Ku Potelwa ko ku Kona ku Tahisa Mbuyoti

¹ Zakia ka tabo n’a amuhezi Jesu ka ku ba mweti mwa ndu ya hae. Mi kona ku potelwa k’o ne ku tahisize mbuyoti ye tuna luli!—Lu. 19:2-9.

² Kacenu, Jesu Kreste ka ku ba yena Toho ya puteho, u laela maeluda kuli ba “lise mutapi wa Mulimu.” (1 Pit. 5:2, 3; Joa. 21:15-17) Kwand’a ku luta kwa mikopano ni ku fa ketelelo mwa sebelezo ya mwa simu, baokameli ba mwa puteho ba fa tuso ye lilato ili ya ka butu kwa lilama za puteho. Kacwalo, ka linako ze ñwi, mu kana mwa libelela ku amuhela tuso ya ka butu ku zwelela kwa maeluda, i be kwa ndu ya mina, kwa Ndu ya Mubuso, ha mu li hamoho mwa sebelezo ya mwa simu, kamba ka linako ze ñwi. Kana kona ku pota kwa maeluda k’o ku swanela ku mi kakamalisa? Ha ku swaneli ni hanyinyani. Ku mi potela kwa bona ha ku talusi kuli mwa fokola mwa muinelo o muñwi. Kacwalo he, mulelo wa musipili wa bulisana ki ufi?

³ Paulusi n’a bulezi kuli n’a bata ku potela mizwale kuli a ‘bone mo ne ba pilela.’ (Lik. 15:36) Ee, ka ku ba balisana ba ba lilato, maeluda ba iyakatwa hahulu mo mu pilela. Ba bata ku mi fa tuso ya kwa moya ye ka mi tusa ni ku mi yaha. Mulisana wa luna ya lilato yena Jehova u lakaza kuli mañi ni mañi wa luna a be ni yona pabalelo ya ka butu ye cwalo yeo.—Ezek. 34:11.

⁴ Mu Amuhele ku Pota kwa Maeluda: Mulelo wa Paulusi ha n’a potela mizwale ba hae ne li wa kuli ‘a ba fe mpo ye ñwi ku za Moya, mi ba fumane ku tiiswa, kuli ba kutazane.’ (Maro. 1:11, 12) Kaufel’a luna lu tokwa susuezo ya kwa moya mwa mazazi a maungulelo a t’ata a, mi lu tokwa tuso kuli lu zwelepili ku tiya mwa tumelo. Ku amuhela kwa mina musipili wa bulisana ku si na kakanyo ku ka tahisa susuezano ye nde.

⁵ Mu itebuhe lituso ze ñata ze zwa mwa musebezi wa maeluda wa bulisana. Haiba ku na ni taba kamba puzo ye mi bilaeza, mu hupule kuli se ba bezi maeluda mwa puteho ki ku fa tuso. Mu si ke mwa zina-zina ku buhisana ni bona litaba lifi kamba lifi ze kana za ama buikangulo bwa mina bwa kwa moya. Mu itebuhe yona tukiso ye lilato ye filwe ki Jehova yeo, mi mu be ba ba tabile kabakala limbuyoti ze kona ku tahiswa ki kona ku pota ko ku cwalo k’o.