“Mwa Kona ku ba Paina yo Munde!”

1. Kaizeli yo muñwi na ikutwile cwañi ka za bukombwa bwa hae sina paina?

¹ Bo Kathe B. Palm ne ba bulezi kuli: “Ne ni si ke na fumana musebezi o muñwi hape o ne u ka ni fa tabo ye tuna kamba o ne u ka ni fumanisa mupuzo wa kwa moya.” Bo Kathe B. Palm ne ba tandile lilimo ze ñata inge ba sebeza sina paina ya si na buitati ka ku kutaza mwa naha kaufela ya Chile, ye mwa South America. Ka ku nahana bupilo bwa tabo bo ba pila batu ba ba mwa sebelezo ya nako kaufela, mwendi mutu yo muñwi a kile a mi taluseza kuli: “Mwa kona ku ba paina yo munde!”

2. Mu taluse libaka tabo ye tuna ha i fumanwa ka ku eza misebezi ya Mulimu.

² Bupilo Bwa Tabo: Jesu yena ye lu likanyisa, na fumani tabo mwa ku eza musebezi wa Ndatahe. (Joa. 4:34) Kacwalo, Jesu na bulezi niti luli ha na lutile balateleli ba hae kuli ku abana mwa misebezi ye ama bulapeli bwa Jehova ku tahisa tabo ya niti. Lwa banga ni tabo ha lu eza misebezi ye miñata mwa bupilo bwa luna ye tabisa Jehova. Hape, ha lu nze lu fana nako ya luna ye ñata, maata a luna, ni ze lu luwile kwa ku tusa ba bañwi, tabo ya luna ya ekezeha.—Lik. 20:31, 35.

3. Ki tabo mañi ye lu kona ku fumana ha lu tanda nako ye ñata mwa bukombwa?

³ Haiba lu tanda nako ye ñata mwa bukombwa, lu ka ba ni kolo ye tuna ya ku ikola hahulu tabo ye tiswa ki ku kalisa ni ku zamaisa lituto za Bibele. Mane, nihaiba mwa libaka mo bañi ba mandu ba bañata ba bonahala ku pateha kamba ku hakanyeha, mwendi lu ka fumana kuli kalulo ya luna ya simu i na ni siselo ku fita mo ne lu nahanela sapili ha lu nze lu twaelela ni ku ekeza kwa bukwala bwa luna. Mapaina ba kona ku sebelisa lituto ze nde ze ba itutanga kwa Sikolo sa Sebelezo ya Bupaina se ba kona ku kena ha se ba sebelize sina paina ka silimo. (2 Tim. 2:15) Ha lu nze lu zwelapili ku sebeza ka taata, lwa kona ku cala peu ya niti ye ka beya miselo hasamulaho wa nako.—Muek. 11:6.

4. Ba banca ba ba tuha ba feza sikolo ba swanela ku nyakisisañi?

⁴ Ba Banca: Ha mu nze mu feza sikolo sa mina, kana mu nahanile ka za bupilo bwa mina ha se mu felize? Ku fitela ha mu ka feza sikolo, nako ye ñata i felela kwa misebezi ya mina ya kwa sikolo. Mu ka itusisa cwañi nako ye ne mu tandanga ku eza misebezi ya kwa sikolo? Ku fita ku ndongwama musebezi wa silifasi, kiñi ha mu sa itomeli sikonkwani sa ku eza bupaina bwa kamita? Lika ze mu ka ituta—ze cwale ka ku kutaza kwa batu ba lisimuluho ze shutana-shutana, ku tula matata a ka butu a mwa bupilo, ku ba ni buikalimelo, ni ku ekeza kwa buikoneli bwa ku luta—li ka mi tusa mwa bupilo bwa mina kaufela.

5. Bashemi ni batu ba mwa puteho ba kona ku susueza cwañi ba bañwi ku eza bupaina?

⁵ Bashemi, kana mu sweli ku tusa bana ba mina ku kena mwa sebelezo ya nako kaufela? Ze mu bulela ni mutala wa mina o munde za kona ku ba tusa hahulu ku beya za Mubuso mwa sibaka sa pili. (Mat. 6:33) Ray ya na kalisize ku eza bupaina ha na felize sikolo, u bulela kuli: “Bo ma kamita ne ba ikutwanga kuli ku eza bupaina ki yona nzila ye fumanisa bupilo bwa tabo.” Batu kaufela mwa puteho ba kona ku susueza ba bañwi ku eza sebelezo ya bupaina ka ze ba bulela ni ka ku ba fa tuso. Jose wa kwa Spain u bulela kuli: “Batu ba mwa puteho ya luna ne ba nga musebezi wa bupaina ku ba ona musebezi wo munde hahulu o ba kona ku sebeza banana. Ze ne ba bulela ni buitebuho bwa bona ka za sebelezo ya bupaina hamohocwalo ni lituso ze ne ba ni fa ne li ni tusize ku kalisa bupaina.”

