu ‘bonela bulobalo’ bwa hae isiñi ka ku zwisa butuku ka makazo, kono ka ku mu tiisa ka mihupulo ye omba-omba. Ne ku ka swana inge kuli Jehova n’a ka fetula bulobalo bwa hae ku bu zwisa mwa ku ba bulobalo bwa butuku ni ku bu tahisa fa ku ba bulobalo bwa ku fola. Ka ku swana, haiba lu nyandiswa ki makulanu sina batanga ba Mulimu, mazoho a Jehova a kamita a ka lu yemela.

Ku Omba-Ombiwa kwa ba Maikuto a Zwafile ka Butuna

8. Mukreste yo muñwi u se a bonisize cwañi buitingo bwa hae ku Mulimu?

⁸ Makulanu n’a kana a tahisa mwa munahano maikuto a ku zwafa ko kutuna. Mukreste yo muñwi ya kula hahulu, ili y’o fokuñwi u palelwa ku ba ni m’ata a’ likani mwa ku bala, u talusa kuli: “Seo si ni tiseza maikuto a mañata a tungile ili a ku zwafa ko kutuna, ku ikutwa ku tokwa tuso, mane nihaiba ku tahisa miyoko.” Ka ku ziba kuli Satani u bata ku mu totobeza ka ku zwafa ko ku cwalo, Mukreste wa lwana, ka ku izibela kuli ka tuso ya Jehova h’a koni ku palelwa. (Jakobo 4:7) Yena mutu y’o ki susuezo ku ba bañwi ba ba ziba kuli u sepile Mulimu. (Samu 29:11) Niha inzi mwa sipatela, wa lumela mawaile ku ba ba kula ni ba bañwi cwalo kuli a ba susueze kwa moya. Yena ka sibili u susuezwa ki ku teeleza kwa makaseti a kopisizwe a lipina za Mubuso ni litaba ze mwa magazini ye ni Awake!, ili ye zamaelela ni yona, ni ka ku swalisana ni Bakreste ba bañwi. Yena muzwale y’o u talusa kuli: “Kamita ni bulela ku Jehova mwa tapelo, ku mu kupa kuli a ni fe m’ata, ketelelo, ku omba-ombiwa, ni tuso ya ku ba ni buitiiso.” Haiba mu Bakreste ba ba ipumani mwa mapongo a matuna, kamita mu sepe Jehova ni ku eza mazoho a hae a kamita kuli a be yona kemelo ya mina.

9. Ki mitala ifi ye bonisa kuli ku zwafa ko kutuna kwa mwa munahano fokuñwi ku kataza batu ba bumulimu?

⁹ Maikuto a ku zwafa ko kutuna ki butata bo se bu bile teñi kwamulaho k’o. Jobo ha n’a li mwa tiko, n’a bulezi sina mutu y’a na ikutwa kuli n’a siilwe ki Mulimu. (Jobo 29:2-5) Pilaelo fa muinelo wa Jerusalema wa ku shandauka ni mamota a ona ne ku tahisize kuli pata ya Nehemia i sosobane, mi Pitrosi n’a ikutwile maswe hahulu ka za ku latula Kreste kuli mane n’a lilile hahulu. (Nehemia 2:1-8; Luka 22:62) Epafrodite na ikutwile maswe hahulu bakeñisa kuli Bakreste mwa Filipi ne ba utwile kuli n’a kula. (Mafilipi 2:25, 26) Maikuto a ku zwafa ko kutuna n’a bile kwa Bakreste mwa Tesalonika, mi Paulusi n’a susuelize mizwale teñi k’o kuli “mu tiise ba lipilu ze shekesha.” (1 Matesalonika 5:14) Kacwalo Mulimu u tusa cwañi batu ba ba cwalo?

