TABA YA KUITUTA 42
PINA 44 Tapelo ya Mutu Yaishuwa
Zekona Kumitusa Kubolosola Litapelo Zamina
“ Nihuweleza ka pilu yaka kaufela. Haku nialabe, wena Jehova.”—SAMU 119:145.
ZEKAITUTIWA
Kunahanisisa litapelo zeñozwi mwa Bibele kwakona kulutusa kubolosola litapelo zaluna.
1-2. (a) Ki lika mañi zekona kulupaleliswa kutaluseza Jehova ze mwa pilu yaluna? (b) Luziba cwañi kuli Jehova wateelezanga kwa litapelo zaluna ka tokomelo?
KANA ka linako zeñwi muikutwanga kuli mukutelanga kubulela litaba zeswana mwa litapelo zamina kamba kuli hamulapelangi kuzwelela kwatasaa pilu? Haiba ki cwalo, muzibe kuli haki mina munosi. Bakeñisa kupateha hahulu mwa bupilo, lwakona kulapelanga ka kumata-mata. Kamba mane kukona kumibela taata kutaluseza Jehova ze mwa pilu yamina kakuli muikutwa kuli hamuswaneli kumuatumela.
2 Bibele ibonisa kuli nto ya butokwa hahulu ku Jehova haki molutaluseza maikuto aluna, kono ki kulapela ku yena kuzwelela kwatasaa pilu. Wautwanga “kupo ya babaishuwa.” (Samu 10:17) Wateelezanga ka tokomelo kwa linzwi ni linzwi lelubulela kakuli uiyakatwa hahulu luna.—Samu 139:1-3.
3. Ki lipuzo mañi zeluka nyakisisa mwa taba ye?
3 Lwakona kuipuza kuli: Ki kabakalañi halukona kulapela ku Jehova ka buikolwiso? Lukona kubolosola cwañi litapelo zaluna? Kunahanisisa litapelo za batanga ba Jehova zeñozwi mwa Bibele kukona kulutusa cwañi kubolosola litapelo zaluna? Mi ki lika mañi zelukona kueza haiba lulembwalile hahulu kuli mane haluzibi feela zelukona kutaluseza Jehova mwa tapelo? Halunyakisiseñi likalabo za lipuzo zeo.
MUSIKE MWALUMELEZA NTO IFI KAMBA IFI KUMIPALELISWA KULAPELA KU JEHOVA
4. Ki lika mañi zekona kulutusa kulapela ku Jehova ka buikolwiso? (Samu 119:145)
4 Haiba luutwisisa kuli Jehova ki mulikani yasepahala, ili yabata kuli lukondise, lukalukuluha kumutaluseza maikuto aluna ka tapelo. Muñoli wa Samu 119 naanga Jehova kuba mulikani yacwalo hanaalapelanga ku yena. Ni yena naakopananga ni miinelo yetaata. Batu babañwi nebabulezi litaba zemaswe ka za hae. (Samu 119:23, 69, 78) Hape ka linako zeñwi naazwafiswanga ki kusapetahala kwahae. (Samu 119:5) Nihakulicwalo, naasika saba kutaluseza Jehova zeneli mwa pilu yahae.—Mubale Samu 119:145.
5. Ki kabakalañi halusa swaneli kulumeleza nto ifi kamba ifi kulupaleliswa kulapela? Mufe mutala.
5 Jehova mane ukupa nihaiba batu babaezize mafosisa amatuna kuli balapele ku yena. (Isa. 55:6, 7) Kacwalo, haluswaneli kutuhelela nto ifi kamba ifi kulupaleliswa kulapela. Ka mutala, mufufisi wa fulai waziba kuli utokwa kuikambota ni babatalima za mufufelo wa lifulai habata tuso. Kana waswanela kuzina-zina kukupa tuso bakeñisa kuli uikutwa maswabi kabakala kuli ulatehile kamba kuli uezize mafosisa? Batili! Ka nzila yeswana, nihaikaba kuli ka linako zeñwi luikutwa kuli haluzibi zeluswanela kueza kamba kuli luezize sibi, lwakona kulapela ku Jehova ka buikolwiso.—Samu 119:25, 176.
