1 | Tapelo ‘Munepele Lipilaelo Zamina Kaufela ku Yena’

ZEIBULELA BIBELE: ‘Munepele lipilaelo zamina kaufela ku Mulimu, kakuli wamiisa pilu.’—1 PITROSI 5:7.

Zeitalusa Taba Yeo

Jehova Mulimu ulumema kuli lumutaluseze lika kaufela zelubilaeza. (Samu 55:22) Luswanela kumutaluseza butata bolukopana ni bona kusina taba kuli ki bobunyinyani kamba ki bobutuna. Haiba kuli taba yeo ki ya butokwa ku luna, uzibe ki ya butokwa ni ku Jehova. Kulapela ku yena ki kwa butokwa kakuli kukona kulutusa kuba ni kozo ya mwa munahano.—Mafilipi 4:6, 7.

Moikona Kumituseza Taba Yeo

Halukatazwa ki butuku bwa mwa munahano, lukona kuikutwa hahulu buinosi. Batu babañwi hañata habautwisisangi luli zelukopana ni zona. (Liproverbia 14:10) Kono haiba lulapela ku Mulimu ni kumutaluseza moluikutwela, ukateeleza ku luna mi uka luutwisisa. Jehova walubona, waziba butata bolukopana ni bona, mi ubata kuli lulapele ku yena ni kumutaluseza nto ifi kamba ifi yelubilaeza.—2 Makolonika 6:29, 30.

Kuambolanga ni Jehova mwa tapelo kukatiisa buikolwiso bwaluna bwa kuli waluisa pilu. Lukaikutwa sina muñoli wa samu yanaalapezi kuli: “Uboni manyando aka; waziba ziyezi-tuna yenili ku yona.” (Samu 31:7) Kuziba kuli Jehova waziba zelukopana ni zona kuka lutusa kuzwelapili kuitiisa mwa miinelo yetaata. Kono halemuhangi feela butata bolukopana ni bona ni kulibala kwateñi. Jehova wautwisisa lika kaufela zelukopana ni zona mi ulutusanga kufumana litaba zeomba-omba ni zesusueza ka kuitusisa Bibele.

Mo Bibele Ituseza Batu Babañwi Bo Julian

Monikatalezwa ki Lipilaelo

“Nikatazwa ki lipilaelo ni butuku bobutahisanga kuli nikutele kunahana kamba kueza lika zenisa tabeli (OCD). Nikatazwanga ki lipilaelo nihaiba ka nako yenisika libelela. Nako yeñwi niikutwanga kuli niiketile, kono hamulaho wa nako nikalanga kubilaela hahulu kusina libaka. Niikalelwanga hahulu sihulu hanili ni batu babañwi. Ninahananga hahulu moba niingela.

“Balikani baka babaziba lika zenibilaeza baezanga mobakonela kaufela kunitusa. Kubulela feela niti, ka linako zeñwi babulelanga lika zesi za butokwa ku na. Kono niitumela kuli balikanga ka taata kuli banituse.

“Fokuñwi muinelo wo utahisanga kuli kunibele taata kulapela. Niezanga monikonela kaufela kuli nisike nayembululwa ki lika zeñwi hanilapela ku Jehova. Ninahananga lika zeñata ka nako iliñwi, mi nto yeo itahisanga kuli niikutwe kulyangana. Hanipalelwanga kufelisa maikuto acwalo, kunibelanga taata kutaluseza Jehova moniikutwela.”

Moi Nituseza Bibele

“Kuituta Bibele kunitusize kuziba kuli litapelo haliswaneli kuba zetelele kamba zekuswani kuli Mulimu aliamuhele. Ka linako zeñwi haku nibelanga taata kutalusa moniikutwela mwa tapelo, nibulelanga feela kuli: ‘Jehova, haku nituse.’ Nihakulicwalo, naaziba kuli Jehova waniutwisisa mi unifanga zenitokwa ka nako yeo. Kwandaa tapelo, hape neniile kwa sipatela. Naitumela luli kuli nikonile kutusiwa ka linzila zeo, mi hanisa katazwa hahulu ki muinelo wo. Nihaike kuli nitokwanga kueza buikatazo kuli nikupe Ndate ya kwa lihalimu kuli anituse, niezanga cwalo kakuli ninani buikolwiso bwa kuli wanilata mi ubata kunitusa.”