Ku Kutaza Mubuso—Tohonolo ye Tuna Hahulu

¹ Ka zazi, batu ba ba eza libilioni ba ba yahile fa lifasi ba fumana tuso kwa litukiso za bufani bwa Jehova ze pilisa. (Mat. 5:45) Kono ki ba banyinyani fela ba ba na ni tohonolo ye ipitezi ya ku itebuha Mubupi wa bona ka ku kutaza taba ye nde ya Mubuso wa Mulimu. (Mat. 24:14) Mu nga ka butuna cwañi tohonolo ye ya butokwa?

² Ku kutaza Mubuso ku kutekehisa Mulimu mi ku tahisa sepo ni kozo kwa batu ba ba swenyiwa ki linako ze t’ata kacenu. (Maheb. 13:15) Ba ba amuhela lushango ba na ni sepo ya ku pila ku ya ku ile. (Joa. 17:3) Ki mubeleko ufi wa silifasi o kona ku fa mipuzo ye cwalo? Muapositola Paulusi n’a bonisize buitebuho bwa hae bwa bukombwa ka mwa n’a bu petezi. N’a bu nga sina bufumu.—Lik. 20:20, 21, 24; 2 Makor. 4:1, 7.

³ Ku Itebuha Tohonolo ya Luna ye Tuna: Nzila ye ñwi ye lu itebuha ka yona tohonolo ya ku kutaza ki ka ku isa mamelelo kwa mufuta wa sebelezo ya luna. Kana lwa banga ni nako ya ku itukiseza mutahisezo o ka susumeza lipilu za bateelezi ba luna? Kana lwa kona ku zwisezapili bunangu bwa luna mwa ku itusisa Mañolo ni mwa ku a nyakisisa ni batu? Kana lwa sebezanga hahulu mwa kalulo ya simu ye lu filwe? Kana lwa kona ku kalisa ni ku zamaisa tuto ya Bibele? Sina Bakreste ba ba sepahala, ba kwamulaho ni ba miteñi ye, lu susuezwa ki mubonelo o lukile wa musebezi wo, mi lu itebuha hahulu tohonolo ya luna.—Mat. 25:14-23.

⁴ Ha lu katazwa ki muinelo wa busupali, mapongo, kamba miinelo ye miñwi ye t’ata, kwa omba-omba ku ziba kuli tukufalelo ya luna ya ku abana mwa bukombwa kaniti ya itebuhiwa hahulu. Linzwi la Mulimu li lu kolwisa kuli Jehova u itebuha buikatazo bo bu cwalo bwa ku mu sebeleza, nihaikaba kuli buikatazo b’o ha bu bonahali ku ba bo bu ipitezi ku ba bañwi.—Luka 21:1-4.

⁵ Ku kutaza Mubuso ku tahisa tabo ye tuna. Kaizeli ya na ni lilimo za buhulu ze 92 n’a ize: “Ki tohonolo ye tuna ku iheta kwamulaho kwa lilimo ze 80 za ku ineela ku sebeleza Mulimu—ni sa inyazi! Kambe ne ni ka kutela hape kwa bwanana, ne ni ka eza nto ye swana kakuli, kaniti, ‘sishemo sa Mulimu ki se sinde ku fita bupilo ka sibili.’” (Samu 63:3) Haike ni luna lu itebuhe tohonolo ye tuna ye, ye zwa ku Mulimu ya ku eza musebezi wa ku kutaza za Mubuso.