MOLUKONA KUBOLOSOLELA LITAPELO ZALUNA
6-7. Kunahanisisa ka za tulemeno twa Jehova kukona kulutusa cwañi kubolosola litapelo zaluna? Mufe mutala. (Mubone ni litaluso ze kwatasi.)
6 Halulukuluha kutaluseza Jehova maikuto aluna kaufela, litapelo zaluna likaba zende hahulu. Kacwalo, ki lika mañi zelukona kueza kuli lubolosole litapelo zaluna?
7 Munahanisise tulemeno twa Jehova.a Halunahanisisa hahulu tulemeno twa Mulimu, lukalukuluha hahulu kumutaluseza maikuto aluna. (Samu 145:8, 9, 18) Halunyakisiseñi mutala wa kaizeli yabizwa Kristine, ili yo bo ndatahe neli ba mifilifili. Utalusa kuli: “Nekuli taata kuunga Jehova sina Ndate. Neniikutwa kuli naaka niyubeka kabakala kuli hanisika petahala.” Ki kalemeno mañi ka Jehova kane kamutusize? Utalusa kuli: “Lilato la Jehova lelisa feli linitusanga kuikutwa kusilelezwa. Naziba kuli haana kuniyubeka. Niha nikaeza mafosisa, ukazwelapili kunilata ni kunitusa. Kuziba taba yeo kutahisanga kuli kunibele bunolo kumutaluseza lika zenitahisezanga hahulu tabo ni zenibilaezanga hahulu.”
8-9. Ki bufi bunde bwa kunahana zemubata kubulela pili musika lapela kale? Mufe mutala.
8 Munahane zemuka bulela. Musika lapela kale, mwakona kuipuza lipuzo lisikai. Ka mutala: ‘Ki miinelo mañi yetaata yenikopana ni yona ka nako ya cwale? Kana kunani mutu yenitokwa kuswalela? Kana kunani butata bobuñwi bonikopana ni bona, ili bonitokwa kutusiwa ki Jehova kuli nibutiyele?’ (2 Mal. 19:15-19) Hape lwakona kulikanyisa mutala wanaatomile Jesu ka kunahana ka za lika zelukona kukupa Jehova kuamana ni libizo lahae, Mubuso wahae ni tato yahae.—Mat. 6:9, 10.
9 Kaizeli yabizwa Aliska hanaazibile kuli bo muunaa hae nebanani kansa ya kwa booko, neku mubelanga taata kulapela. Utalusa kuli: “Nenilembwalile hahulu kuli mane neku nibelanga taata kuziba za kubulela mwa tapelo.” Ki lika mañi zemutusize? Utalusa kuli: “Nisika kalisa kale kulapela, nakutumananga hanyinyani kuli nionga-onge mihupulo yaka, mi kueza cwalo kunitusize kuli litapelo zaka lisike zaba za buitati. Kueza cwalo kutahisanga kuli niwe pilu ni kulapela hande ku Jehova ka za litaba zeshutana-shutana.”
10. Ki kabakalañi haluswanela kulapelanga ka kusamata-mata? (Mubone ni maswaniso.)
10 Musike mwalapela ka kumata-mata. Nihaike kuli litapelo zekuswani zakona kuba zende, halulapela ka kusamata-mata lwakona kutalusa hande maikuto aluna.b Bo Elijah, ili bo muunaa bo Aliska, batalusa kuli: “Nilikanga kulapela hañata ka zazi, mi silikani saka ni Jehova sitiile hahulu bakeñisa kuli hanilapelangi ku yena ka kumata-mata. Nakona kulapela ka kuiketa, kakuli Jehova haalibeleli kuli nifeze kapili kulapela.” Mulike muezezo wo: Mubate nako ni sibaka sesinde komukona kulapelela, nihaiba ka kutumusa, kusina nto yemifilikanya, mi muitwaeze kulapelanga ka kusamata-mata.
