Sikolo sa Bukombwa sa Teokratiki sa 2015 si ka lu Tusa ku Ekeza Kwa Buikoneli Bwa Luna Bwa ku Luta

¹ Walisamu Davida naa ñozi kuli: “Manzwi a mwa mulomo wa ka, ni minahano ya mwa pilu ya ka, ibe zo ka amuhela Muñaa Bupilo, Wena Licwe la ka, ni Muliululi wa ka.” (Samu 19:14) Ni luna lu bata kuli manzwi a luna a amuhelwe ki Jehova, bakeñisa kuli lwa itebuha tohonolo ye tuna ye lu na ni ya ku bulela niti mwa puteho ni mwa bukombwa. Sikolo sa Bukombwa sa Teokratiki ki ye ñwi ya linzila zeo Jehova a lu luta ka yona ku ba baluti ba bande mwa bukombwa. Sikolo se, si eziwanga sunda ni sunda mwa liputeho za mwa lifasi kaufela ze fitelela 111,000. Si tusize mizwale ni likaizeli mwa lifasi kaufela ba lisimuluho ze shutana-shutana ku kwanisa hande ku peta musebezi wa ku kutaza taba ye nde, ku luta ka ku susumeza, ka maseme, ni ka bundume.—Lik. 19:8; Makolo. 4:6.

² Tomahanyo ya 2015 ya sikolo sa bukombwa i ka nyakisisa litaba ze mwa buka ya Bibele I Lutañi Luli? ni ze mwa Tawala ya Mulibeleli. Ku tuha fo, ku na ni licinceho ze ezizwe kwa Ngambolo No. 1 ni kwa nako ya Ngambolo ya ze zwile mubano. Licinceho zeo hamohocwalo ni litaelo za mwa ku fela lingambolo za mwa sikolo li nyakisisizwe mwa maparagilafu a latelela.

³ Ze Zwile Mubano Mwa ku Bala Bibele: Ka mizuzu ye mibeli, mizwale ba ba ka fanga ngambolo ye, ba ka nyakisisanga sisupo si li siñwi ku zwa fa kalulo ya Bibele ye baliwa sunda yeo ni ku bonisa mo sisupo seo si tuseza puteho. Ku itukiseza hande ku ka konisa mubuleli ku nyakisisa sisupo sa butokwa se si tusa puteho, mwa nako ye tomilwe. Hamulaho wa fo, baputehi ba ka ba ni mizuzu ye 6 sina kamita ya ku fa lisupo za bona ze nde ze ba fumani mwa ku bala Bibele sunda yeo, mwa lisekondi ze 30 kamba ze sa fiti fo. Ku tokwa ku itukiseza hande ni ku ba ni buiswalo kuli mutu a kone ku fa sisupo se si utwahala hande mwa lisekondi ze 30, kono ku eza cwalo kwa tusa luli. Hape ku fa kolo baputehi ba bañwi ku bulela lisupo ze ba itutile ka nako ye ne ba eza lipatisiso.

⁴ Ngambolo No. 1: Nako ya ngambolo No.1 i kutisizwe fa mizuzu ye milaalu kamba ye sa fiti fo mi ku ka baliwanga feela litimana li sikai. Ba ba ka fanga ngambolo No. 1, ba lukela ku itukisezanga hahulu ka ku bala ka ku tumusa ni ku isa hahulu mamelelo kwa mubizezo wa manzwi ni ku bala hande ka ku sa fosa-fosa ilikuli mihupulo ye mwa taba ye ba bala i utwahale hande. Bakeñisa kuli ku bala ki kalulo ya butokwa hahulu mwa bulapeli bwa luna, batu ba Jehova kaufela ba swanela ku ikataza ku ziba ku bala hande. Lu tabile hahulu ku lemuha kuli buñata bwa bana ba luna ba ziba hande ku bala! Bashemi ba babaziwa hahulu bakeñisa buikatazo bo ba eza bwa ku tusa bana ba bona ku ba babali ba bande.

⁵ Ngambolo No. 2: Ye ki ngambolo ya mizuzu ye 5, ye ka fiwanga ki likaizeli. Muituti u swanela ku itusisa toho ya taba ye filwe. Haiba toho ya taba i tomile fa litaba ze mwa buka ya Bibele I Lutañi Luli?, muituti u lukela ku itusisa mukutalezo o swanela mwa kalulo ya simu ya puteho. Haiba toho ya taba i ama mutu yo muñwi ya bulezwi mwa Bibele ili ya nyakisisizwe mwa Tawala ya Mulibeleli, muituti u lukela ku nyakisisisa litaba ze ama mutu yo, ku keta mañolo a swanela a ku itusisa, ni ku bonisa lituto ze itutiwa kwa mutala wa mutu yo. Mañolo a mañwi a swalisana ni toho ya taba, a kona ku kopanyelezwa teñi. Muokameli wa sikolo u ka keta mutusi a li muñwi.

