Mu Tuse Ba Bañwi ku Fumana ku Omba-Ombiwa
1 Batu ba bañata se ba katezi ku no utwanga za makayamana, lindwa, bukebenga, ni manyando. Ku omba-ombiwa, nihaike kuli ha ku yo ni kamuta mwa lipiho za makande za kacenu, ki kona k’o mufuta wa mutu u tokwa luli. Ku omba-omba ku talusa “ku fa m’ata ni sepo” ni “ku nolofaza masitapilu kamba butata bwa” yo muñwi. Ka ku ba Lipaki za Jehova, lu bakanyizwe ku tusa batu mwa nzila ye. (2 Makor. 1:3, 4) Libroshuwa za luna ze tomile fa Bibele ze lu ka fa mwa July ni August li na ni lushango lwa niti ili lo lu omba-omba. (Maro. 15:4) Ki ze liakalezo ze ñwi ka mwa ku li tahiseza mwa miinelo ye fapahana-fapahana:
2 Taba ya likayamana ya mwa makande i kona ku fa sibaka sa ku fa bupaki ni ku omba-omba ba bañwi, mwendi ka ku bulela kwa mina nto ye swana sina ye:
◼ “Muta lika ze cwalo li ezahala, ba bañwi ba komoka ka za haiba Mulimu ki ya li teñi luli mi, haiba u teñi, ba buza ka za haiba wa l’u nga luli sina batu ba butokwa. Mina mu hupula cwañi? [Mu litele kalabo.] Nzila ye ñwi ya ku ziba ka za haiba ku na ni Mulimu ki ku sebelisa sikuka se si mutomo.” Mu bale Maheberu 3:4. Mu bulele lika ze ñwi ze lu potolohile zeo luli li tokwa mupangi. Cwale mu zwelepili kuli: “Ni na ni broshuwa ye ni ziba kuli i ka mi omba-omba. I na ni toho ya taba ye li Kana Mulimu Wa L’u Nga Luli Sina Batu ba Butokwa? [Mu bale lipuzo ze fa likepe la pili.] I bonisa bupaki bo bu kolwisa bwa kuli Mulimu haki ya li teñi fela kono hape ona cwale-cwale fa u ka zwisa miinelo ye si ka luka kaufela ye lu talimana ni yona kacenu. Kana ne mu ka lakaza ku i bala?” Mu lukise ku kutela teñi.
3 Fa musipili wa makutisezo, ne mu kana mwa bulela kuli:
◼ “Ne lu bulela za bupaki bwa ku ba teñi kwa Mulimu ha ne ni siile broshuwa ye li Kana Mulimu Wa L’u Nga Luli Sina Batu ba Butokwa? Mwendi mu lemuhile sisupo se se si fa likepe 7. [Mu bonise siswaniso mi mu kusufaze taba ye mwa paragilafu 15.] Wo ki mutala u li muñwi fela o bonisa kuli Mulimu ya l’u nga luli sina batu ba butokwa u teñi luli. [Mu bale paragilafu 27 fa likepe 9.] Tuto ya ka butu ya Bibele i ni tusize ku sebelisana ni butata bwa ka zazi ni zazi bwa bupilo kakuli i fa mubonelo wa Mulimu fa litaba.” Mu bonise ka mwa ku itutela.
4 Ku fa bupaki fa luwaile ku kona ku eziwa ka ku itusisa broshuwa ye li “Mulelo wa Bupilo ki Ufi—Mu Kona ku U Fumana Cwañi?” Ne mu kana mwa italusa mi cwale ni ku bulela kuli:
◼ “Ni bulela ni mina fa luwaile ka za lushango lwa butokwa kakuli ha ni koni ku bonana ni mina ka sibili.” Mu bale paragilafu ya pili fa likepe 4 la broshuwa, mi mu bale ka ku sa yema-yema, inge kuli mane ne mu ambola fela ni mutu yo ka sibili. Mu mu buze za nahana fa taba yeo, mi mu litele kalabo. “Ni na ni Bibele ye apuzwi fa Isaya 45:18. Timana ye i bonisa kuli lifasi ne li bupilwe ili ka ku beya luna mwa munahano. Ni kupa ku mi balela yona.” Hamulaho wa seo, mu taluse mulelo wa broshuwa yeo, mi mu buze ka mwa ku mu fela kopi.
5 Ha mu bulela ni mutu y’o fa luwaile lwa bubeli, ne mu kana mwa lika muatumelo wo ili ku kalisa tuto:
◼ “Ne ni lakaza ku zwelapili ni puhisano ya luna ya pili ka ku tolongosha ka za y’a kona ku lu taluseza seo mulelo wa bupilo u li sona. [Mu kusufaze taba ye mwa paragilafu 1 ni 2 fa likepe 6 la broshuwa ya Mulelo wa Bupilo.] Sinulo 4:11 i talusa kuli Jehova Mulimu ki yena Mubupi wa luna. [Mu bale.] Kaniti luli u swanela ku ba ni libaka la lu bupezi. Batu ba ba latile ku fumana libaka leo ba itutile Linzwi la Mulimu le li ñozwi, yona Bibele. Ni lakaza ku mi fa tohonolo yeo.” Mu taluse mo i zamaisezwa tuto ya Bibele ya fa ndu ye sa lifelwi, mi mu eze litukiso za ku kalisa tuto.
6 Muatumelo o buniti wo ne u kana wa omba-omba ba ba shwezwi ki mulatiwa wa bona:
◼ “Ni eza sebelezo ya fa nyangela ye tusa bote ba ba latehezwi ki balatiwa ba bona mwa lifu. Bakeñisa kuli yeo neikana ya ba nto ye t’ata ka ku fitisisa yeo ufi ni ufi wa luna a ka tiyela muta o muñwi, broshuwa ye ye li Muta Mutu Yo Mu Lata H’a Timela, i ñozwi. I tusize bolule-lule ba batu. Ni lakaza ku mi bonisa ze i bulela ka za sepiso ye nyakalalisa ya Jesu Kreste. [Mu bale paragilafu 5 fa likepe 26, ku kopanyeleza cwalo ni Joani 5:21, 28, 29.] Ha mu bone siswaniso se fa likepe 29 se si bonisa Taba ya Evangeli ya Jesu h’a zusa luli Lazaro kwa bafu. Haiba mu lakaza ku bala yona broshuwa ye omba-omba ye, ni ka taba ku mi siyela yona.”
7 Ha mu kuta, ne mu kana mwa bonisa siswaniso se si fa likepe 29 la broshuwa ya “Muta Mutu Yo Mu lata H’a Timela” mi ni ku bulela kuli:
◼ “Mu hupule puhisano ya luna ya Jesu h’a zusa Lazaro kwa bafu. [Mu bale manzwi a litaluso za siswaniso a’ fa likepe 28, mi mu nyakisise taba ye mwatas’a tohonyana ye li “Kana Ne Si Ezahalile Luli?”] Haiba pilu ya mina i nyolezwi ku lumela kuli mu ka kona ku bona balatiwa ba mina ba ba shwile hape, ni ka mi tusa ku eza sepiso ya zuho ku ba ya luli ku mina.” Mu fe tuto ya Bibele ya fa ndu.
8 Haike lu eze mo lu konela kaufela mwa likweli ze taha mwa ku likanyisa Jesu ka “ku omba-omba ba ba lila kaufela.”—Is. 61:2.