Mu Be Baluti ba Linzwi la Mulimu—Ka ku Itusisa Libroshuwa
1 Mutanga kaufela wa Jehova ya ineezi u na ni buikalabelo bwa ku abana mwa musebezi wa ku luta Linzwi la Mulimu ku ba bañwi. Butuna bwa buikalabelo b’o bu fita fa ku utwahala hande ha lu lemuha kuli ki y’o ya na ni bulena kaufela mwa lihalimu ni fa lifasi-mubu ya lu file musebezi wa “ku eza balutiwa ba batu mwa macaba kaufela, . . . ku ba luta.” (Mat. 28:18-20, NW) Kacwalo, ku abana mwa ku kutaza taba ye nde ku tokwa kuli lu be baluti!—2 Tim. 2:2.
2 Mwahal’a August lwa kona ku itusisa bucaziba bwa luna bwa ku luta ha lu fa libroshuwa. Lu kona ku keta mihupulo ya mwa Mañolo ye mwa teñi ni ku lukisa litaba ze sikai ze ka lu tusa ku kalisa puhisano.
3 Ha mu fa broshuwa ya “Kana Mulimu Wa L’u Nga Luli Sina Batu Ba Butokwa?” mu kona ku bulela kuli:
◼ “Lu se lu potezi buñata bwa bomuyahwa ni mina ni ku fumana kuli ba bilaela hahulu za ku yuyuluka ko kutuna ko ku si ka libelelwa kwa bukebenga, ze sabisa hahulu, ni mifilifili. Ka mo mu nahanela, ki kabakalañi se ha si bile butata cwalo? [Mu litele kalabo.] Ki nto ye lu tabisa hahulu kuli Bibele i bulezi cimo kuli seo ne si ka ezahala. [Mu bale 2 Timotea 3:1-3.] Mu lemuhe kuli se si na ni ku ezahala mwa ‘mazazi a maungulelo.’ Seo si talusa kuli nto ye ñwi se i tuha i fela. Mu hupula kuli ki nto mañi?” Mu litele kalabo. Mu apule kwa likepe 22, mu ame kwa swanisezo, ni ku buhisana liñolo kamba mañolo a mabeli a ñozwi fa likepe leo. Mu eze litukiso za ku kutela teñi hasamulaho ili ku y’o talusa libaka ha lu lumela kuli limbuyoti zeo se li li fakaufi hahulu.
4 Ne mu kana mwa tabela ku itusisa muatumelo w’o ha mu fa broshuwa ya “Mulelo Wa Bupilo Ki Ufi—Mu Kona Ku U Fumana Cwañi?”:
◼ “Batu ba bañata ba fumana butata mwa ku lika ku fumana mulelo luli wa ku pila. Hailifo ba sikai ba ikola munyaka wa makutela-kaufi, buñata ba pila bupilo bo bu tezi masitapilu ni manyando. Kana mu hupula kuli ki mona mwa n’a lelezi Mulimu kuli lu pile cwalo? [Mu litele kalabo.] Bibele i bonisa kuli Mulimu u bata kuli lu pile mwa lifasi le li swana sina le.” Mu bonise swanisezo ye fa likepe 21, mi ni ku apula kwa makepe 25 ni 26, maparagilafu 4-6, ni ku talusa seo a sepisize. Mu tahise puzo y’e kwa neku la puhisano ha mu kutela teñi: “Lu kona ku ikolwisa cwañi kuli Mulimu u ka taleleza lisepiso za hae?”
5 Ne mu kana mwa fa broshuwa ya “Ikole Bupilo fa Lifasi-mubu Ku Ya Ku Ile!” ka ku bonisa siswaniso kaufela se si fa likepe la pili ni la mafelelezo ni ku buza kuli:
◼ “Kana ne mu ka tabela ku pila mwa lifasi le li tezi batu ba ba tabile sina le? [Mu litele kalabo.] Bibele i lu taluseza kuli Mulimu u lata batu mi u tokwa kuli ba pile ku ya ku ile inze ba tabile ona fa lifasi-mubu fa.” Mu apule kwa siswaniso sa bu 49, ni ku bala le liñwi la Mañolo a bonisizwe. Cwale, mu ame kwa siswaniso sa bu 50, ni ku talusa seo lu swanela ku eza haiba lu bata ku pila mwa Paradaisi yeo. Mu sepise ku kutela teñi ni ku t’o buhisana libaka ku lumela ku Jesu Kreste ha ku li kwa butokwa hahulu.
6 Jehova wa tabiswa ha lu ‘bonisa zwelopili ka ku tokomela tuto ya luna.’ (1 Tim. 4:15, 16) Libroshuwa za luna li kona ku ba tuso ya luli ku luna mwa buikatazo bwa luna bwa ku tusa bao ba ba nyolezwi ku utwa “litaba ze nde.”—Is. 52:7.