Mubate nako ni sibaka sesinde komukona kulapelela ka kusamata-mata (Mubone paragilafu 10)
MUNAHANISISE LITAPELO ZA BATANGA BA JEHOVA ZEÑOZWI MWA BIBELE
11. Kunahanisisa litapelo za batanga ba Jehova zeñozwi mwa Bibele kukona kulutusa cwañi? (Mubone ni mbokisi yeli, “Kana Muikutwa Sina Bona?”)
11 Kunahanisisa litapelo za batanga ba Jehova ba mwa linako za Bibele ni lipina zekenile, kamba lisamu, zeñozwi mwa Bibele kwakona kumitusa. Hamunze munyakisisa mo batanga ba Mulimu nebataluselize maikuto abona, mukasusuezwa kutaluseza Jehova ze mwa pilu yamina kaufela. Hape mwakona kulemuha lipulelo zeñwi zemukona kuitusisa mwa litapelo zamina kuli mulumbeke Jehova. Mi mwakona kufumana litapelo zezamaelela ni miinelo yamina.
12. Ki lipuzo mañi zelukona kuipuza halubala tapelo yeñozwi mwa Bibele?
12 Hamubala tapelo yeñozwi mwa Bibele, muipuze kuli: ‘Ki mañi yanaabulezi manzwi a mi naali mwa muinelo mañi? Kana nalumelelana ni maikuto a mwa tapelo ye? Ki lituto mañi zenikona kuituta kwa tapelo ye?’ Mwendi mukatokwa kueza lipatisiso zeñwi kuli mualabe lipuzo zeo, kono buikatazo bo habuna kuba bwa mbango. Halunyakisiseñi mitala isikai.
13. Ki tuto mañi yelukona kuituta ku Anna ka za tapelo? (1 Samuele 1:10, 11) (Mubone ni siswaniso.)
13 Mubale 1 Samuele 1:10, 11. Anna hanaalapezi tapelo ye, naakopana ni miinelo yemibeli yetaata hahulu. Naali mumba, mi muhalizo wahae naatatafaza bupilo bwahae. (1 Sam. 1:4-7) Haiba mukopana ni butata bobuñwi bobuzwelapili, ki lika mañi zemukona kuituta kwa tapelo ya Anna? Naaikutwile hande hamulaho wa kutanda nako yeñata inze alapela ku Mulimu kuzwelela kwatasaa pilu. (1 Sam. 1:12, 18) Ni luna lwakona kuikutwa hande haiba ‘lunepela mushimbo waluna ku Jehova’ ka kumutaluseza moluikutwela ka za butata bolukopana ni bona.—Samu 55:22.
Bakeñisa kuli Anna naali mumba mi naakatazwa hahulu ki muhalizo wahae, naataluselize Jehova zeneeli mwa pilu yahae kaufela (Mubone paragilafu 13)
14. (a) Ki lika mañi zeñwi zeluituta kwa mutala wa Anna? (b) Lukona kubolosola cwañi litapelo zaluna ka kunahanisisa ze mwa Mañolo? (Mubone litaluso ze kwatasi.)
14 Lilimo lisikai kuzwa fapepelwa Samuele, Anna amufa ku Eli Muprisita Yapahami. (1 Sam. 1:24-28) Anna hanaalapela kuzwelela kwatasaa pilu, naabonisize kuli naakozwi kuli Jehova wasilelezanga ni kubabalela batanga bahae babasepahala.c (1 Sam. 2:1, 8, 9) Kukona kuba kuli butata bwanaakopana ni bona Anna kwa ndu nebusika fela, kono naaisize pilu kwa limbuyoti zanaa mufile Jehova. Luitutañi? Lukakona kuitiisa halukopana ni miinelo yetaata haiba lunahanisisa mwalutuselize Jehova kuto fita cwale.
