Kana Mu Itukiselize Likozi?
1. Ki kabakalañi ha lu swanela ku itukiseza likozi?
1 Silimo ni silimo, bolule-lule lifasi kaufela, mane ni mizwale ni likaizeli ba luna, ba welwanga ki lizikinyeho, linanga, mañungwa, ni miunda. Bakeñisa kuli likozi zeo li tahanga ka sipundumukela mi li kona ku wela ufi kamba ufi wa luna, neikaba hande ha ne lu ka itukiseza zona.—Liprov. 21:5.
2. Ki kabakalañi ha lu swanela ku fanga maeluda linombolo za mandu a luna ni za mawaile?
2 Ku Itukiseza Cimo: Fokuñwi muuso u fanga litemuso za likozi ze taha. Ha lu swaneli ku keshebisa litemuso ze cwalo. (Liprov. 22:3) Litemuso ze cwalo ha li fiwa, maeluda ba ka lika ka t’ata ku bonana ni mañi ni mañi mwa puteho kuli ba mu tuse ku itukiseza. Mi hamulaho wa kozi, maeluda ba ka lika hape ka t’ata ku bonana ni mañi ni mañi mwa puteho kuli ba zibe haiba kaufela ba iketile kamba haiba ku na ni ba ba tokwa tuso. Kono cwale haiba maeluda ha ba zibi ko ba ina bahasanyi, nako ye ñata i ka sinyehela fa ku bata-bata ko ba ina. Kacwalo neikaba hande kuli bahasanyi ba fange muñoli ni muokameli wa bona wa tuto ya buka linombolo za mandu a bona ni za mawaile.
3. Haiba lu pila mwa sibaka mo ku ezahalanga hahulu likozi, lu kona ku tusana cwañi ni maeluda?
3 Haiba puteho ya mina i mwa sibaka mo ku ezahalanga hahulu likozi, maeluda ba kona ku kupa bahasanyi kuli ba ba fe mabizo ni linombolo za mawaile za bahabo bona kamba balikani ba bona ba ba pila ku sili ili ba ba kona ku lizezwa haiba ku ba ni kozi. Seo si ka tusa maeluda ku ziba ba ba tutile ni ko ba tutezi. Maeluda hape ba kana ba lelela cimo ze i kona ku eza puteho haiba ku ba ni butata, mi milelo yeo i kona ku kopanyeleza ni lika za swanela ku ba ni zona mañi ni mañi mwa puteho kuli a kone ku itusisa zona haiba ku ba ni muinelo wa ka sipundumukela; ba kana hape ba eza litukiso za mwa ku sabela mwa sibaka ni za mwa ku tuseza basupali, bakuli ni ba bañwi cwalo. Ku amuhela litukiso ze nde ze cwalo ki kwa butokwa.—Maheb. 13:17.
4. Lu lukela ku ezañi haiba lu welwa ki kozi mwa silalanda sa luna?
4 Hamulaho wa Kozi: Mu kona ku ezañi haiba ku ezahala kozi mwa silalanda sa mina? Mu bone teñi kuli lubasi lwa mina lu na ni lika ze tokwahala ze cwale ka lico. Mi haiba mwa kona, mu tuse kwateñi ba bañwi ba ba mwa butokwi. Kapili-pili mu zibise muokameli wa mina wa tuto ya buka kamba eluda yo muñwi. Mu swanela ku eza cwalo nihaiba kuli mu iketile mi ha mu tokwi tuso ni ye kana. Haiba mu tokwa tuso, mu kolwe kuli mizwale ba mina ba sweli ba lika ka t’ata ku tusa. (1 Makor. 13:4, 7) Mu si libali kuli Jehova wa ziba muinelo o mu li ku ona; mu mu sepe mi u ka mi bonela. (Samu 37:39; 62:8) Ha mu fumana kolo, mu tiise ba bañwi lipilu ni ku ba susueza kwa moya. (2 Makor. 1:3, 4) Mu si liyehi ku kalisa ku eza lika za kwa moya ze mu ezanga kamita.—Mat. 6:33.
5. Luna ka ku ba Bakreste lu nga cwañi likozi?
5 Nihaike kuli likozi ki lika ze bilaeza lifasi luli, luna lu talimezi kwapili ka sepo. Hona cwale-cwale fa likozi ha li sa na ku hupulwa. (Sin. 21:4) Kono ka nako ya cwale, haike lu nge mihato ye swanela ya ku itukiseza matata ni likozi ha lu nze lu tukufalezwi ku kutaza taba ye nde ku ba bañwi.