Mu Itusise Hande Lihatiso za Luna
1 Muitusisezo o lukisizwe hande wa lihatiso za luna ne u kalile ka ku abelwa kwa likopi ze 6,000 za magazini ya Tora ya ku Libelela ya July 1, 1879. Ku zwelela onaf’o, lihatiso ze ñata-ñata ili ze shutana-shutana se li hatisizwe ni ku abelwa ka buñata-ñata.
2 Tukiso ya Nubu Fela: Mwa kweli ya November 1999, ne ku talusizwe kuli limagazini ni libuka li ka fiwa bahasanyi ni ba ba tabela ba bañwi ka nubu fela, ili ku talusa kuli, ku si na ku kupa kamba ku akaleza kuli ba life nubu ye kuma fa kuli-kuli ba si ka li amuhela kale. Lihatiso ha li fiwa, linubu za ka ku itatela li ka amuhelwa kuli li tuse mwa musebezi wa mwa lifasi kaufela wa ku hasanya taba ye nde. Lu kolwa kuli Jehova u ka fuyaula tukiso ye.—Mu bapanye Mateu 6:33.
3 Za Ku Eza Mwa Miinelo Ye Lu Fumana mwa Simu: Lu ka zwelapili ku itusisa Litaba za ku Ambolisana kuli lu ezise batu ku tabela. Mutu h’a sa bonisi kuli wa tabela, ha lu tokwi ku mu siyela lihatiso. Ha lu lati ku sinya-sinya fela lihatiso za luna ka ku li fa ba ba sa tabeli. Nihakulicwalo, muñ’a ndu h’a bonisa kuli wa tabela mi u sepisa kuli u ka bala lihatiso, wa kona ku fiwa zona. Lu bata ku itusisa hande lihatiso za luna.
4 Mwa kona ku bulela ze ha se mu bonisize hatiso: “Haiba ne mu ka tabela ku bala hatiso ye, na kona ku mi siyela yona.” Mwendi muñ’a ndu u ka buza kuli: “I leka bukai?” Mwa kona ku alaba kuli: “Ha lu ezi pisinisi. Ha lu lekisi litahiso ze. Musebezi o lu eza mwa silalanda sa mina kacenu u ezwa ka ku itatela mwa linaha ze 233 mwa lifasi kaufela kuli u tuse batu ku ituta nzila ye isa kwa bupilo bo bu sa feli. Haiba ne mu ka tabela ku fa nubu kwa musebezi wo, ni ka itumela hahulu.”
5 Ha mu fa limagazini, mwa kona ku buza lipuzo ka za taba ye ñwi ni ku bulela kuli: “Ni mi kupa kuli mu tekelele litaba ze mwa taba ye. Haiba mwa tabela ku bala limagazini ze peli ze, na kona ku mi siyela zona.” Haiba li amuhelwa, mwa kona ku ekeza kuli: “Ni tabile ha ni konile ku mi tiseza litaba ze. Ni sepa kuli litaba ze li ka mi luta ze ñata. Mane, ne ni ka tabela ku t’o mi potela sunda ye taha kuli ni zibe mo mu li bonela. Mu ka lemuha kuli Tora ya ku Libelela i hasanywa mwa lipuzo ze 132 mi likopi za yona ze 22,398,000 li abelwa kai ni kai mwa lifasi. Musebezi wo kaufel’a ona u lifelwa ka linubu za ka ku itatela. Haiba ni mina ne mu ka tabela ku fa nubunyana kwa musebezi wa ku luta wo, lu ka itumela hahulu.”
6 Fokuñwi, ku kana kwa kataza ku ambola za linubu ze felwa musebezi wa luna wa mwa lifasi kaufela. Ka mutala, muñ’a ndu ya tabela a kana a buza kuli: “Kana mu fa fela?” Lu kana lwa alaba kuli: “Haiba mu bata ku bala hatiso ye mi ne mu ka tabela ku i inga, lwa kona ku mi siyela yona. Ne ni ka tabela ku t’o mi hata sunda ye taha kuli lu buhisane ze lu ambozi ni kuli ni mi bulelele ze ñwi ka za musebezi wa luna wa mwa lifasi kaufela.” Muñ’a ndu h’a ka potelwa hape, wa kona ku bulelelwa mo u lifelelwa musebezi wa luna.
7 Kamba mwendi muñ’a ndu u ka amuhela hatiso a sa kata-kati ni ku bulela kuli, “Ni itumezi.” Mwa kona ku alaba kuli: “Eni sha. Ni ziba kuli mu ka i tabela. Ba bañata ha ba zibi mo u lifelelwa musebezi wo, ka ku ba kuli lu u eza mwa lifasi kaufela. Ba bañata ba ba amuhelanga lihatiso za luna ba bulezi kuli ba itebuha ze ba ka ituta mi ba iketezi ku fa nubunyana kuli lu zwelepili ku abela lihatiso ze. Batu ha ba fanga linubu, lwa li amuhelanga ka buitumelo.”
8 Kana Mutu Wa Tabela Luli?: Kaniti ha lu leli ku fa lihatiso za luna mutakafululele. Lu bata kuli lihatiso za luna li pete ze li lukiselizwe, ili ku tusa batu ba ba tabela luli ku ituta ze ñata ka za milelo ya Jehova ye minde-nde. Neikaba ku sinya ku fa lihatiso za luna kwa batu ba ba sa isi pilu ku Mulimu. (Maheb. 12:16) Ku abela hande lihatiso ku itingile fa buikoneli bwa mina bwa ku ziba ba ba tabela luli. Ku tabela k’o ku kana kwa boniswa cwañi? Mutu h’a tabela ku ambola ni mina, u zibe mwendi wa tabela luli. Kamba h’a teeleza ha mu bulela, ku alaba lipuzo, ni ku bulela mw’a ngela taba ye mu ambola, ku bonisa kuli wa latelela ze mu bulela. H’a mi ambota ka likute, ili ka silikani, u bonisa kuli ki mutu yo munde. H’a zamaelela ni mina ha mu nze mu bala Bibele, u bonisa kuli wa kuteka Linzwi la Mulimu. Hañata, kwa tusa ku buza haiba ba ka bala lihatiso ze ba fiwa. Hape, mu kana mwa ambola za ku y’o ba potela hape kuli mu zwelepili ku ambola. Ha ba lumela ku ba potela, ni kona ku bonisa kuli b’a tabela luli. Ha mu bona lika zeo ze bonisa kuli mutu w’a tabela luli, u zibe mwendi mutu y’o u ka itusisa hande lihatiso lifi kamba lifi z’a fiwa.
9 Cinceho yeo ya muezezo wa musebezi wa luna i ekeza ku fa bupaki bwa kuli “ha lu balekisi ba linzwi la Mulimu.” (2 Makor. 2:17, NW) Hape ku paka kuli ha lu ba lifasi.—Joa. 17:14.
10 Bakeñisa kuli Babilona yo mutuna u ka tuha a sinyiwa, bulapeli kaufela bu sweli ku tahelwa ki miliko ye ekezeha. Mulelo wa luna o mutuna ki wa kuli musebezi wa butokwa hahulu wa ku kutaza za Mubuso mwa lifasi kaufela u zwelepili u sa tibelwi, ili ku tisa ba bañata kwa puluso.—Mat. 24:14; Maro. 10:13, 14.