Kana Mwa Tokomela Hahulu Lihatiso za Luna?
1 Lidaimani ni macwe a mañwi a butokwa a tula hahulu isi fela kabakala kuli ki a mande kono ni ka libaka la kuli ku a fumana ni ku a lafa ku tula hahulu. Zibo ya ku ziba Jehova ni Jesu Kreste ki ya butokwa hahulu ku fita, mi lihatiso za luna ki zona li nosi mwa lifasi ze talusa bufumu bwa kwa moya b’o ka butungi ni ka butali bwa Mulimu. (Maro. 11:33; Mafil. 3:8) Lu kona ku bonisa cwañi kuli luli lwa itebuha lihatiso za luna?
2 Batu ni mabasi a sikai ba bulukanga nubu ya ku isa kwa Ndu ya Mubuso ku y’o i beya ku ka kañwi ka tukwakwati to tu ñozwi kuli “Linubu za Musebezi wa Sosaiti wa mwa Lifasi Kaufela—Mateu 24:14.” Batu ba fanga linubu ze ñwi za musebezi wa mwa lifasi kaufela ha ba bitula libuka kamba limagazini ni ha ba fitisa linubu ze fumanwi mwa bukombwa bwa mwa simu.
3 Mukwa o muñwi wa ku bonisa ka ona buitebuho ki ha lu tokomela muta lu fa lihatiso kwa batu be lu katana mwa sebelezo ya mwa simu. Ne lu si ke lwa nahana za ku fa mbututu daimani ye tula, kakuli h’a koni ku utwisisa butokwa bwa yona. Ka ku swana, ha lu fi lihatiso za butokwa kwa batu ba ba si na taba ni za Mulimu. (Mu bapanye Maheberu 12:16.) Ha lu nze lu ifana ni ku fa lihatiso za luna, lu eze cwalo ka temuho. Kana muñ’a ndu w’a tabela ku ambola? Kana w’a teeleza ha lu bulela, ku alaba lipuzo ze lu buza, ni ku latelela ha lu bala Bibele? Haiba ku tabela k’o kwa bonwa, lwa tabela ku siya hatiso ye swanela. Ha lu zamaisa lituto mwa lihatiso za luna, batu ba tusiwa ku ituta ze i luta Bibele mi ba ba ni kolo ya ku utwana ni Jehova. Kuli mutu a tusiwe luli ki lihatiso za luna, ku itingile ka mw’a itusiseza zona.
4 Lihatiso ze siiwa fa shelufu kwa Ndu ya Mubuso kamba kwahae ha li peti ze li lukiselizwe, mi butokwa bwa zona ha bu sebeliswi. Niheba limagazini za kwamulaho, libroshuwa, libuka, ni matrakiti li swanela ku itusiswa hande.
5 Mu nahanisise hahulu palo ya lihatiso ze mu tokwa luli za ku fa mwa simu. Temuho ya tokwahala. Nihaike palo ye likani ya tokwahala, sihulu haiba mu eza bupaina, ha mu tokwi ku ipulukela lihatiso ze ñata-ñata, kakuli za kona ku n’o ngiwa kwa Ndu ya Mubuso mikopano i si ka kala kale ni ha se i felile. Mu be ni lihatiso ze likani za ku fa kwa makalelo a kweli mi m’u ngange ze ñwi ze mu na ni zona ha li fela.
6 Hape mu hupule kuli haiba lu sa talusi hande mufelo o munca wa lihatiso mwa sebelezo ya mwa simu, ku ka ba t’ata kuli ba bañwi ba hakulule lipulelo kamba mikwa ye se ba twaezi. Ba bañwi ba ezisize nyangela ku nahana kuli lihatiso ze se lu fa cwale ki za mahala mi ku bile t’ata ku hakulula muhupulo wo. Ku tokwahala mali ku leka mapepa, ku hatisa lihatiso ni ku li lumela kai ni kai mwa lifasi, hamoho ni ku toloka lihatiso zeo mwa lipuo ze bat’o ba ze 350. Kacwalo, bahasanyi ba swanela ku taluseza muñ’a ndu kuli lihatiso li fiwa ku si na ku lifisa mi linubu za itebuhiwa.
7 Lihatiso za luna li tusa hahulu ha li fiwa batu ba ba itebuha Linzwi la Mulimu la niti. Haike kaufel’a luna lu talife ni ku ba ni maseme ka mo lu itusiseza ze filwe, mi lu bonise cwalo kuli lu tokomela hahulu lihatiso za luna.