⁶ Ngambolo No. 3: Ye ki ngambolo ya mizuzu ye 5, ye ka fiwanga ki mizwale kamba likaizeli. Ha i fiwa ku kaizeli, i swanela ku fiwa sina mo i felwa ngambolo No. 2. Litaba ze zwa mwa Tawala ya Mulibeleli li swanela ku fiwa sina ngambolo, mi muituti u lukela ku nahana baputehi ba ba ka ba teñi. Muituti u lukela ku nyakisisisa toho ya taba ya filwe, ku keta mañolo a swanela a ku itusisa, ni ku bonisa lituto ze itutiwa kwa mutala wa mutu ya bulezwi mwa Bibele ya nyakisiswa.

⁷ Kalulo ye Nca ye Ekelizwe Kwa Ngambolo No. 3 ha I Fiwa ki Mizwale: Toho ya taba ya ngambolo ye ha i zwa mwa buka ya Bibele I Lutañi Luli?, i swanela ku fiwa sina poniso ka nako ya tuto ya lubasi kamba ka nako ya mukopano wa ku zwela mwa simu. Hañata, muokameli wa sikolo u ka ketanga mutusi ni muezezo. Mutusi u swanela ku ba wa mwa lubasi lwa muituti kamba muzwale yo muñwi mwa puteho. Mañolo a mañwi a swalisana ni toho ya taba, a kona ku kopanyelezwa teñi. Ka linako ze ñwi, ngambolo ye i ka fiwanga ki muuna-muhulu. Muuna-muhulu wa kona ku iketela mutusi wa hae ni muezezo. Ku si na ku kakanya, ki nto ye ka tabisanga hahulu baputehi ku bona muuna-muhulu a bonisa bukwala bwa ku luta mwa ngambolo ye ya poniso ya eza ni mutu wa mwa lubasi lwa hae kamba muzwale yo muñwi.

⁸ Kelezo: Muokameli wa sikolo u ka itusisa mizuzu ye mibeli hamulaho wa ngambolo ya muituti ni muituti kwa ku babaza ni ku fa kelezo ye tusa ye tomile fa litaba ze mwa buka ya Mu Fumane Tuso kwa Lituto za Sikolo sa Bukombwa sa Teokratiki. Muokameli wa sikolo a biza muituti ku to fa ngambolo, ha swaneli ku bulela sisupo sa belekela ku sona muituti. Hamulaho wa ngambolo ni ngambolo, muokameli u swanela ku babaza muituti ha buniti, ku bulela sisupo sa naa belekela ku sona muituti, ni ku bulela libaka muituti ha ezize hande fa sisupo seo kamba ku talusa ka likute libaka ha ku kona ku tusa ku muituti ku isa hahulu mamelelo kwa sisupo seo.

⁹ Kelezo ya muituti i fumaneha fa makepe 79 ku isa 81 mwa buka ya Sikolo sa Bukombwa. Muituti ha sa file ngambolo ya hae, muokameli wa sikolo u ka ñola lisupo ze swanela mwa buka ya muituti ni ku buza muituti kwa mukunda haiba naa ezize tatubo ye lumelelana ni sisupo sa naa belekela ku sona. Muokameli wa sikolo wa kona ku babaza muituti ni ku mu fa liakalezo ze ñwi ze tusa hamulaho wa mikopano kamba ka nako ye ñwi. Mamelelo ya fiwa muituti ni muituti i swanela ku ngiwa ku ba kolo ya ku mu tusa ku eza zwelopili kwa moya.—1 Tim. 4:15.

¹⁰ Haiba muituti a ca nako, muokameli wa sikolo kamba mutusi wa muokameli wa sikolo u swanela ku fa sisupo sa ku lemusa muituti ka maseme, mwendi cwalo ka ku itusisa kalangu kamba ka ku nata fa libala ilikuli a zibise muituti kuli nako ya hae i felile. Muituti u swanela ku lemuha sisupo seo ni ku feleleza manzwi a sweli ku bulela ni ku zwa fa libulelelo.—Mu bone buka ya Sikolo sa Bukombwa, like. 282, para. 4.

¹¹ Kaufela ba ba kwanisize ze tokwahala ba susuezwa ku i ñolisa mwa Sikolo sa Bukombwa sa Teokratiki. (Mu bone buka ya Sikolo sa Bukombwa, like. 282, para. 6.) Sikolo se, si tusize batu ba Jehova ku kutaza ni ku luta taba ye nde ya Mubuso ka buikolwiso, ka likute, ni ka lilato. Ku si na ku kakanya, Jehova u tabiswa hahulu ki milumbeko ya fiwa ki bote ba ba fumana lituso ze ñata kwa lituto za Sikolo sa Bukombwa sa Teokratiki!—Samu 148:12, 13; Isa. 50:4.