Lwa Itebuha Matohonolo a Luna a Sebelezo!

¹ Ku zwa fela kwa makalelo, Jehova u file batanga ba hae matohonolo a mañata a mifuta-futa. U file batu matohonolo ku si na taba kuli ki banna kamba basali, banana kamba ba bahulu, bafumi kamba babotana. (Luka 1:41, 42; Lik. 7:46; Mafil. 1:29) Ki afi matohonolo a lu file Jehova kacenu?

² A Mañwi A Matohonolo E Lu Filwe: Lu filwe tohonolo ya ku lutiwa ki Jehova. (Mat. 13:11, 15) Tohonolo ye ñwi ye lu filwe ki ya ku lumbeka Jehova ka ku alaba kwa mikopano ya puteho. (Samu 35:18) Ha lu fiwa kolo ya ku alaba lu alabanga ka mafulofulo. Ka nzila ye swana, haiba lu nga musebezi ni musebezi o lu fiwa mwa puteho ku ba tohonolo, lu ka peta musebezi wo ka mo lu konela kaufela. Kana lwa tusananga ni ba bañwi mwa musebezi wa ku kenisa Ndu ya Mubuso ni ku i babalela hande?

³ Nihaike ba bañata ha ba zibi haiba Mulimu wa utwanga litapelo za bona kamba kutokwa, luna lu na ni tohonolo ye ipitezi ya ku ziba kuli Mulimu Muambakani ya Pahami wa utwanga litapelo za luna. (Liprov. 15:29) Jehova yena ka sibili wa teelezanga kwa litapelo za batanga ba hae. (1 Pit. 3:12) Ha si ka lu tomela palo ya litapelo ze lu swanela ku fitisanga ku yena. Lu na ni mpo ye tuna luli ya ku kona ku lapela ku Mulimu “ka nako ni nako”!—Maef. 6:18.

⁴ “Lu Ba Ba Sebeza ni Mulimu”: Tohonolo ye ñwi ye tuna ye lu filwe ki ya ku shaela taba ye nde ya Mubuso wa Mulimu ka ku ba “ba ba sebeza ni Mulimu.” (1 Makor. 3:9) Ku kutaza ki musebezi o munde mi wa katulusa. (Joa. 4:34) Jehova ha tokwi kuli konji a itusise batu kuli a pete musebezi wo, kono u lu file musebezi wo ka ku bonisa lilato la hae. (Luka 19:39, 40) Nihakulicwalo, Jehova ha si ka fa tohonolo ye mutakafululele ku mañi ni mañi. Ba ba swala kwa musebezi wa ku kutaza ba swanela ku kwanisa lipimo za mwa Mañolo ze tokwahala ni ku li kumalela. (Isa. 52:11) Kana lwa bonisa kuli lwa itebuha tohonolo ye ka ku beya bukombwa mwa sibaka sa pili ku ze lu ezanga kaufela sunda ni sunda?

⁵ Matohonolo a’ zwa ku Jehova a fumisa bupilo bwa luna. (Liprov. 10:22) Ni kamuta mu si ke mwa keshebisa matohonolo ao! Ka ku bonisa kuli luli lu nga ka butuna matohonolo a luna a sebelezo, lu tabisa Ndat’a luna wa kwa lihalimu, yena Mufani wa “mpo ye nde kaufela, ni mpo ye petehile kaufela.”—Jak. 1:17.