Ku Bonisa Kuli Lwa Itebuha Lihatiso

¹ “Libuka ze ñolwa ki ze ñata, ha li na mo li felela.” (Muek. 12:12) Libuka ze ñata ha li na tuso. Kono lihatiso ze hasanywa ki Watchtower Society ha li cwalo. Li tusa hahulu kakuli li na ni lico za kwa moya ze pilisa. Li tusa ba ba tabela kuli ba fite fa ku ziba Jehova, mi li tiisa tumelo ya ba ba bile kale batanga ba Jehova ba ba ineezi.

² Lu bata ku abela ba bañwi lihatiso za luna kakuli lu ziba kuli za kona ku ba tusa. Nihaike li fiwa ku si na ku lifisa, ku na ni lisinyehelo mwa ku li hatisa ni ku li abela. Kacwalo, ha lu lati ku ifela-fela fela lihatiso zeo. Haiba ha lu zibi hande kuli mutu wa tabela luli, hañata lu ka mu fa fela trakiti. Lu swanela ku potela hape mañi ni mañi ya amuhela lihatiso, mi haiba a bonahala kuli wa tabela ka nako yeo, lwa kona ku mu fa hatiso ye ñwi.

³ Ba bañwi ba zina-zinanga ku bulelela batu kuli musebezi w’o u tusiwa ki linubu za ka ku itatela, kono hañata ki ko kunde ku eza cwalo. Ku eza cwalo ku bonisa hande batu kuli musebezi wa luna haki pisinisi. Ku koñomeka kuli mulelo wa luna ki ku kutaza taba ye nde ya Mubuso ni ku tahisa balutiwa. Ku lu tusa ku lemuha batu ba ba tabela luli. Batu hañata ba lekanga lika ze si za butokwa ni lihatiso za silifasi. Haiba luli ba tabela ze mu ba bulelezi, ba ka bona kuli kwa swanela ku fa linubu za ku yemela Bukreste bwa niti. Ka ku talusa mo u tusezwa musebezi, lu bonisa kuli lwa itebuha lihatiso. Lu bonisa kuli lwa lemuha kuli ku tokwahala se siñwi kuli li hatiswe.

⁴ Taba ya linubu ha i taluswa hande, batu ba bañata ba tabela ku tusa musebezi wa luna wa butokwa. Ku kana kwa ba ni linako fo mu ikutwa kuli ha ku swaneli ku bulela za tukiso ya linubu, kono hañata ki hande ku i bulela fa musipili wa makalelo mutu h’a tabela ku bala lihatiso ze lu fa.