10. Ki sifi se ne si kana sa ba se si tusa mwa ku lika ku tiyela maikuto a maswabi a matuna?

¹⁰ Katulo ya ka butu i swanelwa ku ezwa ka za ku alafiwa haiba mutu u na ni butuku bo butuna bwa maikuto a mwa munahano.a (Magalata 6:5) Ku pumula ko ku likani ni musebezi o itikanelezi ne li kana za tusa. Mwa sibaka sa ku bona butata bu sikai sina ziyezi i liñwi ye tuna, mutu y’a mwa maikuto a ku zwafa ko kutuna n’a kana a fumana kuli kw’a tusa ku sebeleza fa ku bu tatulula bu li buñwi ka bu li buñwi. Tuso ye omba-omba ku zwelela kwa maeluda ba mwa puteho neikana ya tusa hahulu, sihulu haiba bona butata b’o bwa munahano bu tahisa mamelelo ya kwa moya. (Jakobo 5:13-15) Fahalimw’a seo kamukana, ki kwa butokwa hahulu ku itinga ku Jehova, ‘ku beya maikuto a luna kamukana ku yena, kakuli wa lu babalela.’ Tapelo ya ka tundamo ni ye zwelela kwa pilu i kona ku tiseza mutu ‘kozo ya Mulimu ye buluka pilu ni mihupulo ka Kreste Jesu.’—1 Pitrosi 5:6-11; Mafilipi 4:6, 7.

Jehova u Lu Tusa ku Tiyela Maswabi a Lifu

11-13. Ki sifi se si kona ku tusa mwa ku kusufaza maswabi fa lifu la mulatiwa?

¹¹ Muinelo o muñwi o tahisa maikuto a ku zwafa ko kutuna ki lifu la mulatiwa. Abrahama a lila bakeñisa ku latehelwa ki musal’a hae, Sara. (Genese 23:2) Muta mwan’a hae Abisalomi na shwile, Davida a ba ni maswabi a matuna hahulu. (2 Samuele 18:33) Sina ka mutala, nihaiba mutu ya petehile Jesu a “lila” bakeñisa lifu la mulikan’a hae Lazaro! (Joani 11:35) Kacwalo ku na ni maswabi muta mulatiwa a timela. Kono ki sifi se si kona ku tusa mwa ku kusufaza ona maswabi ao?

¹² Mulimu u tusa batu ba hae mwa ku tiyela maswabi a matuna a fa lifu. Linzwi la hae li talusa kuli ku ka ba ni zuho. Kacwalo, ha lu ini mwa “maswabi, sina ba bañwi ba ba si na sepo.” (1 Matesalonika 4:13; Likezo 24:15) Moya wa Jehova wa lu tusa ku ba ni kozo ni tumelo ni ku nahanisisa ka butungi fa nako ya kwapili ye makaza ye sepisizwe mwa Linzwi la hae, ilikuli lu si ke lwa komiwa ka ku tala ki mihupulo ya maswabi ka za mulatiwa ya timezi. Ku ombaombiwa hape ku zwelela mwa ku bala Mañolo ni ku lapela ku “Mulimu wa ze tiisa pilu kaufela.”—2 Makorinte 1:3, 4; Samu 68:4-6.

¹³ Lwa kona ku fumana ku omba-ombiwa ku zwelela fa sepo ya zuho sina mwa n’a ezelize Jobo wa bumulimu, ya n’a bulezi kuli: “Mawe! Kab’o [Jehova] ka ni pata mwa libita! Kab’o ka ni kwahelela mwateñi, buhali bwa hao mane bu fele, Wa ni tomela lizazi l’o ka ni hupula ka lona! Mutu h’a shwa, kabe n’a ka pila hape! Fo, ne ni ka kumalela ndwa ya ka, ka mazazi kaufela, Ku fitela ku taha ya t’o ni lukulula mwa sibaka sa ka. Fo, Wena n’o ka biza, mi ne ni ka ku alaba; Mi n’o ka shukelwa ku bona hape musebezi wa mazoho a hao.” (Jobo 14:13-15) Maswabi a matuna hañata h’a ba ngi teñi muta mulikani ya latiwa a tama musipili, kakuli lu libelela ku mu bona hape. Maswabi a matuna a’ tiswa ki lifu la mulatiwa wa luna na kana a kusufazwa haiba lu talima lifu la Mukreste ya sepahala ka nzila ye swana. Haiba u na ni sepo ya fa lifasi-mubu, u ka zusiwa fa buloko bwa lifu ona fa lifasi-mubu fa mwahal’a Puso ya Lilimo ze Sikiti ya Kreste. (Joani 5:28, 29; Sinulo 20:11-13) Mi haiba lu na ni sepo ya ku pila fa lifasi-mubu ku ya ku ile, ne lu kana lwa ba teñi fa ili ku to lumelisa mulatiwa ya zuhile kwa bafu.

