Lu Filwe Bufumu

¹ Muapositola Paulusi n’a itebuha hahulu musebezi wa n’a filwe ki Mulimu, wona wa ku kutaza mi n’a u biza kuli ki “bufumu.” (2 Makor. 4:7) N’a petile musebezi wo niha n’a tahezwi ki matata a mañata ni ku nyandiswa. N’a si ka katala ku kutaza ku mañi ni mañi kaufela ya n’a li bukaufi ni yena. N’a zamaile misipili ye miñata ye t’ata ni ye sabisa. Lu kona cwañi ku likanyisa Paulusi ni ku bonisa kuli lu nga ka butuna bukombwa bwa luna? (Maro. 11:13) Ki kabakalañi bukombwa bwa luna ha bu li bufumu bo bu sa konwi ku bapanyiwa ni nto ifi kamba ifi?

² Bufumu Bo Bu Ipitezi: Bufumu bwa fa lifasi hañata bu opisanga fela litoho mi ha bu tusangi batu ku ya ku ile. Kono bukombwa bwa luna bona bu tiseza luna ni ba bañwi mipuzo ye ina ku ya ku ile. (1 Tim. 4:16) Bu tusa batu ba ba na ni niti kuli ba zibe Jehova, ba cince bupilo bwa bona, ni kuli ba be ni sepo ya bupilo bo bu sa feli. (Maro. 10:13-15) Haiba lu nga bukombwa bwa luna kuli ki bwa butokwa hahulu, lu ka ba ni tabo mwa bupilo, lu ka tabela ze lu petile, mi lu ka ba ni sepo ye tiile ya bupilo bo bu sa feli bwa kwapili.—1 Makor. 15:58.

³ Mu Bonise Kuli Mu Nga Bufumu bwa Mina ka Butuna: Hañata, butokwa bwa sika bu boniswanga ka lika ze lu itombola, kuli lu si fumane. Ki tohonolo ye tuna luli ku itusisa nako ya luna ni m’ata a luna mwa musebezi wa ku lumbeka Jehova. (Maef. 5:16, 17) Muitusisezo wa luna wa nako u swanela ku bonisa kuli ze lu nga hahulu ku ba za butokwa ki za kwa moya ku fita za kwa mubili. Mi bakeñisa kuli taba ye nde ye lu kutaza ki ya butokwa hahulu, lu bata ku i kutaza ka cisehelo ye tuna ni fo lu fumanela kolo kaufela.

⁴ Hañata bufumu bo bu sa lekiswi ha bu patiwangi kono bu beiwanga fa ñandaleza ilikuli ni ba bañwi ba bu bone. Haiba lu nga bukombwa bwa luna sina bufumu, bu ka ba bwa butokwa hahulu mwa bupilo bwa luna. (Mat. 5:14-16) Kuli lu bonise buitebuho bwa luna bo butuna, haike lu zweleñipili ku likanyisa muapositola Paulusi ni ku itusisa hande nako kuli lu bonise kuli lu nga bukombwa bwa luna ka butuna sina bufumu.