6. Ki likamañi ze lu kona ku eza haiba ka nako ya cwale ha lu na takazo ya ku eza bupaina?

⁶ Ku Tula Lika ze Kona ku mi Palelwisa: Kono ku cwañi ha mu bulela kuli, ‘Ha ni na takazo ya ku eza bupaina.’ Haiba kona mo mu ikutwela kwa makalelo, mu lapele ku Jehova ni ku mu taluseza ka za mo mu ikutwela kuli, ‘Ha ni zibi kuli na kona ku eza bupaina, kono ni bata ku eza lika ze ku tabisa.’ (Samu 62:8; Liprov. 23:26) Cwale mu bate ketelelo ya hae ku zwelela mwa Linzwi la hae ni kwa kopano ya hae. Mapaina ba kamita ba bañata ne ba ‘lazwize’ pili bupaina ka ku eza bupaina bwa ku tusa, mi tabo ye ne ba ikozi ne i ba susuelize ku kena mwa sebelezo ya nako kaufela.—Samu 34:8.

7. Lu kona ku tula cwañi maikuto a kuli mwendi ha lu na ku kona ku kwanisanga lihola ze 70 za ka kweli ni kweli?

⁷ Ku cwañi haiba mu ikutwa kuli mwendi ha mu na ku kona ku kwanisanga lihola ze 70 za ka kweli ni kweli? Kiñi ha mu sa amboli ni mapaina ba ba na ni miinelo ye swana ni ya mina? (Liprov. 15:22) Cwale mu ñole litomahanyo li sikai ze mu ka kona ku latelela. Mwendi mu ka lemuha kuli ku yolisa linako ka ku eza bukombwa ku fita ku eza lika ze si za butokwa ku bunolo hahulu ku fita mo ne mu nahanela sapili.—Maef. 5:15, 16.

8. Ki kabakalañi ha lu swanela ku tatubanga miinelo ya luna nako ni nako?

⁸ Mu Tatube Miinelo ya Mina: Miinelo ya mutu hañata ya cincanga. Ki kwa butokwa ku tatubanga miinelo ya luna nako ni nako. Ka mutala, kana se mu li fakaufi ni ku tuhela mubeleko? Bo Randy ba ne ba tuhezi mubeleko nako ya bona ya ku tuhela i si ka fita kale, ba bulela kuli: “Ku eza cwalo ku ni konisize ku kalisa bupaina bwa kamita hamoho ni musalaa ka, mi ku lu file kolo ya ku tuta ni ku yo sebeleza ko ku na ni hahulu butokwi. Ni fumani limbuyoti ze ñata kabakala katulo ya ka, kono mbuyoti ye tuna hahulu ki ya kuli ni na ni lizwalo le linde.”

9. Batu ba ba nyalani ba swanela ku nyakisisa likamañi?

⁹ Batu ba bañwi ba ba nyalani ha se ba tatubile hande miinelo ya bona, ba boni kuli sibeli sa bona ha ba tokwi ku beleka musebezi wa nako kaufela. Ki niti kuli ku eza cwalo ku ka tokwa kuli lubasi lu nolofaze mupilelo wa lona, kono buitomboli bo bu cwalo bwa swanela luli. Bo John ba ba na ni basali ba ne ba tuhezi mubeleko wa bona wa nako kaufela kuli ba yandulule bukombwa bwa bona, ba bulela kuli: “Ha ku na maikuto a mande a fita ku ziba kuli musalaa ka u abananga mwa musebezi wa Mulimu mwahalaa lizazi.”

10. Ki likamañi ze susuezanga Bakreste ku nahana za ku eza bupaina?

¹⁰ Sisupo sa Lilato ni Tumelo: Jehova u ezize musebezi wa ku kutaza ku ba musebezi wa butokwa hahulu wa kona ku eza mañi ni mañi wa luna. Lifasi la kale le, li tuha li sinyiwa, mi ki bao feela ba ba biza fa libizo la Jehova ba ba ka piliswa. (Maro. 10:13) Pilu ye tezi lilato la ku lata Mulimu ni buitebuho bwa lika za lu ezelize i ka lu susueza ku utwa taelo ye zwa ku Mwanaa hae ya ku kutaza ka cisehelo. (Mat. 28:19, 20; 1 Joa. 5:3) Hape, ku lumela kuli lu pila mwa mazazi a maungulelo ku ka lu susueza ku beleka ka taata mwa bukombwa ha ku sa na ni nako, ku fita ku itusisa hahulu za lifasi.—1 Makor. 7:29-31.

11. Haiba mutu yo muñwi a lu bulelela kuli lwa kona ku ba paina yo munde lu swanela ku nga cwañi taba yeo?

¹¹ Ku eza bupaina bwa kamita ku ama ze ñata ku fita ku tanda feela lihola ze ñata inze lu kutaza; ki sisupo sa lilato-tuna la luna ku Mulimu. Kacwalo haiba mutu a mi bulelela kuli mwa kona ku ba paina yo munde, mu nge kuli mutu yo wa mi babaza. Mi mu nahane ni ku lapela ka za ku abana mwa musebezi wo munde wo, wo ba sweli ku eza ba bañwi.

[Manzwi a fa likepe 4]

Bashemi, kana mu sweli ku tusa bana ba mina ku kena mwa sebelezo ya nako kaufela?

[Manzwi a fa likepe 5]

Jehova u ezize musebezi wa ku kutaza ku ba musebezi wa butokwa hahulu wa kona ku eza mañi ni mañi wa luna.