14. Limbelwa ba Sikreste ba babeli ne ba talimani cwañi ni lifu la banna ba bona?

¹⁴ Kaizeli yo muñwi, hamulaho wa lifu la munn’a hae na zibile kuli n’a na ni ku zwelapili mwa misebezi ya bupilo bwa hae ili mwa sebelezo ya Mulimu. Fahalimw’a ku pateha ka ku ‘itiisa mwa musebezi wa Mulena,’ n’a lukile kubo ka likalulo ze fita fa 800. (1 Makorinte 15:58) U talusa kuli, “Wo ne li musebezi o munde, bakeñisa kuli mwa nako kaufela ye ne ni sebeza ne ni kona ku teeleza kwa lipina za Mubuso ni matepu a Bibele, ili nto ye ne i patehisize muhupulo wa ka.” Ka tabo u hupula ku pota kwa eluda ni musal’a hae. Ku zwelela mwa Bibele, eluda n’a supile kuli Mulimu luli u babalela limbelwa. (Jakobo 1:27) Musali yo muñwi wa Mukreste n’a si ka komiwa ki linongosi muta munn’a hae na timezi. Na itebuhile kemelo ya balikani ni ku ba ni cisehelo ye tuna hahulu ku ba bañwi. “Ne ni lapela hañata ni ku fita ni ku hulisa swalisano ye tiile hahulu ni Jehova,” ko na mwa taluseza. Mi ki mbuyoti hakalo ku ba ni kemelo ya mazoho a Mulimu a kamita!

Tuso Muta Lu Eza Mafosisa

15. Ki ufi muhupulo o mutuna wa manzwi a Davida kwa Samu 19:7-13?

¹⁵ Nihaike kuli lwa lata mulao wa Jehova, ka linako ze ñwi lu eza mafosisa. Ku si na ku kakanya seo si lu tiseza maswabi, sina mo ne si ezelize ku Davida, ili y’o milao ya Mulimu, litemuso, litaelo ni likatulo za hae za buatuli ku yena ne li lakazeha ku fita gauda. Na bulezi kuli: “Mutang’a hao u monyehelwa ki zona; Mwa ku ya ka zona, ku na ni mupuzo o mutuna. Ki mañi ya ka lemuha lifoso za hae? U ni swalele lifoso ze patilwe. Hape u tibele mutang’a hao kwa libi ze ezwa ka buikuhumuso; Li si ke za ni busa. Kihona ni ka tokwa ku nyazahala, Ni tokwe mulatu o mutuna.” (Samu 19:7-13) Ha lu tatubisiseñi manzwi ao.

