Kalulo ya Puzo

◼ Kana lu lukela ku bulelela muñ’a ndu kuli lu ka tabela ku amuhela nubu ya ka ku itatela kwa musebezi wa Sosaiti wa mwa lifasi kamukana nako kaufela ha lu mu potela?

Kutokwa. Ñambeko ya Bukombwa bwa Luna bwa Mubuso bwa January 2000 mwa taba ye li “Mu Itusise Hande Lihatiso za Luna” ne i ize: “Fokuñwi, ku kana kwa kataza ku ambola za linubu ze felwa musebezi wa luna wa mwa lifasi kaufela.” Ku itusisa ngana ki kwa butokwa mwa muinelo wo. Lu bata kuli batu ba zibe kuli musebezi wa luna kaniti luli ki wa ku luta Bibele mi haki wa ku fumanela teñi mali. Ha lu kupeleli mali.

Hañata, ki ko kunde ku talusa hande m’o musebezi wa luna u tusezwa ka linubu za ka ku itatela ha lu fa lihatiso lwa pili ku ba ba tabela. Haiba lu hupula kuli lu fa lihatiso ku ba ba bonisa kuli ba tabela kamba ba ba bonisa kuli ba lakaza ku bala lihatiso za luna, u zibe hañata nto yeo ha i na ku tisa butata.

Buñata bwa ba ba tabela bao ba ikupulisanga ku fa linubu ka ku itatela fa misipili ye latelela. Ba bañwi ba kana ba buza teko ya hatiso. Lwa kona ku talusa ka bukuswani kuli musebezi wa luna haki wa ku fumanela teñi mali, ili ku talusa kuli lu fa lihatiso za luna ku ba ba tabela ku si na tifo. Hape ba konwa ku bulelelwa kuli kaufela ba ba tabela ku tusa musebezi wa mwa lifasi kamukana ba kona ku fa nubu ya ka ku itatela. Haiba mutu ye lu potela h’a fi linubu, fokuñwi, ka mo ku tokwahalela, lwa kona ku tahisa taba ya ku tusa musebezi wa Sosaiti wa mwa lifasi kamukana.

Lu hupulange kuli nihaike kuli lu fanga lihatiso za luna ku ba ba tabela ku si na tifo, ku na ni lisinyehelo mwa ku hatisa ni ku hasanya lihatiso za luna. Lu sepa kuli moya wa Mulimu u ka susueza batanga ba hae ni ba ba tabela mwa simu ku fa linubu za ka ku itatela kuli lisinyehelo zote za musebezi wa mwa lifasi kamukana li lifelwe.