15. Lukona kuitutañi kwa kupo ya mupolofita Jeremia haluezwa ka kusaluka? (Jeremia 12:1)
15 Mubale Jeremia 12:1. Ka nako yeñwi, mupolofita Jeremia naaziyelizwe ki kubona babamaswe inze bakondisa. Hape fokuñwi naazwafanga kabakala mwanaaezezwa ki Maisilaele babañwi. (Jer. 20:7, 8) Ni luna lwakona kuikutwa sina yena halubona batu babasa sepahali inze bakondisa kamba halusheununwa. Nihaike kuli Jeremia naabonisize bunyemi bwahae, naasika kakanya kuli Mulimu unani katulo yelukile. Kubonahala kuli naafitile fa kusepa hahulu kuli Mulimu unani katulo yelukile hanaaboni Jehova inze akalimela batu bahae bane bamukwenuhezi. (Jer. 32:19) Ni luna lwakona kubonisa bunyemi bwaluna mwa tapelo, inze lusepile kuli Jehova ukafelisa kusaluka kaufela ka nako yahae yeswanela.
16. Lukona kuitutañi kwa tapelo ya Mulivi haiba miinelo yaluna yalupaleliswa kupeta zeñata? (Samu 42:1-4) (Mubone ni maswaniso.)
16 Mubale Samu 42:1-4. Pina ye neiñozwi ki Mulivi yanaasa koni kulapela kwa tempele ni Maisilaele babañwi. Samu yahae ibonisa mwanaaikutwela. Lwakona kuikutwa sina yena haiba halukoni kuzwa fa ndu kamba lu mwa tolongo kabakala tumelo yaluna. Lwakona kuba ni maikuto ashutana-shutana, kono lukaeza hande kutalusa maikuto ao mwa tapelo. Kueza cwalo kwakona kulutusa kutatuba maikuto aluna ni kuba ni mubonelo oswanela ka za muinelo oluli ku ona. Ka mutala, Mulivi yo naalemuhile kuli naanani kolo yeñwi ya kulumbeka Jehova. (Samu 42:5) Hape naanahanisisize mwanaa mubabalelela Jehova. (Samu 42:8) Kulapela ka taata ku Mulimu kwakona kulutusa kutatuba maikuto aluna, kuba ni mubonelo oswanela hape ni kuba ni maata a kuitiisa.
Mulivi yanaañozi Samu 42 naataluselize Mulimu zeneeli mwa pilu yahae kaufela. Haiba lutalusa maikuto aluna mwa tapelo, lukaba ni mubonelo oswanela ka za miinelo yelutalimana ni yona (Mubone paragilafu 16)
17. (a) Lukona kuitutañi kwa tapelo ya mupolofita Jonasi? (Jonasi 2:1, 2) (b) Lipulelo zeñwi za mwa Lisamu likona kulutusa cwañi halukopana ni miinelo yetaata? (Mubone litaluso ze kwatasi.)
17 Mubale Jonasi 2:1, 2. Mupolofita Jonasi naalapezi tapelo ye hanaali mwa mba ya tapi yetuna. Nihaike kuli Jonasi naasika utwa Jehova, naanani buikolwiso bwa kuli Mulimu naakautwa tapelo yahae. Mwa kupo yahae, Jonasi naaitusisize lipulelo zeñata za mwa Lisamu.d Kubonahala kuli naaziba hande Lisamu zeo. Kunahanisisa Lisamu zeo neku mutusize kukolwa kuli Jehova naaka mutusa. Ka nzila yeswana, haiba lupeta litimana zeñwi za mwa Bibele, lwakona kulihupula ni kuomba-ombiwa ki zona halulapela ku Jehova ka nako yelukopana ni miinelo yetaata.
MUZWELEPILI KUSUTELELA KU JEHOVA KA TAPELO
18-19. Haiba ka linako zeñwi kulubelanga taata kutalusa moluikutwela mwa tapelo, ki buikolwiso mañi bolufumana kwa Maroma 8:26, 27? Mufe mutala.