16. Ki kabakalañi ha lu swanela ku pima buikuhumuso?

¹⁶ Likezo za buikuhumuso ki libi ze tuna hahulu ku fita mafosisa a fela-fela. Saule n’a hanilwe sina mulena bakeñisa ku fa sitabelo ka buikuhumuso ni ku sa bulaya mulena Agagi wa Maamaleke ni lihapwa ze nde ka ku fitisisa, nihaike kuli Mulimu n’a laelezi kuli Maamaleke ba timezwe. (1 Samuele 13:8-14; 15:8-19) Mulena Oziasi n’a natilwe ka mbingwa ka ku kwañasha misebezi ya buprisita ka buikuhumuso. (2 Makolonika 26:16-21) Muta areka ya bulikani ha ne i isiwa kwa Jerusalema mi likomu ze ne li hoha koloi ha ne li batil’o i fetula, Mulimu a bulaya Uza bakeñisa ku kwañasha Areka ka ku tokwa likute ilikuli a i inise hande. (2 Samuele 6:6, 7) Kacwalo, haiba ha lu zibi sa ku eza kamba haiba lu filwe m’ata a ku eza nto ye ñwi, lu swanela ku bonisa buikokobezo ni ku buza bao ba ba na ni kutwisiso ye tungile. (Liproverbia 11:2; 13:10) Ka mo ku inezi fela, haiba se lu bile ni buikuhumuso, lu swanela ku kupa swalelo ni ku kupa Mulimu kuli a lu tuse mwa ku pima buikuhumuso mwa nako ya kwapili.

17. Sibi se si patilwe si kona ku ama cwañi mutu, niteñi ku swalelwa ni ku imululwa li kona ku fumanwa cwañi?

¹⁷ Libi ze patilwe ne li kana za tahisa maswabi. Ka ku ya ka Samu 32:1-5, Davida n’a likile ku pata sibi sa hae, kono n’a bulezi kuli: “Ha ne ni sa ikuzelize, masapo a ka n’a lenga; Mi ne ni tonga lizazi kaufela. Kakuli musihali ni busihu lizoho la hao ne li li bukiti fahalimw’a ka, Mukamo wa bupilo bwa ka, n’o fetuhile inge muhau wa mbumbi.” Ku lika ku tibela maikuto a lizwalo le li tabehile ne ku katalisize Davida, mi ku kalelwa kwa hae ne ku kusufalize m’ata a hae sina kota ha i palelwa ku fumana mukamo o’ i fa bupilo mwahal’a linanga kamba mwa ku cisa kwa lizazi la mbumbi. Ka mo ku bonahalela n’a ipumani mwa manyando a mwa munahano ni kwa mubili mi n’a latehezwi ki tabo bakeñisa ku palelwa ku ipulela bufosi bwa hae. Ku ipulela bufosi ku Mulimu ki yona fela nto ye kona ku tahisa swalelo ni kimululo. Davida na bulezi kuli: “U filwe mbuyoti mutu ya swalezwi ku fosa kwa hae. . . . Ni ku bulelezi sibi sa ka, ha ni si ka pata bumaswe bwa ka; Ni ize, ni ka ipulela lifoso za ka ku [Jehova, NW]; Mi Wena u swalezi mulatu wa sibi sa ka.” Tuso ye lilato ku zwelela kwa maeluda ba Sikreste ya kona ku tusa mwa ku tahisa ku uncafazwa kwa moya.—Liproverbia 28:13; Jakobo 5:13-20.

18. Ki bupaki mañi bo bu li teñi bwa kuli sibi si kona k’u nga nako ye telele, kono ki sifi se si kona ku ba simuluho ya ku omba-ombiwa mwa miinelo ye cwalo?

¹⁸ Sibi si kona ku tahisa butata bo bu ina nako ye telele. Seo ne si ezahezi ku Davida, ili y’o na ezize bubuki ni Bati-Sheba, a eza mulelo wa lifu la munn’a hae, ni ku nyala mbelwa y’o ya n’a itwezi. (2 Samuele 11:1-27) Nihaike kuli Mulimu n’a bonisize mufelañeke bakeñisa bulikani bwa Mubuso, ku baka kwa Davida, ni k’u nga ba bañwi kwa hae ka nzila ya mufelañeke, Davida a ipumana mwa ‘manyando ku zwelela mwa ndu ya hae.’ (2 Samuele 12:1-12) Mwana wa mwa bubuki a timela. Mwan’a Davida Amnoni a swala ka likalala kaizel’a hae Tamare wa ku bondat’ahe mi n’a bulailwe ka taelo ya kaizel’a Tamare Abisalomi. (2 Samuele 12:15-23; 13:1-33) Abisalomi a swabisa Davida ka ku fosa ni basali ba Davida ba liendi. Na likile ku hapa lubona kono na bulailwe. (2 Samuele 15:1–18:33) Sibi hape si tahisa miinelo ye miñwi. Sina ka mutala, mutu ya zwisizwe n’a kana a baka ni ku kutisezwa sinca mwa puteho, kono ne ku kana kwa tanda lilimo kuli a felise libizo le li sinyehile ni maikuto a maswabi a mwa munahano a simuluha fa sibi. Mwahal’a nako yeo, ki ko ku omba-omba hakalo ku ba ni swalelo ya Jehova ni kemelo ya mazoho a hae a kamita!

Ku Punyuswa kwa Maikuto a Maswabi a Matuna a Fahalimw’a Luna

19. Moya wa Mulimu u kona ku tusa cwañi muta lu ba mwa tiko ye tuna?

¹⁹ Muta lu ba mwa tiko ye tuna, ne lu kana lwa palelwa ku ba ni butali bo bu likani ni m’ata a ku eza katulo ni ku i zwisezapili. Mwa muinelo o cwalo, moya wa Mulimu “u lu tusa mwa mifokolo ya luna. Kakuli ha lu zibi se lu lukela ku kupa; kono Moya isali ona wa lu lapelela, ka sitongo se si sa konwi ku taluswa.” (Maroma 8:26) Haiba Jehova a cinca miinelo, lu swanela ku itumela. Niteñi, lizoho la hae ne li kana la lu punyusa ka nzila ye ñwi. Haiba lu lapela ka ku kupa butali, Jehova ka moya wa hae n’a kana a bonisa seo lu swanela ku si eza ni ku lu fa m’ata a tokwahala mwa ku eza seo. (Jakobo 1:5-8) Ka tuso ya hae, lwa kona ku ba ni buitiiso muta lu “swabiswa . . . ki miliko ya mifuta ye miñata” ni ku zwa ku yona ka tumelo ye likilwe ni ye tiisizwe.—1 Pitrosi 1:6-8.

20. Ki sifi se lu ka ikola haiba luli lu eza mazoho a Jehova a kamita sina yona kemelo ya luna?

²⁰ Ni kamuta lu si ke lwa katala mwa ku fetuhela ku Mulimu ka tapelo. Davida na bulezi kuli: “Meto a ka a talima [Jehova, NW] kamita; Kakuli ki Yena ya ka comola mautu a ka mwa siteo. U sikuluhele ku na, mi u ni utwele butuku, Kakuli ni nosi, mi ni nyandile. Manyando a pilu ya ka a ekezehile; U ni zwise mwa liñalelwa za ka. Shalima maswabi a ka ni butuku bwa ka; Mi u swalele libi za ka kaufela.” (Samu 25:15-18) Ka ku swana ni Davida, lu ka ikola tukuluho ya bumulimu, sishemo, ni ku swalelwa haiba luli lu eza mazoho a Jehova a kamita sina yona kemelo ya luna.

[Litaluso za kwatasi]

Ne Mu Ka Alaba Cwañi?

◻ Jehova u tusa cwañi batanga ba hae ba ba kula?

◻ Ki sifi se ne si kana sa ba se si tusa ha lu nze lu lika ku talimana ni maikuto a maswabi a matuna a mwa munahano?

◻ Ki sifi se si kona ku tusa mwa ku kusufaza maswabi fa lifu la mulatiwa?

◻ Bao ba ba pata libi za bona ba kona ku fumana kimululo kamukwaufi?

◻ Ki tuso mañi ye li teñi muta batu ba Jehova ba kena mwa muliko o mutuna?

[Siswaniso se si fa likepe 16, 17]

Lwa kona ku fumana ku omba-ombiwa ku zwelela fa sepo ya zuho, sina mwa n’a ezelize Jobo wa bumulimu