18 Mubale Maroma 8:26, 27. Ka linako zeñwi lwakona kulembwala hahulu kuli mane lwakona kupalelwa kutaluseza Jehova moluikutwela. Kono lwakona kufumana tuso. Ka linako zeo, moya wa Mulimu okenile ‘walukupelanga.’ Ka mukwa ufi? Ka kuitusisa moya okenile, Jehova naatahisize kuli litapelo zeñata liñolwe mwa Linzwi lahae. Halupalelwa kutalusa hande maikuto aluna, Jehova wakona kuunga lipulelo zeñwi mwa litapelo zeo sina likupo zelubata kufitisa, mi wakona kulialaba.
19 Taba yeo neitusize kaizeli wa kwa Russia yabizwa Yelena. Naatamilwe kabakala kulapela ni kubala Bibele. Kaizeli Yelena naalembwalile hahulu kuli mane nekuli taata kulapela. Utalusa kuli: “Nenihupuzi kuli hanilembwalile mi hanizibi za kubulela mwa tapelo, Jehova ukaitusisa litapelo zene balapezi batanga bahae ba kwamulaho . . . sina likupo zenibata kufitisa. . . . Taba ye nei niomba-ombile hahulu ka nako yene nikopana ni miinelo yetaata.”
20. Lukona kuitukiseza cwañi mwa munahano pili lusika lapela kale halulembwalile?
20 Halulembwalile, kukona kulubela taata kuisa pilu ku zelubulela halulapela. Kuli luitukiseze mwa munahano, lwakona kubala litaba za mwa Lisamu ka kutumusa. Hape lwakona kutalusa moluikutwela ka kuñola, sina mwanaaezelize Mulena Davida. (Samu 18, 34, 142; manzwi a fahalimu.) Kono niti kikuli, hakuna milao yetomilwe yeama zaswanela kueza mutu kuli aitukiseze pili asika lapela kale. (Samu 141:2) Mueze zemubona kuli zakona kumitusa hahulu.
21. Ki kabakalañi halukona kulapela ka pilu yaluna kaufela?
21 Kuziba kuli Jehova wautwisisa moluikutwela mane lusika mutaluseza kale nto ifi kamba ifi, kwalususueza. (Samu 139:4) Niteñi, watabanga hautwa lipulelo zaluna zebonisa kuli lumusepile. Kacwalo, musike mwazina-zina kulapela ku Ndataa mina wa kwa lihalimu. Muitute kwa litapelo zeñozwi mwa Linzwi lahae. Mulapele ka pilu yamina kaufela. Mumutaluseze zemitahisezanga tabo ni zemibilaezanga. Jehova kamita uka mitusa kakuli ki Mulikanaa mina wa niti!
PINA 45 Minahano ya Mwa Pilu Yaka
a Munyakisise taba yeli, “Totuñwi twa tulemeno twa Jehova totunde” ye mwa buka ya Mañolo Atusa Bakreste Mwa Bupilo mwatasaa taba yeli, “Jehova.”
b Litapelo zefiwa fapilaa nyangela ka kuyemela puteho liswanela kuba zekuswani.
c Mwa tapelo yahae, Anna naaitusisize lipulelo zeswana ni ze mwa litaba zanaañozi Mushe. Kubonahala kuli naabanga ni nako ya kunahanisisa Mañolo. (Deut. 4:35; 8:18; 32:4, 39; 1 Sam. 2:2, 6, 7) Hamulaho wa lilimo zeñata kuzwa fo, Maria, yena mahe Jesu, naaitusisize manzwi a kulumbeka Jehova aswana ni anaaitusisize Anna.—Luka 1:46-55.
d Ka mutala, mubapanye Jonasi 2:3-9 ni Samu 69:1; 16:10; 30:3; 142:2, 3; 143:4, 5; 18:6; ni 3:8, kulikana ni mwanaaitusiselize lipulelo zeo Jonasi.